2025: Yoshlar siyosati – raqamlar va real natijalar

⚡️2025-yil davomida yoshlar bilan ishlash sohasida amalga oshirilgan chora-tadbirlar aniq raqamlar va sezilarli natijalar bilan o‘z tasdig‘ini topdi. Yil davomida ta’lim, bandlik, tadbirkorlik, sport va ijtimoiy faollik yo‘nalishlarida yoshlar uchun keng imkoniyatlar yaratildi.

Yoshlar ishlari agentligi tomonidan olib borilgan ishlar natijasida 414 mingdan ortiq yosh bandlik va tadbirkorlik dasturlari orqali qo‘llab-quvvatlandi. Hayot yo‘lida adashgan 51 mingdan ziyod yosh bilan tizimli ishlar tashkil etildi.

Yil davomida tanlovlar, festivallar, sport va ta’lim loyihalari orqali 20 milliondan ortiq yosh qamrab olindi. “Ibrat farzandlari”, “Mutolaa”, “Ustoz AI”, “Qizlar akademiyasi”, “UzChess” kabi loyihalar millionlab yoshlarni bilim va rivojlanishga undadi.

Yoshlar yetakchilari tizimi doirasida 338 nafar yosh yetakchi yuqori lavozimlarga tayinlandi, 295 nafari rag‘batlantirildi. Shuningdek, 13 213 nafar yetakchi turli o‘quv-seminarlar orqali bilim va malakasini oshirdi.

Yoshlar tadbirkorligini rivojlantirish jamg‘armasi orqali 1 300 dan ortiq yoshga imtiyozli kreditlar ajratildi. “Ko‘mak” loyihasi doirasida esa chekka hududlarda o‘quv markazi ochayotgan 100 nafardan ortiq yoshga foizsiz ssudalar berildi. “Yoshlar Ventures” orqali istiqbolli startaplarga 161 ming AQSh dollari miqdorida sarmoya kiritildi.

Yoshlar jinoyatchiligini oldini olish borasida 4 388 ta mahalla jinoyatchilikdan xoli hududga aylandi, umumiy ko‘rsatkich esa 17 foizga kamaydi.

Shuningdek, “Yoshlarni eshitamiz” ochiq muloqotlari doirasida 9 ta uchrashuv o‘tkazilib, 7 115 nafar yosh qamrab olindi hamda 1 000 dan ortiq taklif va tashabbuslar bildirildi.

Batafsil: gov.uz/yoshlar

🕊Telegram 📱Instagram 📺YouTube 🔹 Linkedin 🌍Veb sayt