Өфөнөң Затон биҫтәһендә яңы мәктәп асылды

1225 урынға иҫәпләнгән мәғариф учреждениеһы баш ҡалала иң ҙур мәктәптәрҙең береһе һанала. Миловка урамындағы объект «Мәғарифты үҫтереү» дәүләт программаһы буйынса төҙөлгән. Заманса бинала бөтә кабинеттар ҙа интерактив таҡталар менән йыһазландырылған, Интернет үткәрелгән. Йылдам үҫешкән микрорайонда сафҡа ингән белем усағында уҡыусыларға барлыҡ уңайлы шарттар тыуҙырылған.

Халыҡ һайланыусылары студенттар алдында яуап тотто

Баш ҡалала республиканың алдынғы юғары уҡыу йорттарында уҡыусылар Дәүләт Думаһы депутаттары менән осрашты. Һорауҙар төрлө. Буласаҡ идарасыларҙы етәкселек эше, халыҡ менән мөнәсәбәттәр һәм ил кимәлендә эшләгән федераль проекттар үҙенсәлектәре ҡыҙыҡһындыра. Әңгәмә барышында депутаттарға бирелгән иң ҡыҙыҡлы өс һорау һайлап алынды. Уларҙы биреүсе студенттар Мәскәүгә Федераль йыйылыштың түбәнге палатаһы эшмәкәрлеге менән танышырға саҡырылды.

Ҡоролтайҙа либерал демократтар мәғариф мәсьәләләре буйынса асыҡ һөйләшеү уҙғарҙы

Либерал демократтар менән асыҡ һөйләшеү. Дәүләт Йыйылышы-Ҡоролтайҙа партия ағзалары мәктәп уҡыусылары, студенттар, уҡытыусылар һәм ата-әсәләр менән көнүҙәк мәсьәләләр буйынса фекер алышты. Осрашыуға иҫке ятаҡтарға урындар, уҡытыусылар етешмәүе, уҡыу йортон тамамлағандан һуң эшкә урынлашыу проблемалары сығарылды.

Өфөлә «Бәхетле көмөш» проектының дүртенсе төркөмө асылды

Республикала 60 йәштән өлкәндәр өсөн проект 2024 йылдан алып уҙғарыла. Былтыр программа конкурста ҡатнашып Өфө ҡалаһы башлығы грантын отҡан. Сираттағы төркөмдә иллегә яҡын оло быуын кешеһе иҫәпләнә.

«Юлдаш»тар концерт менән Әбйәлилдә сығыш яһаны

Тамашаға төбәктең Ишбулды ауылы радио хеҙмәткәрҙәре ойошторған «Атайсалға изге эштәр» конкурсында еңеү яулауҙары сәбәпсе булды. Ике көнлөк ижади сәфәр барышында юлдаштар шулай уҡ урындағы «Ахай» хоккей командаһы менән иптәштәрсә матч та уҙғарҙы. Сара махсус хәрби операцияла батырҙарса һәләк булған Ишбулды ауылы ир-егеттәре иҫтәлегенә арналды.

Бөрөлә күлгә батҡан һарыҡ кәүҙәләре Алабуға ҡалаһына оҙатылған

Улар махсус предприятиела эшкәртелә, тип хәбәр итәләр Ветеринария буйынса дәүләт комитетынан. Был хәл уҙған йылдың декабрендә була. Бөрө районында һарыҡтар боҙға сыға һәм һыуға бата. Күлдән 1 мең 340 үлек алына. Көтөүҙәге бер генә һарыҡ иҫән ҡала.

Башҡортостан ауыл хужалығында автоматлаштырылған комплекстар ҡуллланыла

Һөтсөлөк тармағында 37 робот системаһы бар. Уларҙың 20-еһе 2025 йылда файҙаланыуға тапшырылған. Быйыл тағы 20 ошондай комплексты сафҡа индереү планлаштырыла, тип белдерҙе вице-премьер-Ауыл хужалығы министры Илшат Фәзрахманов. Башҡортостан предприятиеларында уҙған йылда һатыу өсөн 780 мең тонна һөт етештерелгән.

Мәләүез халҡы МХО биләмәһендәге яҡташтарына оҙатҡан сираттағы гуманитар ярҙам барып етте

Мәләүез халҡы махсус хәрби операция биләмәһендәге яҡташтарына оҙатҡан сираттағы гуманитар ярҙам барып етте. Был юлы йөк ике машинаға тупланды. Ылауға аҙыҡ-түлек, йылы кейемдәр, төҙөлөш материалдары, шулай уҡ яугирҙарҙың көнкүрешен яҡшыртыу өсөн кәрәкле ҡорамалдар тейәлгән. Уны оҙатыуҙа Дәүләт думаһы депутаты Зариф Байғусҡаров та ҡатнашты. Ул да гуманитар ярҙамға үҙ өлөшөн индергән.

Өфөлә 96-сы йәшендә Марат Муллағәләмовтың йөрәге тибеүҙән туҡтаны

Башҡортостан йәмәғәтселеге оло юғалтыу кисерҙе. Өфөлә 96-сы йәшендә Башҡортостан ветерандар советының элекке рәйесе Марат Муллағәләмовтың йөрәге тибеүҙән туҡтаны.

Баймаҡ агросәнәғәт колледжы «Агропрофессионалитет» федераль программаһына инде

Быйылдан Рәсәйҙә аграр колледждарҙы үҫтереүгә йүнәлтелгән «Агропрофессионалитет» программаһы тормошҡа ашырыла башланы. Конкурсҡа илдең 18 төбәгенән 18 проект һайлап алынған. Икәүһе Башҡортостандан. Улар иҫәбендә Баймаҡтың Зәкәриә Аҡназаров исемендәге Урал аръяғы агросәнәғәт колледжы ла бар.

Республика балалар дауаханаһында ваҡытынан алда тыуған игеҙәктәрҙе аяҡҡа баҫтырҙылар

Республика балалар дауаханаһы табиптары ваҡытынан алда тыуған игеҙәктәрҙе стационар шартарҙа ҡарап тейешле ауырлыҡҡа еткерҙе. Яңы тыуған сабыйҙар санавиация менән Мәсетле районынан килтерелгән. Башта уларҙың ауырлығы 1 кг 800 грамм була. Әммә табиптарҙың тырышлығы менән сабыйҙар күҙгә күренеп үҫә башлай. Аҙна аҙағында улар дауахананан әсәләре менән бергә өйҙәренә ҡайтасаҡ. Етлекмәй тыуған сабыйҙарҙы тәрбиәләү һәм медицна хеҙмәтләндереүе нисек ойошторолған?

Иҫке Абзанда Урындағы башланғыстар программаһы буйынса һыу башняһын яңыртырға ниәтләйҙәр

Благовар районының Иҫке Абзан ауылы халҡы Урындағы башланғыстарҙы яҡлау программаһы буйынса һыу башняһын алыштырырға иҫәп тота. 55 йыл элек төҙөлгән башня сафтан сыҡҡан. Ауылда йәшәүселәр быйыл конкурста ҡатнашып уны яңыртырға ниәтләй. Ауыл халҡы республика программаларында әүҙем ҡатнаша. Быға тиклем улар конкурста еңеп зыяратты кәртәләгән.

Мәскәү башҡорттары ҡоролтайы эшенә йомғаҡ яһап, киләсәккә маҡсаттар билдәләне

Мәскәүҙә йәшәүсе башҡорттар ҡоролтай эшенә йомғаҡ яһап, киләсәккә бурыс-маҡсаттар билдәләне. Республиканың тулы хоҡуҡлы вәкиллегендә ойошманың отчет конференцияһы үтте. Тәүҙә Мәскәү башҡорттары ҡоролтайының яңы рәйесе һайланды. Хәҙер ойошманы Дәүләт мәғариф университеты уҡытыусыһы Алһыу Буш етәкләй.

Башҡорт хореография колледжы «Бейеү күңеле» абруйлы премияһына лайыҡ булды

Рудольф Нуриев исемендәге Башҡорт хореография колледжы «Бейеү күңеле» премияһына лайыҡ булды. Абруйлы награда Рәсәйҙең мәҙәниәт министрлығы менән «Балет» журналы мөхәрририәте тарафынан 30 йыл элек булдырылған.

Ҡыпсаҡ-Асҡар ауылы урындағы башланғыстар программаһы буйынса МТЗ тракторы алырға ниәтләй

Әлшәй районы Ҡыпсаҡ-Асҡар ауыл биләмәһе йыл һайын урындағы башланғыстарға ярҙам программаһында ҡатнаша. Уның ярҙамында байтаҡ эштәр башҡарыла, атап әйткәндә һыу башняһы һатып алынған, зыяраттар ҡоймаһы яңыртылған, мәҙәниәт йорто тәҙрәләре алмаштырылған.

Владимир Путин Владислав Бочаровҡа үлеменән һуң Рәсәй Геройы исеме бирҙе

Владимир Путин Белорет ҡалаһында тыуып үҫкән Владислав Бочаровҡа үлеменән һуң Рәсәй Геройы исеме бирҙе. Алтын йондоҙҙо бөгөн махсус хәрби операцияла һәләк булған гвардия капитанының ата-әсәһенә Башҡортостан башлығы Радий Хәбиров һәм Балтик флоты командующийы Сергей Липилин тапшырҙы.

Башҡортостандың дүрт яугиры Батырлыҡ ордены менән бүләкләнде

Рәсәйҙең юғары дәүләт наградалары тағы дүрт яҡташыбыҙға бирелде. Владимир Путин Указына ярашлы, сержант Фәрит Ғәбделбаянов, рядовойҙар Сергей Медведев менән Шамил Тимербаев һәм ефрейтор Руслан Юлдашев һәләк булғандан һуң «Батырлыҡ ордены» менән блдәләнде. Наградаларҙы яугирҙарҙың ғаиләләре ҡабул итте. Дәрәжә, ғәскәрҙәр төрлө, әммә уларҙы бер тойғо -тыуған илгә һөйөү, батыр йөрәк берләштерә, тине республика етәксеһе Радий Хәбиров.

Өфөлә урамдарҙы төҙөкләндереү һәм тарихи биналарҙы яңыртыу мәсьәләләре ҡаралды

Радий Хәбиров рәйеслегендә уҙған «Йәмәғәт киңлектәре сәғәте»ндә Өфө урамдарын төҙөкләндереү һәм тарихи биналарҙы яңыртыу мәсьәләләре тикшерелде. Баш ҡала хакимиәте башлығы Ратмир Мәүлиев хәбәр итеүенсә, ҡаланың 450 йыллығына 19 мәҙәни мираҫ объектының фасадтары ремонтланған.

30 ғинуарҙа Радий Хәбиров Дәүләт Йыйылышы-Ҡоролтайға йыллыҡ мөрәжәғәтнамә менән сығыш яһай

Башҡортостан башлығы 30 ғинуарҙа Дәүләт Йыйылышы-Ҡоролтайға йыллыҡ мәжәғәтнамә менән сығыш яһай. Унда Радий Хәбиров республиканың төп үҫеш йүнәлештәрен һәм артабанғы эштең өҫтөнлөктәрен билдәләйәсәк.
Йыллыҡ мөрәжәғәтнамәне Башҡортостан юлдаш телевидениеһы, «Сәләм», «Башҡортостан 24» һәм «Вся Уфа» телеканалдары тура эфирҙа күрһәтәсәк, шулай уҡ трансляция төбәк башлығының социаль селтәрҙәрендә буласаҡ. Сара иртәнге сәғәт 10-да башлана.

Өфөлә бер төркөм яугирҙарҙы махсус хәрби операция биләмәһенә оҙатыу сараһы үтте

Ҡыҫҡа ваҡытлы ялдан һуң йәнә яуға. Өфөлә бер төркөм яугирҙарҙы махсус хәрби операция биләмәһенә оҙатыу сараһы үтте. Ватан һаҡсылары ял осоронда ғаиләре менән булып көс-дәрт туплаған, көндәлек эштәр башҡарған. Яугирҙар алдында республика хөкүмәте премьер-министры урынбаҫары Ирек Сәғитов сығыш яһап, яҡташтарыбыҙға хәйерле юл теләне.

Башҡортостанда пилотһыҙ системалар ғәскәренә контракт буйынса хеҙмәткә ҡабул итеү дауам итә

Хәтерегеҙгә төшөрәбеҙ,яңы төр ғәскәр былтыр ил Президенты һәм Ҡораллы көстәр министры ҡарары буйынса ойошторолдо. Ғафури районында йәшәүсе хәрби хәрәкәттәр ветераны Илья Макаров махсус операция башланғандан алып һуғышта дрондар менән ҡулланған. Хәҙер ул яугирҙарҙың һәм уларҙың яҡындарының мәсьәләләрен хәл итеүҙә ярҙам итә. Фронттан ҡайтҡас, ир хәрби комиссариатта эшләй документтар рәсмиләштерә һәм Ватанды яҡларға барырға йыйынғандарға консультациялар бирә.