Рәсәй иҡтисады донъяла иң эреләр рәтенә ингән

Был турала Президент Владимир Путин белдерҙе. -2022 йыл һөҙөмтәләре буйынса Рәсәй иҡтисады Германияныҡын үтеп китте һәм бишенсе урынға күтәрелде. Был иң мөһим күрһәткестәрҙең береһе, - тине ул. Бөтә донъя банкы төҙөгән исемлектә беренсе урындарға Ҡытай, Америка ҡушма штаттары, Һиндостан һәм Япония иҡтисадтары ҡуйылған.

Радий Хәбиров Волга буйы федераль округының «Йыйын-2023» 4-се йәштәр граждандар форумында ҡатнашты

Башҡортостанда Волга буйы федераль округының «ЙЫЙЫН-2023» 4-се йәштәр граждандар форумы үтә. Бөрйән районында дүрт көн дауам иткән сара палаткалы лагерь форматында ойошторола. Форум Башҡортостан һәм Волга буйы федераль округы төбәктәре йәштәрен, Мәскәүҙә, Санкт-Петербургта, Ҡазанда белем алған республика студенттарын берләштерҙе. Башҡортостанда дүртенсе йыл рәттән үткән форумда ҡатнашыусылар һаны буйынса быйыл рекорд ҡуйылды - Йыйында 1 мең ярымдан ашыу кеше эшлекле һәм ижади майҙансыҡтарҙа осрашты. Шулай уҡ ҡыҫҡа метражлы йәштәр киноһы фестивале, дизайнерҙар конкурсы, «Атайсал» йәш яҡташтар һәм «Беренселәр хәрәкәте» осрашыуы ойошторола. Форумда Башҡортостан Башлығы Радий Хәбиров та ҡатнашты.

Радий Хәбиров күләмле агросәнәғәт паркы төҙөлөшөнә старт бирҙе

Етештереү, логистика, инженер инфраструктураһы булған «Таврос Агропарк» Өфө районының Подымалов ауылы янында урынлаша. Унда ауыл хужалығы тауарҙары етештереүселәр өсөн бар уңайлыҡтар ҡаралған. Төп арендаторҙар «Евразия» күмәртә-ваҡлап һатыу үҙәге һәм республиканың сауҙа селтәрҙәре. Шулай уҡ сит ил импортерҙары өсөн дә урын бүленәсәк.

Башҡортостандың ЗАГС бүлексәләрендә ике йөҙҙән ашыу пар теркәлде

Аҙна уртаһы булыуға ҡарамаҫтан, матур дата - 2023 йылдың 23 авгусында законлы никахҡа инеүселәр күп булды. Башҡортостандың ЗАГС бүлексәләрендә ике йөҙҙән ашыу пар теркәлде. «Именлек» республика геронтология үҙәгендә йәшәүсе ғаиләләр һаны ла берәүгә артты. Харьков өлкәһенән Башҡортостанға күсенеп килгән Екатерина Тендитная социаль учреждениела үҙ бәхетен осратҡан. Тулыраҡ видеояҙмала.

Өфөлә Ағиҙел яры буйында йәнә автомобилдәр хәрәкәте сикләнә

Иҫке күперҙе капиталь ремонтлауға бәйле 5 сентябрҙән яңы йылға тиклем Ағиҙел йылғаһының Яр буйы урамы өлөшләтә ябыла. Баш ҡала хакимиәтенән белдереүҙәренсә, был осорҙа ҡалаға ингән урында тығындар булыуы ихтимал. Аркалы Ағиҙел күперенә капиталь ремонт 2022 йылдың мартында башланды. Ул Өфөнөң 450 йыллығына төҙөлгән объекттарҙың береһе. Күпер файҙаланыуға тапшырылғандан һуң баш ҡаланың көньяҡ ҡапҡаларында 11 һыҙат буйынса автомобилдәр хәрәкәт итә аласаҡ.

Башҡортостанда социаль эшҡыуарҙарға ярты миллионлыҡ гранттар таратыла

500 мең һумлыҡ финанс ярҙамға ғаризалар 24 августа ҡабул ителә башлай. Гранттар конкурсы “Бәләкәй һәм урта эшҡыуарлыҡ, шәхси эшҡыуарҙар башланғысына ярҙам” милли проекты барышында үткәрелә. Грант алғандан һуң еңеүселәр өс йыл эсендә социаль эшмәкәрлеген дауам итергә һәм социаль предприятие статусын раҫларға тейеш. Аҡса биналарҙы ҡуртымға алыу һәм ремонт үткәреү, оргтехника, ҡорамалдар, сеймал һатып алыу, шулай уҡ лизингка, коммуналь хеҙмәттәргә түләүгә йүнәлтелергә тейеш. Конкурсҡа документтар Эшҡыуарлыҡ һәм туризм министрлығында 18 сентябргә тиклем ҡабул ителә.

Өфөлә Аксаков исемендәге баҡсала скейт-парк булдырылды

Шулай уҡ инженер коммуникациялары үткәрелгән, киоск, китапхана, сәхнә, амфитеатр урындары билдәләнгән. Был турала социаль селтәрҙә ҡала хакимиәте башлығы Ратмир Мәүлиев хәбәр итә. Аксаков баҡсаһы реконструкцияға ябылды. Эштәр нояргә тиклем тамамланырға тейеш.

Өфө халҡын саф һауала кино ҡарарға саҡыралар

Был шәмбе "Кино төнө" Бөтә Рәсәй акцияһы уҙғарыла. Уға Башҡортостан да ҡушыла. Өфөлә Салауат Юлаев һәйкәле янындағы амфитеатрҙа "Чебурашка" комедияһын, тарихи драма һәм йыһанда төшөрөлгән фильм ҡарарға мөмкин була. Улар бушлай күрһәтелә, сеанс киске сәғәт 8-ҙә башлана.

Башҡортостанда мәктәп ашханаларында Италия аш-һыуы тәҡдим ителә

Рецептарҙың яңыртылыуы тураһында социаль селтәрҙә Сауҙа һәм хеҙмәттәр министры Алексей Гусев яҙа. Уҡыусылар "Наполи" тигән фрикаделька, митбол, тауыҡ итенән наггетс, ризотто һәм башҡа ризыҡ менән һыйлана ала. Меню ашханаларҙа файҙаланыу өсөн тәҡдим ителгән.

Республика халҡы мобиль элемтә станциялары кәрәк булған ауылдарҙы атай ала

Тауыш биреү Дәүләт хеҙмәттәре порталында ойошторолған. Унда 18 йәштән өлкәндәр ҡатнашырға хоҡуҡлы. Исемлеккә 130 ауыл индерелгән. Һөҙөмтәләр буйынса, 117 ауыл һайлана һәм федераль проектҡа индерелә. Тауыш биреү 12 ноябрҙә тамамлана. Шулай уҡ Рәсәй Һанлы үҫеш министрлығына шәхси йәки коллектив хат ебәрергә мөмкин. 26 ноябргә тиклем килгән хаттар иҫәпкә алына.

Республикала күп балалы ғаиләләр йәшәгән райондар аталды

2020 йылда үткәрелгән Бөтә Рәсәй халыҡ иҫәбен алыу кампанияһы мәғлүмәттәре буйынса, Башҡортостанда 472 мең балалы ғаилә йәшәй. Уларҙың 59 меңе ишле һанала. Был күрһәткес буйынса беҙҙең республика Волга буйы федераль округында - беренсе, илдә - етенсе урында килә. Иң күп балалы райондар исемлегендә беренсе баҫҡыста Бөрйән тора. Унда һәр өсөнсө ғаиләлә өс йәки унан күберәк бала тәрбиәләнә. Икенсе урында Баймаҡ, өсөнсөлә Хәйбулла һәм Әбйәлил райондары. Быйыл иң күп сабыйҙар Бөрйән, Әбйәлил һәм Архангел райондарында тыуған, тип хәбәр итәләр Ғаилә, хеҙмәт һәм халыҡты социаль яҡлау министрлығында.

Баҡалы районында беренсел ярҙам звеноһы яңырыу кисерә

Ете ауылда быйыл модулле ФАП-тар эш башларға тейеш. Ауыл халҡына заманса, сифатлы медицина ярҙамы күрһәтеү өсөн шарттар булдырыла. Баҡалы районынан репортаж.

Евразия Олимпия комитетын ойоштороу планлаштырыла

Был турала Евразия Халыҡтары Ассамблеяһы Генераль советы һәм ойошманың Башҡортостандағы вәкиллеге йәмәғәт советының киңәйтелгән ултырышында билдәләнде. Эшлекле осрашыу Республика менән идара итеү үҙәгендә үтте. Ассамблея эшмәкәрлегенең тәүмаҡсаты күп яҡлы хеҙмәттәшлек һәм халыҡ дипломатияһын үҫтереп, йәмғиәттә татыулыҡ булдырыу.

Рәсәйҙә икмәккә хаҡ күтәрелмәйәсәк

Ҡайһы бер сығанаҡтар көҙ икмәк 10 процентҡа ҡиммәтләнә тигән мәғлүмәт тарата. Улар быны һумдың арзанайыуы, импорттың кәмеүе һәм эш хаҡының артыуы менән аңлата. Шулай уҡ илдең “Иген килешеүен” өҙөүе менән дә бәйләй. Федераль Ауыл хужалығы министрлығынан белдереүҙәренсә, икмәктең хаҡы дөйөм инфляцияға бәйле үҙгәрергә мөмкин.

Быйыл республикала бәлиғ булмағандар ҡатнашлығында 300 авария теркәлгән.

300 бала имгәнгән, дүртәүһенең ғүмере өҙөлгән. Юл хәрәкәте хәүефһеҙлеге дәүләт автоинспекцияһынан ошо турала белдерҙеләр. Юл-транспорт ваҡиғаларының өстән бер өлөшө балаларҙың һаҡһыҙлығы менән бәйле. Башҡортостанда 1 сентябрь алдынан “Иғтибар, балалар!” акцияһы иғлан ителде. Ул балалар ҡатнашлығында юл ҡазаларын иҫкәртеү маҡсатында уҙғарыла. Автоинспекторҙар мәктәптәрҙә уҡыусылар менән осраша, юл ҡағиҙәләренә арналған конкурс һәм викториналар ойошторола. Акция 15 сентябрҙә тамамлана.

Быйыл республикала 14 кеше бәшмәк ашап ағыуланған

Былтыр зыян күреүселәр 30-ҙан ашыу булған. Ҡулланыусылар хоҡуғын яҡлау хеҙмәтенән белдереүҙәренсә, Салауат районында теркәлгән осраҡ буйынса тикшереү башланған. Өфөнән Лаҡлы ауылындағы туғандарына килгән 5 кеше бәшмәктән ағыуланған. Әле улар дауаханала.

Өфөлә Мортаза Рәхимовҡа һәйкәл урынлаштырыла

Дәүләт экспертизаһы проектты хупланы. Башҡортостандың беренсе президентына мемориал Ленин исемендәге паркта, ике фонтан араһында була. Мортаза Рәхимов һыны бронзанан ҡойола, бейеклеге 4 метрға яҡын була. Композицияны Миңлеғәли Шайморатовҡа һәйкәлдең авторы - скульптор Салауат Щербаков әҙерләй.

Радий Хәбиров Бөрйән районындағы иң ҙур түмәр-солоҡ умарталығында булды

Эш сәфәре барышында республика етәксеһе умартасы Вадим Сәйфетдинов менән аралашты. Бөрйән эшҡыуары төбәктә умартасылыҡты үҫтереү менән туғыҙ йылдан ашыу шөғөлләнә. Түмәрҙәренең дөйөм һаны 300-ҙән ашыу. Бынан тыш, умартасы бөрйән бал ҡортоноң инә ҡорттарын алыу өсөн парк булдырған. Быйыл ул бер меңгә яҡын инә ҡорт етештереүгә ирешкән.

Өфөләге Аксаков паркы республика көнөнә асыла

Был турала социаль селтәрҙәге сәхифәләрендә Башҡортостан Башлығы хәбәр итте. Эш араһында Радий Хәбиров паркты төҙөкләндереү барышы менән яҡындан танышҡан һәм яңырыу кисергән парктың күренештәре менән интернетта бүлешкән.

Өфөлә ҡеүәтле «Затон-Көнсығыш» насос станцияһы төҙөлә

Ул 4 миллион квадрат метрҙан ашыу яңы торлаҡтың канализация һыуын ағыҙырға мөмкинлек бирәсәк. Был иң ҙур коммуналь объект, уның менән бергә 28 километр оҙонлоҡтағы таҙартыу ҡоролмаларына тиклем коллектор ҙа төҙөлә.

Өфө һайлау участкаларының береһендә штаттан тыш хәл осраҡтары буйынса күнекмәләр ойошторолдо

Башҡортостандың Дәүләт Йыйылышы-Ҡоролтайға һайлау алдынан Өфө һайлау участкаларының береһендә һайлау комиссияһы ағзалары өсөн штаттан тыш хәл осраҡтары буйынса күнекмәләр ойошторолдо.
Уҡыуҙа Ленин районы хакимиәте вәкилдәре, территориаль һайлау комиссияһы ағзалары, Рәсәй эске эштәр министрлығының Өфө буйынса 4-се полиция бүлеге хеҙмәткәрҙәре, Ғәҙәттән тыш хәлдәр министрлығының күҙәтеү бүлеге һәм 2-се янғын-ҡотҡарыу хеҙмәте белгестәре ҡатнашты.