بعيدا عن كل شيء، هذه اللقطة ستخلد في التاريخ، شخصية لاعب بهذه القوة وين يتخذ قرار مثل هذا ويؤمن انه سيعود وسيتوج وكأنه مؤمن بقدر الله وقضاءه، ساديو قصة جميلة، قصة رجل جعل العالم كله ينظر إليه كبطل.

اليوم بدون أدنى شك هو بطل قومي في بلده وبل حتى في إفريقيا، الرجل الذي غير مدينته كلها بالأعمال الخيرية، يبقى مثال للشاب المسلم الذي حتى وان لعب في أعلى مستوى لم تغره الدنيا وبقى وفيا لأصله وشعبه، وتقدر تحوس على قرية بامبالي كيفاه كانت وكيف اصبحت.

الـ Infinix GT 30 Pro راهو هنا! إنفينيكس حبت تدير تخرج بخلطة تجمع بين ديزاين شباب وأداء مديور سبيسيال للجيـمرز، وحتى الاكسسوارات ما نساوهمش.

بصح السؤال المهم: قاسوها صح! وقدروا يوصلوا للتوليفة المناسبة!

هنا نظرة اولى، والمراجعة الكاملة راهي جاية في الطريق.. قولولي في التعليقات واش هي الحاجة اللي حابين نركزو عليها بزاف؟"

لازم نحكيو في هذا الموضوع

علابالي راهي تالفة مع ضريبة المقاول الذاتي والكاسنوس كل واحد وش راه يغني!

هنا نشرحلك كلش بطريقة مبسطة مرحبا بيك

واذا عندك سؤال اتفضل!

🔴 ملخص Tech Feed للأسبوع:
▪️ محلياً: مرسوم رئاسي جديد يفرض هياكل للأمن السيبراني في المؤسسات 🇩🇿
▪️ أجهزة: أبل تجهز في منافس لـ OpenAI (جهاز يتعلق في الحوايج).
▪️ منصات: خوارزمية X ولات Open Source، ويوتيوب يطلق نسخ AI.
▪️ نقاش: الجانب الخفي لزيارة IShowSpeed للجزائر.
تفرجو الحلقة كاملة وشاركونا رايكم 👇
#TechFeed #1001Tech

وصلتني رسالة من عند أم.. والله حسيت بكل كلمة كتبتها، لأنها تحكي وجع بزاف عائلات راهم ساكتين عليه.
قالت: "وليدي يقرا سنة رابعة ابتدائي، بصح كان عايش في عالم موازي. يدخل من المدرسة، يرمي المحفظة، ويرفد الهاتف. عينيه في الشاشة، ما يسمعش كي نعيطلو، وجهو دايما شاحب، وإذا طفيتلو الويفي ولا خلاصت لاباتري.. الدار تولي جحيم من العياط والعصبيةـ والقراية والتركيز ربي يجيب"

وكملت تحكي انو اللحظة اللي خلاتها تبدل كلش "واحد الليلة شفتو راقد والهاتف تحت مخدتو، حسيت بالذنب يقطع في قلبي. حسيت بلي أنا اللي دمرتو بيدي كي عطيتو هاد 'المخدر الرقمي' باش نسكتو. قررت في ديك الليلة.. لازم ننقذ وليدي."

رحلة الـ 5 أشهر (من الإدمان إلى الإبداع) 🔄 التغيير ما جاش بالساهل، كانت "حرب" تاع صبر وحكمة:

المرحلة الاولى (الفطام الذكي): سحبت الهاتف نهائياً. البديل كان "تابلات" بصح ماشي لليوتيوب والتيك توك، فيها ألعاب فقط ووقت محدد (ساعة في النهار). الطفل كان يقلق فاللول، بصح بدا يتعود.

المرحلة الثانية : هنا كانت النقلة. الأم شرات ألعاب تركيب (Puzzle) وألعاب ذكاء يدوية. قالتلي: "نهار ركب أول طائرة بقطع التركيب ونجح، شفت في عينيه لمعة وفرحة ما شفتهاش وهو حاكم التليفون. حس بنشوة الإنجاز الحقيقي"، وبالتشاور مع باباه ولا يدي وقت باش يعاونوا حتى ولاو يلقاوا روحهم يلعبوها كامل كيف كيف.

واخيرا: التليفون ولا يبانلو حاجة "تافهة" ومملة مقارنة بالتحدي اللي يلقاه في الألعاب الحقيقية.

الصدمة كانت في المدرسة! 🏫 بعد مدة قصيرة، المعلمة عيطت للأم. الأم تخلعت، قالت بالاك دار مشكل. بصح المعلمة قاتلها بذهول: "مدام، واش درتي لوليدك؟ راهو إنسان آخر! التركيز تاعو رجع خارق، المشاركة تاعو زادت، وحتى خطو ولغتو تحسنو.. وليدك تبدل!".

النهاية السعيدة.. وبداية جديدة 🚀 اليوم، هاد الطفل راهو راقد مهني، عصبيتو راحت، ونتائجو الدراسية في القمة. والأم راهي تخمم تسجلو في مدرسة لتعليم البرمجة والروبوتيك، لأنها اكتشفت بلي وليدها عندو عقلية هندسية كان دافنها التيك توك والألعاب التافهة.

العبرة لينا كامل: التليفون ساهل باش "تهني راسك" من وليدك، بصح راك تقتل في مستقبلهم ببطء. البديل كاين، ويحتاج منك شوية صبر برك.

شكون فيكم عاش نفس التجربة؟ واش هي الحيلة اللي نفعت مع ولادكم؟ 👇

ارواح تتعلم كيف تستعمل الذكاء الاصطناعي في التدريس… مجانًا… ومن عند العم Google 😮🔥

تحصل الان على شهادة Gemini Certified Faculty من Google for Education وهي اعتماد عالمي يثبت قدرتك على توظيف الذكاء الاصطناعي في:
– تصميم المقررات
– دعم الطلبة
– البحث الأكاديمي
– وتطوير طرق التدريس الحديثة

الدورة اسمها: 🧠 الذكاء الاصطناعي التوليدي للمعلمين
ومجانية 100% + شهادة رسمية في الأخير ✔️

الدورات مفتوحة للجميع عبر منصة Google for Education،
وتقدر تبدأ من اليوم وتبني مهارة مطلوبة عالميًا 🌍

📌 روابط التسجيل:
educertifications.google/registration/4
edu.exceedlms.com/student

بصراحة…هكذا فرص ما تتعاودش كل يوم.
استغلها، طور روحك، وخلي الذكاء الاصطناعي يخدم معاك مش ضدك

رسميا تعليق الدراسة بسبب الرياح المترقبة.

ان شاء الله تكون سلامت، خوذوا حذركم.

مع تغيرات الطقس الأخيرة في الجزائر والنشريات الجوية المتتالية، بدون تهوين او تهويل وبفضل التكنولوجيا، يمكنك الآن تحويل هاتفك إلى محطة رصد جوي دقيقة لمتابعة حركة الرياح لحظة بلحظة.

هنا أفضل تطبيقين مجانيين يعتمد عليهما الخبراء والمحترفون، وهما متوفران على أندرويد و iOS.

✅ تطبيق Windy-com (الأفضل بصرياً)
يعتبر الخيار الأول لهواة الطقس والطيارين. يتميز بعرض خرائط حرارية متحركة توضح اتجاه الرياح بدقة متناهية.

الميزة: يعطيك توقعات دقيقة بناءً على نماذج عالمية مثل ECMWF.

لماذا نستخدمه الآن؟ يمكنك رؤية "هبات الرياح" القوية وتوقيت دخولها لولايتك بالتحديد.

✅ تطبيق Windfinder (الأكثر بساطة)
إذا كنت تبحث عن الأرقام المباشرة والسرعة بالكيلومتر في الساعة دون تعقيد الخرائط، فهذا التطبيق هو وجهتك.

الميزة: يوفر تقارير من أقرب محطة رصد جوي لموقعك الجغرافي.

لماذا نستخدمه الآن؟ ممتاز لمعرفة ما إذا كانت الظروف تسمح بالقيادة على الطرقات السريعة أو التنقل بين المدن.

وبطبيعة الحال الانسان يلتزم بالنشريات الخاصة وماتنشره جهات مختصة مثل الحماية المدنية.

ارواح تسمع هدي الكارثة لي صرات في واشنطن!

تخيل معايا.. راك في قلب واشنطن، وتحديداً في الوكالة لي مهمتها تحمي أمريكا من الهاكرز والهجمات الإلكترونية تاع روسيا والصين (CISA). يعني هاد المكان هو القلعة الرقمية تاع العالم.

صحا شكون المسؤول الكبير تم؟ حبيبنا"مادهو" (Madhu Gottumukkala). هذا ماشي مجرد موظف، هذا هو المدير بالإنابة، يعني هو اللي يعطي الأوامر ويقول للناس "بالاكو تحطو أسراركم في الإنترنت".

واش دار السي مادهو؟ حب يسهل على روحو الخدمة كيما بزاف ناس، راح لـ ChatGPT وتحمس شويا وبدا يرفع في ملفات ومستندات حكومية حساسة ومكتوب عليها "للاستخدام الرسمي فقط". قالك نخلّي الذكاء الاصطناعي يديرلي الملخص ويربحلي الوقت.

اتصور هذا راني نقولك رأس الهرم واكثر واحد علابالوا بلي أي حاجة تكتبها في ChatGPT تولي ملك للشركة ويقدر أي واحد يوصل ليها بطريقة غير مباشرة!

المفارقة، "مادهو" طلب استثناء باش يفتحولو ChatGPT (لأنو محظور على الموظفين العاديين)، بصح نسى بلي "السيستام" ما يرحمش وما يفرقش بين الوجوه.

غير بدا يرفع في الملفات، أنظمة الإنذار تاع الوكالة نفسها شعلت الضو الأحمر! حبس كيما راك، النظام رصد "تسريب بيانات" وفضح العملية فوراً. تخيل الموقف: النظام اللي هو مسؤول عليه، هو اللي كشفو وبعث إنذارات للإدارة بلي "المدير راهو ثقبها!".

دورك وش نقولوا الذكاء الاصطناعي ضد الغباء البشري ولا كيفاه!

بلا منحكيلك على سرعة انتشار الخبر وكيفاش، اصبح نكتة في العالم التقني.

الرقمنة مليحة، بصح الوعي قبل كل شيء...!

حلقة مجنونة هذا الأسبوع في #TechFeed 🔥
من تيك توك لي ولات "TikTok U.S."، لمدير الأمن الأمريكي لي سرب أسرار بلادو للذكاء الاصطناعي! 😂
في هذا الفيديو:
✅ رسمياً: تيك توك تولي شركة أمريكية لتفادي الحظر.
✅ فضيحة: مدير CISA يحصلوه يستعمل ChatGPT بملفات سرية!
✅ صدمة: واتساب متهم بالتجسس على الرسائل.. التشفير كذبة؟
✅ للجزائريين: RedotPay تدخل لـ Apple Wallet أخيراً 💳
✅ فرنسا: منع السوشيال ميديا على أقل من 15 سنة.
🔴 سؤال الحلقة: فرنسا منعت الهواتف في الثانويات.. مع ولا ضد تطبيق هذا القانون في الجزائر؟ 👇

غدا يوم مميز لينا في 1001 TECH ان شاء الله تجربة جديدة في بلد جديد، لتغطية حدث عالمي، المؤتمر هذا حاضرين فيه كإعلام متخصص في المجال التقني، كل هذا بفضل الدعم ديالكم المستمر وإنتقاداتكم وتشجيعكم لينا، الهدف دوما الرقي بالمحتوى الجزائر في المجال التقني.
تقدروا تعرفوا هذا الحدث وين؟ وشكون هو؟

البارحة تكلمنا عن تجربة جديدة نستعد لها،
اليوم نحن متواجدون في قطر كإعلام تقني لتغطية حدث #WebSummit في نسخته التي تقام في الدوحة #websummitqatar

الإفتتاح كان منذ قليل لهذا الحدث العالمي، هذا العام الحدث بالأرقام:

✅ نحكوا على أزيد من 30,000 مشارك جاو من كتر من 120 دولة، يعني الحضور تضاعف مقارنة بأول نسخة.

✅ كتر من 1,600 شركة ناشئة، كامل جاو باش يعرضوا ابتكاراتهم.

✅ أكثر من 700 مستثمر عالمي راهم هنا يفتشوا على المشاريع اللي عندها مستقبل.

✅ فوق 400 متحدث من كبار المسؤولين والتقنيين، على رأسهم مؤسسي شركات كيما Canva وRunway وElevenLabs.

✅ نحكيوا على العارضين لي راهم شركات كبار مثل مايكروسفت، آمازون، META، IBM وغير الكثير ...

خلال الإفتتاح كانت جلسة حوارية مع عصام حجازي مؤسس منصة التواصل لي راه صانع الحدث في العالم UpScrolled، والذي تأسس لمجابهة الطغيان لي راه واصل في المنصات الأخرى، خاصة وان مؤسسه من اصول فلسطينية، واعلن من خلال الافتتاح بأن المنصة وصلت لأكثر من 2 مليون مستخدم.
تابعوا كامل التغطية خلال صفحتنا ومن خلال الستوريات، وادا عندكم افكار شاركونا في التعليقات.

حلقة جديدة من Tech Feed مع عبد الحق! 🔥

سفرية جديدة جاية على الأبواب 👌

​بريد الجزائر في ذكرى الرابعة والعشرين لتأسيسه وفي حدث خاص يعلن عن خدمات جديدة،
الهدف حسب المسؤولين عن المؤسسة هو الدخول لمرحلة جديدة وعصرية، والهدف هو القضاء على طوابير الانتظار وتعقيدات التوصيل.
وزير البريد سيد علي زروقي أعلن عن "ثورة رقمية" حقيقية في القطاع، وهذي المرة كاين 3 حاجات جدد لازم تعرفوهم:
✅ شبكة "الخزائن الذكية" (Smart Lockers): أخيراً خدمة EMS Champion Smartbox شافت النور. يعني كي تشري حاجة، السلعة تجيك لـ "خزانة ذكية" قريبة ليك، وتفتحها بكود يلحقك في تيليفونك 24/7 بلا ما تبقى تستنى الموزع.
✅ الموقع الإلكتروني بحلة جديدة: المؤسسة أطلقت الموقع الرسمي بتصميم عصري وجديد كلياً. الواجهة ولات أسهل، والوصول للخدمات عن بعد صار أسرع وأوضح للمواطن، باش تنقص التنقل لمراكز البريد.
✅ الحسابات غير النقدية (Cashless Accounts): خدمة لتعزيز الدفع الإلكتروني تخليك تسير دراهمك وتخلص مشترياتك رقمياً 100% بلا ما تحتاج ترفد الكاش.
الوزير أكد بلي هذي غير البداية، والهدف هو تحسين جودة الخدمة وتوسيع شبكة الشبابيك الآلية (GAB).
في انتظار ايضا النسخة الجديدة من بريدي موب التي يتم العمل عليها ومن المتوقع ان نراها في السداسي الأول لهذا العام، ان شاء الله.

اذا مباشرة من مصر والقاهرة بالتحديد والحضور كإعلاميين لتغطية مؤتمر AI EVERYTHING من تنظيم GITEX

الحدث مهتم بكل جديد الذكاء الاصطناعي والتركيز بطبيعة الحال على المشرق الاوسط و شمال افريقيا، بحضور قوي لمختلف الشركات العالمية، ربما أهمها مايكروسوفت وسيسكو،Red Hat، كنظرة اولى المعرض فيها العديد من الشركات التي تسحق النظرة عليها خاصة في مايخص التطور الكبير لي راه في المجال حاليا. والمشاريع الجديدة لي راهي يوميا.

اذا كان عند اسئلة حول المعرض او شيء تريد ان نغطيه لا تترد في ترك تعليق حوله.

هذا التوجه منا كفريق 1001Tech لحضور العديد من المؤتمرات العالمية والاقليمية لنقل التجربة للجمهور الجزائري والاحتكاك بالعالم التقني العالمي وين راه واصل.

لا تنسونا من دعائكم ودعمكم لنا بالتوقيق وشكرا.

14فيفري 💚🌳