Ғафури районында «Уңайлы ҡала мөхите» проекты тормошҡа ашырыла

Халыҡ өсөн уңайлыҡтар. Был уңайлыҡтарҙаң иң мөһиме -сифатлы юлдар. Ғафури районы үҙәге Красноусол ҡасабаһы тиҙҙән танымаҫлыҡ булып үҙгәрәсәк. Юлдарҙа туҙған асфальт-бетон ҡатламы алмаштырыла, тротуарҙар һалына, эскәмйәләр ҡуйыла, биләмәләр һәм ихата алдары йәшелләндерелә.

Киләһе өс йылда Башҡортостанда соя баҫыуҙары майҙаны 10 тапҡырға арттырға тейеш

Был турала Ауырғазы районында ойошторолған “Баҫыу көнө”ндә белдерелде. Илдең билдәле эксперттары һәм ауыл хужалығы белгестәре ҡатнашлығындағы кәңәшмә соя һәм кукуруз үҫтереү технологияларына арналды. Семинар барышында эксперттар Башҡортостанда ҡулланыу өсөн тәҡдим ителгән сояның яңы сорттары менән таныштырҙы.

Башҡортостан Башлығы эшҡыуарҙарға күрһәтелгән ярҙам саралары менән таныштырҙы

Радий Хәбиров социаль селтәрҙәге сәхифәһендә Көйөргәҙе районынан Виктория Чуева миҫалында, шәхси эш асыу мөмкинлектәре тураһында яҙып сыҡты. Логопед дәүләт программаһы буйынса субсидия юллап, балаларҙың үҫеш студияһын асҡан һәм кәрәкле ҡормалдар һатып алған. Виктория Чуева кеүек эшҡыуарҙар Башҡортостанда бихисап. Республикала 128 мең бәләкәй һәм урта эшҡыуарлыҡ субъекты иҫәпләнә. Һәр береһенә тейешле шарттар булдырыға һәм ярҙам күрһәтергә тырышабыҙ тип яҙған Башҡортостан Башлығы.

Башҡортостанда Пилотһыҙ авиация системаларын үҫтереү дирекцияһы ойошторолдо

Республика Башлығы Радий Хәбиров тейешле указға ҡул ҡуйҙы. Дирекцияны Хөкүмәт Премьер-министры урынбаҫары - Сәнәғәт, энергетика һәм инновациялар министры Александр Шельдяев етәкләй. Яңы ойошма республикала хәрби һәм гражданлыҡ тәғәйенләнештәге пилотһыҙ осҡостар етештереү, фәнни-технологик мөмкинлектәрҙе үҫтереү, тармаҡта кадрҙар мәсьәләһен хәл итеү өсөн яуаплы була. Дирекцияға 2035 йылға тиклем иҫәпләнгән пилотһыҙ авиация стратегияһын әҙәрләү бурысы ҡуйыла.

Балтас районында үҙәк дауаханаға 30 миллион һумға диагностика ҡоролмалары һатып алынған

«Сәләмәтлек» милли проекты буйынса Балтас районында үҙәк дауаханаға 30 миллион һумға диагностика ҡоролмалары һатып алынған. Ҡатын-ҡыҙҙар маммографы, УЗИ аппараттары теүәл диагноз ҡуйып сирҙәрҙе асыҡларға ярҙам итә. Республикала беренсел медицина ярҙамын камиллаштырыу программаһы сиктәрендә учреждениела транспорт саралары ла яңыртылған.

Башҡортостанда һуҡыр һәм насар күргән граждандар өсөн махсуслаштырылған биш һайлау участкаһы эшләйәсәк

Берҙәм тауыш биреү көнөндә Башҡортостанда һуҡыр һәм насар күргән граждандар өсөн махсуслаштырылған биш һайлау участкаһы эшләйәсәк. Улар Өфө, Стәрлетамаҡ, Белорет һәм Бәләбәй ҡалаларында урынлашҡан. Был һайлау участкалары яуаплы кампанияға етди әҙерләнгән.

Өфөнөң 13-сө коррекция- мәктәп-интернаты капиталь төҙөкләндереүҙән һуң эш башланы

Мәғариф учреждениеһы «Мәктәп мәғариф системаһын модернизациялау» федераль программаһы буйынса 80 миллион һумға ремонтланған.

Мишкә районы яңы уҡыу йылын яңыртылған дүрт белем усағында ҡаршыланы

Шул иҫәптән республикала сентябрҙән эш башлаған полилингваль күп профилле мәктәбенең береһе тап ошо төбәктә урынлашҡан. Уҡыу-уҡытыу программаһы башлыса мари телендә алып барыла. Берҙәм мәктәп формаһы ла булдырылған.

«Ашҡаҙар моңдары» конкурсының икенсе туры еңеүселәре билдәләнде

Башҡорт халыҡ йырҙарын башҡарыусылар конкурсы икенсе йыл рәттән үткәрелә. Конкурстың географияһы ла киң. Быйыл унда Рәсәйҙең төрлө төбәктәренән 28 башҡарыусы ҡатнашты.

Өфөлә Аксаков баҡсаһын төҙөкләндереү сентябрь аҙағында тамамлана

"Торлаҡ һәм ҡала мөхите" милли проектына ярашлы баш ҡаланың тарихи үҙәгендәге парк тәртипкә килтерелә. Баш ҡала хакимиәтенән белдереүҙәренсә, биләмә мәҙәни мираҫ һәйкәле иҫәпләнә. Баҡсаның тарихи йөҙөн мөмкин тиклем һаҡлап ҡалыу бурысы ҡуйылған. Паркка ингән урында яңыртылған коллоналар урынлаштырыла, күл буйы тәртипкә килтерелә, әҙәби ҡунаҡхана ҡорола, балалар майҙансығы һәм скейт-парк була.

Республикала шәкәр сөгөлдөрө ҡаҙа башланылар

Ауыл хужалығы министрлығы мәғлүмәттәре буйынса, был эш Әлшәй, Шишмә, Благовар, Дәүләкән һәм Кушнаренко райондарында алып барыла. Әлшәй районы “СН-Агро” ойошмаһында татлы тамыр йыйыуға бер-нисә көн элек төшкәндәр. “Сөгөлдөр быйыл вағыраҡ, әммә татлыраҡ”, - ти хужалыҡ етәксеһе Илгиз Свечников. Киләһе йылда баҫыу майҙандарын 6 мең гектарға арттырырға ниәтләйҙәр.

Республикала халыҡ-ара геологтар чемпионаты уҙғарыла

"Геосаҡырыу" тип исемләнгән сара 16 сентябрҙә башлана. Унда Рәсәй төбәктәре, Бойондороҡһоҙ Дәүләттәр Берләшмәһе илдәренән йәш геологтар, ғалимдар ҡатнаша. Чемпионат Шишмә районындағы "Патриот" паркында, Архангел, Ишембай һәм Ғафури райондарында ойошторола. Вице-премьер – Хөкүмәт Аппараты етәксеһе Азамат Абдрахманов етәкселегендә ойоштороу комитеты балаларҙы урынлаштырыу, сараны уҙғарыу шарттары менән ҡыҙыҡһынды.
Азамат Абдрахманов әйтеүенсә, Башҡортостан өсөн был чемпионат үтә лә мөһим. Уның ер аҫты байлыҡтары күп булған төбәктә ойошторолоуы байтаҡ проблемаларҙы хәл итеү, ҡаҙылма байлыҡтар менән файҙаланыуҙы яңы кимәлгә күтәреү мөмкинлеген бирә. Чемпионатта 11 төр ярыш була. Конкурсанттар палеонтология, геохимия, гидрология, минералогия, петрография буйынса һынау тота, проекттарын яҡлай. Йәш геологтарҙың ярышын илдең абруйлы ғалимдары һәм ҡаҙылма байлыҡтар өлкәһендә эшләгән эксперттар баһалай.

Башҡортостанда Милли кейем көнө билдәләнә

Республика Башлығы указына ярашлы, байрам сентябрҙең икенсе йомаһы үткәрелә. Быйыл ул 8 сентябргә тура килә. Был көндә төрлө саралар ойошторола. Өфөлә “Ҡашҡаҙан” мәҙәниәт һәм ял паркында күргәҙмә ҡуйыла, оҫталыҡ дәрестәре уҙғарыла, милли бейеүҙәр күрһәтелә, балалар һәм өлкәндәр өсөн күңел асыу саралары үткәрелә.

Ауырғазы районы Төрөмбәт ауылында фельдшер-акушер пункты төҙөлә

Эштәр "Һаулыҡ һаҡлау" милли проектына ярашлы алып барыла. Әле төҙөлөшө аҙағына яҡынлаша. ФАП 400-ҙән ашыу кешене хеҙмәтләндерәсәк. Ауырғазы районында милли проект буйынса 6-сы фельдшер-акушер пункты төҙөлә. Быйыл республикала 75 яңы ФАП асыу маҡсаты ҡуйылған.

Рәсәйҙә ауыл ипотекаһы программаһы киләһе йылда яңынан ғәмәлгә ашырыла

Ауыл хужалығы министры Дмитрий Патрушев белдереүенсә, әле алдан бирелгән кредиттар буйынса йөкләмәләр артҡан. Бюджеттан аҡса алғас, программаны яңынан башларға мөмкин, - тине ул. Үҙәк банк нигеҙ ставканы 12 процентҡа тиклем күтәргәндән һуң, 25 августан банктар "Ауыл ипотекаһы" программаһы буйынса аҡса биреүҙе туҡтатты. Был программа 2020 йылда башланды, ауылдарҙа йорт-фатир алыу өсөн торлаҡ кредиты йыллыҡ 3 процент менән бирелде.

2023 йылдың 11 сентябренән Рәсәйҙә мобилизация булмаясаҡ

Бынан алда интернетта ошо көндән алып 200 мең ир-егетте махсус хәрби операцияға саҡырыу көтөлә тигән имеш-мимештәр барлыҡҡа килде. Әммә Оборона министры Сергей Шойгу мәғлүмәтте кире ҡағып, был хәбәрҙе украин телеграм-каналдарының фейкы тип атаны. Уның ҡарауы, Рәсәйҙә контракт буйынса хәрби хеҙмәткә ҡабул итеү дауам итә.

Ғафури районы Аҡкүл урта мәктәбендә хәүефһеҙлек сараларына арналған асыҡ дәрес үтте

Һуңғы айҙа Башҡортостан тимер юлдрында өс юл-транспорт ваҡиғаһы теркәлгән. Үкенескә, икәүһе - үлемесле тамамланған. Водителдәр тимер юл аша сыҡҡанда юл йөрөү ҡағиҙәләрен инҡар итмәгәндә бындай фажиғәләргә юл ҡуйылмаған булыр ине. Ғафури районы Аҡкүл урта мәктәбендә хәүефһеҙлек сараларына арналған асыҡ дәрес үтте.

Башҡортостан иген һатыуҙы арттырған

Быйыл сит илдәргә 312 мең тонна оҙатылған. Был уҙған йылдың ошо осоро менән сағыштырғанда 3 тапҡырға күберәк тип хәбәр итәләр Ауыл хужалығын күҙәтеү хеҙмәтенән. Башҡортостан игенен Рәсәй менән сиктәш дәүләттәр, шулай уҡ Бельгия, Нидерландтар, Төркмәнстан ала.

Өфөлә «Көҙ романтикаһы» беренсе классик музыка фестивале йомғаҡланды

Ул ике көн дауамында,баш ҡаланың Совет майҙанында үтте. Мәҙәни сара ҡунаҡтары алдында Дмитрий Крюков етәкселегендәге Башҡортостандың милли симфоник оркестры, Дәүләт академия опера һәм балет театры солистары, Шулай уҡ Юрий Медяник етәкселегендәге Төмән филармония оркестры сығыш яһаны.

Салауат районында йәшәүсе махсус хәрби операцияла ҡатнашыусыларға мобиль мунса эшләй

Тәгәрмәс өҫтөндә еңел пар менән. Салауат районы үҙәге Малаяҙҙа йәшәүсе Рөстәм Хөснуллин махсус хәрби операцияла ҡатнашыусы яҡташтарыбыҙға мобиль мунса эшләй. Әҙер булыу менән ул уны үҙе үк алып барып та ҡуясаҡ. Әйткәндәй, Рөстәм Хөснуллин Донбас еренә ярҙам ылауы менән 2015 йылдан алып йөрөй. Был мобиль мунса иһә уның үҙ ҡулдары менән төҙөп яугирҙарға тапшырған 11-се техникаһы.

Быйыл республикала халыҡты айырыуса борсоған 237 саҡрым юл участкаһын тәртипкә килтереү ҡаралған

Иҫегеҙгә төшөрәбеҙ, ремонт буйынса республика программаһы Башҡортостан башлығы Радий Хәбиров башланғысы менән тормошҡа ашырыла. БЮТ ижади төркөмө Өфө районында алып барылған төҙөкләндереү эштәрен ҡараны.