Башҡортостанда ВУЗ-ара кампуста башҡа төбәктәр һәм сит ил студенттары һаны бер ярым тапҡырға арта

Был турала Мәғариф һәм фән министры Айбулат Хажин белдерҙе. Кампуста студенттар, йәш ғалимдар һәм уҡытыусылар өсөн 4 мең 300-ҙән ашыу урын булдырыла. Әле объекттың тәүге өлөшө 70 процентҡа әҙер, уны быйыл файҙаланыуға тапшырыу көтөлә. Икенсе өлөшө 2025 йылда сафҡа инергә тейеш.

Шаҡша-Карпов юлы ремонтланасаҡ

Транспорт һәм юл хужалығы министрлығынан хәбәр итеүҙәренсә, был урында ауыр йөк машиналары күп йөрөү арҡаһында асфальт ҡатламы таушалған. Шуға 1 сентябргә тиклем соҡорҙарҙы тигеҙләү бурысы ҡуйылған. Өфөнән Көнсығыш юл төҙөлөшө тамамланғас Шаҡша һәм Карпов араһындағы трасса капиталь төҙөкләндерелә.

Өфөнөң 450 йыллығын билдәләү буйынса ойоштороу комитеты составына үҙгәреш индерелде

Премьер-министр Михаил Мишустин ҡарары менән Башҡортостан хөкүмәтенең беренсе вице-премьеры Азат Бадранов комитеттан сығарылды. Азат Бадранов үҙ ирке менән махсус хәрби операцияла ҡатнаша. Өфөнөң юбилейын ойоштороу комитеты 2021 йылда булдырылды. Уны Рәсәй хөкүмәте вице-премьеры Алексей Оверчук етәкләй. Комитет рәйесе урынбаҫары - Республика Башлығы Радий Хәбиров. Өфөнөң 450 йыллығы киләһе йылда билдәләнә.

Бөгөн Радий Хәбиров Стәрлетамаҡҡа эш сәфәре барышында яңы мәсет асыу тантанаһында ҡатнашты

Уға 2012 йылда нигеҙ һалынған. Бында шулай уҡ мәҙрәсә, машиналар өсөн парковка, парк, ҡунаҡхана, кафе бар. - Яҡшы мәсет. Кешеләрҙең бында килеп намаҙ ҡылыу мөмкинлеге бар. Беҙҙең республика халҡы татыу йәшәй, - тине Радий Хәбиров.

Радий Хәбиров ҡунаҡсыллыҡ байрамында ҡатнашты

Бөгөн Стәрлетамаҡта ҡунаҡсыллыҡ фестивале үтте. Байрам Салауат Юлаев исемендәге скверҙа ойошторолдо. 20-се быуат башына тиклем тап ошондай сауҙагәрҙәр йәрминкәләре уҙғарылған. Бөгөн фестивалдә Республика Башлығы Радий Хәбиров булды. Ул йәрминкәләрҙе ҡараны, кәсепселәр һәм оҫталарҙың эше менән танышты. - Ныҡ сағыу фестиваль. Республикала иң яҡшыларҙың береһе һәм бик файҙалы. Беренсенән - фестиваль, икенсенән - байрам, өсөнсөнән - халыҡ кәсептәрен танытыу, дүртенсенән - мәҙәниәт, Тыуған илгә һөйөү. Был ныҡ яҡшы фестиваль, -тип тәьҫораттары менән уртаҡлашты Радий Хәбиров.

Өфөләге иң популяр пляж аталды

Ҡаланың граждандарҙы һаҡлау идаралығынан хәбәр итеүҙәренсә, быйыл йәй "Ҡашҡаҙан"ға халыҡ күпләп йөрөгән. Бында 63 меңгә яҡын кеше килгән. Быйыл Өфөлә рәсми асылған пляждарҙа фажиғәләргә юл ҡуйылмаған. Ҡотҡарыусылар батып барыусы 41 кешене сығарған. Өфө янында рөхсәт ителмәгән урындарҙа 16 кеше батып үлгән.

"Төньяҡ амурҙары" йәнһүрәте Рәсәй кинотеатрҙарында күрһәтелә

Өфөлә төшөрөлгән картина 31 августан киң экрандарға сыға. Йәнһүрәттә 1812 йылғы Ватан һуғышында башҡорт яугирҙәренең ҡаһарманлығы һүрәтләнә. Анимация фильмы башҡорт һәр рус телдәрендә күрһәтелә.

Ишембай районында ташландыҡ завод туристик биләмә итеп үҙгәртелә

Проект - "Верхотор - дәүерҙәр театры" тип атала. Уны ғәмәлгә ашырыу өсөн 65 миллион һумдан ашыу федераль грант бүленгән. Хәҙер боронғо баҡыр иретеү заводы биләмәһе төҙөкләндерелә. Бында туристар өсөн уңайлыҡтар булдырыла.

Радий Хәбиров Стәрлетамаҡ ҡалаһында Мөхәмәтсәлим мәсетен асыу тантанаһында ҡатнашты

Стәрлетамаҡ ҡалаһында Мөхәмәтсәлим мәсете сафҡа инде. Иман йортон асыу тантанаһында Башҡортостан Башлығы Радий Хәбиров, республиканың дини йәмәғәтселеге, урындағы халыҡ һәм күрше райондарҙа йәшәүселәр ҡатнашты.
Һәр кем үҙ сығышында мәсеткә халыҡтың күпләп йөрөүенә, унда йәмәғәт намаҙҙары ғына түгел, дини байрамдар, никахтар уҙғарылыр, дәрестәр үткә­релер тип ышаныс белдерҙе.

Башҡортостанда Һауа флоты көнө билдәләнде

Был осоусыларҙың ғына түгел, аэропорт инженерҙары, механиктары, багаж тейәүселәре һәм авиацияға ҡағылышлы башҡа һөнәр эйәләре байрамы. Дата уңайынан самолеттар, парашютистар ҡатнашлығында төрлө һауа шоуҙары күрһәтелде, лайыҡлылар маҡтау ҡағыҙҙары менән бүләкләнде.

Бөгөн тарих фәндәре докторы, академик Нияз Мәжитовҡа 90 йәш тулған булыр ине

Тарихтан киләссәккә күпер һалыусы. Башҡорт халыҡ йыры «Шәүрә» ны яратып башҡарған археология ҡомартҡылары иле батшаһы. Был һүҙҙәр алҡыбыҙҙың арҙаҡлы улы, билдәле ғалим Нияз Мәжитовҡа ҡарата әйтелгән. Уны замандаштары шулай уҡ башҡорт археологияһына нигеҙ һалыусыһы булараҡ та белә. Бөгөн тарих фәндәре докторы, академик Нияз Мәжитовҡа 90 йәш тулған булыр ине.

Радий Хәбиров Стәрлетамаҡ ҡалаһында үткән Сауҙагәрҙәр 2.0 фестивалендә ҡатнашты

Стәрлетамаҡ ҡалаһында үткән Сауҙагәрҙәр 2 нөктә 0 фестивале меңәрләгән кешене берләштерҙе. Кәсепселәр һәм эшҡыуарҙар әҙерләгән күргәҙмә менән Башҡортостан Башлығы Радий Хәбиров танышты. Стәрлетамаҡҡа эш сәфәре барышында республика етәксеһе яңы иман йортон асыу тантанаһына йыйылған халыҡты тәбрикләне, сәнәғәт предприятиеһы эшмәкәрлеген баһаланы.

Радий Хәбиров Күмертау халҡын ҡаланың 70 йыллығы менән ҡотланы

Күмертау күгенә уның төп символдарының береһе - вертолеттар күтәрелде. Тап ошо осоу аппараттарын етештереү арҡаһында ҡала әле донъя кимәлендә танылыу алған. Әммә ул үҙенең барлыҡҡа килеүе менән һуғыштан һуңғы йылдарҙа илгә бик кәрәк булған һоро күмер ятҡылығына бурыслы. Республиканың иң көньяҡ ҡалаһы үҙенең тыуған көнөн билдәләне. 70 йыллыҡ юбилейына ҡала халҡын байрам менән ҡотларға Башҡортостан Башлығы ла килде. Радий Хәбиров Күмертау хакимиәте башлығы менән бергә тәүҙә Мәңгелек утҡа сәскәләр һалды. Бынан һуң төбәк башлығы тарих-тыуған яҡты өйрәнеү музейына инде. Музейға күптән түгел ремонт яһалған.

Радий Хәбиров Стәрлетамаҡта махсус хәрби операцияла һәләк булғандарҙың ғаиләләре менән осрашты

Стәрлемаҡҡа эш сәфәре барышында Башҡортостан башлығы махсус операцияла ҡатнашыусыларға ярҙам үҙәге эшмәкәрлеге менән танышты. Ҡалала 15-се февралдә эш башлаған үҙәктә яугирҙарға һәм уларҙың яҡындарына медицина, юридик, психологик ярҙам күрһәтелә. Радий Хәбиров махсус операцияла һәләк булған ватан һаҡсыларының ғаиләләренә Миңлеғәле Шайморатов ордендарын тапшырҙы. Яугирҙарҙың ата-әсәләренә республика кардиология үҙәгендә реабилитация һәм башҡа ярҙам саралары еткерелде.

Башҡортостанда солоҡ күстәрен 5 меңгә еткереү көтөлә

2030 йылға тиклем яңы программа әҙерләнгән. Республика Башлығы Радий Хәбиров социаль селтәрҙә яҙыуынса, әле Башҡортостанда 1 мең 600 солоҡ бар. - Солоҡсолоҡ менән шөғөлләнеүселәргә субсидия бирә башлайбыҙ. Башҡорт тоҡомло бал ҡорто, техника, кәрәк-яраҡ алыу өсөн сығымдар ҡаплана. Ғаризалар Ауыл хужалығы министрлығында ҡабул ителә. Тәүге субсидиялар бирелде. Боронғо кәсеп менән шөғөлләнеүселәр араһында йәштәр ҙә бар. Ярҙам итәсәкбеҙ, - тип яҙа Радий Хәбиров.

Рәсәйҙә 2024 йылға ял һәм байрам көндәре раҫланды

Премьер-министр Михаил Мишустин тейешле ҡарарға ҡул ҡуйҙы. Уға ярашлы, яңы йыл каникулы 10 көнгә һуҙыла - 2023 йылдың 30 декабренән 2024 йылдың 8 ғинуарына тиклем була. Байрамға тура килгән ял көндәре күсерелә. Ватанды һаҡлаусылар, Ҡатын-ҡыҙҙар көндәрендә, Яҙ һәм Хеҙмәт, Еңеү байрамдарында бер нисә көнлөк ял ҡаралған.

Хоккейсы Родион Әмиров менән хушлашыу иртәгә була

Сара "Өфө-Арена"ла уҙғарыла, иртәнге 8-ҙә башлана. Родион Әмиров Ишембай районы Богдановка ауылында ерләнә. "Салауат Юлаев" мәктәбе тәрбиәләнеүсеһе 14 августа 21 йәшендә яман шештән вафат булды.

Башҡортостанда йәшәү минимумын арттырыу көтөлә

Республика хөкүмәте ҡарары проекты менән Ғаилә, хеҙмәт һәм халыҡты социаль яҡлау министрлығы сайтында танышырға мөмкин. Йәшәү минимумын 13 мең ярым һумға еткереү планлаштырыла. Әле уның күләме 12 мең 650 һум.

"Салауат Юлаев" Блинов кубогы өсөн турнирҙы һуңыраҡ башлай

Юлаевсылар тәүге матчын йәкшәмбе уҙғарырға тейеш ине. Әммә ул кисектерелде. Бөгөн команда клубтың тәрбиәләнеүсеһе Родион Әмиров менән хушлаша, ошонан һуң Омскиға миҙгел алды турнирына юллана. Кубок өсөн шулай уҡ "Авангард", "Барыҫ", "Локомотив" һәм "Нефтехимик" көрәшә.

Башҡортостанда ике миллион тоннаға яҡын иген һуғып алынған

Был турала Ауыл хужалығы министрлығынан хәбәр итәләр. Баҫыуҙарҙың яртыһынан күбеһендә эштәр теүәлләнгән. Ужым игенен йыйыу тамамланған. Һәр гектарҙан уртаса 20 центнер уңыш алына. Быйыл республика иген менән үҙебеҙҙе тулыһынса тәьмин итә, ситкә һатыр өсөн дә ҡала, - ти ауыл хужалығы белгестәре.

Өфө йылғаһы аша паром ебәрелде

Шаҡша күперендә ремонт арҡаһында ошондай ҡарар ҡабул ителгән. Унда ремонт башланды. Йөк машиналары йөрөшө тыйылды. Еңел машиналар өсөн ике яҡҡы берешәр һыҙат ҡалдырылды. Паром хәрәкәт тығыҙлығын кәметеү өсөн ебәрелгән. Ул октябрь аҙағына тиклем йөрөйәсәк.