Башҡортостанда “Атайлыҡ даны” наградаһы еңеүселәре асыҡланды

Республика Йәмәғәт палатаһынан хәбәр итеүҙәренсә, 51 кеше абруйлы бүләккә лайыҡ була. Быйыл конкурсҡа 191 ғариза ҡабул ителгән. Әлшәй, Белорет, Бөрө, Илеш, Краснокама райондары, Өфө һәм Октябрьский ҡалаларынан заявкалар күп килгән. “Атайлыҡ даны” йәмәғәт наградаһы менән бүләкләү сараһы 4 октябрҙә Өфөлә уҙа.

1 сентябрҙә Башҡортостанда 7 мәғариф кластеры асыла

Улар “Профессионалитет” федераль проектына ярашлы булдырылған. Химия буйынса ойошторолған мәғариф-етештереү үҙәге Стәрлетамаҡ химия-технология колледжы нигеҙендә була. Тау-байыҡтырыу тармағыныҡы – Учалы тау сәнәғәте, машиналар эшләү кластеры – Стәрлетамаҡ политехник колледжында асыла. Бөрө медицина-фармацевтика колледжында “Клиник һәм профилактик медицина” йүнәлеше буйынса кластер эшләй. Өфө һәм Стәрлетамаҡтағы колледждарҙа “Педагогика” тармағына ҡараған 3 кластер булдырылған. Ҡабул итеү кампанияһы барышында “Профессионалитет” программаһы буйынса белем алыуға 9 меңдән ашыу ғариза тапшырылған. Мәғариф-етештереү үҙәктәрендә 5 меңдән ашыу 1 курс студенты белем аласаҡ. Федераль проект оҫта белгестәр әҙерләү маҡсатын ҡуя.

Башҡортостандың Ҡаҙағстандағы яңы вәкиле тәғәйенләнде

Был дәүләттәге Рәсәй сауҙа вәкиллегендә беҙҙең республика мәнфәғәттәрен Дмитрий Ситников яҡлаясаҡ. Республика Башлығы Радий Хәбировтың ошо турала указы бар. Тейешле документ рәсми мәғлүмәттәр порталында донъя күргән. Килешеү 1 йылға төҙөлгән. Дмитрий Ситников 1964 йылда Алма-Атала тыуған. Ошо уҡ ҡалала иҡтисад университетын тамамлаған. Быға тиклем Ҡаҙағстанда Башҡортостан вәкиле булараҡ Урал Аҙнабаев эшләне. Ул үҙ теләге буйынса вазифаһынан бушатылды.

Башҡортостандың халыҡ шағиры Гөлфиә Юнысоваға “Өфөнөң Почетлы гражданы” исеме бирелде

Гөлфиә Аҙнағол ҡыҙы 20-нән ашыу китап авторы. Уның әҫәрҙәре байтаҡ телдәргә тәржемә ителгән, шиғырҙарына йырҙар яҙылған. Гөлфиә Юнысова оҙаҡ йылдар “Башҡортостан ҡыҙы” журналы редакцияһын етәкләй. Федераль һәм республика парламенты, Өфө ҡала Советы депутаты булды. “Маҡтаулы исемде юбилейым алдынан ҙур бүләк итеп ҡабул иттем”, - ти шағирә.10 сентябрҙә Гөлфиә Юнысоваға 75 йәш тула. Республикала халыҡ шағирына арналған саралар үткәрелә.

Башҡортостан теннис оҫталары Татарстандан алтын-көмөш миҙал алып ҡайта

Республика спорт министрлығынан хәбәр итеүҙәренсә, өҫтәл теннисы буйынса турнир Саба район үҙәгендә үткән. Унда илдең 12 төбәгенән 100-гә яҡын спортсы ҡатнашҡан. Башҡортостан спортсылары 4 алтын, 2 көмөш һәм 3 бронза миҙал яулаған.

Радий Хәбиров граната шартлатырға янаған яугирҙың ғүмерен һаҡлап ҡалырға тырышыуы тураһында һөйләне

Радий Хәбиров ысын күңелдән граната шартлатырға янаған яугирҙың ғүмерен һаҡлап ҡалырға тырышыуы тураһында һөйләне. Башҡортостан Башлығы уның яҡындары һәм туғандарының ҡайғыһын уртаҡлашты һәм яугир Илдар Б-ны ерләүҙе ойоштороуҙы үҙ өҫтөнә алыуын белдерҙе.
«Миңә бик йәл. Мин ысын күңелдән уның ғүмерен ҡотҡарырға тырыштым. Хаталанһа ла минең өсөн ул һалдат. Һәр кемдең үҙ юлы. Әммә береһенең дә ҡорал менән янап, көс ҡулланыу аша талаптарын ҡуйырға хаҡы юҡ»,-тип белдергән Радий Хәбиров.

Ватан яугирҙары ғаиләләре комитетының Башҡортостандағы төбәк бүлексәһе эшмәкәрлегенә йомғаҡ яһаны

Ватан яугирҙары ғаиләләре комитетының Башҡортостандағы төбәк бүлексәһе махсус хәрби операцияла ҡатнашыусыларҙан һәм уларҙың яҡындарынан 1 мең 600 мөрәжәғәт эшкәрткән. Улар социаль селтәрҙәрҙән, телефон һәм шәхси рәүештә ҡабул ителгән. Был турала төбәк комитеты эшмәкәрлегенә йомғаҡ яһауға арналған матбуғат конференцияһында Ғаилә, хеҙмәт һәм халыҡты социаль яҡлау министры Ленара Иванова белдерҙе. Мөрәжәғәт итеүселәр башлыса юридик, медицина һәм психологик ярҙам һорап килә. Шулай уҡ ташламалар, социаль түләүҙәр, дауаланыу юллап килеүселәр ҙә күп.

Республикала шәкәр сөгөлдөрө ҡаҙыу башланды

Татлы сеймал баҫыуҙарҙан шәкәр заводтарына ташыла. Яҡын арала улар шәкәр сығарыуға тотонасаҡ. Быйыл татлы тамыр уңышы мулмы? Тулыраҡ видеояҙмала.

Башҡортостанда бер юлы өс фельдшер-акушерлыҡ пункты асылды

Быйыл Нуриман һәм Иглин райондарына ҡараған яңы медицина учреждениелары тәүгеләрҙән булып лицензия алған. «Сәләмәтлек» милли проектының «Беренсел звеноны яңыртыу» төбәк программаһы буйынса төҙөлгән объекттар тураһында репортаж.

Өфөлә Белем көнөндә ҡайһы бер урамдар ябыла

Мәктәп, колледж һәм университеттарҙа байрам линейкалары уҙғарыла. Рәсәй урамында ла машиналар йөрөшө сикләнә. Бында "Профессионалитет" федераль проекты буйынса сара уҙғарыла. Шулай уҡ Ҡулса урамының бер өлөшө ябыла. Өфө дәүләт нефт-техник университеты "1-се курстар фестивале"н ойоштора. Белем көнөндә, йылдағыса урамдарҙа машиналар хәрәкәте тығыҙ була, тип хәбәр итәләр ҡала хакимиәтенән.

Өфөлә “Төньяҡ симфония” яңғырай

Баш ҡалала Федор Шаляпин исемендәге Санкт-Петербург музыкаль театрының Симфоник оркестры сығыш яһай. Ике бүлектән торған концертта Россини, Пуччини, Бизе, Глинка, Дунаевский кеүек күренекле композиторҙарҙың классик музыка өлгөләренән торған бай программа тәҡдим ителә. Симфоник оркестр менән донъяға билдәле дирижер Фабио Мастранджело етәкселек итә. Итальян маэстроһы 22 йыл Рәсәйҙә йәшәй. Өфөлә Абдразаковтар уҙғарған халыҡ-ара фестивалдә ҡатнашҡан.“Төньяҡ симфония” тип аталған концерт 13 сентябрҙә “Башҡортостан” дәүләт концерт залында уҙа.

Белем көнөндә республикала иҫерткес эсемлектәр һатыу тыйыла

Магазиндар был турала иғлан урынлаштыра. Кафе, бар һәм ресторандарға сикләү тәртибе ҡағылмай. Башҡортостанда Яңы йыл каникулдары, Һуңғы ҡыңғырау байрамы һәм Йәштәр көнөндә, шулай уҡ һабантуйҙар үткәрелгән көндә лә алкоголь һатылмай. “Ҡоро закон”ды боҙоусыларға штраф һалына.

Табиптар ауыл халҡының һаулығын тикшерә

“Сәләмәтлек поезы” белгестәре акция барышында 140 меңдән ашыу кеше ҡабул иткән. 37 мең тикшеренеү үтеп, йүнәлтмәләр алған. Бөгөн күсмә бригадалар Хәйбулла районының Подольск, Дыуандың Вознесенка, Илештең Груздевка, Әлшәйҙең Тавричанка, Стәрлетамаҡтың Гончаровка, Өфөнөң Чесноковка ауылындарында эшләй. Алдан яҙылыу кәрәкмәй. Күсмә бригадаларҙың эш теҙмәһе менән Һаулыҡ һаҡлау министрлығы сайтында танышырға мөмкин.

Хәйбулла районында яңы фельдшер-акушер пункты асылды

Баҡал ауылында йәшәүселәр хәҙер заманса йыһазландырылған учреждениела тәүге медицина ярҙамын ала. Ул 200-ҙән ашыу кешене хеҙмәтләндерә. Программа "Һаулыҡ һаҡлау" милли проекты нигеҙендә ғәмәлгә ашырыла.

Бөгөндән мәктәп уҡыусылары һәм студенттар ҡала яны поездарында ярты хаҡҡа йөрөй ала

Башҡортостан ҡала яны пассажирҙар компанияһынан белдереүҙәренсә, 50 процентлыҡ ташлама республика биләмәһендә ғәмәлдә була. Ташламалы хаҡҡа билеттар алыу өсөн уҡыусыларға мәктәптән белешмә, студенттарға шәхес таныҡлығын күрһәтеү талап ителә.

Башҡортостанға инвестиция арта

Быйыл ярты йылда республика иҡтисадына йәлеп ителгән финанс уҙған йылдың ошо осорондағы менән сағыштырғанда 6 ярым процентҡа артҡан. 186 миллиард һумдан ашыу инвестиция килгән. Был күрһәткес буйынса беҙҙең республика Волга буйы округында Татарстан һәм Түбәнге Новгород өлкәһенән генә ҡалыша, тип хәбәр итәләр Статистика хеҙмәтенән. 2022 йылда Башҡортостанға инвестиция суммаһы тәүге тапҡыр ярты триллион һумдан ашты.

Башҡортостандан махсус хәрби операцияла ҡатнашыусылар шифаханала һаулығын нығыта

Әле 220 яугир ошондай мөмкинлек менән файҙаланған. Был турала Ғаилә, хеҙмәт һәм халыҡты социаль яҡлау министры Ленара Иванова белдерҙе Хәрбиҙәр өсөн башҡа ярҙам саралары ла ҡаралған, 80-дән ашыу кешегә белем алыу өсөн 50 мең һумлыҡ сертификаттар тапшырылған. Бынан тыш газ үткәреү өсөн 100 мең һумлыҡ 206 сертификат бирелгән.

Радий Хәбиров махсус хәрби операцияла ҡатнашыусының ҡыҙын беренсе класҡа оҙатты

Башҡортостанда ярты миллиондан ашыу бала өсөн яңы уҡыу йылы башланды, уларҙың 54 меңе тәүге тапҡыр парта артына ултырҙы. Республика Башлығы Радий Хәбиров алдан вәғәҙә иткәнсә махсус хәрби операцияһы зонаһында булған дуҫы һәм хеҙмәттәше Азат Бадрановтың ҡыҙын беренсе класҡа оҙатты. Мостай Кәрим исемендәге 158-cе башҡорт гимназияһында Белем көнөнә арналған тантаналы линейканан киләһе репортаж

Уҡыусылар сүп-сарҙы сорттарға бүлеп йыйырға өйрәнәң

Рәсәй экология операторы мәктәптәрҙә фандоматтар урынлаштырырға тәҡдим итә. Тәбиғәттән файҙаланыу һәм экология министрлығында был башланғысты хуплағандар. Проект бер нисә төбәктә, шул иҫәптән Башҡортостанда һынала. Мәктәп уҡыусылар сүп-сарҙы сортына ҡарап айырым һауыттарға ташлай, бының өсөн уларға балдар яҙыла. Был балдарҙы мәктәп ашханаһында файҙаланырға мөмкин.

ЛХР-ҙың Шайморатов исемендәге мәктәбе уҡыусылары Башҡортостан халҡын Белем көнө менән ҡотланы

Шайморатов батальоны яугиры Луганскийҙың Петровское ҡалаһындағы 22-се Миңлеғәле Шайморатов исемендәге мәктәбе уҡыусылары менән бергә Башҡортостан халҡын яңы уҡыу миҙгеле менән ҡотланы. Белем усағы бер йыл элек үҙ ишектәрен асҡайны. Республика етәксеһе Радий Хәбиров ҡушыуы буйынса мәктәп ҡыҫҡа ваҡыт эсендә төҙөкләндерелде.

Башҡортостанда торлаҡ төҙөлөшө йылдам бара

Быйыл 7 айҙа 1 миллион 760 мең квадрат метр файҙаланыуға тапшырылған. Был уҙған йылдың ошо осоронан 5 процентҡа күберәк. Статистика баҡса ерҙәрендә төҙөлгән йорттарҙы ла иҫәпкә алған. Башҡортостанда киләсәктә йыл һайын 3 миллион квадрат метр торлаҡ төҙөү маҡсаты ҡуйылған.