البـارت 233 ••

أنـتِ حـبـي

ونزار بفرحه: قد وصلت امنا او مع؟

عماد التفت له باستغراب

نزار: انت قلت انك عتدي لنا ام يوم الجمعه

عماد: عاد الجمعه عتبدأ من غدوه الصبح

نزار: يعني عتجي بالصبح
نقوم وهي في البيت

عماد: لا

نزار: ليش؟

عماد: قوا ياابني لاتربشني خليني اسوق سوا

سند ابسر مطعم: باباه اشتري لنا بيتزا

عماد: ماقد تعشيتوا؟

سند: لا خاور بيتزا هيا ياباباه

عماد جنب السياره وخرج اشترى لهم بيتزا وروحوا تعشوا ورقدوا
.
.

اليوم الثاني بالصبح الساعه ست قام نزار فارح ومتحمس وسار لغرفه ابوه وهو نووم وبيقومه

نزار: باباه باباه

عماد وهو نص نووم: هاه

نزار طلع فوق السرير جنب ابوه: اي حين عتوصل امنا الجديده

عماد: ياجناه احنا وامكم عتخلوني ارقد لي شويه

نزار: سير ادي امي اول

عماد بضبح: هي عتجي بالعشي بالليل تمام

نزار زعل: ليش ماتجي ذلحين؟

عماد غطى راسه بالوساده: اخرج وغلق الباب وممنوع تكون تدخل الغرفه هكذا شاكون اغلق بالداير

نزار خرج وهو زاعل
.
.

عند لميس سارت كوافير استشورت شعرها وفعلت تسريحه رقيقه على جنب ومكياج خفيف

لميس لفتت لمها: كيف وقعت؟

مها: ما شاءالله عليش قمريه هيا فيسع البسي نروح

لميس: تسلمي عيونش الحاليه
و قامت تلبس
.
.

عند عماد قام وبيسر الساعه لتلفونه: اووه قد الساعه ١١ مدري قد اصطبحوا العيال او مع

وقام خرج للصاله ابسرهم بيبسروا التلفزيون

عماد طفاه: واصل وانتوا بتبسروه عيونكم عيوجعينكم

سند: مانفعل

عماد: قووم ذاكر او لون العب بالالعاب اللي ملان البيت
اصطبحتوا؟

سند: اكلنا روتي وجبن

عماد: شاسير الان اشتري لنا غداء

سند: خلينا نتغدى خارج احسن

عماد ابسر نزار وهو زاعل منه: تشتوا تسيروا تلعبوا ونتغدى ونروح

سند فرح: ايوه

عماد: وانت يانزار؟

نزار بحنق: لا شاريع لامي لوما تجي 

عماد جلس جنبه: امك عتجي بالليل قد حاكيتك الف مره ، لكن ياابني كون افهم قوم البس فيسع نخرج عشان نرجع بحين اشتي اخزن

نزار وهو حانق: تمام
.
.

بعد العصر عماد وابوه واكرم ساروا عند بيت احمد وتموا العقد وخزنوا

ولميس عزمت اهلها القريبين منهن بس وبعض صاحباتها الموجودات في اليمن
.
.

بالعشي الساعه تسع

علي قام: خاطركم قدو هو وقتنا

اكرم قام بعده: تمسوا على خير ياعم

احمد ودعهم ورجع وعماد مراعي بالمجلس

احمد: زد راعي شويه لوما احاكيها تتجهز

عماد: طيب 

وبعد ربع ساعه

احمد دخل لعند عماد: بنتي بأمانتك اوبه تغثيها او تجرحها وانا سامحتك وقلت ننسى الماضي وتبدأوا صفحه جديده وكل واحد يحترم الثاني ويقدره

عماد قام: ولا يهمك ياعم شاطرحها هنيه واشر لفوق راسه

احمد ابتسم: الله يرضى عليكم ويسعدكم دنيا واخره

عماد:  يارب

وسبق عماد للسيارة بعد مادخل الحارس الشنيط شويه وجت لميس وجلست جنبه

عماد: مساء الخير

لميس بصوتها الهادئ: مساء النور

عماد حرك السياره وساروا لبيتهم

وصلوا والبيت هدوء وكل شي مرتب ونظيف عماد استغرب

لميس دخلت البيت وبتبسر كل شي متغير الديكور وتصميم البيت

عماد: اتفضلي

لميس وهي خازيه: اين غرفتنا قد غيرت الشقه

عماد: اوه صح هذاك هي اللي على يسارش

لميس: طيب

دخلت الغرفه عماد ابسر الساعه قد عتوقع عشر حس بتأنيب ضمير ان عياله رقدوا بغير عشاء وسار يتفاقدهم للغرفه فتح الباب وسرج اللمبه

سند التفت لعند: باباه قد جيتوا

عماد: ايوه تعشيتوا او ماشي

سند: ايوه فعلت لنا عمه علياء ورتبت البيت

عماد تجمل منها وقرب لسرير نزار يبسره وهو راقد

عماد: وانت ارقد قد هو وقتك ياباباه غدوه معك مدرسه

سند: حاضر

عماد طفى النور وخرج


دقدق باب الغرفه

لميس: ادخل

عماد دخل وابسرها وتصنم بقعته

لميس لفتت له وهي بتسبر شعرها قبال التسريحه  واستغربت عماد حس على نفسه ودخل وغلق الباب

لميس جلست فوق الكنبه وساكته عماد جلس جنبها واخذ نفس

عماد: تعشيتي؟

لميس: ايوه وانت؟

عماد: الحمد لله


بعد سكوت دقيقتين

عماد: لميس

لميس التفتت لعنده: هاه

عماد مسك يده وحبها: فقدت لش قووي

لميس ساكته

عماد بعتاب: ماتخيلت ان انتي في يوم عتفلتيني وتسيري بعد حياتش او تخليني بنص الطريق وحدي يا لميس انا حبيتش اكثر من كل شي وانتي الوحيده اللي كسرتيني
ورغم كل شي الا ان حبش في قلبي ولانسيتش يوم

لميس نزلين دموعها ومسكت يده بقوه: قوا ياعماد لاتذكرنيش انا عانيت اكثر منك وانت داري اني كنت في حالة اكتئاب

عماد رفع راسه وابسر دموعها: ليش بتبكي؟

لميس: سامحني انا جرحتك جرح كبير وانجرحت معاك

عماد طرح راسها بحضنه ولف يده حولها: خلاص ماضي وسار واحنا عنفتح صفحه جديده

لميس: تمام

البـارت 234

أنـتِ حـبـي

الساعه ٢ بالليل نزار نكز على صوت رعود وامطار وافتجع حمل لغرفه ابوه وحاول يفتح الباب وهو مغلق رجع يبكي وبيداعي ابوه

نزار وهو بيبكي: باباه افتحوا لي

عماد نكز وسمع صوته فز من فوق السرير وفتح له الباب وخرج وغلق الباب بعده

عماد: مالك؟

نزار حضن ابوه: مفجوع خلوني ارقد عندكم قوا

عماد حضنه وشله لغرفته هو وسند: انا شاجي ارقد عندك

نزار: كيف السرير صغير

عماد: انت ارقد فوق سريرك وانا شارقد هنيه جنبك فوق الكنبه

نزار هز راسه بمعنى تمام

عماد امتد فوق الكنبه وبيحاول يرقد شويه وجاء نزار يرقد جنبه عماد حضنه عشان يحس بالامان وناموا
.
.

بالصباح بدري لميس قامت تفعل الصبوح دخلت المطبخ وبتبسر ايش الموجود

نزار كان صاحي سمع اصوات بالمطبخ وقام جلس واقف باب المطبخ بيبسرها

لميس خرجت البيض من الثلاجه والتفتت وابسرت نزار ابتسمت له وهو خزي

لميس قربت لعنده: انت نزار صح

نزار هز راسه بمعنى ايوه

لميس: قد انته جاوع؟

نزار بخزا: ايوه

لميس: طيب ايش يعجبك تصطبح؟

نزار: بيض عيون تعرفي تفعليهن؟

لميس: اكيد

وجلسوا يتجابروا ولميس بتفعل الصبوح


عماد قام للحمام ورجع يصلي الفجر لانه فاتته وسند قام وبيجهز شنطته والزي حقه

لميس تمت تفعل صبوح وقدمت لفوق الطاوله اللي بالمطبخ

نزار وقد اندمج معاها: تعالي اوريش غرفتي انا وسند

لميس: هيا

نزار مسك بيدها وبيمشي معاها للغرفه فتح الباب: ابسري هذا سند اخي

سند ابسرها وانصدم

لميس ابتسمت له: كيف حالك؟

سند: الحمدلله
وبعد تردد: انتي خاله ميار صح !

لميس: ايوه وهي تسلم عليك

سند انحرج وسكت

عماد دخل لعندهم للغرفه: هيا عيبرد الصبوح

نزار: ماماه لميس فعلت لي بيض عيون

عماد ابسر لعندها وابتسم: تسلم الايادي

لميس: الله يسلمكم

وساروا المطبخ اكلوا وضحكوا وهم مبسوطين

بعد الصبوح عماد تجهز وبيمشط شعره وهو بيبسر للمرايه

لميس دخلت الغرفه: قد انت جاهز

عماد: ايوه ، لو سمحتي ابسري العيال قد جهزوا عنتأخر

لميس: قدهم جاهزين

عماد باسها بخدها وهو ماشي: مع السلامه ياروحي

لميس ابتسمت: الله معك

عماد خرج للصاله: هيا ياعيال

نزار وهو لابس البجامه: ماشاجيش الحضانه

عماد: ليش؟ او اليوم عيد

سند ضحك

نزار سار مسك بيد لميس: شاجلس عند امي


عماد: انته اخبر مع السلامة

لميس: الله معاكم

سند اشر له بيده باي

لميس سارت حضنته وباسته وودعتهم ومشيوا
.
.

اميرة بالبيت بتفكر معقوله عماد قد تزوج بس من تزوج وجالس قلبها يفحر قررت تتصل لرقم البيت تبسر من عيجاوبها رن اول رنتين محد جاوب بعدين سمعت صوت مألوف

لميس: الو الوو الوو من معي؟

اميره صحيت من سرحانها: لميس !!

لميس: ايوه من معي؟

اميره ضبحت: اين سند ونزار؟

لميس عرفتها وبضيق: مابحد ساروا المدرسة وقفلت قبل ماترد عليها

اميره تبرقطت ليش يرجعها وليش تقفل وجهها

نزار: ماماه

لميس سارت لعنده: عيونها

نزار: ماعرفش البس عتلبسوني

لميس ابتسمت: اكيد ياروحي
وبتخرج له ملابس من الدولاب: ماتشتي تلبس؟

نزار: اختاروا لي انتوا
وحضنها

لميس ابتسمت: تمام
.
.

عند اميره سارت لعند امها بالمطبخ وهي بتفور: رجعها التافهه

امها استغربت: من رجع؟ ومن هو ؟

اميره بضبح: عمااد رجع لميس الزفته وعتربي عيالي هي تخيلي يمااه اكثر انسانه مااطيقهاش عتربي عيالي

امها طنشتها ورجعت تحشوش اللحمه: وانتي ايش عليش قد تزوجتي وكم شهر وتولدي يتزوج يرجع مرته يموت يجنن ايش علينا منه

اميره: ماهو يسير ملح انا من عيالي

امها: وانتي فلتيهم بيدش ليش انتي ضابحه

اميره سكتت شويه ورجعت سارت غرفتها وبتفكر: وانا ايش عليا منهم صدق عيالي وفلتهم بكامل ارادتي وعماد وكرهته وكرهت العيشه معه وتزوجت حب حياتي واسبوع وارجع بيتي وكم شهر واولد خلاص ماعليا منهم طز بهم وبعيشتهم والله يسامحني لاني فلت عيالي وهم صغار ويارب يعوضهم بحنان وطيبه لميس اكيد ماعتسخى عليهم وبالذات حين مابش معاها جهال وحتى عتحنجهم من حنج عماد
.
.

عماد روح من العمل والبيت مرتب ومبخر وكل شي جاهز

نزار حمل لحضن ابوه وهو مبسوط والبسمه ملان وجهه

عماد فرح لما ابسره فارح

نزار: فعلنا اليوم دونات

سند: ادي لي وحده

نزار: لا لبعد الغداء

لميس خرجت من غرفتها
لميس بابتسامه: حياا

عماد ابسرها وابتسم وهي قربت منه شلت الشنطه حقه وخلسته الجاكت

لميس: كيف كان يومك؟

عماد: الحمد لله

لميس: قد صليت؟

عماد: ماشي شاصلي لوما تقربي

لميس:  طيب  ، هيا ياسنود نغسل

سند مسك بيده: هيا

عماد بيصلي وهو بيسمعهم بيتجابروا ولميس بتسأل سند كيف المدرسه وايش درسوا وتضحك معاهم
.
.

اميره بتلفلف ثيابها

امها دخلت الغرفه: هيا مسرع قد عتروحي

اميره:

البـارت 235

أنـتِ حـبـي

اميره بتلفلف ثيابها

امها دخلت الغرفه: هيا مسرع قد عتروحي

اميره: الحمد لله قد انا اشكل اروح ابسر انور والبيت ومايحتاج

امها: ايوه يابنتي اوقعي مره سوا الله يحفظش ويسعدكم

اميره: تمام
.
.

بالعشي وهم سامرين عماد بيقلب القنوات ولميس جالسه جنبه وطارحه راسه بصدره وهو طارح يده حولها

نزار قرب ويشتي يجلس بحضن لميس

عماد: اين عتسير من المزاحمه؟

نزار: اشتي ارقد بحضن امي

عماد ابتسم: فارح بش اكثر مني

لميس حضنته وباسته: حبيب قلبي

سند قرب جنبها: احكي لنا قصه

لميس: تمام هيا نقوم نفرشي اسناننا ونبدل واحكي لكم لما ترقدوا

سند قام: هيا

لميس قامت وبحضنها نزار: شويه واجي

عماد: مراعي لش

بعد نص ساعه عماد دخل لغرفتهم وهم مندمجين مع لميس وهي بتحكي لهم

عماد: مابتحكي من أول

نزار وهو مندمج: اووص ياباباه

عماد ابسر لعنده: هيا رقده جوا يسمروا هانا وانا مراعي وحدي في الصاله

لميس ضحكت: خلاص شاتم لكم الباقي غدوه

سند ونزار بصوت واحد: لاااااا

عماد بهرر لهم وبهنجمه: يله رقده غدوه معك مدرسه انت وهو

نزار بحنق: ماعد شاسيرش الروضه خلاص

عماد: ياسلام وليش؟

نزار غطى راسه بالبطانيه: هكذا قول لهم قد نزار كمل ماعد عيدرسش

عماد ضحك: تمام

سند تدفى ورقد

عماد مسك بيدها: هيا
وخرجوا

لميس: حرام عليك رقدوا وهم غاثيين

عماد: ماعليش منهم عينسوا تعالي نسمره شويه ماقد ابسرتش سوا 

لميس ابتسمت
.
.

اليوم الثاني
الساعه سبع الصباح

لميس بتصحي عماد: هيا عتتأخر

عماد بصوت كله نوووم: كم الساعه؟

لميس: سبع

عماد: خلاص خليني ارقد مابش نفس للدوام وسند خليه يسير مع يوسف ويارا

لميس: طيب
وخرجت وغلقت الباب بهدوء

سند وقدوه جاهز: هيا اين هو باباه؟

لميس: عاد هو راقد وقال تسير المدرسه مع يوسف ويارا ، من عيوصلكم؟

سند: السواق ، شاخرج ابسر شكلهم عيخطوا الآن

لميس باسته: الله معك

سند ودعها وهو مبسوط

لميس رجعت تبسر نزار عادو راقد رجعت ترقد
.
.

الساعه ثمان
صفيه قامت وقد اميره تمت تفعل الصبوح

صفيه باستغراب: كيف لش اليوم؟

اميره: قد خفت العيافه وانور قال عيجي يصطبح خاور فاصوليا من اللي بين افعلها له

صفيه: يله وانا شاسير ابسر الديوان اذا هو يحتاج رفاع امد مايجي

اميره: تمام


بعد نص ساعه وصل انور واستقبلته اميره واجتمعوا كلهم على سفرة الصبوح
.
.

عماد فتح عيونه وابسرها ابتسم وجلس يتأمل ملامحها ماتغيرت ولاشي وطيبتها وحنيتها زادت اكثر وبدأ يلعب بشعرها
.
.

بعد الصبوح وهم بيشربوا شاهي

انور: هيا يا اميره قدش جاهزه

اميره: ايوه شالبس واجي

انور: طيب وجلس يتجابر مع عمه ونزار عن خطوبه نزار وعرسه وبيخططوا
.
.

لميس نكزت ابسرته وابتسمت

عماد: صباح الخير

لميس: صباح النور كم الساعه؟

عماد: مدري ليش؟

لميس: بس بين اسأل

سمعوا دقة الباب

نزار: افتحوا لي الباب

عماد: من هذا اللغجه ولا بيخلي لنا حالنا

لميس ضحكت: قوم افتح له حرام

عماد فتح له الباب

نزار دخل جلس بحضن لميس وباسها

نزار: انا احبش

لميس ابتسمت وباسته: وانا احبك اكثر مما تحبني

.
.


انور واميره بالسيارة

اميره: الى اين هذا مش طريق البيت؟

انور: ماتشتي تغير جو مع حبيبش؟

اميره ابتسمت: الا اشتي ، اين عتشلني؟

انور: اين خاوره تسيري؟

اميره: عادي اي مكان


ومشيت الايام وكلهم مبسوطين بحياتهم

وبعد عدة شهور واميره بالشهر الخامس

اميره روحت من عند الدكتوره واشترت بدله اطفال ولادي وفعلتها وسط بوكس هدايا وروحت البيت

خلود فتحت لها الباب: يووه ليش روحتي وحدش اين هو انور؟

اميره: قال معه شويه عمل وانا روحت رجل هو قريب

خلود: اوبهي لنفسش لاترجعي تسقطي مش وقت المخطرة

اميره بفرحه: قالت الدكتوره معي ولد

خلود بفرحه: له الحمد انور عيطير من الفرحه

اميره: لاقد تحاكوه شافعل له مفاجأة

خلود: تمام
.
.

عماد روح البيت وبيده سمك وبيداعي للميس

نزار خرج وبفرحه: باباه اشترى لنا سمكه كبيره

سند: انا اخترتها

لميس خرجت من المطبخ وبقزازه: يووه ياعماد للمه تشتريها

عماد استغرب منها: ليش انتي يعجبش السمك قلت نخور اليوم

لميس حملت للحمام وبتستفرغ

عماد استغرب طرح السمك في المطبخ وسار يبسرها

لميس خرجت من الحمام وشكلها تاعب

عماد: مالش او تاعبه؟

لميس بتهوي وجهها بيدها: مدري قوا ياعماد غير ثيابك شمك سمك قووي
عماد: طيب وانتي ارتاحي وشاشتري لنا غداء من خارج لاتفعلي شي اليوم
لميس: تمام

عماد طلع السمك لابوه وغير ملابسه وخرج يشتري غداء
انور وصل البيت دخل الغرفه وابسر الصندوق

البـارت 236

أنـتِ حـبـي

انور وصل البيت دخل الغرفه وابسر الصندوق

انور فرح وبيداعي اميره: شافتح هديتي

اميره كانت بالمطبخ: لا راعي

انور: شافتحها

اميره وصلت وشلت البوكس من يده: ومن قال لك انها هديتك

انور: كان هديه من؟

اميره ابتسمت ومكنته:  طيب افتحه

انور فتحه وخرج البدله ابسر لها باستغرب: او قد عتولدي

اميره ضحكت: مع بس معك ولد يافالح

انور فرح وقام: متأكده

اميره: على ماقالت الدكتوره والله اعلم

انور رفع ايديه: يارب ولد يارب نفسي في ولد

اميره: آمين ويوقع حالي وطيب وحنون مثلك

انور: ان شاءالله
.
.

اليوم الثاني الصبح لميس بالحمام وبتبسر الفحص وهي سارحه بعدين رجمته للزباله وغسلت وجهها وخرجت تصحي عماد

لميس: عماد عماادي حبيبي هيا قوم عتتأخر

عماد فتح عيونه: خمس دقايق واقوم

لميس: طيب وانا شافعلك قلص بن تصحصح

عماد غطى راسه بالوساده وبيحاول يرقدد جلس يتقلب رجع قام دخل الحمام وغسل وجهه ولفت نظره فحص الحمل اللي في الزباله عرف ليش لميس غاثيه وتاعبه وماحب يضغط عليها اكثر او يستفسر منها خرج وقد جهزت له البن

عماد نشف وجهه: يسلموا

لميس: ايش خاور صبوح؟

عماد: ولاشي شاصطبح بالمكتب مابش نفس

لميس: براحتك

عماد: وتجهزي وجهزي العيال عنخرج اليوم نتغدى خارج

لميس: ليش عتشتري شافعل في البيت احسن مابيعجبك اكل المطاعم

عماد: اصلا اليوم عيد ميلاد نزار وحبيت نفعل له مفاجأة لاني مااحبش الحفلات والدوشه اصحابهم مرافيس

لميس ضحكت: طيب تروح واحنا جاهزين

عماد شرب من البن: لذيذذ تسلم ايدش

لميس: يهنا
.
.

انور مدد وبيبسر تلفونه

اميره: عتتأخر على العمل

انور: ماشسيرش اليوم مابش حاجه مهمه

اميره: طيب مارأيك نخرج نلوي

انور: تمام قومي اللبسي

بعد ماتم عمله روح البيت وهم جاهزين
.
.

عماد: هيا

لميس لبست شنطتها: هيه

نزار مسك يدها وخرجوا 

وصلوا المطعم وكل واحد بدأ يطلب له اكل
.
.

بمكان قريب منهم

انور: هيا ماانتي خاوره

اميره ساكته وسارحه

انور: اميرة مالش

اميره ركزت معه: هاه ولاشي
وبتبسر المنيو

انور لفت لحيث كانت تبسر ابسرهم بيضحكوا عرفهم بس متى عماد تزوج


وبعد ماتغدوا

عماد غمز للميس: اليوم معانا مفاجأة

لميس بفرحه: من منكم كبر سنه؟

نزار فرح وبيتنبع: انا انا

لميس ضحكت: صح

شويه ووصلت الترته لميس طرحت الشمع ولبست نزار قبعه عيد ميلاد وبدأوا يغنوا له وهم مبسوطين
.
.

كانت اميره بتتفرجهم ودمعتها بطرف عينها انور ركز عليها

انور مسك يدها: هيا نروح يابيبي

اميره مسحت دموعها وابتسمت: هيا


نزار طفى الشموع وهم صفقوا له

نزار وهو مبتسم: اين الهدايا؟

عماد: ضروري هديه

نزار: ايوه كيف عيد ميلاد ومابش هدايا

سند: وانا اشتي هديه بعيد ميلادي اشتريت لنزار هديه

نزار: لاني الصغير

سند: مشو عليك بين احاكي باباه

نزار: مااعه اشتي هديه

عماد وهو بياكل من الكيك: تمام شاشتري لكم الاثنين
ابسر لعند لميس: ليش ماتأكلي؟

لميس: الحمد لله شبعت

ورجعت تأكل سند ونزار
.
.

اميره روحت البيت دخلت الحمام وجلست تبكي ومتندمه على كل شيء متندمه انها تزوجت عماد لا هي قادرة تعيش حياتها وتنسى عيالها و لاهي قادره تعيش معاهم ولا هي اللي كانت سعيده مع عماد تندمت انها خلفت سند ونزار وفلتتهم اكيد عينسوها مع الايام بكيت وخرجت كل اللي في قلبها لما حست انها ارتاحت وغسلت وجهها وسارت ترقد
.
.


بالليل بعد ماروحوا البيت سند ونزار بيلعبوا بالعابهم وهم فارحين عماد بيقلب قنوات الاخبار

نزار سار لعند لميس يرويها لعبته

لميس خرجت من الحمام وهي ماسكه على بطنها

نزار ابسره وخاف عليها: مالش ياماماه؟

لميس جلست على السرير وابتسمت بتعب: ولا شي ياروحي بس بطني بتوجعني شويه

نزار قرب لعندها: اقل لباباه يشلش عند الدكتور

لميس: لا مابش داعي ياحبيبي سير ارقد وانا شارقد واقوم الصبح وانا بخير

نزار هز راسه بمعنى تمام وخرج سار لعند ابوه

نزار: باباه

عماد وهو مركز مع التلفزيون: هاه

نزار: ماماه لميس تاعبه شلها عند الدكتور

عماد ابسر لعنده وبخوف: مالها عاد كانت اول بخير وقام

نزار بيمشي بعده: مدري بس قالت عترقد وتفتهن

عماد دخل الغرفه: لميس

لميس وقد عترقد: هاه

عماد جلس جنبه: مالش؟ قال نزار انش تاعبه 

لميس قامت جلست وشكلها تاعبه وماسكه على بطنها والدموع بعيونها: مدري بطني بتوجعني قووي

عماد بخوف قام: وليش ماتحاكيني قومي البسي وهيا نسير المستشفى

لميس مسكت يده: مابش حاجه خطيره شارقد وافتهن

عماد: لا ضروري نسير هيا قومي

لميس: تاعبه غدوه نسير بالصبح

عماد: وماعيصبرني للصبح وانتي تاعبه هكذا
لميس: دام انته جنبي شاكون بخير
عماد جلس جنبها واشر لنزار يخرج

البـارت 237

أنـتِ حـبـي

لميس: تاعبه غدوه نسير بالصبح

عماد: وماعيصبرني للصبح وانتي تاعبه هكذا

لميس: دام انته جنبي شاكون بخير

عماد جلس جنبها واشر لنزار يخرج

نزار خرج وغلق الباب بعده عماد حضنها وشابك اصابعه باصابعها وباس يدها

لميس طرحت راسها بصدره وقد كانت عتبكي بس حاولت تمسك نفسها عماد بيلعب بشعرها وهي غمضت عيونها ورقدت 
.
.

اليوم الثاني بالصبح

لميس نكزت على صوت دقدقة باب غرفتهم رفعت راسها من فوق عماد وهو نوم بملابسه تذكرت لما كانت تاعبه ورقدت بحضنه

لميس بداخل نفسها: شكله ماقامش يغير ملابسه عاسب لاينكزني

نزار: ادخل

لميس بصوت واطي: لحظه

وحاولت تقوم وحست بوجع ورجعت جلست عماد نكز وابسرها

عماد: عادش تاعبه

لميس هزت راسها بمعنى ايوه

عماد: قومي البسي وهيا نسير للمستشفى

لميس: بس

عماد قاطعها: ضروري نسير ابسري كيف بتتوجعي

نزار بصوت رافع: ادخل

عماد بصوت مسموع: لا شويه ونجي
.
.

اميره قامت الصبح وانور مابحد فتحت تلفونها وابسرت رساله منه

انور: صباحو ياعسل شتأخر اليوم لاتراعوش لي تغدوا

اميره ابتسمت له ورسلت له: طيب ياروحي وايموجي قلب
.
.

بالمستشفى

عماد: تشتي ادخل معش؟

لميس: مابش داعي شادخل بسرعة

عماد: مش كان افضل لو حجزنا دكتوره باطنيه مش نساء وولاده

لميس: هذه دكتوره شاطره
وسمعت اسمها وقامت وهي متوتره
.
.

اميره قامت تفعل لها صبوح وما ابسرتش احد بالبيت فعلت لها بيض وشاهي ورجعت تصطبح وتفكر بعيالها وقررت تتصل لهم تسأل عن حالهم

اتصلت وجاوبها سند

سند: الوو

اميره فرحت: كيف انته ياروحي ؟

سند ابتسم: الحمد لله وانتوا؟

اميره: بخيره واخوك بيسلم عليك

سند ابتسم: قالت لش الدكتورة ولد

اميره: ايوه ، كيف هو نزار؟

سند: زعلان على ماماه لميس انها تاعبه؟

اميره استغربت: ليش مالها؟

سند: مدري بس قال باباه انها عترجع وهي بخير لانفتجعش

اميره بضبح وبصوت واطي: وليش عتفتجعوا ياسعم؟

سند: ماماه نزار يشتي يحاكيكم؟

اميره: هات احاكيه

سند مكنه السماعه ونزار بيجابر امه
.
.

لميس خرجت من عند الدكتوره وقد عتبكي

لميس: هيا نروح

عماد ابسرها ونغزه قلبه: مالش؟

لميس بتحاول تمسك نفسها لاتبكي: ولاشي شاحاكيك بالسيارة

عماد قام بسرعه ومشيوا للسياره

وهم بالسيارة لميس بتبكي وهي بتبسر صوره السونار

عماد: لميس مالش تحاكي خوفتيني عليش

لميس ابسرت لعنده وعيونها ملان دموع ضحكت من بين دموعها

عمادد مستغرب

لميس: انا حامل

عماد انصدم وسكت لعدة ثواني: ماقلتي؟

لميس مسكت بطنها والفرحه بتغمرها: انا حامل من شهرين

عماد ابتسم وهو مصدوم: متأكده يعني قصدي مدري

لميس قاطعته: ايوه ابسر للصوره السونار

عماد بيبسر لعندها وهو مبتسم ومش مصدق او مستوعب

لميس: يارب تتم فرحتي وارزقني الذريه الصالحه يارب

عماد مسك يدها وباسها: يارب وعيفرحوا العيال قووي

لميس ابتسمت وهي طايره من الفرحة

عماد شغل السياره ومشيوا: بس كيف لوما حملتي هكذا يعني كنتي تستخدمي علاج او شي محدد

لميس وهي بتمسح دموعها: مع بس بعد مافعلت العمليه قبل كم سنه قالت لي الدكتوره ان ممكن احمل بدون علاجات ، وقبل شهر فعلت فحص بس ماكان مبين وامس كمان فعلت فحص وطلع خطين بس ماكنت متأكدة

عماد وهو مبتسم وسارح ورجع ابسرها: الف مبروك ياروحي والله فارح من داخل قلبي
.
.

بعد ما روحوا البيت كان سند ونزار مراعيين لهم دخلوا جلسوا بالصاله

سند جلس جنب لميس: كيف قد انتي يا مامي؟

لميس وهي مبتسمه: الحمد لله

عماد بفرحه: عيوقع لكم اخ او اخت جديده

نزار بفرحه: قد به نونو ببطنش

لميس ضحكت: ايوه

نزار: واي حين عيجي ، ماماه اميره بطنها كبيره عيوقع لهم ولد كبير وانتي ياماماه ليش بطنش صغيره

سند: هو عيكبر ببطنها وتكبر البطن صح

لميس: صح

عماد: ادخلي ارتاحي شويه ومن الان لاعاد تتعبي نفسش قووي افعلي اللي تقدري عليه بس والباقي عليا

لميس: تمام، وبه علاجات قالت الدكتوره تشتريهن

عماد: طيب شويه واخرج واديهن على طريقي

لميس قامت لغرفتها غيرت ملابسها وامتدت فوق السرير وبتمسح بطنها وهي مبسوطه

عماد دخل بعدها ابسرها وابتسم وبمزح: عادش فارحه اول شهرين بعدين عتعيفينا وتتقارحي فوقنا ويف شم جيفه وتوقعي سمينه

لميس بدلع: عادي

عماد جلس جنبها: ماتشتي نسميه؟

لميس ابتسمت بفرحة: شاسميها انا وان شاءالله انها بنت احب البنات قووي وزد تعلقت بميار اخر فتره نفسي بنتي توقع مثلها 

عماد: ان شاءالله ومش عتوقع سع ميار بس عتوقع زد احسن منها مادام وامها لميس

لميس ابتسمت وسكتت شويه: عمااد

عماد: عيونه

لميس: ليش طلقت اميره؟

عماد استغرب: قد بدأت هرمونات الحمل

لميس: .

البـارت 238

أنـتِ حـبـي


لميس: ليش طلقت اميره؟

عماد استغرب: قد بدأت هرمونات الحمل

لميس: صدق نفسي أعرف ليش فلتت العيال وهي كانت تحبهم ومتعلقه بهم

عماد ضحكه نص ضحكه: من هي؟
عمرها ما اهتمت بهم سوا او حتى حسستهم بالحنان ولهذا السبب مابيفقدوهاش قوي 

لميس بتغير الموضوع: مارأيك لو وقعت بنت نسميها ميرا احب هذا الاسم

عماد ابتسم: ان شاءالله
وامتدد جنبها وابسر لعندها وعيونه بعيونها: احبش

لميس ابتسمت: مش اكثر مما احبك

عماد غمض عيونه وهو حاسس براحه وسعاده ونام
.
.

وبعد مرور ساعات

نزار وسند بيقوموا ابوهم

نزار: هيا باباه قوم قد أذن

عماد فتح عيونه ورجع غمضهن

لميس دخلت الغرفه وبتنشف يدها: عماادي قد الساعه ثلاث هيا قوم

عماد فتح عيونه واقتلب على ظهره وبصوت كله نووم: قد الساعه ثلاث !

لميس جلست جنبه: ايوه قوم صلي

سند: هيا قوم عشان نتغدى قد احنا جاوعين

عماد: طيب الان
وقام

سند طرح يده ببطن لميس: كم قد عمر اختي؟

لميس: شهرين

نزار بعد يد سند وطرح يده: شاوقع اخوها الكبير صح

سند ضرب نزار وبعد يده ورجعوا يتضاربوا

لميس بتحاول تبعدهم من بعض عماد خرج من الحمام

عماد: واووو مالكم؟

نزار وهو بيبكي: سند ضربني 

عماد ابسر لعند سند

سند: كذاب هو اللي بدأ

عماد: خلاص سكته اخرجوا خلوني اصلي

سند خرج ونزار خرج بعده

عماد ابسر لعند لميس: ذكريني ادي لش العلاجات حقش

لميس: تمام

عماد: فعلتوا غداء؟

لميس: ايوه

عماد: لا تتعبي نفسش افعلي الحاصل والا شاشتري لنا

لميس: ولا تعب ولاشي وحتى بنتي عتوقع سع ابوها مابيعجبها غير اكل البيت

عماد ابتسم: قد عتتشرط من ذلحين

لميس: اكيد ماهي بنت وعتوقع الدلوعه حقنا

عماد: ان شاءالله

لميس قامت: شاسير اقرب الغداء امد ماتصلي

عماد: طيب
.
.

عند اميره وهن بيغسولين

خلود: عتجي معي الولاد؟

اميره: حق بيت الجيران؟

خلود: ايوه وزوجها صاحب انور

اميره: شابسر لو انور ماعيخزنش في البيت شاجي معاكم

خلود: تمام واذا عتجي فيسع ماعد بش وقت

اميره: تمام
.
.

ببيت عماد

عماد خرج من الغرفه وقد قربوا الغداء

عماد: يا سلام قد الشم ملان البيت

نزار: فعلنا بيتزا

عماد جلس وبيبسر الاكل: تسلم الايادي

لميس: الله يسلمك

سند: جاء عمو اكرم وادى قات قال هن حقك

عماد: ايوه قد حاكيته بالصبح يشتري لي معه

لميس: ماكان ضروري تخزن اليوم كن افعل لك اجازه من القات شويه

عماد: اصلا معي عمل متراكم ويشتي له تركيز وسمره وماينفعش الا بقات

لميس: لو به نيه انه عينفع

عماد ضحك: ما قدرت عليش

لميس ابتسمت: ولاعتقدر
.
.

بالولاد دخلت اميره وبتسلم على النسوان وانصدمت لما ابسرت شورى وبنتها

شورى سلمت على أميره وبتفعل نفسها انها مابتعرفهاش
وبنتها سلمت براس اصابيعها وبزنط

اميره تمت تسلم وجلست وكان جنبها صاحبتها من الحاره وجلسين يتجابرين

شورى بتبسر اميره ومبين ان بطنها كبيرة وبفضول: انتي حامل؟

اميره استغربت كيف لها سألتها: ايوه

شورى: لكن اوبهي له مش ترجميه سع الاولين والا لاتكوني توحمي

اميره اقتهرت وسكتت ورجعت تسأل اللي جنبها ايش يقربوا للوالده

المره: اخت الوالده مرة ابنهم

اميره: هاه

المره: ليش تعرفيهن؟

اميره بضبح: ايوه
.
.

بعد الغداء

عماد: تشتي نحاكي ابي انش حامل او لابعد فتره؟

لميس: عادي اللي تبسره مناسب

عماد: شاحاكيه أفضل ، قد غسلتي القات

لميس: ايوه

عماد لبس وطلع يخزن مع ابوه ولميس رقدت 

عماد دقدق باب الشقه فتحت له الشغاله

الشغاله: تفضل باباه بالمجلس 

عماد دخل وابسر جدته بالصاله

انيسه: حيا بالقاطع تزوج ولازد ابسرنا له صوره

عماد سلم عليها وحب فوق راسه وطنش كلامها ودخل المجلس ابسر كنان مخزن انصدم

عماد: السلام عليكم

ابوه وكنان: وعليكم السلام

عماد جلس وهو بيبسر لعند كنان وهو مصدوم: من ايحين قد بتخزن؟

كنان: من سنه تقريبا

عماد رفع حواجبه باستغراب: يااخي ابرد لك من القات

كنان ضحك: ليش؟ هوذا وانت مخزن اربع وعشرين ساعة

عماد تضايق من طريقه كلامه وبضبح: اولا انت عادك صغير صح ان قد كبرت بس بالعمر اما بالعقل فالصدق ماشي وثانيا قوم لاحق جامعتك بدل الفرغه والتخازين والرقده

كنان ضبح وبقلة ادب: مشو عليك خليك في حالك

علي بصوت رافع: كنااان احترمه اخوك الكبير

كنان: اسمعوا مابيقل جاء يتفلسف

علي: هو بينصحك

كنان: ما اشتيش نصيحته
.
.


عند اميره قدهي ضابحه وماعجبتها الجلسه قررت تروح

اميره: ياعمه شاروح

خلود: مسرع زيدي اجلسي شويه

اميره: سهل مره ثانيه اصلا اشتي اسير ابسر امي

خلود: الله معش

اميره سارت بيتهم وصلت وامها فتحت لها الباب

البـارت 239

أنـتِ حـبـي


اميره سارت بيتهم وصلت وامها فتحت لها الباب

اميره: مساء الخير

امها: مساء النور كيف انتي؟

اميره: الحمد الله وانتوا؟

امها: نحمد الله

اميره: جالسين وحدكم

امها: ايوه

ودخلين جلسين بالغرفه

اميره: واي حين العرس حق نزار قد حددتمه؟

امها: بعد شهر شهرين هكذا عاد احنا عنبسر  القاعات

اميره: الله يوفقه ويسعده

امها: يارب
.
.

عماد ذكر حمل لميس: ايوه قد لميس حامل

ابوه انصدم: ماقلت لميس حامل

عماد: ايوه

كنان ضحك ابسروا لعنده وهم مستغربين وعلامات الصدمه بوجه علي من الخبر

علي: ليش بتضحك؟

كنان: ولا شي بس مستغرب كم ناوي عماد يخلف

علي بضبح: صلِ على النبي ياسعم مدري كم هم

كنان: اثنين والثالث بالطريق
وابسر لعند عماد: او عاد انته بتبسرهم قليل

عماد ضبح وباستفزاز: ايوه او هذا الشي مضايقك وبعدا عيالي عيوقعوا رجال مش سع بعض ناس

كنان بضبح: أحترم نفسك واعرف انك ببيتنا 

عماد بصياح: احترم نفسك انت وهذا بيت ابي مش هو بيتك تمام

علي: مالكم صلوا على النبي

كنان قام: هو ابنك والا قد عنخزن وحدنا نفتهن لكن مع داعوا عماد

علي: اين عتسير؟

كنان: اخرج اخزن مع اصحابي
ومشي

عماد ضابح ومتضايق

علي: ماقلت لي كيف لوما حملت لميس؟

عماد بضبح: هكذا وحمت من الله

علي: الف مبروك

عماد رجع هدأ شويه: الله يبارك ، هي فعلت عمليه قبل فترة وقالت لها الدكتوره ان به احتمال تحمل والحمد لله قدها بالشهر الثاني

علي: الحمد لله

عماد: ياباه اوبهوا لكنان كما هو غاوي قوي واصحابه مش هم سوا اعرفهم

علي استغرب: من اين تعرفهم؟

عماد: كم قد ابسرته مرات مفلت للجامعه ويخرجوا يصيعوا في الشوارع بس اول مره ابسره مخزن

علي بقلق: ليش ماحاكيتني من قبل؟

عماد: ماحبيت اتدخل وقلت يمكن فتره ويعقل وقد حاكيته اكثر من مره يبرد من هولا الاصحاب حتى مره قد صيح فوقه اكرم لانه ابسر بيدخن

علي بضبح: اي حين ابسره مالكم ماتحاكوني؟

عماد قام: هوذا بنحاكيكم وعلمه الادب ويكون يحترم اللي اكبر منه ونزل

دخل غرفته وابسر لميس بتحاكي التلفون

لميس: ماماه تسلم عليك

عماد: الله يسلمهم سلمي عليهم

لميس: وهو يسلم عليكم
اكيد فارح
ايوه

عماد شل اللابتوب حقه ورجع للمجلس
.
.

اليوم الثاني بالصبح

سند ونزار بيلعبوا بالحوش ولميس بتتفرجهم من طاقه الغرفه

كنان وصل بسيارته وابسرهم بالحوش وبضبح: مابتفعلوا هانا؟

نزار: بنلعب

كنان: يله ادخلوا العبوا عند امكم

سند: عاد احنا خرجنا

كنان بتهديد: ادخلوا والا يشلوكم الجن لكن ابسر سيارتي به شخط والا تراب ياويلكم
ومشي

علي ابسره دخل البيت: حياااا

كنان ابسر لعند ابوه وانحرج

علي قام لعنده: حياا الله من جانا ، وين انته لذلحين ؟

كنان: كنت عند اصحابي

علي: ليش او مابش معك بيت تروح ترقد به

كنان: مع كنا سامرين

علي: ومخزنين للصبح

كنان سكتت

علي: وانعم والتربيه ورجع يداعي لمرته

ام كنان: هاه

علي: وين ابنش لهذا السع؟

ام كنان: وين عيكون ياسعم عند اصحابه

علي: طيب ومن هم هولا اصحابه؟

ام كنان: مادراني وانا

كنان: شادخل غرفتي امد ماتتموا مجبركم ويشتي يمشي

علي بصوت رافع: كنااان جي هانا

كنان رجع

علي: من اي حين بتدخن؟

كنان بكذب: من انا؟

علي: لا انا

مرته بضبح: مالك اليوم قالب عليه

كنان: من عماد لاقد علاقتنا سابره يجي يخرب كل شي

مرته: وانا اقول هيا قول له يوبه لعياله ومشو عليه من اخوه

علي: الا عليه ونص اخوه واكبر منه وينصحه ويرشده للطريق الصح

مرته: من اي حين عاد هو لاقبل امس وهو بيتسرسر مع اصحابه

علي بصوت رافع: كسروا لقفش عادو ابني وتربيتي عمره مامشي هكذا والا هكذا عمري ماسمعت احد جاء يشتكي منه
مايتأخر الا واستاذن وانا عند هذاك ومع هذاك والا مثل ابنش يغيب ولا احنا داريين اين هو او مع من

مرته: ماذلحين انكروا كل جمايلي نسيت اني ربيته وهو ابن عشر سنين

علي: قولي شبعتيه حياة بس وابنش قليل الادب يكون يحترم اخوته ويسمع كلامهم وسمره لفجور ممنوع وخرجه بدون اذن ممنوع

كنان يشتي يتحاكا قاطعه ابوه

علي بتهديد: اووووص لاسمع نخس ولا اشتي اي اعذار والسنه الجايه تسجل جامعه وتجتهد وتجي تشتغل مع اخوتك

كنان ضبح وسار غرفته وبيلعن عماد
.
.

بعد الغداء عماد روح من العمل

لميس فتحت له

عمادابسرها وابتسم: السلام عليكم

لميس: وعليكم السلام، كيف انته؟

عماد: نحمد الله

لميس شلت منه الشنطه والكوت ودخلت تعلقه

نزار حمل لحضن ابوه

سند جلس جنب ابوه: اليوم عمو كنان صيح فوقنا

عماد عقد حواجبه: ليش؟

نزار: مدري انا اكرهه واصل وهو مقزز

عماد وهو مركز مع سند: ليش يصيح فوقكم؟

لميس..

البـارت 240
أنـتِ حـبـي

سند جلس جنب ابوه: اليوم عمو كنان صيح فوقنا

عماد عقد حواجبه: ليش؟

نزار: مدري انا اكرهه واصل وهو مقزز

عماد وهو مركز مع سند: ليش يصيح فوقكم؟

لميس طرحت له قلص عصير فوق الطاوله  وجلست جنبه: هو كان بيقول لهم يلعبوا بعيد لا يشخطوا السيارة حقه

عماد بضبح: وليش عيشخطوها حتى وان يتحاكا بإحترام 

لميس مسكت يده: خلاص يا روحي ابرد لك منه
.
.

وبعد مرور اربعه شهور بدون اي شي جديد

لميس تاعبه وراقده

عماد وصل من العمل وبيداعيها

لميس من الغرفه: عماادي انا بالغرفه

عماد دخل: ليش راقده او تاعبه

لميس: شويه

عماد جلس جنبها ومسك بطنها اللي قد كبر: ليش بتتعب امك؟

لميس ابتسمت: ماعتسميه؟

عماد: ايش بنفسش تسميه؟

لميس: مابش اسم محدد

عماد: خلاص خليه لما يوصل هذا الشغله اللي بيتعب روحي وانا شاسميه

لميس ابتسمت: طيب

عماد: اين العيال ما ابسرتهم؟

لميس: بيلعبوا بالغرفه

عماد: اووه نسيت شليت لش ايس كريم على طريقي
وقام يديه لها

لميس: تسلم

واكلوا الاثنين
.
.

عند اميره

انور: تاعبه قوووي اشلش المستشفى

اميره وهي بتتوجع: ايوه شكلي قد شاولد

انور بخوف: قد هو وقت الولاده

اميره هزت راسها بمعنى ايوه وهي بتتألم

انور ارتبش: طيب هيا قومي والا اقول لش راعي لما داعي امي
.
.

بالعصر

عماد ابسر لميس جالسه وبحضنها نزار

عماد: قوم ياباباه

لميس: خليه عادي

عماد: عيوجعش

سند: خرجنا ياباباه دوره ضبحت بالبيت

عماد: اين تشتوا تسيروا؟

نزار: العشاش

عماد ابسر للميس: هيا نخرج

نزار: العشاش حالي وخضره عتعجبش

عماد ضحك: تعرف البقعه من قبل ماتعرفك

لميس: تمام نلبس ونخرج

العيال فرحوا وسار يلبسوا

لميس قامت بعدهم

عماد: انا شابدل لهم ارتاحي

لميس ابسرت لبطنها: قد سمنت صح

عماد بمزح: عادش ركزتي

لميس تحسست: ماسمنت قوي هو بطني كبر بس

عماد قرب لعندها ومسك ايديها: انا بين امزح ياروحي ليش تزعلي هاه

لميس: مازعلت

عماد: متأكده

لميس ضحكت: ايوه وسير بدل للعيال

عماد: حاضر وباسها بالهواء ومشي
.
.

بالمستشفى

انور جالس يسير ويجي وهو قلق شويه يجلس وشويه يقوم

امه بضبح: انوور قر اطويت روحي

انور جلس وبقلق: متى عتولد شكلها عتتعب قوي

امه: قد هو الثلاث ياابني
ادعي الله يسهل لها وقر من القلق

انور: يارب سهل لها يارب يارب
.
.

وهم بالعشاش عماد ولميس بالسياره وسند ونزار خرجوا يلعبوا كره

عماد ابسر الساعه: قد وقت صح؟

لميس: ايوه حتى برد على العيال

عماد بيداعيهم

سند: خلينا زد شويه

عماد: عنجي يوم ثاني من حين

سند دخل السياره ونزار دخل بعده

عماد مشي بالسيارة بس لفتت نظره سياره كنان وقف سيارته يتأكد

لميس: ليش وقفت؟

عماد وهو بيركز على اللي وسط السيارة وبيشيش ويضحك: شويه بس

كنان مخزن وبيشيش هو واصحابه ابسر سياره وقفت جنب سيارتهم وكلها بنات بدأ يصفر لهن ويأشر لهن

عماد ابسره وجنن بسرعه خرج تلفونه واتصل له كنان بيكنسل الاتصال وعماد يتصل اكثر من مره ضبح ورجع يطرق له

كنان التفت وابسر عماد ضبح واتصل له: خير ماقد تشتوا

عماد وهو ضابح: الآن تنزل من سيارتك وتجي لهانا نروح البيت

كنان: معي سيارتي شاروح بها

عماد: كان بسرعه اطرد هولا الصعاليك وقبالي احسن ماانزل ابدع بك قبالهم

كنان بضبح: مشو عليك

عماد نزل من سيارته كنان افتجع ونزل بعده

عماد بضبح اكثر: الآن طريق البيت

كنان: عمااد مشو عليك

عماد: لا تخليني امد يدي عليك قبال الجن حقك بسرعه يانزلتهم من فوق سيارتك والا الان تطلع معي ونروح نتفاهم بالبيت

كنان بضبح: ريع احاكيهم واجي

عماد: فيسع احسن ماافحرك هانا ياكلب

كنان: عتندم وعتبسر

عماد وهو ضابح: فيسع

كنان مشي

وعماد رجع لعند لميس: ارجعي وراء كنان عيروح معانا

لميس: تمام

كنان: هيا ياخبره عتروحوا؟

اصحابه: مسرع عاد احنا ناووين على سمره وبعدا ابسر السياره هذيك كم فيها من مزز

كنان: خلاص شاروح مع اخي ابي تعب وهم بالمستشفى اتطمن عليه وارجع والسياره عندكم اوبهوا لها

اصحابه: ولاتهمها

كنان شل القات حقه ودخل سيارة عماد ورزع الباب بقوه لما نكزوا

عماد: مكسر يكسرك

كنان بصياح: ماعليك مني

عماد: وطي صوتك خلينا نوصل البيت وعنتفاهم

كنان بصوت رافع: بأيش نتفاهم

عماد بصياح: قلت وطي صوتك احسن مايقرح ملطام

كنان: وعادو بيهدد هااايه من بتتخايل نفسك

عماد: اخوك الكبير وادسعك دساع

كنان: من يدسع من

عماد ابسر لعنده بضبح والشر بيطير من عيونه: خلينا نوصل البيت

كنان: بتفجعني او مه نزلني هانا

عماد مسرع

كنان بنرفزه: بتسمع او مع

عماد بصوت رافع: لاتخليني اكسر لقفك

كنان: بين اقول لك وقف

عماد زاد السرعة.

البـارت 241 ••

أنـتِ حـبـي

كنان: بين اقول لك وقف

عماد زاد السرعه نزار افتجع وقرب جنب لميس

فجأه جاء متر قطع عليهم الخط عماد لف بسرعة قبل مايصدموه وكانت عتقتلب السيارة

الكل سكت وهم مفجوعين لميس مسكت على بطنها من قوه الرزعه اللي وقعت لها

عماد رجع شغل السياره ومشيوا للبيت

عماد فتح الباب وخرج: ادخلوا البيت

كنان خرج من السياره ويشتي يخرج من البيت

عماد مسكه من كتفه: الى اين؟

كنان دهف يد عماد: مشو عليك بتفهم او ماشي

عماد مسك كتفه بقوه وهزره لداخل البيت
وطلعوا للمجلس حيث بيخزن ابوه

عماد دهف كنان بقوه لفوق الفراش

علي استغرب: مالكم؟

عماد قرب من كنان ولطمه بأقوى قوته

علي ضبح وقام: عمماااااد

عماد التفت لابوه: خير ياباه

علي بتهديد: لاتمد يدك على اخوك

عماد: انت لو ربيته سوا كان اني ما مديت يدي عليه وامد يدي عليه احسن مايمدها غريب

علي: ماوقع تحاكوا

كنان قام ودهف عماد بضبح عماد مسك يده وعصرها

عماد بصوت رافع: لاتخليني اكسرها لك

كنان صاح بوجع

علي: عماد فك له مالك عليه

عماد فك له بدهفه وبصوت رافع: اباه زيدت له الغنج ضيعته بنفسك وبدلعك له ابسر هاه على قد لبس وحلاقه وجنان ايش هذا والله لو هو ***

علي بضبح: مافعل تحاكا؟

عماد: ابنك الحالي بيسير يصيع بالشوارع ويخزن ويدخن ويلاحق بنات الناس

علي ابسر لعند كنان بضبح وعاد يد عماد مبينه بخده 

عماد بضبح اكثر: وازيدك من الشعر بيت كل اسبوع بيسحب فلوس من البنك اين بتسير مابيفعل بها مدري

علي ابسر لعند كنان وهو ضابح منه

عماد: ربيه سع الناس والا والله لاربطه انا
ونزل وهو ضابح


ابسر لميس ماسكه بطنها وبتتوجع

عماد: مالش؟

لميس وهي بتبكي: اليوم واحنا مروحين لما وقفت فجأة عورت بطني وبين اتوجع ولاعد بين احس بحركه ابني

عماد افتجع: بتتوجعي قوي

لميس ببكاء: أيوه

عماد: طيب تعالي نسير المستشفى

لميس: خايفه يوقع بابني شي

عماد بيحاول يهديها وهو متوتر: ولا عيوقع شي لاتفتجعي

لميس بتبكي وهي بتتوجع

عماد مسكها وبيحاول يسندها تقوم

لميس وهي بتبكي بحرقه: ماقدرت ابني ياعماد ابني

عماد: حاولي تقوي نفسش اشلش هيا بسرعة

العيال سمعوا صوت بكاها ودخلوا الغرفه

نزار ابسرها بتبكي وبكي: مالش ياماماه؟

عماد: ولا شي شاشلها المستشفى وانتوا ريعوا لنا هانا تمام

سند وهو خايف هز راسه بمعنى تمام 
.
.

بالدور الثاني

علي بيصيح فوق كنان وبيلعنه ومرته بتحاول تهديه

علي بضبح وصوت رافع: اين السيارة؟

كنان: عند صاحبي

علي: ومن هو هذا صاحبك من اليوم اشتي اعرف اصحابك كلهم ، انا ركنت عليك قدك رجال وعتوبه لنفسك مش انا داري ان ابني الحيوان بيتسرسر بالشوارع

كنان: وما قال عماد عتصدقوه صدقوني انا

علي بصياح: اوووص لااسمع لك نخس عاد هو بيرادد وينكر وبوجهه

مرته: صلِ على النبي واهدأ

علي وهو بيأشر لكنان: هذا الكلب لو يزيد يخرج من البيت بدون اذني لااكسر البيت فوق روسكم

مرته: طيب اهدأ اول

علي وقدو بيتنفس بصعوبه وهو ضابح: انقلع غرفتك واتصل للجني هذا يروح السيارة

كنان مصنم بقعته

علي بصياح: من بين احاكي

كنان مشي غرفته ورزع الباب بقوه ابسر عماد وهو ماسك للميس وشكلها تاعبه

كنان بضبح: ان شاءالله تموت هي واللي ببطنها الله يلعنك من اخ 
.
.

وصلوا المستشفى

وبسرعه دخلوا لميس الطوارئ

عماد قلق وبيدعي لها

فوقه بكم دور بغرفه الولاده اميره بتولد وانور مريع خارج هو وامه وام اميره وابو انور

صفيه: الله يسهل لها ويقومها لنا بالسلامه

كلهم: يارب
.
.

بعد شويه خرجت الدكتوره

الدكتوره: ماتقرب للمريضه؟

عماد: زوجها

الدكتورة سكتت شويه وبعدين: الله يعوضكم الجنين مات

عماد انقهر قووي وسكت

الدكتورة: ممكن تروح عند الرسبشين تدفع عشان نتم عملنا بسرعه زوجتك تاعبه

عماد: يعني خلاص مات

الدكتورة: ايوه مابش نبض وزوجتك تاعبه ومانقدر نتأخر اكثر حاول تسرع

عماد بصوت مخنوق: تاعبه قووي

الدكتورة: ايوه

عماد: طيب ينفع ماتحاكوها ان الجنين مات

الدكتورة: لا ماينفع

ومشيت للغرفه

عماد جلس على الكرسي ووطى راسه ودموعه بطرف عينه وهو بيتذكر فرحتها لما وحمت وكل يوم وهي بتعد الساعات متى يجي ابنها

عماد تنهد بضيق وقام: ياررب ياكريم ياالله قويها كانت فارحه من قلبها
.
.

بعد ساعه خرجت الممرضه ومكنته الرشته يشتري العلاج

خرج للصيدليه وبالصدفه ابسر انور بيشتري علاجات وحليب ورضاعه وشكله فارح

انور ابسر عماد على خرجته رد السلام ومشي
.
.

عماد اشترى العلاج ورجع مكن الممرضه: اقدر ابسرها؟

الممرضه: مش الآن
.
.

انور دخل الغرفه وابنه بيبكي

انور: ليش بيبكي؟

امها: ...

البـارت 242 ••

أنـتِ حـبـي

انور دخل الغرفه وابنه بيبكي

انور: ليش بيبكي؟

امها: هم الجهال هكذا بيبكوا واصل

انور جلس جنب اميره: كيف قد انتي؟

اميره بصوت تاعب: الحمد لله

انور مسك يدها وباسها: الحمد لله على سلامتش ياروحي

اميره ابتسمت
.
.

بعد ساعه

عماد دخل يبسر لميس وهي نووم

الممرضه وهي بتسبر لها المغذيه: فعلنا لها مهدئات عشان تقدر ترقد

عماد هز راسه بمعنى تمام وهو غاثي خرج تلفونه واتصل بسند

سند جاوب تلفون البيت: الوو

عماد: كيف انته وكيف نزار؟

سند: الحمدلله،  كيف ماماه؟

عماد تنهد: تاعبه شويه ادعوا لها

سند زعل: الله يشفيها

عماد:  يارب ، من عندكم بالبيت؟

سند: عمه علياء ويوسف

عماد ارتاح شويه انهم مش بالبيت وحدهم: طيب سلم عليهم وسير ارقد ياحبيبي تمام

سند: تمام

عماد: مع السلامه

سند: مع السلامه

وقفل المكالمه

عماد جلس جنب لميس وهي نووم جلس يمسح شعرها وهو بيهمها كيف عتكون منهاره وتتعب نفسيتها
.
.

بغرفة اميره

بيتجهزوا عشان عيروحوا البيت

انور بفرحه: خرجنا اثنين ورجعنا ثلاثه

اميرة ضحكت وبتعب: قوا لاتضحكني

انور: ماخاوره عشاء اليوم العشاء عليا بمناسبه قدوم ابني
وضحك: تخوروا

عمته صفيه ضحكت: خبي زلطك ياابني ماذاحين تشتري حفاظات وحليب

انور: سهل ياعمه تدلعوا اليوم وابني عيجي رزقه معه

عمته صفيه: الله يرزقك

خلود وبحضنها ابن انور وبتتحيلى له: انا فدا له كم يشبه ابوه

صلاح بيبسره وهو مبتسم: الله يحفظه ويصلحه

خلود: يارب

وقاموا روحوا

وانور اشترى عشاء للبيت كله واجتمعوا تعشوا هم ونزار ومرته الرجال لحالهم والنسوان لحالهن
والفرحه بتغمر الكل
.
.

بعد نص ساعه فتحت عيونها وابسرت عماد جالس فوق كرسي قبالها تذكرت كل شي وبكيت

عماد قرب جنبها مسك يدها وباسها: الحمدلله على سلامتش ياروحي وعيعوضنا ارحم الراحمين امانه لاتغثي وتغثيني معش بين احس بتأنيب ضمير

لميس بتبكي وتشهق وتشد على مسكة يده

عماد امتلين عيونه بالدموع: آسف ياروحي سامحيني

لميس بتبكي وبتحاول تسكت ولاقدرت

عماد قام يدي لها ماء وبيحاول يشربها

لميس بعدت يده وببكاء: مااشتيش

عماد: خلاص اهدي عاسب ماتتدهور صحتش

لميس وهي بتبكي بحرقه: ابني ياعماد ابني مات خلاص جالسه مراعيه له ومتحمله كل التعب هذا بس عاسب ابسره واشم ريحته وراح عليا هكذا بسرعة

عماد ماسك دموعه بالغصب: حرام يا لميس لاتتحاكي هكذا هذا مكتوب لنا ويعوضنا الله ويجبر بخاطرنا

لميس ببكاء هستيري: اشتي ابني ياعماد مااشتيش حاجه ثانيه بهذه الدنيا قوا اين هو انا مراعيه له اربع شهور وخلاص عيجي لحضني ليش يارب ليش ورجعت تبكي

دخلت الدكتورة: مالها المريضه او بتتوجع؟

عماد بخوف على لميس: مع بس منهاره ما نفعل لها؟

الدكتورة ضربت لها ابر مهدئه وشويه هدأت وبدأت تنعس والدموع بوجهها وهي بتتكلم كلام مش مفهوم

عماد بيمسح دموعها وقد هو عيبكي على حالتها حس بضيق ويشتي يفضفض لاحد ابسر للساعه الي بالجدار الساعه ١١ الليل

خرج من الغرفه واتصل على امه

نجلاء: الوو

عماد بصوت مخنوق: مساء الخير يمه كيف انتي وكيف امي حنجا؟

نجلاء: الحمدلله وانت كيف حالك ومالصوتك او تاعب ؟

عماد بغصه: لميس سقطت اليوم

نجلاء بصدمة: ماهو !! ماوقع بها ؟

عماد حكى لها كل شي

عماد: بين احس بتأنيب ضمير وضيق قد شختنق بين احس انو انا السبب بكل تعاستها وحزنها

نجلاء: يووه صلِ على النبي وانت مادخلك هذا قضاء وقدر حتى لو كانت بالبيت كانت عتسقط

عماد تنهد وقدو عيبكي وبيمسح دموعه

امه: هيا ياعماد انا اعرفك قوي مالك لو تبسرك منهار عتنهار اكثر قوي نفسك

عماد: ان شاءالله

نجلاء:  وين هي لميس احاكيها؟

عماد: فعلوا لها مهدئات ورقدت

نجلاء: الله يشفيها وعيعوضكم

عماد: يارب ، كيف مصر ارتحتوا فيها؟

نجلاء: ايوه الحمدلله

عماد: وخالي كيف هو؟ سلموا عليه مني

امه: الله يسلمك ماله شي يسأل عن صحتك

عماد: الله يسلمه يله كان مع السلامه اقوم ابسر لميس

امه: مع السلامه واتصل لي اول ما تصحى
عاسب اتطمن عليها

عماد: ان شاءالله

ملاحظه " ام عماد سافرت مصر مع امها عند اخوها عشان تعالج امها واستقرين في مصر "


رجع للغرفه وابسرها نوم جلس بالكرسي اللي جنبها ورزح ظهر وغمض عيونه وبيدعي للميس ان الله يعوضها ويجبر قلبها ويقويها
.
.

طلع الفجر واميره نكزت على صوت ابنها
ابسرت انور بيهزه وبيحاول يسكته

اميره بتحول تقوم عشان تجلس: هات ارضعه عشان يسكت

انور قرب يطرحه بحضنها: جالس يتدلع على ابوه مايشتي الا عند امه

اميره ابتسمت

خلود دخلت الغرفه: ادي لش قهوه يابنتي تدفي بطنش

اميره: لا اسلموا لبعدين

انور جالس جنبها وهو طاير من الفرحه بابنه وبيبسر لعنده وبيتحيلا له ويجابره

البـارت 243 ••

أنـتِ حـبـي



خلود: شاسير ارقد يابنتي لو احتجتي شي قيموني

انور: ارقدي بس يمه هوذا انا وجود

خلود: الله يسعدكم
ومشيت

اميرة بمزح: شابسر هذه الفرحه بعد سنه اين عتسير

انور وهو ماسك ليد ابنه وبيبوسها: ياعمري ماحلاه صغير اشتي اكله

وضحكوا

اميره وهي بتضحك عليه: قالوا زوجوه يعقل عياكل ابنه

انور: امانه ابسري مااحلاه مانسميه

اميره: امم مارأيك باليأس 

انور: الله وبعدا يكونوا يداعوني يا ابو الياس
حالي الاسم عجبني قوي

اميره: خلاص نسميه الياس

انور: تمام ياروحي

اميره ابتسمت بحب وبتحمد الله على السعاده اللي هي فيها
.
.

لميس فتحت عيونها وابسرت عماد راقد فوق الكرسي وشكله مرهق بتحاول تقومه وعماد نكز

عماد قام: اين تشتي تسيري؟

لميس: الحمام

عماد ساعدها تقوم ورجع خرج يشتري لها صبوح تأخر شويه ورجع وهي جالسه وسند ونزار عندها

لميس بتحاول تنسى وتقوي نفسها عشان عماد والعيال

عماد: مع من جيتوا؟

سند: مع جدو

عماد: وين هو؟

سند: جاء ابسر ماماه لميس وخرج قال معه عمل

عماد: خير ان شاءالله
وابسر لعند لميس: كيف قد انتي؟

لميس: الحمد لله

نزار طلع جنبها فوق السرير وامتدد وطرح راسه بحضنها: انا احبش ياماماه قووي

لميس حضنته وباسته: وانا احبكم قووي قووي
ونزلين دموعها

نزار: ليش بتبكي؟

لميس بتمسح دموعها بيدها: ولا شي بس تاعبه شويه

سند ابسر لعندها: وين هو اخي؟

لميس رجعت تبكي

عماد تنهد: خلاص ياحبايبي تعالوا هانا خلوا ماماه تصطبح وتهدأ شويه هي تاعبه

نزار نزل من السرير: بس وين النونو اشتي ابسره

عماد بضبح: قد سار عند الله خلاص قفلوا الموضوع

وجلس جنب لميس وبيهديها ويراشيها تأكل

لميس بتبكي

عماد: قوا يالميس عاسبي حتى عاسب العيال ابسريهم كيفهم يرحموا من دونش هيا قوي نفسش ياروحي

لميس ببكاء: شابعه لوما اجوع شاكل

عماد: من ايش شابعه من امس ما اكلتي شي عتدوخي

لميس: طيب شويه واكل

عماد تنهد وجلس فوق الكرسي ومسك راسه بايديه
.
.

كنان سار عند صاحبه يروح السياره

صاحب كنان: ليش ماعد جيت امس امانه كان به جو على كيف كيفك

كنان بضبح دهفه خفيف: ابعد من قبالي قد انا طافح من روحي وبيتفاقد سيارته

صاحبه: خير ماللك او ابوك تاعب

كنان: مشو عليك هات المفتاح اروح

صاحبه مكنه وهو مستغرب منه: عادك بتتواصل مع افنان

كنان بهرر له: اوووص وبيتلفت لو احد سمعهم
ورجع يهدد صاحبه: حسك عينك احد يعرف عن موضوع افنان ولا لاتلوم الا نفسك فاهم

صاحبه افتجع: مالك اليوم قالب قزز ماشتحاكا تتطمن

كنان دخل السياره ولبس نظارته الشمسيه: واصلا افنان نهايتها مثل اللي قلبها ياسعم ماهي عتفرق عنهن

صاحبه: بس انته وعد

كنان قاطعه: ماعليك من ذيه الخبر ولاتزيد تتصل لرقمي شاكون اتصلك انا

وغلق باب السياره وفحط
.
.

بعد مرور اسبوع وقد لميس تحسنت حالتها شويه

عماد دخل الغرفه وبيده قلص بن وابسرها بترتب الملابس

عماد: كيف قد انتي؟

لميس: الحمد لله احسن

عماد قرب لعندها وابتسم لها بحب: الله لا يحرمني منش ولا يرويني بش حزن

لميس ابتسمت

عماد: امي تسلم عليش

لميس: الله يسلمك ويسلمها، قد انا فاقده لهم قووي

عماد شرب من البن: مارأيش نسير عندها

لميس: ياريت

عماد: طيب لفلفي ملابس لش وللعيال ونسافر

لميس بفرحه: صدق

عماد: عشان خاطرش اسفركم حتى الصين

لميس: ياروحي
وقامت حضنته

لميس: قد حجزت؟

عماد: ماشي والله عاد جت لي الفكره الان اقوم ابسر لنا اقرب حجز

لميس: فكره حلوه بيبي

عماد قام: ايوه عاسب ترتاح نفسيتش ياعمري تجهزوا وانا شابسر اقرب حجز وسافرنا

لميس: والعيال متى عتروحهم؟

عماد: بالمغرب

لميس: ماافعل لنا غداء؟

عماد: اي شي من يدش طعيم
.
.

عند اميره وعيالها عندها

نزار جنب اخوه وهو فارح: يمه كنت مثله صغير هكذا

اميرة: عاد كنت اصغر منه

سند: وانا

اميره: انت كنت مثله تقريبا

نزار: هو يشبهني صح

سند: لا يشبهني انا

انور دخل الغرفه وبمزح: ولا يشبه احد منكم يشبه ابوه بس

نزار حمل يحضن انور

انور طيره وباسه

انور: كيف اخوكم الصغير؟

سند: حالي

انور: جالس يبكي مابلا يشتي يبسر اخوته جالس وحده ضابح

نزار ضحك: ماقد يعرفنا عادهو صغير

انور: الا كان ليش بيبكي؟

سند: لان هو بيبي يبكي واااصل

انور ابسر لاميره: كيف انتي؟

اميره: الحمد لله

انور: وكيف الياس بعد الختان عادهو بيبكي خيرات

اميره: ايوه من حين خرجت وهو بيبكي عادهو الا سكت قبل شويه ورقد

صفيه دخلت الغرفه كان الباب مفتوح: هيا غداء قد الغداء جاهز

نزار: اشتي اتغدى بالبيت روحوني

اميره: ليش ياحبيبي اجلس تغدى معانا؟

نزار:

البـارت 244 ••

أنـتِ حـبـي


صفيه دخلت الغرفه كان الباب مفتوح: هيا غداء قد الغداء جاهز

نزار: اشتي اتغدى بالبيت روحوني

اميره: ليش ياحبيبي اجلس تغدى معانا ؟

نزار: شابع عاد احنا اصطبحنا

سند: حتى انا اشتي اروح ضبحت

اميره اكتسفت: ماعجبتكم الجلسه عندي؟

سند: الا بس فقدت لباباه وماماه

نزار: قد لنا هانا من سبع

اميره زعلت وحست ان عيالها مابيحبوهاش ولا يفرق عندهم اذا ابسروها او لا

انور ابسر اميره زعلت: خلاص ياحبايبي نتغدى اول ونجعل وشاروحكم

نزار بزن: ماشي اشتي اروح

صفيه: طيب ياولدي تغدى وروح مايسبرش تسير بغير غداء

نزار: مااعه روحوني عند باباه قال عيشتري لي لعبه جديده

أميره بزعل: خلاص يا انور روحهم بعدين عيكرهوا الجيه هانا

انور: تمام
.
.

بالبيت وهم نووم
لميس بتسمع دقدقه باب الشقه استغربت ولبست شال من البرد وخرجت للصاله

لميس بصوتها الهادئ: من؟

سند: احنا افتحوا لنا

لميس فتحت لهم وبفرحه: حيااا من وصلكم؟

نزار حضنها: عمو انور وين باباه؟

لميس: عاد هو راقد خليه

نزار: ماشي هو وعدني يشتري لي لعبه

لميس: شويه وشاصحيه انا

نزار بعناد: مع شاقومه انا وحمل للغرفه

سند بيعمل نفسه عاقل وكبير: مابيفهمش الكلام
ومشي غرفته

لميس ضحكت عليه وسارت غرفتهم

نزار نبع لفوق السرير وعماد نوم

نزار: باباه ... باباه يا باباه

عماد وهو نص نووم: هاه

نزار: هيا نخرج تشتري لي اللعبه

عماد اقتلب وغطى راسه بالوساده: شويه خليني ارقد

نزار بعد الوساده: هيا باباه

عماد: نزار رضي عليك اخرج

لميس: قدوه وقت الساعه ثلاث

عماد تأفاف

نزار حنق وكتف ايديه

لميس: تعال ياروحي ابدل لك لما يصحصح باباه

نزار قام معاها وهو حانق ومبرطم دخلوا الغرفه

سند: ليش بتلفلفوا الثياب للشنط؟

لميس ابتسمت: معي لكم مفاجأة

نزار: ما هي؟

لميس: عنسافر عند ماماه نجلاء

سند ونزار بصوت واحد: هايييه هيييييه
.
.

اليوم الثاني

عماد خرج من العمل واتصل للميس

لميس: الوو

عماد: ايوه كيف انتوا؟

لميس: الحمد لله وانت

عماد: الحمد لولي تغدوا ماشاروح لا تراعوا لي

لميس: ليش؟

عماد: شاسير ابسر مكتب سفريات عاسب احجز لنا واشتي اشتري لي لامي وجده وخالي هدايا

لميس: طيب

عماد: مع السلامه ياحبي

لميس: الله معك

نزار: من اتصل؟

لميس: باباه

نزار: ليش اتصل؟

لميس: قال معه عمل ماعيقدر يروح نتغدى

سند: طيب هيا نتغدى قد انا جاوع

لميس: الآن ياروحي
.
.

بالشارع الرئيسي وهو مسرع بسيارته وبيحاكي التلفون

افنان وهي بتبكي: بين اقلك اليوم عيتموا الخطبه وانت مبورد هكذا

كنان بضبح: ماافعل يعني اجي افعل خيمه باب بيتكم او مه خلاص يابنت الناس الله يستر عليش

افنان وهي بتبكي: وحبنا

كنان: انتي اللي فرطتي به

افنان: والله لاقتل نفسي لو اتزوج واحد غيرك

كنان ضبح: يهيهاااهه افهمي خلاص كل واحد من طريقه

افنان ببكاء: انت عمرك ماحبيتني مثل ماحبيتك ليش تعلقني بك وترجع تفلتني

كنان: لانش هبلاء وصدقتي انتي بعقلش والا لا اني شاتزوجش وحده فارغة

افنان اكتبدت: الله لا وفقك يا تافه ياحقير

كنان بقزازه: خلاص خربتي نفسيتي
وقفل التلفون ورجمه وبيسوق بسرعه وهو بيغني  فجأة ابسر جاهل صغير قباله حاول انه يوقف السياره ماقدرش وصدمه
.
.

اميره بتبدل لالياس وتتذكر سند ونزار وكيف كانت مهمله لهم وماكانت حاسه بالامومه تجاههم وحست بالندم عليهم تذكرت لميس وبتحاكي نفسها: اكيد انها بتهتم بهم وتحبهم اكثر مما اهتميت بهم اصلا هي بتحب الجهال قوي وحنونه قطع سرحانها جية انور

انور: سلام

اميره ابتسمت: وعليكم السلام حيااا

انور جلس فوق السرير وشله ابنه وبيبوسه قووي

اميره: حرام عليك عيبكي

انور: وليش يبكي ابني رجال مايبكيش واشتيه يتعود على حب ابوه الجلف وضحك

اميره ضحكت وبمزح: جلف قووي
.
.

كنان افتجع ووقف السياره طفى الاغاني ونزل يبسر ماوقع بالولد وبدأوا الناس يلتموا والاصوات ترتفع

كنان ابسر الولد وهو ملان دم ولا شي يبين انه عايش بسرعه رجع سيارته وفحط

والناس بتصيح له وتلاعنه

شويه ووصل لعماد اتصال ابسر المتصل واستغرب

عماد بضبح: الو

كنان وهو مفجوع وقد عيبكي: عماد وين انت؟

عماد افتجع: انا خارج ليش ابي حصله شي ولا  ايش ، مالك ؟ مالصوتك؟؟

كنان وهو مربوش وخايف مسح على راسه وبقلق: صدمت ولد وشكله مات مدري ماوقع به قوا ياعماد تعال مش انا داري ماافعل

عماد بصدمه: ماهو ماقلت !!

كنان: بين اقلك صدمت ولد قوا ياعماد سير اسعفه ابسر ماوقع فيه خايف لو يكون مات

عماد بضبح وصياح: اين صدمته؟ وليش ماتسعفه؟ كم مره حاكيتك ونبهت عليك ماتكون تسرع بالسياره اين انت ذلحين؟

كنان وقد عيبكي: مش وقت الكلام هذا سير ابسر ماوقع بالولد

عماد.

البـارت 245 ••

أنـتِ حـبـي

كنان: بين اقلك صدمت ولد قوا ياعماد سير اسعفه ابسر ماوقع فيه خايف لو يكون مات

عماد بضبح وصياح: اين صدمته؟ وليش ماتسعفه؟ كم مره حاكيتك ونبهت عليك ماتكون تسرع بالسياره اين انت ذلحين؟

كنان وقد عيبكي: مش وقت الكلام هذا سير ابسر ماوقع بالولد

عماد: طيب طيب اين صدمته؟  اكيد قد اسعفوه

كنان: بشارع " ... "

عماد: دقايق وانا هاناك وشسأل لاين اسعفوه وانت روح البيت لاتسير اي بقعه

كنان وهو متوتر: وارجع اتصل لي وحاكيني كيف هو

عماد بيحاول يكون هادئ: ان شاء الله مع السلامه

كنان: مع السلامه

وغلق التلفون وجلس بالارض ومسك على راسه وقد هو عيبكي من الخوف: يارب احفظه يارب اشفيه ان شاءالله انه عايش يارب يااارب ومسح دموعه وركب سيارته ومشي للبيت

عماد وصل لمكان الحادث وبيسأل على الولد واين اسعفوه

صاحب البقاله: وانت مادراك انه وقع حادث هانا

عماد اخذ نفس: اخي اللي صدم الولد لو سمحت تعرف لاي مستشفى اسعفوه اشتي ابسر كيف الولد

صاحب البقاله: الله لاوفقه صدمه وهرب ورجعنا ندور من يسعفه ولا حد رضي يشله عاسب لايقولوا انه اللي صدمه

عماد زفر بضيق: طيب اين هو انت داري والا شاسير اسأل واحد ثاني

صاحب البقاله: الا اظن اسعفوه لمستشفى "... "

عماد: شكرا ومشي للمستشفى


كنان روح البيت طلع وواول ماوصل ابسرته امه

امه افتجعت: مالك ليش صورتك هكذا ماوقع؟

كنان بكي: صدمت ولد وشكله مات يمااه عيقتلوني بدله ماافعل هو بدون قصدي وآلله ماكان قصدي اصدمه

امه شهقت ومسكت على صدرها: ماهو صدمت ولد اي حين هذا؟

كنان مسح دموعه: قبل شويه

ليان وهي مصدومه: كيف صدمته ومات خلاص

ابوه سمعهم وخرج: مالكم؟ ماوقع؟

مرته مسكت على راسها: يووه يارب سترك

علي بضبح: ماهو ماوقع ؟؟

كنان ابسر لعند ابوه: صدمت ولد وهربت شكله مات مدري ماوقع به

علي بصدمه: كيف؟
كيف صدمته؟
مابتقل انت بعقلك او ماشي

كنان بكي وبخوف وجسمه بيرجف: قوا ياباباه سفروني هم قد حفظوا رقم السياره اكيد عيعرفوني وعيقتلوني بدل ولدهم والله ماهو بقصد

ام كنان بتبكي وتولول وليان بتحاول تهديها

علي: انت متأكد انه مات

كنان ببكاء: ماشي اتصلت لعماد يسير يبسره للمستشفى

علي: وعماد ماقال لك؟

كنان: مازد اتصلت ولا هو اتصل

علي: سير ادي تلفوني اتصل له

كنان: حاضر

عماد بيبسر رقم ابوه عرف ان قد كنان حاكاهم

عماد وهو ضابح وضايق: الو

علي: عماد كيف الولد ماوقع؟

عماد بنرفزه: ابسرت ابنك الفالت اللي مابيفهم كلام احد ابسرت نهايه الدلع لوين وصله

علي بخوف: مات الولد

عماد تنهد بضيق: عادهو بغرفه العمليات مدري يعيش او لا وانا مسكوني بالمستشفى ماشقدر اروح

علي: بأي مستشفى انته؟

عماد: مستشفى ال" ... " وحاكوا لميس اني شاتأخر لاتحاكوهم من الحادث

علي: طيب طيب مع السلامه

كنان وهو خايف: ما قال لك؟

علي: قال عاد هو بغرفة العمليات الله يستر

مرته: يارب اشفيه يارب ورجعه لاهله سالم غانم ودحنا المشاكل يارب

علي: يارب وذلحين شاسير ادي لي مفتاح الخزنه اشل معي زلط

مرته قامت وهي تبكي: الآن
.
.

عماد جالس فوق الكرسي باب غرفه العمليات وهو قلق وبيدعي ويرجع يبسر اهل الولد ويرحم لحالهم كيف امه بتبكي وابوه قلق

عم الولد: ذلحين انت اللي صدمته انته غريمنا والله لو يوقع به شي ما نقبرك الا جنبه

عماد: مالكم صلوا على النبي ان شاءالله انه عيقوم بخير متعافي ادعوا له


ابو الولد بضبح: ابني بذمتك اين كان عقلك وانت مسرع اقل شي اعتبره كأنه ابنك

عماد: مش هو انا هو اخي الصغير وان شاءالله ان ابنك بخير وماعيوقع الا كل خير والله ماكنت معه ولا انا داري الا لوما اتصلي واحنا مستعدين نتكفل بكل مصاريف العلاج ولو يحتاج نسفره للخارج بنسفره

ام الولد وهي تبكي: اول شي يخرج لنا وهو عايش يارب ولدي يارب

عماد: ليش بتفاول عليه تفاءلوا بالخير تجدوه الله معانا واهدأوا

علي وصل: هاه عماد كيف الولد؟

عماد التفت لعند ابوه وقام معه لبعيد شويه: عادهم بالعمليات

علي: ليش تاخروا هكذا؟

عماد: مدري الله يشفيه قد اهله متعصبين قوي ليش عاد جيتم

علي: الله يهديك ياكنان الله يهديك 
.
.

بعد المغرب

لميس بالبيت قلقت ليش تأخر عماد هكذا بتتصل له ويرن لما يقفل ماحد بيجاوب

سند ابسر لعند لميس: ماماه وين باباه ليش تأخر؟

لميس بقلق: مدري وحاولت تهدأ عاسب العيال: شويه ويجي

نزار: قولوا له يجعل لنا على طريقهم

لميس: طيب
.
.

بالمستشفى

عماد بيبسر الولد وتذكر سند بنفس عمره تخايل لو هو سند اللي بمكان الولد ماكان عيوقع به قرب لجنب الولد وحبه براسه

عماد: الحمدلله ربي لطف والله يقومه بالسلامه

ابو الولد: يارب واسلموا ماقصرتوا

علي: ..

البـارت 246 ••

أنـتِ حـبـي


عماد: الحمدلله ربي لطف والله يقومه بالسلامه

ابو الولد: يارب واسلموا ماقصرتوا

علي: كل تكاليف المستشفى والعلاج عليا ولاتهموا شي اهم شي يقوم الولد بخير وبس

ابو الولد: ان شاء الله

علي: شاطرح لكم رقمي
وخرج من جيبه طبعه زلط: وهذه لو احتجتم شي والا شي

ابو الولد: تسلم ياعم

علي: مع السلامه احنا عنروح ونجي غدوه الصبح وان شاء الله نجي وقد صحي وقد تحسن لو وقع شي اتمنى تبلغونا

ابو الولد: طيب

عماد مشي هو وابوه وهو سارح

علي ركب سيارته وعماد بسيارته وروحوا البيت وصلوا على الساعه ١١


عماد دخل البيت وهو هدوء

لميس سمعت فتحة الباب وقامت: عماااد

عماد دخل للغرفه: هاه

لميس: وين انت اقلقتي عليك وليش مابترد على تلفونك؟

عماد خلس الجاكت حقه وتنهد: قد رقدوا العيال؟

لميس: ايوه

عماد بيجابرها من الحادث وماوقع

لميس: يووه سلم الله ، الله يهديه عاد هو غاووي قووي

عماد: ستر الله والا كان عيكبر الموضوع بس الحمد لله

لميس: الحمد لله اقوم افعل لك عشاء

عماد: لا لا تسلمي شابع اشتي ارقد بس قد انا تاعب

لميس: طيب
.
.

اليوم الثاني كل اللي بالبيت دريوا بالخبر وعلي ومرته ساروا بالصبح للمستشفى تفاقدوا الولد وكيف حالته


الساعه ٣٠: ١١

عماد نكز من اصوات عياله وهم بيتحانبوا فتح عيونه وبيبسر الساعه كم بتلفونه ابسره ١١ وقام جلس وبيمسح عيونه ورجع دخل الحمام توضى وصلى ركعتين وخرج يبسر عياله

سند ونزار ابسروا ابوهم وحملوا لعنده يحضنوه

لميس خرجت من المطبخ: صباح الخير

عماد: صباح النور

لميس: تشتي افعل لك صبوح؟

عماد: قد الغداء جاهز؟

لميس: تقريبا

عماد: خلاص افعلي لي قلص بن بس

لميس: طيب
.
.

بعد الغداء
كنان سار يعتذر من اهل الولد هو وابوه

ابو الولد: خلاص حصل خير والحمد لله ابني بخير وانتوا ماقصرتوا

علي: انا قد حاكيت الدكتور وقال مايحتاج نسفره ولا شي والا قد كنت شاحجز لكم تسفروه مصر بس مادام وقد فعلوا له العمليه ونجحت الحمد لله اشوف انه مابش داعي للسفر والتعب

عم الولد: بارك الله فيك ياعم وانت انتبه مره ثانيه ياولدي هذا المره ربي سلم مره ثانيه الله ياعلم ماعيوقع

علي ابسر لعند كنان وبحزم: ماعدبش مره ثانيه او لا يا سيد كنان

كنان: ايوه

علي: كان استأذنكم ولو احتجتم شي رقمي عندكم

ابو الولد: اذنك معك
.
.

بالبيت

عماد: قد حجزت لنا لبعد اسبوع كيف مناسب؟

لميس: ايوه 

عماد: مارأيش نخرج نبسر لامي وجده هدايا ماعد اشتريت امس

لميس: طيب نقوم نلبس عاسب نرجع بحينه

عماد قام: هياا

وهم بالسوق اشتروا هدايا والعاب

عماد: مارأيش لو نشتري للولد اللي صدمه كنان ونسير نبسره جالس حسي عنده

لميس: فكره حاليه كم عمره؟

عماد: تقريبا بعمر سند

لميس: خلاص سند يختار له الهديه

سند تحمس: تمام

اشتروا له هدايا وغلفوهن وتحركوا للمستشفى

وصلوا لباب الغرفة وعماد ابسر ابو الولد سلم عليه

عماد: كيف قدهو ابنكم ان شاءالله احسن؟

ابو الولد: الحمد لله احسن

عماد: عيالي جوا عاسب يبسروه ويتحمدوا له بالسلامه

ابو الولد ابسرهم وابتسم: تفضلوا

دخلت لميس للغرفه هي والعيال وعماد وابو الولد جلسوا يتجابروا

لميس: مساء الخير

ام الولد: مساء النور

لميس سلمت عليها: كيف انتوا؟ وكيف قد صحه ابنكم ؟

ام الولد: الحمد لله احسن ، بس من انتي؟

لميس ابتسمت: انا مرة عماد اخو كنان اللي صدم ابنكم

ام الولد: هاه تفضلي اجلسي

لميس جلست وسند ونزار ساروا لجنب سرير الولد

سند مد يده يسلم وهو سلم عليه

سند: مااسمك؟

الولد: حارث

سند: الحمد لله على سلامتك

حارث سكت

نزار مكنه الهديه: هذه مني

وسند طرح الهديه فوق الكرسي: وهذه مني

حارث ابتسم: شكرا

نزار ابسر بنت صغيره داخل العربيه حقها سار لعندها وابسر لعند امها: عادي ابوسها؟

ام حارث ابتسمت: عادي

نزار باسها وجلس يتحيلى لها وسند اندمج مع حارث بالحديث من المدرسه والالعاب


لوقت اذان المغرب

لميس: هيا نروح باباه مراعي لنا خارج

سند: خلينا زد شويه

لميس: عنجي يوم ثاني

نزار مسك بيد لميس

لميس: هيا سنودي

سند: بااي حارث

حارث: بااي

ام حارث: اسلموا على الزيارة

لميس: الله يسلمش

وخرجوا
.
.

ببيت صلاح

انور روح البيت واشترى معه عشاء لاميره

صفيه: ان ياابني عتجلس تأكل مرتك من هذا الاكل وهي والده

انور استغرب: ليش قلت ادلعها

اميره ضحكت

صفيه: الوالده مابلا يكون اكلها سوا حاجات مفيده وانته كل يوم تشتري لها اكل من كل شكل ولون

انور ضحك: هي بتخورهن

اميره فتحت الكيس وبتاكل من السندويش: خلاص يمه اخر يوم

انور: وانا متجمل من روحي بين ادلعش طلعت بين اضرش

اميره: ولاشي ياروحي ااكل معي

انور عدل جلسته وفتح الكيس..

البـارت 247 ••

أنـتِ حـبـي

انور عدل جلسته وفتح الكيس وخرج سندويش واكل منه ورجع لفت لعمته: ياعمه تشتوا

صفيه: ماشي ياابني الصدق مايعجبني يهنى
.
.

بالسياره

عماد: تشتوا نخرج نتعشى بمطعم والا نروح البيت

سند ونزار: المطعم المطعم

عماد ابتسم: حاضر اشلكم احلى مطعم

سند: يسس

وساروا مطعم تعشوا ولعبوا وروح اخر الليل رقدوا

.
.

بعد اسبوع

يوم سفر لميس وعماد

علي وكنان نزلوا يودعوا عماد

علي سلم على عماد: توصل بالسلامه ياابني

عماد حب راس ابوه: الله يسلمكم

علي ابسر سند ونزار وهم فارحين ابتسم من فرحتهم ورجع ابسر لعند لميس اللي قربت تسلم عليه

علي: الله يوصلكم بالسلامه ويعوضش خير

لميس: الله يسلمك ياعم ، يارب

كنان سلم على عماد: شكرا ياعماد

عماد ابتسم: على ايش؟

كنان: على وقفتك جنبي

عماد ربت على كتفه: ولو ماانته اخي اذا ماوقفت معاك من عيوفقك معك

كنان ابتسم

اكرم دخل البيت: قد السواق خارج قد خرجت لكم الشنيط

عماد حضنه: تسلم

اكرم: لا تطول عنفقد لك

عماد: ولايهمك

اكرم: وسلم على امي وخالي وجده

عماد: يوصل

وودعوهم كلهم وتحركوا
.
.

عند اميره

صفيه: امس رسل عماد لنزار انه هو عيسافر هو والعيال

اميره وهي بترضع الياس: اين سافروا وليش مااداهم ابسرهم قبل مايسافروا ؟؟

صفيه: قال عيسافروا عند امه يبسروها ويغيروا جو

اميره: طيب كان عيقول لي نزار ويسير يديهم ابسرهم

صفيه: مارسل له الا العشي

اميره زعلت لانها مابسرت عيالها قبل سفرهم
.
.

ومرت يومين ووصل عماد لمصر واستقبلهم خاله بالمطار

عماد ابسر خاله وابتسم وسار يسلم عليه

خال عماد حضن عماد: حيا بالبزي

عماد: الله يحييك ياعم

خال عماد مجاهد: ما شاء الله هذولا عيالك

عماد: ايوه سند ونزار ، سلموا على خالو

سند مد يده يسلم عليه ونزار تشجع وسار يسلم عليه

وصلوا البيت واستقبلتهم نجلاء وهي فارحه

عماد سلم عليها وحب راسها وبعدين سلمت عليها لميس والعيال

وجلسوا تغدوا وهم مبسوطين


بالعشي

عماد دخل الغرفه حقه امه ولميس وامه بيتجابرين

عماد: هيا يالميس

امه باستغراب: الى اين ياابني؟

عماد: استأجرت لنا شقه نجلس بها

امه: ليش ماتجلس عندنا كود احنا ابسرناك

عماد: هي الشقه قريبه وهكذا افضل

امه: براحتك لكن امسوا حتى اليوم عيزعل خالك

عماد ابسر لعند لميس: خلاص تمام عنمسي اليوم وغدوه عنسير الشقه

لميس قامت: شاسير افعل عشاء مع خاله عيب

نجلاء: سيري لوما اصلي واجي بعدش

لميس: تمام
.
.

اميره بتهز الياس وهي واقفه لما رقد ورجعت تتأمل ملامحه وهو نووم وتذكرت سند ونزار وكيف سافروا بدون ماتسبرهم رجعت تبكي
.
.


بالمطبخ

خاله عماد: امانه يابنتي لاعسيتي شي عادش ضيف

لميس: يووه مع ياخاله خلوني اعاونكم اصلا يعجبني الطبخ

خالة عماد ابتسمت لها: الله يسعدش يابنتي ويرزقش الذريه الصالحه

لميس: يارب
.
.

ومر شهر وهم مبسوطين وكل يوم يخرجوا مكان وكانت احلى ايامهم مع سند ونزار

عند البحر وعماد بيلاحق سند

لميس بتضحك عليهم وماسكه ليد نزار: خلاص ياسند هيا نروح

عماد مسكه وسند ضحك

عماد رفعه فوق ظهره: الى البيت بس حرقنا شمس

نزار: باباه اشتري لنا ايس كريم

عماد: تمام

لميس: ولاتنسى الموعد حق الدكتوره اليوم العشي

عماد: حاضر ماعد باقي

لميس: ولا شي

واشتروا ايس كريم وروحوا البيت

عماد: ابدأو ااكلوا لوما اتحمم ملوحة البحر اكلت جسمي

لميس: طيب بس لاتتأخر عنتمه عليك

عماد: دقايق واجي

سند: ليش عتسيروا عند الدكتورة؟

لميس: امممم سر شارجع اقول لكم بعدين

نزار: وعتخلونا وحدنا بالبيت

لميس: مع عتسيروا عند ماماه نجلاء
.
.

عند اميره اللي الياس كل يوم يكبر

انور وصل من العمل دخل الغرفه: وين الياسو؟

اميره: قوا ياانور لا تقومه عاد هو رقد

انور قرب وبيبسره لفوق السرير: ليش ترقديه قبل مااوصل؟

اميره: من صبح وهو صاحي واصلا جالس يبكي يشتي يرقد

انور: خلاص قربي لنا الغداء

اميره: الآن

انور باسها بالهواء اميره ضحكت وخرجت
.
.

بالعشي لميس وعماد منتظرين دورهم

عماد ماسك ليد لميس: مالش قلقه اهدئي

لميس: مدري كيف انا متوتره تخيل ومايطلعش حمل

عماد: عادي عتوحمي الشهر الجاي او اللي بعده اشتي يكون املش بالله كبير

لميس شدت على مسكه يده وابتسمت
.
.

بالبيت

سند ونزار بيلعبوا ويحشروا البيت

الجده بضبح: اين ساروا هولا وطرحوا عيالهم عندنا جنونا

نجلاء: سند نزار ارزوا العبوا بهدوء

الجده: اتصلي لهم ابسري اين قدهم ماخلوا اخوش يهجع

نجلاء: شويه يمه ويجوا اصلا هم ساروا عند الدكتوره


بعد دقايق الباب بيدق

نزار حمل يفتح الباب: باباه جاء باباه جاء

عماد دخل هو ولميس والفرحه مبينه عليهم

البـارت 248 ••

أنـتِ حـبـي

بعد دقايق الباب بيدق

نزار حمل يفتح الباب: باباه جاء باباه جاء

عماد دخل هو ولميس والفرحه مبينه عليهم

نجلاء: هاه بشروا

عماد بفرحه: حامل

نجلاء بفرحه كبيره حضنت لميس: الف الف مبروك ياقلبي الله يتمم لش حملش على خير ويفرحكم يارب

لميس من داخل قلبها: ياررب

عماد: وانا ماعد عتحضنوني

نجلاء: الا وحضنت عماد


"طبعا كنان عقل بعد اللي حصل معه وقرر يرجع يتم دراسته بالجامعه ويشتغل مع اخوته ويبتعد عن اصدقاء السوء عشان انه عيضر نفسه ويضر الاخرين معه"
.
.

ومرت الايام و الشهور بسرعه والكل منتظر ولادة لميس بفارغ الصبر


وجاء اليوم الموعود

عماد بقلق: هيا نخطى ليش مانسير ذاحين

لميس وهي بتتوجع: مدري خايفه خليني زد شويه

عماد قام يجهز الشنط حق النونو وحقها: ولادقيقه قومي البسي هياا

لميس بكيت: خايفه قووي

عماد رجع جلس جنبها مسك يدها وباسهن: تخافي وانا جنبش ومعش

لميس ابتسمت والدموع في عيونها: طيب اتصل لامي وابي يسبقونا للمستشفى

عماد: الآن وانتي قومي البسي هيا حبيبي

لميس قامت تلبس ببطء وهي تفكر ومتوتره

نزار دخل الغرفه يوريهم الرسمه اللي رسمها ابسرهم بيتجهزوا: اين عتسيروا

لميس مسكت بطنها وصاحت بوجع

عماد قرب لعندها وبيحاول يهديها ويساعدها تلبس

نزار خاف وبكي رجم الورقه اللي بيرسم بها وحمل حضن لميس: وين عتسيروا ؟
مالش ياماماه؟

عماد رجع يسكته: نزار حبيبي مالك احنا عنشل ماماه لميس للمستشفى تولد ونرجع احنا واخوتك هيا لاتبكيش عتقلق ماماه عليك

نزار سكت وبيبسر للميس

لميس ابتسمت بالغصب وهي بتتوجع

عماد: يله ياحبيبي سير انت وسند عند عمو اكرم لما نرجع

نزار مسح دموعه: تمام
ومشي


تجهزوا وساروا للمستشفى

لميس ابسرت امها وبكيت: يمه خايفه قووي

امها بتهديها: ولاعيقع شي قد انتي في احسن مستشفى واحسن دكتوره توكلي على الله

عماد: قد بين اقولها واحنا معاها كلنا

لميس: وين ابي؟

امها: شويه ويجي هيا تعالي افعلي فحوصات نبسر ماعتقول لنا الدكتورة

لميس: طيب

ودخلت هي وامها لعند الدكتوره وعماد جلس مريع لهن خارج لما وصل عمه احمد قام سلم عليه
.
.

ببيت صلاح وقد الياس بدا يخطى شويه ويرجع يدرب

انور ماسك له وبيمشيه ويغني له: دادده دادده

الياس: دادده

اميره بتتحيلا له وترجع تأكله

صلاح بيبسرهم وهو مبسوط ومبتسم وفارح لابنه

خلود: بس جننتوا الولد خلوه يجلس ياكل لاهو عيشبع ولاشي

انور حضنه وبيمسح له وجهه من الاكل وبيتكلم ياسعم انه الياس: خلاص قد انا شابع ياجده او تشتيني اوقع سع باباه دب والكل يضحك عليه
ومالش عليهم خليهم يلعبوني شويه اشتي العب
ورجع يدغدغه والياس يضحك: اشتي العب اشتي العب

خلود ضحكت: الله يجبرك ياابني

انور: انا شاخرج انا وابني اعرفه على الشوارع

اميره: هاه من ذاحين عتعلمه الشورعه

انور ضحك: ايووه
ورجع يعلم الياس يفعله لهم بيده بااي

وهي يتحيلوا له ولحركاته
.
.

لميس بتتجهز عشان تدخل العمليات وهي بتبكي وقلقه

عماد وامها بيهدوها

عماد: هيا فاانتي مراعيه لهذا اليوم من تسعه اشهر مالش يالولي

لميس ماسكة ليديه بقوه: خايفه خايفه قووي

امها: مش اول مره تفعلي العمليه هي سع اللي فعليتها المره الاوله

الممرضه جت: هياا

لميس بتبسرهم وهي خايفه

عائشه قامت وبتقومها: هياا يابنتي توكلي على الله
وما عتفتحي عيونش الا واحنا جنبش كلنا

لميس هزت راسها بمعنى تمام

عماد باس راسها: استودعش الله ياروحي

لميس ابتسمت له ومشيت مع الممرضه
.
.


بييت عماد

علياء وليان بيرتبين الشقه وينظفين ويصلحين الزينه عشان يفاجأين لميس لما تجي

وسند ونزار فارحين ومنتظرين متى يروحوا


بعد سااعاات

لميس فتحت عيونها ببطء وهي بتسمع صوت بكاء بحرقه فتحت عيونها وابسرت امها وبحضنها نونو وبتحاول تسكته وبتهزه وترجع تدي له اللهايه وهو بيبكي ولاسكت

احمد: هي عتجي حرقه سع امها

عماد ضحك: اهم شي ابني يجي هادئ انا عليا الولد وهي البنت

لميس بصوت خافت: عماااد

عماد ابتز وقام لعندها وبفرحه: الحمد لله على سلامتش ياروحي
والف مبرووك يتربوا بعزنا ودلالانا ابسري كيف ربي عوضش باثنين مش الا واحد

لميس ابتسمت وعيونها امتلين بالدموع: وين هم اشتي ابسرهم

عائشه قربت لعندها وبتوريها بنتها: هذيه ميس قال عماد ماعيسميها الا ميس والا ميس عشان انه مقارب لاسمش

لميس ابتسمت: جالس مصمم على الاسم

عماد: اكييد ولاعيتغير الا لو رضيتي نسميها لميس

لميس: لا ميس احسن

احمد حضن الولد وقرب يوري لميس: وهذا الصغنون الثاني جبره عاقل سع جده ولابيبكي ولاشي ماحقش المشولحه قد سمعت بنا ورجع يضحك وهو مبسوط

لميس بتتأمل ملامحه: .

البـارت 249 ••

أنـتِ حـبـي

احمد حضن الولد وقرب يوري لميس: وهذا الصغنون الثاني جبره عاقل سع جده ولابيبكي ولاشي ماحقش المشولحه قد سمعت بنا ورجع يضحك وهو مبسوط

لميس بتتأمل ملامحه: بيشبهكم قووي

احمد: ايوه الله يجبرش يابنتي

لميس: يارب
ورجعت تبسر لعماد: شاسميه احمد

عماد: تمام ياروحي مثل ماتشتي

عائشه بعد ماهدأت ميس وطرحتها بسريرها: ايوه للمغالطه وانا ماعتسموا على اسمي

عماد: الثانيه

لميس بتعب: ماعدبش خلاص تعبت

رجعوا يضحكوا عليها ويجابروها وهم مبسوطين
.
.

بعد يومين

روحوا البيت
وسند ونزار فارحين باخوتهم ويشتوا يحضنوهم ويبوسوهم

لميس جالسه فوق السرير

ونزار وسند كل واحد جنب سرير واحد من اخوتهم وبيبسروهم

يارا: الله وقع لكم اثنين اخوه مره واحد يله على كل واحد يوبه لاخوه
من تختار يانزار؟

نزار بفرحه: ميس واشتيها تحبني خيرات مثل مابين احبها

سند: وانا احمد عشان انه هادئ ماعيتعبني

لميس ضحكت: سع ابوك هاه بتدوروا راحتكم

عائشه دخلت وبيدها قلص قهوه: ايووه حاذقين قووي
يله قومي اشربي هذا يابنتي

لميس: قرفه لا يمه مااحبها

عائشه: الا ضروري

يارا: يله نخرج عشان نخليهم يرقدوا

نزار: تمام

سند: لما يقوموا داعونا نبسرهم سوا

عائشه ابتسمت: ولايهمك
.
.

الساعة واحدة

عماد روح من العمل وبيسمع صوت بنته وهي بتبكي دخل الغرفه ولميس واقفه عند سريرها حاضناها وبتسكتها

عماد ابتسم: سلام

لميس لفتت لعنده وابتسمت: حياااا

عماد: ليش انتي واقفه جي اجلسي عتتعبي

لميس ابتسمت وجلست وبحضنها ميس بتتأملها والفرحه مش سايعتها

عماد خرج من العلبه سلس ولبسها

لميس ابسرت لعنده ورجعت مسكت السلس بيدها: ثانكيوو حبيبي

عماد بيسبره لها: ولا تزيدي تبعديه تمام

لميس بتتأمل التعليقه بها قلبين متلصقات مع بعض وشكله انيق: تمام

عماد بعد من عندها: اسكه ابسر كيف وقع

لميس بتسبره برقبتها: حاللي ياروحي

عماد قرب باسها براسها وجلس بالارض مقابل لها ومسك يدها: انتي اللي حليتيه وحليتي حياتي بكلها

لميس: لفو يوو بيبي

ميس بكيت

عماد: الغيووره بتغاري من ماماه

سند ونزار دخلوا الغرفه لما سمعوها بتبكي

نزار: قد قاموا اخوتي

عماد: ميس بس

قربوا يبسروا ويتأملوها

سند حبها: بتشبهني صح ياباباه

نزار: لاتشبهني انا

عماد: ولاتشبه احد تشبه امها بس

لميس بتسكتها وهي سكتت

سند: ماماه اشتي احضنها

نزار: وانا

عماد طلع نزار فوق السرير جنب لميس: احضن اخوك والهرمه هذه خليها لامها احنا العيال فريق وهن فريق

لميس ضحكت: والله

عماد ضحك: اخليهم يحضنوا احمد

لميس: اكييد

عماد شل احمد من فوق سريره وطرحه بحض نزار ووضع له وساده عشان لاينكع عليه

سند: قوا ياماماه خلوني احضن ميس

لميس: طيب
وطرحت ميس بحضنه

عماد: وانا احضن مرتي جلس جنبها وطرح يده حولها وخرج تلفونه: يله ابسروا للتلفون

لميس ضحكت: يووه مع ياعماد مدري كيف شكلي

عماد: حاليه سع القمر

لميس ضحكت

وعماد صورهم كم صورة

ورجعت ميس تبكي

سند: مالها

لميس شلتها من حضنه: مدري

نزار: ابسر كيف احمد مابكي بحضني انا اعرف اهتم باخوتي اكثر منك

لميس: لا انتم الاثنين عتهتموا بهم سوا وعيحبوكم سووا

نزار: ايووه

عماد شل احمد من حضنه: يله سيروا العبوا

سند: تمام
وخرج ونزار خرج بعده

عماد قرب لجنب لميس وبحضنه احمد وهي بحضنها ميس

عماد: ابسرتي كيف ربي عوضنا وجمعنا ببعض رغم كل اللي قد وقعع

لميس: الحمدلله
وطرحت راسها فوق كتفه

عماد: احبش وشاجلس احبش لاخر نفس بحياتي
ماانتي حبي وحياتي كلها

لميس ابتسمت: وانا احبك

البارت 250•• والاخير

انتِ حبي

بعد مرور خمس سنين وعلى شواطئ البحر بتركيا

جالسين ابطال روايتنا وهم بيبسروا عيالهم بيلعبوا بالرمل

ميس بتفعل هي وسند قلعه
ونزار هو واحمد

بعد ماتموا وقعت حق احمد ونزار احسن

احمد بفرحه: فزنا عليكم ياخاسرين ننناااه

ميس ضبحت وخربت قلعتهم

احمد صااح: ليش

ميس شلت رمل ورجمته لوجهه وهربت وهو بيلحقها

سند ونزار بيضحكوا عليهم

سند: حركاتك حين كنت صغير وترجع تبكي
ووااء ووااءء  وضحك

نزار ضحك ورجمه بالرمل: والله

وقام بيمدده وبيتسافطوا ويضحكوا

ميس حملت بسرعه لحضن ابوها

احمد وهو ضابح: ابسروا بنتكم اللي بتدلعوها خسرت وجت تخرب قلعتي

ميس بدلع: ايحين خربت انا مااخربش

احمد بضبح اكثر: الاا خربتيهااا

عماد: سهل ياباباه احنا مضطهدينا هكذا طول عمرنا
وابسر للميس وضحك

لميس خفعته: عماااد

عماد وهو بيضحك: اححح ، آسف ياروحي
وابسر لاحمد وغمز له: ابسرت ياابني

احمد نسي ضبحه وضحك

سند بيحمل لعندهم وجلس وهو بيضحك
ونزار وصل بعده اتكى عليه وجلس

لميس: تشتوا نروح والا لا

نزار: مع شويه الجو حالي

عماد قام: من يتسابق معي؟

نزار وسند بحماس: اناا

احمد: وانا وانا

ميس: وانا وماماه الحكم

عماد وقف وجنبه سند ونزار

لميس: واحد اثنين ثلاثه انطلقوا

وهم حملوا مع بعض وبيضحكوا


بمكان ثاني وعند اميرة وانور

انور بحضنه بنته الصغيره وقد عمرها سته شهور بيبعد من شعرها الفراتك

اميره ببهراره: انوورر

انور بيبعد منها وبيخربش شعر بنته: هزورتي شعر بنتي

اميره: قوا ياانور خلها ليش تبعده كان شكلها حالي

انور وهو بيضحك: وذاحين احلى

اميره بضحكه وضبح: انوور كيف احلى قدهي مشعفله

انور: الا احلى

اميره: خلاص سد انت وبنتك
وين الياس ابدل له

انور بيتلفت: كان هانا

الياس خرج من وسط الدولاب: بخخخخ وحششش

انور وهو بيضحك: وحش وحش عيأكلني اين اتخبى
وبيتخبى وراء اميره

اميره بتضحك عليه

والياس سار لعنده وبيفجعه وانور بيهرب منه وبحضنه ميرا وهي بتضحك معاهم

اميره: انوور قوا عنتأخر

انور: خلاص يله شلي العسل حقي مشطي لها لكن بدون حقكن هولا اللي يوجعين الراس وانا شابدل لابني
وين هوو؟

الياس هرب وهو بيضحك وانور بيلاحقه مسكه وبيدغدغه ويضحكه

واميره رتبت شعر ميرا وبدلت
.
.

بتركياا

لميس: سند الفايززز

سند: يسسسس

عماد وهو بيتنفس بسرعه: مغالطه

لميس ضحكت: انت المغالط بتداهفه عاسب لا يسبقك قدك شيبه خلاص

عماد ضحك: صددق

لميس بدلع: ايووه

نزار وهو بيتنفس بسرعه: ابسرتوا الحمدلله

عماد: يارجال تشتي تفوز على ابووك

نزار ضحك: فكيف

لميس: عماادي هيا نروح حرقت شمس

عماد مسك بيدها: هيا حبيبي

ميس: سند شلني تااعبه

سند طلعها فوق ظهره: اووبه يله نروح البيت

ميس: اول شي اشتروا لنا ايس كريم نبرد

احمد مسك بيد نزار: ايوه وانا اشتي

نزار: كلنا

عماد: حاضر من عيوني ادي لكم مااشتيتوا

مشيوا لعند السياره

عماد مكن لميس مفتاح السياره: يله سوقي انتي

لميس: طيب

ودخلوا السيارة

عماد جلس قدام ولبس نظارته الشمسيه

سند ونزار وراء بيتضاربوا وكل واحد يسافط الثاني

لميس حركت السياره: حبايبي من غير حركه وسفاط شاتوتر قوا

سند فك ليد نزار: خلاص حاضر

نزار: خاور سمك ياباباه قوا غدونا اول بعدين ايس كريم

عماد: يله يالولي امشي للمطعم

وفتح اغنيه
Birak sende kaybola
نزار بيصفر على نغمه الاغنيه وهو مستمتع ومبسوط

وسند بيبسر تلفونه وبيراسل ميار وهو مبتسم

واحمد وميس كل واحد بيتفرج من طاقه للبحر وشوارع تركيا
.
.

بصنعاء

انور واميره خاطيين لبيت اميره عزموهم غداء

اميره بحضنها ميرا وانور متحمل لالياس فوق اكتافه

الياس: باباه اشتي جعاله

انور: حاضر بعد الغداء اخرجكم واجعل لكم

الياس: نسير الالعاب

انور: اين ماتشتي

الياس بفرحه: هااايه
وبيبوس راسه ابوه

اميره ابسرتهم وهي مبتسمه بحب ميرا وهي بتحرك ايديها وفرحه: بااباه باااباه

انور فرح: ياروح ابووش انتي
قالت باباه

اميره ضحكت: ايووه،  باباه والا ماماه ياميروا

ميرا: باابااه بااباه

انور ضحك: ياقلبي انتي ابسرتي امش كيف بتغالطش قالت باباه
وخرج لسانه لاميره بمحانكه

اميره ضحكت
.
.

بعد العصر ووقت الغروب

عماد جالس هو ولميس بيتفرجوا الغروب وهم مبسوطين

ونزار وسند بيتسبحوا ويلعبوا مع احمد وميس


واميره وانور
بيتفرجوا الياس وميرا وهم بيلعبوا سوا ويضحكوا والياس بيأكل اخته شوكلاته

اميره بحب: ما احلاهم الله يحفظكم

انور طرح راسه فوقها وامتد فوق العشب: ويخليش لنا
..

لميس: ويسعدنا طوال العمر

عماد باس يدها: ياارب

..
اميره ابتسمت


ومرت الايام بسلام وسعادة وكل واحد عايش حياته وهو مرتاح وراضي بما كتب له الله

#انتهت

وڪذا نڪون خلصنا الروايه

#ملخــــــــــص الروايه

مهما صار او حدث في حياتك لاتسستبقش الاحداث بالصبر يأتي كل جميل ومن صبر نال
اكثر شي اتكلمت عنه الروايه هو الصبر زميا صبرت لميس وتحملت وفي الاخير عوضها الله بعوض جميل يليق بصبرها

#انتهت😍❤

آرائكــم محل اهتمـامنا .. وكل واحــد يــرسل تعليقـة على الروايــة ..

كل متابع يكتب رأي جميل للنهاية لهذا الرواية المميــزة

تعليقاتكم وأرآئكـم اكتبوها ع  تعليقات القناه 👇