Башҡортостан ауыл хужалыҡтары «Һөт иле» фестиваленә әҙерләнә

2 сентябрҙә уҙасаҡ сарала һөтлө продукцияны тәмләп ҡарау ғына түгел, бәләкәй ферма менән танышырға мөмкин буласаҡ. Унда республиканың төрлө төбәктәренән аграр хужалыҡтар үҙенсәлекле мал тоҡомдары менән таныштырасаҡ. Благовещен районында йәшәүсе Фәрхетдиновтар байрамға иң һөтлө кәзә тоҡомдарын алып киләсәк. Хужалыҡта кәзә һөтөнән ҡымыҙ етештереү менән шөғөлләнәләр.

Республика предприятиеларын Ҡаҙағстанға саҡыралар

Бизнес-сәфәр 23 сентябрҙә Астана ҡалаһына була. Тышҡы иҡтисади бәйләнештәр һәм конгресс эшмәкәрлеге министры Маргарита Болычева белдереүенсә, Ҡаҙағстан Башҡортостанда төп партнерҙарының береһе булып ҡала. Быйыл ярты йыл тауар әйләнеше 4,4 процентҡа артҡан. -Ҡаҙағстанға беҙҙән башлыса химия сәнәғәте продукцияһы оҙатыла. Шулай уҡ аҙыҡ-түлек, ағас һатыла. Сауҙаны үҫтереү өсөн һәр ваҡыт яңы мөмкинлектәр эҙләйбеҙ, - тине Маргарита Болычева.

Өфөлә халыҡ-ара марафонға әҙерлек бара

Спорт байрамында ете меңгә яҡын йүгерергә яратыусы, скандинав йөрөшө, роллер спорты менән мауығыусылар йыйыла. Өфө халыҡ-ара марафоны баш ҡала халҡы һәм ҡунаҡтарҙың яратҡан сараларының береһе. Туғыҙынсы тапҡыр Рәсәйҙәге иң уңайлы трассаларҙың береһе һәм баш ҡаланың тарихи үҙәге буйлап йүгерергә тәҡдим итәбеҙ, - ти марафон директоры Дмитрий Бабин. “БегуПомогу” хәйриә акцияһына ярашлы, сарала ҡатнашыусылар үҙҙәре теләгән тиҙлектә йүгерә һәм Өфөләге хәйриә фондтарына ярҙам итә ала. Әлегә “Өфө хосписы”, “Мәрхәмәт” һәм башҡа Өфө фондтарына 805 мең һумдан ашыу аҡса күсерелгән. Өфө халыҡ-ара марафоны 3 сентябрҙә уҙа.

2025 йылдан Рәсәйҙә урман хужалығының яңыртылған дәүләт реестры эшләй башлай

“Һанлы урман” концепцияһына ярашлы, оҙаҡ йылдар тупланған мәғлүмәтте һанлаштырыу көтөлә. “Яңы реестрҙа урман хужалығы ойошмалары күрһәткән дәүләт хеҙмәттәренең бер өлөшө электрон төргә күсерелә”, ти Урман хужалығы министры урынбаҫары Венер Вәхитов. Рәсәйҙә электрон рәүештә бирелгән күсермәләр һаны буйынса Башҡортостан Мәскәү өлкәһенән ҡала 2-се урында килә. Һанлаштырыу урман хужалығын һаҡлау, тармаҡ белгестәренең эшен еңелләштереү өсөн ойошторола.

Күмертауҙа Юрий Шатуновҡа таҡтаташ асыла

Ул йырсы уҡыған 3-сө башҡорт республика гимназия-интернаты бинаһына ҡуйыла. Быға тиклем белем усағының музыка бүлмәһенә Юрий Шатунов исеме бирелгәйне.
Юрий Шатунов 1973 йылдың 6 сентябрендә Күмертауҙа тыуа. Уҙған йылдың июнендә вафат булды.

Мәктәптәрҙә ашатыу сифаты яҡшыра

Башҡортостан Хөкүмәтендә мәктәптә ашатыуҙы ойоштороу мәсьәләһе ҡаралды. Ултырышта район һәм ҡала башлыҡтары ҡатнашты. Төп иғтибар ашатыу сифатына бирелде. Йылдан-йыл етешһеҙлектәр кәмей. Былтыр ата-әсәләрҙән 60-тан ашыу ялыу теркәлһә, быйыл 6 айҙа 15 мөрәжәғәт ҡабул ителгән. Махсус комиссия аш-һыуҙы әҙерләү тәртибендә лә етешһеҙлектәрҙе аҙыраҡ асыҡлаған. Ултырышта ашатыу сифатын артабан яҡшыртыу бурысы ҡуйылды.

Башҡортостанда инвалидтар махсус һайлау участкаларында тауыш бирә ала

Республика Үҙәк һайлау комиссияһынан хәбәр итеүҙәренсә, күреү һәм ишетеү һәләтенән мәхрүм булғандар өсөн 5 урын тәғәйенләнгән. Өфөлә Инвалидтар мәҙәниәт йорто һәм медицина колледжында махсус һайлау участкалары йыһазландырыла. Стәрлетамаҡ, Бәләбәй һәм Белорет ҡалаларында ла тауыш биреү өсөн урындар була. Мөмкинлектәре сикләнгән кешеләр “Мобиль һайлаусы” алымы ярҙамында уңайлы участканы ҡарай ала. Электрон сервиста пандус, күтәргес, лифт, ярҙам саҡырыу төймәһе барлығы йәки юҡлығы күрһәтелә. Аҙаҡ “Дәүләт хеҙмәттәре” порталы йәки Күп функциялы үҙәк офистары аша теләгән урында тауыш биреү өсөн ғариза ебәрергә кәрәк. Быйыл Берҙәм тауыш биреү көнө 10 сентябргә тәғәйенләнде. Башҡортостанда һайлау участкалары иртәнге сәғәт 7-нән киске 9-ға тиклем асыҡ була.

Башҡортостанда яңы уҡыу йылынан 8 полилингваль мәктәп эшләй башлай

Бындай мәктәптәр Хәйбулла һәм Учалы райондарында асыла, Мишкә районында һәм Сибай ҡалаһында белем усаҡтары яңыса үҙгәртеп ҡорола. Күп профилле мәктәптәрҙә рус һәм башҡорт телдәренән тыш, туған һәм сит телдәр ныҡлап уҡытыла. Бөгөнгә 5 мең ярым уҡыусы полилингваль белем ала.

Башҡортостанда генерал Шайморатов ордены кавалерҙары клубы ойошторолдо

Республика Башлығы Радий Хәбиров тейешле указға ҡул ҡуйҙы. Клуб йәш быуында ватансылыҡ тойғоларын тәрбиәләү, махсус хәрби операцияла ҡатнашҡандар һәм уларҙың ғаиләләренең мәнфәғәттәрен яҡлау маҡсатынан булдырылды. Радий Хәбиров билдәләүенсә, клуб советы составына арҙаҡлы башҡорт яугирҙәрҙе, генерал Шайморатов ордены кавалерҙары индерелә. Патриотик ойошманың девизы - “Тоғролоҡ. Ҡаһарманлыҡ. Бурыс”.

Башҡортостанда федераль трасса төҙөлөшөндә импортты алмаштырыуға йүнәлтелгән пилот проект старт алды

Ҡазан-Екатеринбург М 12 трасса төҙөлөшө үҙебеҙҙә етештерелгән асфальт ҡатнашмаһынан һалына башланы. Дүртөйлө районында биш ауылды урап үтеп төҙөлгән юлды һалыу өсөн заводта сәғәтенә 200 тонна асфальт етештерелә.

1 сентябрҙән Башҡортостанда туризм һәм айырыуса һаҡланған тәбиғәт биләмәләре тураһында закон ғәмәлгә инә

Законға айырыуса һаҡланған тәбиғәт биләмәләрендә туризм критерийҙары һәм үҙенсәлектәре тураһында яңы статья индерелгән. Критерийҙар туризмды махсус йыһазландырылған урындар һәм маршруттарҙа ғына атҡарыу, мәҙәни мираҫ объекттарын һаҡлау, билдәле ваҡытҡа туристар төркөмөнөң экосистемаға зыян килтермәҫлек күләмен билдәләүҙе күҙаллай.

Башҡортостанда Салауат Юлаев батальонына көн һайын 20-гә яҡын заявка ҡабул ителә

Республика Башлығының Рәсәй Милли гвардияһы ғәскәрҙәре менән хеҙмәттәшлек буйынса кәңәшсеһе Артур Йомағужин шулай тип белдерҙе. Икенсе батальонға доброволецтар һайлап алыу 7 сентябргә тиклем дауам итә. Сәләмәтлеге яҡшы 55 йәштән кесерәк ир-егеттәр ҡабул ителә. Салауат Юлаев батальонының штабы Өфөлә Дан бульвары, 6-сы йорт адресы буйынса урынлашҡан. Стәрлетамаҡ, Туймазы ҡалалары һәм Малаяҙ ауылында ла мөрәжәғәт итергә була.

Башҡортостанда күләүектә һыу ингән айыуҙы күргәндәр

Видеояҙма «Башҡортостан тәбиғәте» телеграм каналында урынлаштырылған. Автор тайыш табанды Ҡариҙел-Таҙтүбә юлында осратыуы тураһында яҙған. Кадрҙан күренеүенсә, айыу арҡаһында ятып күләүектә табандарын таҙарта. Мауығып китеп ул хатта үҙенең янында туҡтаған автомобилгә лә иғтибар итмәгән. Шулай итеп һыу яратҡан айыу тарихҡа инеп ҡалған.

Башҡортостанда «Мәктәпкә йыйынырға ярҙам ит» хәйриә акцияһы тамамлана

1 июлдә старт алған акция барышында республиканың төрлө ойошма-предприятиелары һәм айырым граждандар ауыр тормош хәлендә ҡалған ғаиләләргә мәктәп кәрәк-яраҡтары туплауҙа ҡатнашты. Балаларға мәктәп формалары, спорт костюмдары, аяҡ кейемдәре, канцелярия тауарҙары һәм башҡа кәрәкле әйберҙәр йыйылды. Иглин районында акцияның һуңғы көндәрендә аҙ тәьмин ителгән, күп балалы ғаиләләрҙә тәрбиәләнгән һәм яҡындары махсус хәрби операцияла ҡатнашҡан балаларға мәктәп кәрәк-яраҡтары менән портфелдәр тапшырылды. Быйыл 13 тапҡыр ойошторолған акцияла район халҡы ҙур әүҙемлек күрһәткән.

Башҡортостан мәктәптәрендә яңы уҡыу йылында тағы 30 стоматология кабинеты асыла

Республика Башлығы Радий Хәбиров социаль селтәрҙә шулай тип яҙа. “Ҡанатлан!” проектының “Сәләмәт йылмайыу” модуленә ярашлы мәктәп уҡыусыларына медицина ярҙамы күрһәтелә. Белем усаҡтарында 214 теш дауалау бүлмәһе эшләй. Уҙған уҡыу йылында стоматологтар 130 меңдән ашыу уҡыусыны һәм 5 мең самаһы уҡытыусыны ҡараған.

“Айыҡ ауыл” республика конкурсы яңыса ойошторола

Хөкүмәт ултырышында сараны үткәреү тәртибенә үҙгәреш ҡаралды. Конкурс 1 августан 30 апрелгә тиклем ике өлөшкә бүлеп уҙғарыла. 1 декабргә тиклем район этабы ойошторолорға тейеш. Онлайн тауыш биреүҙә бер кеше бер ауылды ғына һайлай ала. Быға тиклем конкурста еңгән ауылдар икенсегә ҡатнаша алмай. Бүләкләү фонды 40 миллион һум булып ҡала.

Көйөргәҙелә “Башҡорт оҙон ғүмерлелеге“ проекты буйынса район маршруты булдырылған

Өлкән йәштәгеләр тарихи урындар, агрохужалыҡтар, аҙыҡ-түлек етештергән предприятиелар менән таныша. “Һаулыҡты нығытыуға ла иғтибар бүленә”, - ти район хакимиәте башлығы урынбаҫары Данил Акилов. Быйыл республикала ғәмәлгә ашырылған “Башҡорт оҙон ғүмерлелеге” проектында 14 мең ярым самаһы кеше ҡатнашҡан. 60 йәшкә еткән ирҙәр һәм 55 йәштән өлкәнерәк ҡатындар йылына бер тапҡыр бушлай сәфәр ҡыла ала.

Рәсәй компьютер спортсыларына флаг һәм гимн менән сығыш яһарға рөхсәт ителде

Халыҡ-ара киберспорт федерацияһы шундай ҡарар ҡабул иткән. Ултырышта 32 делегат ыңғай тауыш биргән. Рәсәй вәкилдәре халыҡ-ара турнирҙарҙа тулы хоҡуҡлы спортсылар булараҡ ҡатнаша ала.

Өфө, Учалы һәм Нефтекама ҡалаларында йәшлек хаустар асыла

Йәштәр өсөн махсус майҙансыҡтар селтәрен киңәйтеү тураһында Башҡортостан башлығы социаль селтәрҙәге сәхифәләрендә яҙып сыҡты. Әүҙем йәштәр бик уңайлы формат. Бер урында төрлө ойошмалар тупланған, тауыш яҙҙырыу студиялары, коворкингтар, тематик майҙансыҡтар эшләй тип билдәләгән Радий Хәбиров.

Яңы уҡыу йылынан мәктәп ашханаларында яңы туҡланыу нормалары индерелә

Балаларға ике меню әҙерләнгән. Уларҙа сәләмәт туҡланыу талаптары, диетолог һәм нутрициологтарҙың тәҡдимдәре иҫәпкә алынған. Был турала Ҡулланыусылар хоҡуҡтарын күҙәтеү федераль хеҙмәте идаралығының бүлек етәксеһе Регина Аҡмалова белдерҙе. Мәктәп ашханаһында порциялар балаларҙың йәшенән сығып талап ителгән калорийҙар күләме буйынса иҫәпләгән. Уҡыусыларға тәҡдим ителгән аш-һыу төрлөләндереп тәҡдим ителә.
Шишмә районының «Туҡланыу үҙәге «нә балаларҙы тәмле һәм файҙалы ризыҡтар менән туҡландырыу бурысы йөкмәтелгән. «Сифат йондоҙо» федераль наградаһына эйә булған ойошма эшмәкәрлеге хаҡында ентекләберәк видеояҙмала.

Журналистар өсөн Республика перинаталь үҙәгенә махсус тур ойошторолдо

Әсә наҙын бүләк итеүсе бала табыу йортона сәфәр. Матбуғат һәм киң мәғлүмәт саралары хеҙмәткәрҙәре өсөн Республика перинаталь үҙәгенә махсус тур ойошторолдо. Журналистар медицина учреждениеһының бөгөнгө мөмкинлектәре менән яҡындан танышты. Йылына 10 меңдән ашыу сабый ауаз һалған перинаталь үҙәк ил кимәлендә иң ҡеүәтлеләрҙән иҫәпләнә.