Радий Хәбиров эш сәфәре менән Ишембай районына барҙы

Башҡортостан нефтен тәүге асыусылар майҙанын реконструкциялау 2024 йылдың аҙағына тамамланасаҡ. Ошо осорҙа Ишембай ҡалаһының Александр Матросов исемендәге мәҙәниәт һәм ял паркы ла яңыртыласаҡ. Бөгөн республика башлығы ҡалала йәмәғәт биләмәләрен төҙөкләндереү барышы менән танышты. Шулай уҡ Ишембай районына эш сәфәре барышында Радий Хәбиров Верхотор ауылында булды.

Радий Хәбиров Ишембай районында мобилизацияланған хәрбиҙең ғаиләһе менән осрашты

Ишембай районына эш сәфәре барышында республика башлығы мобилизацияланған хәрбиҙең ғаиләһе менән осрашты. Радий Хәбиров 6-сы майҙа Донбаста яугирҙар менән осрашҡанда, уның яҡындарына барырға вәғәҙә биргәйне. Республика башлығы ғаиләгә улдарынан, иренән һәм аталарынан сәләм тапшырҙы. Мобилизацияланған һалдаттың ҡатыны төбәк етәксеһенә яугирҙарға ғына түгел, уларҙың ғаиләләренә лә шәхси иғтибар биргәне өсөн рәхмәт белдерҙе.

Төбәктә Салауат Юлаев исемендәге батальонды ойоштороу буйынса штабтың өс филиалы эшләй башланы

Улар Стәрлетамаҡта, Туймазыла һәм Салауат районының Малаяҙ ауылында асылды. Батальонға 120-нән ашыу кеше яҙылған. Уны ойоштороу 10 сентябргә тиклем дауам итә. Яугирҙәр махсус операция үткәреү зонаһына юлланыр алдынан хәрби уҡыуҙар үтә. Подразделение Росгвардия структураһында. Салауат Юлаев исемендәге икенсе батальонға 55 йәшкә тиклемге яугирҙарҙы һәм 60 йәшкә тиклемге офицерҙарҙы ҡабул итәләр. Контрактты хеҙмәт итмәгән, әммә хәрби билеты булған кешеләр ҙә төҙөй ала. Батальонға инеү өсөн Өфөләге штабҡа йәки республика буйынса филиалдарға мөрәжәғәт итергә кәрәк. Контракт төҙөргә теләүселәр өсөн телефон һандары 8 987 023 76 00.

Башҡортостанда «Мобиль участка һайлау комиссияһы» пилот проекты эш башланы

Электрон программа ярҙамында 10 сентябрҙә үтәсәк Берҙәм тауыш биреү көнө тураһында халыҡҡа адреслы мәғлүмәт-аңлатыу эше алып барыла. Өфө буйынса был проектҡа 12 участка комиссияһы йәлеп ителгән, уларҙың икәүһе Дим биҫтәһенә ҡарай.

Өфөнөң Черниковка биҫтәһендәге Республика инженер лицей- интернатына капиталь ремонт яһалды

Яңы уҡыу йылына төҙөк лицей. Өфөнөң Черниковка биҫтәһендәге Республика инженер лицей- интернатына капиталь ремонт яһалды. Әле эштәр йомғаҡланыу алдында. Мәғариф учреждениеһындағы үҙгәрештәрхаҡында репортаж.

Өфөнөң Гагарин урамында йәшәүселәр көтмәгәндә зәңгәр яғыулыҡһыҙ тороп ҡалған

Айға яҡын газһыҙ. Өфөнөң Гагарин урамында йәшәүселәр көтмәгәндә зәңгәр яғыулыҡһыҙ тороп ҡалған. Идарасы компания быны халыҡтың газ торбаларын диагностикалауҙан баш тартыуы менән аңлата. Ә был йортта йәшәүселәр беҙ диагностика үткәреүгә ҡаршы түгел, газ тәьминәтен туҡтатыу хаҡында беҙҙе алдан иҫкәртеүсе булманы, тигән дәғүә белдерә.

Башҡортостанда тимер юлы янғын һүндереүселәре араһында ярыштар башланды

Чемпионатта илдең төрлө округынан 7 команда ҡатнаша. Кемдәр улар - тимер юл янғын һүндереүселәре? Уларҙың таһыллығы нисек баһалана? Ентекләберәк видеояҙмала.

Башҡортостанда 1 миллион 500 мең тоннанан ашыу иген йыйып алынған

Ауыл хужалығы министрлығы мәғлүмәттәре буйынса, ураҡ 52 районда алып барыла. Әлегә барлыҡ майҙандарҙың 46 процентында урып-йыйыу эштәре теүәлләнгән, гектарынан 20 центнерҙан ашыу уңыш алына. Стәрлетамаҡ, Ауырғазы һәм Ҡырмыҫҡалы райондары юғары күрһәткестәргә өлгәшә.

Өфө юлдарында яңы уҡыу йылы башланғанда тығындар көтөлә

Был ҙур ҡалалар өсөн ғәҙәти күренеш, тип хәбәр итәләр хакимиәтенән. Халыҡ отпускынан сыға, студенттар һәм уҡыусылар мәктәпкә бара. Бынан тыш ҡала бер нисә урында ҙур ремонт бара. Ағиҙел аша иҫке күпер ябылды. Пугачев һәм генерал Рыленко урамдары төҙөкләндерелә, Шаҡша күперендә ремонт башланды. Халыҡҡа маршруттарын алдан уйлап билдәләргә кәңәш ителә.

Башҡортостанда балалар өсөн сәләмәтлек үҙәге -“Шифа” һауыҡтырыу комплексы төҙөлә

Сибайҙағы ял һәм һауыҡтырыу базаһының беренсе өлөшө киләһе йылдың сентябрендә ишеген асырға тейеш. Дөйөм хаҡы 3 миллиардҡа баһаланған обьектты финанслау өсөн республика ҡаҙнаһы 756 миллион һум бүлә. Лагерь сменаһына 350 баланы хеҙмәтләндерә ала.

Өфөнөң “Урал” волейболсылары миҙгел алды турнирында ҡатнаша

22 августа Санкт-Петербургта Платонов мемориалына ярыштар башлана. Унда “Урал” һәм майҙан хужаһы “Зенит”тан тыш, Ленинград өлкәһенән “Динамо”, Сорғоттан “Газпром-Югра”, Новокуйбышевскиҙан “Нова” һәм Беларуссиянан “Строитель” клубтары ҡатнаша. Командалар ике төркөмгә бүленеп уйнай, тәүге ике урында яулаусы ярым финалға сыға.

Өфөнөң Әр-Рәхим мәсетенә яңы көмбәҙ ҡуйылды

Иман йортоноң бер манараһы 13 мартта көслө елдән зыян күргәйне. Көмбәҙҙе урынлаштырыу өсөн башня краны ҡулланылды.
“Мәсет үҙенсәлекле объект. Уның көмбәҙе лә уникаль”, - ти Башҡортостан Мосолмандар диниә назараты рәйесе Айнур Бирғәлин.
Башҡортостан Башлығы ҡушыуы буйынса быйыл июндә Әр-Рәхим мәсетендә эштәр яңынан башланды. Төҙөлөш һәм архитектура министрлығынан белдереүҙәренсә, төҙөлөш меценаттар аҡсаһына финансланасаҡ. Радий Хәбиров бер ай эсендә төҙөлөш доументтарын тикшерергә, объекттың торошон баһаларға һәм оператив штаб булдырырға ҡушты.

Өфөлә балалар өсөн хәрби-патриотик парк асыла

“Тирмәкәй” балалар баҡсалары селтәре “Батыр” хәрби-патриотик паркы” проекты менән “Движение Первых” грант конкурсында еңеү яулаған. Мәғариф һәм фән министрлығынан белдереүҙәренсә, проект балаларҙа мәктәпкәсә йәштән гражданлыҡ һәм ватансылыҡ тәрбиәләүгә, уларҙың ялын әүҙем итеп ойоштороуға, сәләмәт тормошҡа йәлеп итеүгә йүнәлтелгән. Уның барышында Өфөлә мәктәпкәсә белем биреү төркөмдәре һәм мәктәптәр өсөн хәрби-патриотик парк булдырыла. Стационар комплекстар йыл дауамында эшләйәсәк.

Өфөлә "Йәйәүле" операцияһы бара

Автоинспекциянан хәбәр итеүҙәренсә, төп маҡсат - аварияларҙы кәметеү. Водителдәрҙең һәм йәйәүлеләрҙең ҡағиҙәләрҙе үтәүенә иғтибар бирелә. Быйыл Өфөлә йәйәүлеләр ҡатнашлығында 272 авария теркәлгән. Уларҙа 4 кешенең ғүмере өҙөлгән. 278 кеше йәрәхәттәр алған. 65 авария йәйәүлеләрҙең ҡағиҙә үтәмәүе арҡаһында сыҡҡан.

Быйыл республикала 9 меңдән ашыу кеше талпан ҡаҙалып медицина учреждениеларына мөрәжәғәт иткән

Уларҙың өстән бер өлөшө балалар. Быйыл боррелиоз йоҡтороуҙың 13 осрағы теркәлгән, 7 кеше энцефалит менән ауырыған, тип хәбәр итәләр Ҡулланыусылар хоҡуҡтарын яҡлау хеҙмәтенән.

Хоккей буйынса йәштәр турниры Родион Әмиров исемен йөрөтә

“Салауат Юлаев” хоккей клубы генераль директоры Ринат Бәширов ошо турала белдерҙе. Турнир август аҙағында Өфөлә ойошторола. Спортсының исемен мәңгеләштереү буйынса башҡа тәҡдимдәр һуңғараҡ ҡарала. “Салауат Юлаев” командаһының 21 йәшлек һөжүмсеһе 14 августа вафат булды. Уға 2022 йылда баш мейеһе яман шеше диагнозы ҡуйыла. Родион Әмиров “Торонто” командаһы составына индерелә.

Радий Хәбиров мәшһүр йырсы Абдулла Солтановтың вафатына бәйле ҡайғы уртаҡлашты

«Башҡортостан халҡыбыҙҙың лайыҡлы улы, легендар йырсы, халыҡ артисы Абдулла Афзал улы Солтанов менән хушлаша. Бөтә республика менән бергә ҡайғырам. Туғандары һәм яҡындарының ауыр ҡайғыһын уртаҡлашам. Бәхил бул, аҡһаҡал. Һинең йырҙарың һәм моңоң үлемһеҙ», - тип яҙған Телеграм-каналда Башҡортостан Башлығы.

«Инвестиция сәғәте»ндә Башҡортостанда ҡошсолоҡ объекттарын модернизациялау буйынса яңы проект хупланды

Республика Хөкүмәтендә Радий Хәбиров үткәргән кәңәшмәлә сәнәғәт, ауыл хужалығы һәм хеҙмәтләндереү өлкәһендәге яңы башланғыстар тураһында барҙы. «Турбаслы бройлерҙары» акционерҙар йәмғиәте етәкселеге «Өфө» һәм «Юбилейный» ҡошсолоҡ фабрикаларын реконструкциялау буйынса проект менән сыҡты. Хәтерегеҙгә төшөрәбеҙ, быйыл июндә Санкт-Петербург ҡалаһында үткән Халыҡ-ара иҡтисад форумында «Черкизов» төркөмө етәксеһе Республика башлығына киләсәккә пландары менән уртаҡлашты.

«Әр-Рәхим» мәсете манараһына яңы көмбәҙ ҡуйылды

Изге йома көнөндә яҡшы яңылыҡ. Бөгөн март айындағы көслө ел ваҡытында Әр- рахим мәсетенең ҡолап төшкән манара көмбәҙе урынына яңыһы ҡуйылды.

Бөгөн Республика Башлығы Радий Хәбиров махсус хәрби операцияла ҡатнашыусыларҙы бүләкләне

Хәрбиҙәргә орден-миҙалдар, маҡтаулы исемдәр, грамоталар, рәхмәт хаттары тапшырылды. Республика Башлығы Өфөлә ҡыҫҡа ялға ҡайтҡан яугирҙәр менән осрашты. Радий Хәбиров хәрбиҙәргә һәм уларҙы ғаиләләренә рәхмәт белдерҙе.

Башҡортостан журналистары фестиваль уҙғара

Журналистар Әбйәлил ерендә. Башҡортостан киң мәғлүмәт саралары хеҙмәткәрҙәре бөгөн Яҡтыкүл буйында фестивалгә йыйылды. Сара быйыл “Тыуған яҡҡа һөйөү менән” исеме аҫтында уҙа. Бында тармаҡтың көнүҙәк мәсьәләләре ҡарала, тәжрибә уртаҡлашыу, оҫталыҡ дәрестәре ойошторола.