በሊባኖስ የተፈጠረውን ወቅታዊ ሁኔታ ተከትሎ በችግር ላይ የነበሩ 51 ዜጎች ወደሀገራቸው ገቡ
****************
(ኢ ፕ ድ)
በሊባኖስ የተፈጠረውን ወቅታዊ ሁኔታ ተከትሎ በችግር ላይ የነበሩ 51 ዜጎች በሁለት በረራዎች ዛሬ ማለዳ ወደሀገራቸው ገብተዋል።

የውጭ ጉዳይ ሚኒስትር ቃል አቀባይ አምባሳደር ነቢያት ጌታቸው እና የአደጋ ስጋት አመራር ኮሚሽን ኮሚሽነር አምባሳደር ሽፈራው ተክለማርያም (ዶ/ር) ለዜጎቹ አቀባበል አድርገዋል።

አምባሳደር ነቢያት ጌታቸው እንደገለፁት፤ በሊባኖስ በተከሰተው ወቅታዊ ሁኔታ ለአደጋ ተጋላጭ ዜጎችን ወደሀገራቸው ለመመለስ በርካታ ስራዎች እየተሰሩ ነው።

በዚህም ዜጎቹን ለመመለስ እየተደረገ ባለው ጥረት የሚያስተባብር አመራር ወደ ሊባኖስ ተልኮ ሥራውን ጀምሯል።

በአካል እና በዲጂታል የምዝገባ ስርዓት ተዘርግቶ ዜጎች እየተመዘገቡ ይገኛሉ ያሉት አምባሳደር ነቢያት፤ ዜጎች ሊባኖስ በሚገኘው ቆንስላ ጽህፈት ቤት አማካኝነት በፈለጉት አማራጭ ተመዝግበው ወደሀገራቸው እንዲመለሱ ጥሪ አቅርበዋል።

በመጀመሪያው ዙር 51 ዜጎች በዛሬው ዕለት ወደሀገራቸው መመለስ መቻሉን አምባሳደሩ ጠቁመዋል።

አምባሳደር ሽፈራው ተክለማርያም (ዶ/ር) በበኩላቸው፤ መንግስት እያከናወነ በሚገኘው የዜጋ ተኮር ዲፕሎማሲ ተግባር በዬትኛውም ሁኔታ በችግር ውስጥ የሚገኙ ዜጎችን ህይወት ለመታደግ በአትኩሮት እየሰራ እንደሚገኝ ገልጸዋል።

ይህ ተግባር መንግስት በሀገር ውስጥ የሚገኙ ዜጎች ጉዳይ የሚያሳስበውን ያህል በተለያዩ ሁኔታዎች ከሀገራቸው የወጡ ዜጎችም ሁኔታ እንደሚያሳስበው ማሳያ መሆኑን በመግለፅ በቀጣይም መንግሥት ከተለያዩ ባለድርሻ አካላት ጋር በመሆን ለዜጎቹ የክትትል እና ድጋፍ ስራ እንደሚያከናውን ኮሚሽነሩ ጠቁመዋል።

በቃልኪዳን አሳዬ
መስከረም 28 ቀን 2017

ሥራ ፈላጊ ነዎት❓
መልካም ዕድል‼️

ታላቁ ሩጫ በኢትዮጵያ ዓለም አቀፍ የ10 ኪሜ ሩጫ የውድድር ደረጃዎች ውስጥ ተካተተ
*****
(ኢ ፕ ድ)
የዓለም አትሌቲክስ አስተዳዳሪ ዎርልድ አትሌቲክስ የ2017 ሶፊ ማልት ታላቁ ሩጫ በኢትዮጵያ ዓለም አቀፍ 10 ኪሜ ሩጫን የሌብል ደረጃ ያለው የጎዳና ላይ ውድድር ሲል ዕውቅና ሰጥቶታል።

የአለም አትሌቲክስ የሌብል ደረጃ ሲል የሰየማቸው ውድድሮች በጥራት ዝግጅቶችን ከማድረግ፣ ደህንነታቸው የተጠበቀ ከመሆን እና የተሳታፊዎች ውድድሩ ላይ የነበራቸው ቆይታ፣ የከተማ አስተዳደሮች ለዝግጅቱ ያላቸውን ድጋፍ፣ ዝግጅቱ በአትሌቲክስ ውድድር ዘርፍ አበረታች መድኃኒት ላይ ለመስራት ያለውን ቁርጠኝነት ከግምት ውስጥ ያስገባ መሆኑ ተጠቅሷል።

እጅግ በርካታ የሩጫ ውድድሮች ባሉበት ዓለም ይህንን የሌብል ደረጃ ማግኘት ዝግጅቱ ከጊዜ ወደ ጊዜ ያሳየውን ዕድገት እና በዓለማችን ካሉ ቀዳሚ እና ተመራጭ የጎዳና ላይ ውድድሮች መሀከል መሆኑንም እንደሚያሳይ ተጠቁሟል።

የአለም አትሌቲክስ አስተዳዳሪው አካል (World Athletics) ውድድሮችን በመመዘን በየአመቱ ደረጃዎችን የሚሰጥ ሲሆን፤ የመሮጫ ኮርስ ልኬት፣ የውድድር ሰዓት ምዝገባ እና የኤሊት አትሌቶች ተሳትፎ ከግምት ውስጥ የሚገቡ ጉዳዮች ናቸው።

24ኛው ዙር ታላቁ ሩጫ በኢትዮጵያ አለም አቀፍ 10ኪሜ ህዳር 8 ቀን 2017 በ50ሺ ተሳታፊዎች እንደሚካሄድ ከታላቁ ሩጫ በኢትዮጵያ ያገኘነው መረጃ ያመለክታል፡፡

መስከረም 28 ቀን 2017 ዓም

ችግሮችን ለመፍታትና ሕይወትን ለማቅለል ወሳኝ የሆነውን የአርቲፊሻል ኢንተለጀንስ አቅምና አጠቃቀም ማሳደግ ይገባል
******************
(ኢ ፕ ድ)
ችግሮችን ለመፍታትና ሕይወትን ለማቅለል ወሳኝ የሆነውን የአርቲፊሻል ኢንተለጀንስ አቅምና አጠቃቀም ማሳደግ እንደሚገባ ምክትል ጠቅላይ ሚኒስትር ተመስገን ጥሩነህ ገለጹ።

3ኛው ፓን አፍሪኮን ኤአይ 2024 "አፍሪካን በአርቴፊሻል ኢንተለጀንስ ማላቅ" በሚል ሀሳብ በአዲስ አበባ መካሄድ ጀመረ።

በመድረኩ ምክትል ጠቅላይ ሚኒስትር ተመስገን ጥሩነህ እንደገለጹት፤ ኤአይ የአፍሪካን ችግሮች ለመፍታት፣ የማህበረሰቡን ኑሮ ለማቃለል፣ ለኢኮኖሚያዊ እድገት፣ ለስራ እድል ፈጠራ፣ ለግብርና፣ ለጤና እና ለሌሎች ዘርፎች የሚያበረክተው ሚና ከፍተኛ ነው።

ችግሮችን ለመፍታትና ሕይወትን ለማቅለል ወሳኝ የሆነውን የአርቲፊሻል ኢንተለጀንስ አቅምና አጠቃቀም ለማሳደግ ሁሉም ባለድርሻ አካላት ኃላፊነታቸውን ሊወጡ እንደሚገባ አስታውቀዋል።

የኢትዮጵያ አርቲፊሻል ኢንተለጀንስ ኢንስቲትዩት የመረጃ አያያዝ ቴክኖሎጂን ማሳደግ፣ ብቁ የሰው ኃይል ማፍራት፣ የማሽን ቋንቋ ያልሆኑ ሀገረኛ ቋንቋዎችን ማሽን እንዲያውቃቸው የማድረግ እንዲሁም የግብርናውን ዘርፍ ችግሮች ከመፍታት አንጻር በርካታ ስራዎችን ማከናወኑን ተናግረዋል።

የኢትዮጵያ አርቲፊሻል ኢንተለጀንስ ኢኒስቲቲዩት ያዘጋጀው 3ተኛው ዙር ፓን አፍሪኮን ኤ.አይ 2024 ኮንፈረንስ መካሄድ የጀመረ ሲሆን፤ ዛሬን ጨምሮ ለሁለት ቀናት ይቆያል ተብሏል።

በኮንፈረንሱ የኢፌደሪ ምክትል ጠቅላይ ሚኒስትር ተመስገን ጥሩነህ፣ የፌደራል ጠቅላይ ፍርድ ቤት ፕሬዚዳንት ቴድሮስ ምህረት፣ የድሬዳዋ ከንቲባ ከድር ጀዋርን ጨምሮ የዘርፉ ባለድርሻ አካላት ተገኝተዋል።

በሄለን ወንድምነው
መስከረም 28 ቀን 2017 ዓም