Творчая анлайн-вечарына з Андрэем Хадановічам у межах Форума ВБЎ 🌟

Гэта будзе сустрэча пра моц слова і крыніцы нашай надзеі — той самай, што мы праносім праз межы і забароны, нібы кантрабанду.

Запрашаем на цёплую імпрэзу з паэтам і аўтарам нашага канала. Вас чакаюць: новыя і выбраныя вершы, крутыя песні і каверы пад гітару, адказы на вашы пытанні (можна задаць пры рэгістрацыі!)

👉 Рэгістрацыя: https://volny-uni.eu/rehistratsyia-na-tvorchuju-sustrechu-z-andreem-khadanovicham

📆 Дата: 12 снежня
⏰ Час: 18:00 (CET)

Далучайцеся — будзе жывая паэзія, шчырасць і добры настрой 🌿

Зь нізкі "Невядомыя вершы Максіма Багдановіча"

* * *
Калісь глядзеў на сонца я,
Мне сонца апаліла нос...
Больш не палохае прагноз -
Калісь глядзеў на сонца я!

Хай заўтра выпадзе ўтрая,
А потым восень і мароз, -
Калісь глядзеў на сонца я,
Мне сонца апаліла нос.

-------

Урыўкі рыфмаванай паэзіі,
выпадкова ацалелыя
ў бутэльцы пасьля касьмічнага караблекрушэньня

Я хацеў бы спаткацца з Вамі на ву…
У ціхую сінюю но…
I сказаць:
«Бачыце гэтыя бу…
Ясныя зо…
Да іх ляціць нашае со…
I нясецца за сонцам зя…
Хто мы такія?
Толькі падарожныя, – папутнікі ся…
Нашто ж на зямлі
Сваркі і звадкі, боль і гор…
Калі ўсе мы разам ляцім
Да зор?»


З днём народзінаў, Паэце!..

📙 Ужо сёння, 16 снежня, адбудзецца анлайн-прэзентацыя кнігі Ганны Краль “Апярэдзіць Госпада Бога” па-беларуску

У межах цыклу “Санаторый пад клепсідрай“ адбудзецца анлайн-сустрэча, прысвечаная выхаду беларускага перакладу адной з найважнейшых кніг пра Халакост і чалавечую годнасць — рэпартажу Ганны Краль “Апярэдзіць Госпада Бога“.

У размове возьмуць удзел:
🔹 перакладчык — Лявон Баршчэўскі
🔹 мадэратар — Андрэй Хадановіч

Разам яны:
✅ паразважаюць пра рэпартаж як літаратурны жанр і Ганну Краль як адну з яго стваральніц;
✅ пагавораць пра аповед Эдэльмана і прысутнасць аўтаркі ў тэксце;
✅ абмяркуюць тэмы годнага жыцця і годнай смерці;
✅ звернуць увагу на асаблівасці стылю Ганны Краль і яго захаванне ў беларускім перакладзе.

📆 16 снежня
⏰18:00 BY

Глядзіце жывы эфір тут:
👉 facebook.com/PrastoraPL

Памёр аўтар YouTube-каналаў “жыццё-маліна“ і “Загляне сонца“ Мікіта Мелказёраў 🕯

Словы Андрэя Хадановіча:

Менш чым месяц таму сустракаліся зь Мікітам у Варшаве і рабілі праграму да юбілею Караткевіча...

Колькі сьвятла і добрай энэргіі, які імклівы прафэсійны рост, колькі цікавасьці да Беларусі і ўсяго беларускага, як шмат было зроблена за такі кароткі час - і як жа мала выявілася гэтага часу!.. Сьветлая памяць...

Шчырыя спачуванні родным і блізкім 💔

Дапамагчы сям'і Мікіты Мелказёрава можна тут:
👉 https://buymeacoffee.com/mikita_melkaziorau

✨ Анлайн-сустрэча “Кантрабанда надзеі“ з Андрэем Хадановічам у межах Форума ВБЎ ужо сёння

У пераднавагодні вечар хочацца крыху запаволіцца і пабыць разам. Таму запрашаем правесці гэты час з сэнсам, добрымі песнямі і вершамі.

Гэта размова для тых, каму важныя словы, што падтрымліваюць, і думкі, якія даюць апору. Для тых, хто хоча завяршыць год не ў мітусні, а ў жывой, шчырай і спакойнай атмасферы.

📝 Рэгістрацыя абавязковая:
https://volny-uni.eu/rehistratsyia-na-tvorchuju-sustrechu-z-andreem-khadanovicham

📆 Дата: 29 снежня
⏰ Час: 18:00

Далучайцеся — сустрэнем надыход новага года з думкай і надзеяй.

А вось вам, сябры і сяброўкі, разам зь віншаваньнямі, файны навагодні вершык, які паспрабаваў перакласьці.

Канстанты Ільдэфанс Галчыньскі

Хто прыдумаў ялінкі

Мае даражэнькія дзеці,
быў некалі час на сьвеце,
калі не было аніводнай ялінкі,b
і дзяцел ірваў на сабе з гора пёркі,
і плакалі горка ў лесе вавёркі,
хвасты ўздымаючы, нібы камінкі.

Той час быў цяжкі невераемна,
бо толькі ўявіце, як непрыемна
безь яліначкі на Куцьцю!
І дзеткі плакалі ў хаце на сьвяты,
а ў лесе енчылі зьвераняты:
“Дайце яінку, яінку хацю!”

Але ў адказ ім – ні слова, ні руху.
Ажно сава набралася духу:
“Так быць ня можа! Вастрыце косы!
Я тут з таварышкамі трыма
паўстаньне ўздыму, бо ялінак няма,
ёсьць толькі мак і сушаныя абрыкосы”.

І сапраўды: хоць бачылі Зорку,
але не зіхцела нічога ў падворку,
і нават ня мроіў у гэткай бядзе
ніхто пра зялёную жырандолю,
і наракалі людзі на долю,
бо ні ялінкі ня зьзяла нідзе.

Але ў хацінцы на ножках савіных
жыў той, хто выратаваць павінны іх,
меў том залаты зь зялёным пяром.
Ён крыкнуў: “Чакайце, добрыя людзі!
Зараз зраблю так, што сумна ня будзе,
будзе вам цуд са сьвятлом і дабром!”

Ну і зірніце: зь першага слова
там, дзе бязь лісьця стаяла дуброва,
хвоя зялёная ўзімку і летам!
Бо ў словах паэтаў прыемныя чары,
якія спаўняюць таемныя мары.
(А той чалавек быў якраз паэтам.)

Ён ведаў, як сьвечкі запальваць уночы,
як лялькам з гузікаў робяцца вочы
(бо ўважліва слухаў мае парады),
як майстраваць караблі папяровыя
ды напісаць неймаверныя словы і
музыку, што загучаць на Каляды.

Ён паказаў усе фокусы тыя, –
так, мае срэбныя, так, залатыя! –
як абуджаецца ўсьмешка на твары,
як распускаюцца ўверх фаервэркі,
полымем сьвечак як зьзяюць люстэркі,
бы чарадзейскія акуляры.

Зараз вам, хлопчыкі і дзяўчынкі
ведама ўжо, хто прыдумаў ялінкі?
Ці разабраліся ў гэтым?
Хорам усе: “ЗАЛАТЫ ЧАЛАВЕК,
ШТО НА САВІНЫХ НОЖКАХ ЖЫВЕ,
БЫЎ, ЁСЬЦЬ І БУДЗЕ ПАЭТАМ!”

Вось жа, затанчыць сьнег навагодні –
ты не забудзь, павіншуй найлагодней
пана таго, што пануе над вершамі,
ліст напішы на лісточку канвалі,
а мы тэлеграмаю павіншавалі,
бо моцна любім і згадваем першымі.

1948

✨ Андрэй Хадановіч віншуе са святам Трох Каралёў і таксама перадае святочнае прывітанне тым, хто святкуе Каляды па ўсходнім календары, — перакладам правансальскай калядкі.

Гэтая песня пісалася на замову творцы, які сёння знаходзіцца за кратамі.

Чакаем на волі, каб разам праспяваць святочную кампазіцыю 🎶

Гэта апошні выпуск на канале «Загляне сонца» з Мікітам Мелказёравым

Мікіта, вялікі дзякуй за тваю асветніцкую працу!

Праект пакуль становіцца на паўзу. Нам таксама трэба час, каб прыйсці ў сябе і зразумець, што рабіць далей. А пакуль калі прапусцілі нейкія выпускі – паглядзіце, калі ласка. Тут шмат цікавага кантэнту, які дапаможа працягнуць беларусець разам ❤️‍🩹

Каманда канала «Загляне сонца»