ከንቲባ አዳነች አቤቤ የአደባባይ በዓላት በድምቀት ተከብረው እንዲጠናቀቁ አስተዋጽዖ ያደረጉ አካላትን አመስግነዋል
********************
(ኢ ፕ ድ)
ከንቲባ አዳነች አቤቤ በአዲስ አበባ የአደባባይ በዓላት በድምቀት ተከብረው እንዲጠናቀቁ አስተዋጽዖ ያደረጉ አካላትን አመስግነዋል።

ከንቲባ አዳነች በተለይም ከአዲስ ዓመት ዋዜማ ጀምሮ በአዲስ አበባ የተከበሩት በዓላት ፍጹም ሰላማዊ፣ የተረጋጋ፣ ደማቅ፣ ህዝቡን ባከበረ እና ላቅ ባለ ዲስፒሊን በተሞላበት መንገድ ኃላፊነታቸውን የተወጡ የጸጥታ አካላትን፣ በየደረጃው የሚገኙ የከተማ አስተዳደሩን አመራሮችን እንዲሁም መላው የከተማውን ህብረተሰብ አመስግነዋል::

የአደባባይ በዓላት ለከተማዋ ተጨማሪ ውበት እና የቱሪስት መስህብ ናቸው ያሉት ከንቲባ አዳነች አቤቤ ነዋሪውን የሰላሙ ባለቤት በማድረግ ከተማችን አዲስ አበባን ሰላማዊ እና ለነዋሪዎቿ ምቹ ለማድረግ የጀመርነውን ስራ አጠናክረን እንቀጥላለን ብለዋል::

የኢትዮጵያ ፌደራል ፖሊስ ኮሚሽነር ጀነራል ደመላሽ ገ/ሚካኤል በበኩላቸው የአደባባይ በዓላቱ በድምቀት ተከብረው ለመጠናቀቃቸው የከተማ አስተዳደሩ ከጸጥታ አካላት ጋር በቅንጅት ለሰራው ስራና ለተገኘው ውጤት አመስግነው ይበልጥ ውጤታማ ስለሚያደርገን በጋራ መስራታችንን አጠናክረን እንቀጥላለን ማለታቸውን የከንቲባ ጽሕፈት ቤት መረጃ ያመለክታል።

መስከረም29 ቀን 2017 ዓም

ለአሻም ሚዲያ የመጨረሻ ማስጠንቀቂያ ተሰጠ
****
(ኢ ፕ ድ)

የኢትዮጵያ መገናኛ ብዙሃን ባለስልጣን ለአሻም ሚዲያ ትሬዲንግ አክሲዮን ማህበር የመጨረሻ ማስጠንቀቂያ መስጠቱን አሰታወቀ።

ለአንድ ወር የሚቆይ የፋይዳ መታወቂያ የምዝገባ ዘመቻ በነገው ዕለት በአዲስ አበባ ይጀመራል

👉 በአንድ ወር ዘመቻው ከአንድ ሚሊየን በላይ ነዋሪዎችን ለመመዝገብ ታቅዷል
*******
(ኢ ፕ ድ)

የብሔራዊ መታወቂያ ፕሮግራም ጽህፈ ቤትና የአዲስ አበባ ከተማ አስተዳደር የሲቪል ምዝገባና የነዋሪነት አገልግሎት ኤጀንሲ የፋይዳ መታወቂያ ምዝገባን በጋራ እንደሚያካሂዱ አሰታወቁ።

ብሔራዊ መታወቂያ ፕሮግራም ዋና ዳይሬክተር ዮዳሄ ዘሚካኤል ለጋዜጠኞች በሰጡት መግለጫ እንደገለጹት፣ በአዲስ አበባ የብሔራዊ መታወቂያ ምዝገባ ከነገ ጀምሮ ተግባራዊ የሚደረገ ዘመቻ  ይጀመራል።

የፋይዳ ዲጂታል መታወቂያ በአዲስ አበባ ከተማ ባጠረ ጊዜ ውስጥ ለማጠናቀቅ እንደሚሰራ ጠቅሰው፣ የፋይዳ ዲጂታል መታወቂያ ምዝገባው ምንም አይነት ክፍያ የለውም ብለዋል።

የፋይዳ ዲጂታል መታወቂያ በኢትዮጵያ የዲጂታል ስትራቴጂ 2025 እቅድ አካል መሆኑን በመግለጽ ፋይዳ የሀገሪቱን የሰው ሀብት ለማወቅ ቀልጣፋና ዘመናዊ አገልግሎቶችን ተደራሽ ለማድረግ እንደሚያስችል ተናግረዋል።

የአዲስ አበባ ከተማ አስተዳደር የሲቪል ምዝገባና የነዋሪነት አገልግሎት ኤጀንሲ ዳይሬክተር አቶ ዮናስ አለማየሁ በበኩላቸው፣ የፋይዳ ምዝገባ በሁሉም ወረዳዎችና ዋና መስሪያ ቤት እንዲሁም ሁለት ቅርንጫፎች ላይ ይካሄዳል።

ለምዝገባ ሥራ የጋራ ግብረሀይል መቋቋሙን ጠቅሰው የትስስር ስርዓቱ በከተማ ደረጃ የተጀመረውን የዲጂታል አገልግሎት ለማስቀጠል እንደሚያስችል ገልጸዋል።

ዘመቻው የአዲስ አበባ ከተማ አስተዳደር የሲቪል ምዝገባና የነዋሪነት አገልግሎት ኤጀንሲ ከብሔራዊ መታወቂያ ፕሮግራም በመተባበር የሚካሄድ ነው ተብሏል።

በማርቆስ በላይ

መስከረም 29 ቀን 2017 ዓም

ጀነራል አበባው ታደሰ በደብረብርሃን የፊቤላ ኢንዱስትሪያል የመኪና መገጣጠሚያን ጎበኙ
*******
(ኢ ፕ ድ)

የጦር ሃይሎች ምክትል ጠቅላይ ኢታማዦር ሹም ጀነራል አበባው ታደሰ በደብረብርሃን የፊቤላ ኢንዱስትሪያል የመኪና መገጣጠሚያን ጎበኝተዋል።

በጉብኝቱም ላይ የኮማንዶና አየር ወለድ ዕዝ አዛዥ ሌተናል ጀኔራል ሹማ አብደታ፣ የአማራ ክልል የፀጥታ ዘርፍ ሃላፊን ጨምሮ የክልሉ የዞንና የሠራዊቱ ከፍተኛ አመራሮች ተገኝተዋል።

የፊቤላ እንዱስትሪያል ሃላፊነቱ የተወሰነ የግል ማህበር የመኪና መገጣጠሚያ ተመርቆ ስራ ከጀመረ ጊዜ ጀምሮ በርካታ ስራዎችን እየሰራ እንደሚገኝ የፕሮዳክሽንና ቴክኒክ ክፍል ሃላፊ አቶ ሳሙኤል ቀለመወርቅ ተናግረዋል።

የተሸከርካሪ መገጣጠሚያ ፋብሪካው በኤሌክትሪክ የሚሰሩ ተሸከርካሪዎችን እያመረተ የሚገኝና በሀገሪቱ ኢኮኖሚ የራሱን አሻራ ለማሳረፍ የተቋቋመ መሆኑን መግለጻቸውን ከመከላከያ ሰራዊት ማህበራዊ ትስስር ገጽ የተገኘው መረጃ ያመለክታል።

መስከረም 29 ቀን 2017 ዓም

የጦላይ ወታደራዊ ማሰልጠኛ ትምህርት ቤት ያሰለጠናቸውን ምልምል ወታደሮች ነገ ያስመርቃል
****
(ኢ ፕ ድ)

የጦላይ ከፍተኛ ባለሌላ ማዕረግተኛ ማሰልጠኛ ትምህርት ቤት በመሠረታዊ ውትድርና ያሰለጠናቸውን ምልምል ወታደሮች በነገው ዕለት እንደሚያስመርቅ አስታውቋል።

የጦላይ ከፍተኛ ባለሌላ ማዕረግተኛ ማሰልጠኛ ትምህርት ቤት ዋና አዛዥ ብርጋዴል ጄነራል ጡምሲዶ ፊታሞ ለኢፕድ እንደገለጹት፤ ለዘጠነኛ ዙር የመሠረታዊ ውትድርና ስልጠና ሲከታተሉ የነበሩ ሰልጣኞች በነገው ዕለት ይመረቃሉ።

ማሰልጠኛው ሁለገብ የሆነ ስልጠና በመስጠት ለሀገር ሉዓላዊነት የሚተጉ የሰራዊት አባላትን እያፈራ ይገኛል።

ሰልጣኞቹ በመሰረታዊ ውትድርና ማግኘት ያለባቸውን ስልጠናዎችን በተገቢው መንገድ መከታተላቸውን ተናግረዋል።

በማሰልጠኛው የሰራዊት ስነልቦና ግንባታ ቡድን መሪ ሌተናል ኮሎኔል ተከስተ አስገዶም በበኩላቸው የዘጠነኛው ዙር ሰልጣኞች ምረቃ ዝግጅት ተጠናቋል። ከደርግ ዘመነ መንግስት ጀምሮ በብሔራዊ ውትድርና እንዲሁም ከመንግስት ለውጥ በኋላም የተሃድሶና የተለያዩ ስልጠናዎች እየሰጠ እንደሚገኝ ጠቁመዋል።

በልጅዓለም ፍቅሬ(ጦላይ)

መስከረም 29 ቀን 2017 ዓም

የበለስ-መካነ ብርሃን አስፋልት ኮንክሪት መንገድ ፕሮጀክት ግንባታ 75 ነጥብ 2 በመቶ ደረሰ
****
(ኢ ፕ ድ)

በአማራ ክልል ሰሜን ጎንደር ዞን ደባርቅና ጃናሞራ ወረዳዎችን የሚያገናኘው የበለስ-መካነ ብርሃን አስፋልት ኮንክሪት መንገድ ፕሮጀክት ግንባታ አፈጻጸም 75 ነጥብ 2 በመቶ ደርሷል።

አሁን ላይ የአስር አነስተኛና ከፍተኛ ድልድዩች ግንባታ ሙሉ በሙሉ ተጠናቅቋል።

የመንገድ ፕሮጀክቱ 36 ነጥብ 42 ኪሎ ሜትር ይሸፍናል። ለግንባታው አንድ ቢሊዮን 018 ሚሊዮን 952ሺህ 362 ብር በፌደራል መንግስት ተመድቧል።

የአካባቢው የቀድሞ ገጽታ ምንም ዓይነት የመንገድ መሠረተ ልማት ያልነበረው፣ በኅብረተሰቡ ጥያቄ መሠረት ቦታው ካለው ዘርፈ ብዙ ጠቀሜታ አንጻር፣ በመንግስት ተወስኖ አሁን ላይ በአስፋልት ኮንክሪት ደረጃ በመገንባት ላይ ይገኛል።

የመንገዱ መገንባት የደባርቅና ጃናሞራ ሕዝብ በቅርበት ደረጃውን በጠበቀ መንገድ የሚያገናኝ ነው። በመንገዱ የበለስ፣ ወይና፣ ሚጊራና መሰል ከተሞች ዕድገት ያፋጥናል።

የሰሜን ተራሮች ብሔራዊ ፓርክ መዳረሻ እንደመሆኑም የቱሪዝም ዘርፉን በማነቃቃት በኩል የጎላ ሚና እንደሚኖረው የኢትዮጵያ መንገዶች አስተዳደር አስታውቋል።

መስከረም 30 ቀን 2017 ዓም