አምባሳደር ምስጋኑ አርጋ ከተሰናባቹ የተመድ የልማት ፕሮግራም ተወካይ ቱርሃን ሳልህ ጋር ተወያዩ
******
(ኢ ፕ ድ)

የውጭ ጉዳይ ሚኒስትር ዴኤታ አምባሳደር ምስጋኑ አርጋ ቆይታቸው ካጠናቀቁት የተመድ የልማት ፕሮግራም ተወካይ ቱርሃን ሳልህን ዛሬ በጽህፈት ቤታቸው ተቀብለው አነጋግረዋል።

የተመድ የልማት ፕሮግራም ተወካይ ቱርሃን ሳልህ በበኩላቸው፤ ድርጅቱ ከብሔራዊ ምርጫ ቦርድ፣ ሀገራዊ ምክክር ኮሚሽን እና ከብሔራዊ ተሃድሶ ኮሚሽን ጋር በአቅም ግንባታ ላይ በቅርበት ሲሰራ መቆየቱን በውይይቱ ተገልጿል።

የተመድ የልማት ፕሮግራም በአገሪቱ የተለያዩ ተቋማት አቅም በማሳደግ ረገድ ያለውን ሚና አሰታወሰው፣ መንግሥት ከተመድ የልማት ፕሮግራም (UNDP) ጋር ላለው ግንኙነት ትልቅ ቦታ እንደሚሰጥ አምባሳደሩ ገልጸዋል።

አምባሳደር ምስጋኑ የተመድ የልማት ፕሮግራም በኢትዮጵያ ከአራት ዓመታት በላይ በተለያዩ ተቋማት አቅም ግንባታ ላይ ሲሰሩ የቆዩትን ቱርሃን የግል አመራር አድንቀው ለቀጣይ የስራ ጊዜ መመኘታቸውን የውጭ ጉዳይ ሚኒስቴር መረጃ ያመለክታል።

ጥቅምት 28 ቀን 2016 ዓ.ም

"ኢትዮጵያ ለዳታ ማዕከላት ልማት ትኩረት ሰጥታ እየሰራች ነው" በለጠ ሞላ (ዶ/ር)
******
(ኢ ፕ ድ)

የዲጂታል ትራንስፎርሜሽን እውን ለማድረግ ለዳታ ማዕከላት ልማት ትኩረት በመስጠት እየተሰራ መሆኑን የኢኖቬሽንና ቴክኖሎጂ ሚኒስትር በለጠ ሞላ (ዶ/ር) ገለጹ።

የዳታ ማዕከላትን ለፋይናንስ ዘርፍና ለአዳዲስ ቴክኖሎጂዎች ጅማሮ ማዋል የሚቻልበት ሁኔታ ላይ ያተኮረ ውይይት ባለድርሻ አካላትና ከፍተኛ የመንግስት አመራሮች በተገኙበት እየተካሄደ ነው።

በውይይቱ የኢኖቬሽንና ቴክኖሎጂ ሚኒስትሩ በለጠ ሞላ (ዶ/ር) ኢትዮጵያ የዳታ ማዕከላትን ለማልማት ከተለያዩ አካላት ጋር እየሰራች መሆኑን ገልፀዋል። ለአብነትም በአራት አፍሪካ ሀገራት ውስጥ አገልግሎት እየሰጠ ያለው ዊንጉ አፍሪካ በአይሲቲ ፓርክ ውስጥ ኢንቨስት ማድረጉን ጠቅሰዋል፡፡

የአይ ሲቲ ፓርክ ኮርፖሬሽን ስራ አስፈፃሚ አቶ ሄኖክ አህመድ በበኩላቸው፤ የግሉ ዘርፍ በዳታ ማዕከላት ልማት እንዲሳተፍ ምቹ ሁኔታዎች መፈጠራቸውን ገልፀዋል። ከ ዊንጉ አፍሪካ በተጨማሪም በቀጣይ ወደ ገበያው የሚገቡ አስር የዳታ ማዕከላት በሂደት ላይ መሆናቸውንም ጠቅሰዋል።

የዳታ ማዕከላት ልማት መስፋፋት የፋይናንስ ተቋማት የራሳቸውን ዳታ ማዕከል መገንባት ሳያስፈልጋቸው አገልግሎት ወደሚያቀርቡት ድርጅቶች በመሄድ መገልገል እንዲችሉ ዕድል ስለሚሰጥ ከፍተኛ ኢኮኖሚያዊ አስተዋፅኦ ይኖረዋል።

በተስፋ ፈሩ

ጥቅምት 28 ቀን 2016 ዓ.ም

በሰመራ በአንድ ቢሊዮን ብር ወጪ ለሚገነባ ሪፈራል ሆስፒታል የመሰረት ድንጋይ ተቀመጠ
*******
(ኢ ፕ ድ)

በአፋር ክልል ሰመራ ከተማ በአንድ ቢሊዮን ብር ወጪ ለሚገነባው ደረጃውን የጠበቀ ሪፈራል ሆስፒታል በክልሉ ርዕሰ መስተዳድር አወል አርባ የመሰረት ድንጋይ ተቀመጠ።

ርዕሰ መስተዳደር አወል ሆስፒታሉ ለህብረተሰቡ ዘርፈ ብዙ ጠቀሜታ እንዲሰጥና ለከተማዋ የሚመጥን ተደርጎ እንደሚገነባ ተናግረዋል።

በዋናው የአገሪቱ አውራ መንገድ ላይ የምትገኘው ሰመራ ከተማ ላለፉት ዓመታት የሪፈራል ሆስፒታል ሳይኖራት መቆየቷን ያስታወሱት ርዕሰ መስተዳድሩ የሚገነባው ሆስፒታል ከከተማዋ ነዋሪዎች ባለፈ የከተማዋን ዋናው ጎዳና ለሚጠቀሙ አካላትም እንደሚያገለግል መግለጻቸውን ኢዜአ ዘግቧል፡፡

በመሠረት ድንጋይ የማስቀመጥ ሥነ ስርዓት ላይ የተገኙት የክልሉ ጤና ቢሮ ኃላፊ ያሲን ሃቢብ በበኩላቸው እንዳሉት ሆስፒታሉ በአንድ ቢሊዮን ብር ወጪ ደረጃውን ጠብቆ ይገነባል።

የሰመራና የአካባቢው ነዋሪዎች ለዓመታት ለከፍተኛ ሕክምና ወደ ደሴ፣ መቀሌ፣ አዳማ እንዲሁም አዲስ አበባ እንደሚጓዙ አስታውሰው፣ "የሆስፒታሉ ግንባታ ሲጠናቀቅ ወደተለያዩ የአገሪቱ አካባቢዎች ለሕክምና የሚደረገውን ጉዞ ያስቀራል" ብለዋል።

የሪፈራል ሆስፒታሉ በመንግስት በጀት፣ በአጋሮች ተሳትፎ እና በህብረተሰቡ የተጠናከረ ትብብር እንደሚገነባም አመልክተዋል። ሆስፒታሉ ተገንብቶ ሲጠናቀቅ ለሰመራ ሎጊያና አካባቢው ማህበረሰብ የተለያዩ የሕክምና ዓይነቶችን እንደሚሰጥ ተመላክቷል።

ጥቅምት 28 ቀን 2016 ዓ.ም

የፓኪስታን ባለሃብቶች በኢትዮጵያ መዕዋለ ነዋያቸውን እንዲያፈሱም ጥሪ ቀረበ
*******
(ኢ ፕ ድ)

የውጭ ጉዳይ ሚኒስትር ዴኤታ አምባሳደር ምስጋኑ አርጋ በኢትዮጵያ የፓኪስታን አምባሳደር ሚያን አጢፍ ሸሪፍ ጋር የሁለቱ ሀገራት ግንኙነትን ማጠናከር በሚቻልባቸው ሁኔታዎች ዙሪያ በጽህፈት ቤታቸው ውይይት አድርገዋል።

በኢትዮጵያና በፓኪስታን መካከል በንግድ፣ በኢንቨስትመንት፣ በአቪዬሽን፣ በባህልና ቴክኒክ ድጋፍ ዙሪያ ያለውን የሁለትዮሽ ግንኙነት ማጠናከር እንደሚያስፈልግ ገልጸዋል። የፓኪስታን ባለሃብቶች በኢትዮጵያ መዕዋለ ነዋያቸውን እንዲያፈሱም ጥሪ አቅርበዋል።

አምባሳደር ሚያን አቲፍ በበኩላቸው ፓኪስታን ከኢትዮጵያ ጋር በሁለትዮሽ እና በባለብዙ ወገን ጉዳዮች ያላትን ትብብር ለማሳደግ ፅኑ ፍላጎት እንዳላት ገልፀዋል።

ኢትዮጵያ በግብርና፣ በማኑፋክቸሪንግ፣በፋርማሲዩቲካልና በኮንስትራክሽን ዘርፍ ያላትን ትልቅ የኢንቨስትመንት አቅም የፓኪስታን ባለሃብቶች እንዲጠቀሙበት እንደሚሰሩ አረጋግጠዋል።

ጥቅምት 28 ቀን 2016 ዓ.ም