Башҡортостанда аҙыҡ сүстәрен етештереү буйынса завод барлыҡҡа килә

Уны “Алға” махсус иҡтисади биләмәһе майҙанында төҙөү ҡаралған. Проект инвестиция комитеты ултырышында ҡаралды. Бында пектин һәм клетчатка етештереү ҡарала. Пектин аҙыҡ-түлек сәнәғәтендә киң ҡулланыла. Шулай уҡ төрлө дарыуҙар составына инә, яман шеш күҙәнәктәре менән көрәшә. Клетчатка мал-тыуарға аҙыҡ әҙерләүҙә ҡулланыла. Проектты тормошҡа ашырыу өсөн 5 миллион 400 мең һум инвестиция йәлеп ителә.

Башҡортостанда ҡысынма ауырыуын йоҡтороуҙың 100-ҙән ашыу осрағы теркәлгән

Был сир ауырыу кешегә ҡағылғанда, йә кейем, уртаҡ әйберҙәр аша йоғоуы ихтимал. Тән ныҡ итеп ҡысый, өҫтәмә инфекция йоҡтороу хәүефе лә арта. Сирҙән һаҡланыу өсөн гигиена ҡағиҙәләрен теүәл үтәргә кәрәк, тип хәбәр итәләр Ҡулланыусылар хоҡуғын яҡлау хеҙмәтенән.

Башҡортостанда дәүләт йомғаҡлау аттестацияһының өҫтәмә осоро башланды

Мәғариф һәм фән министрлығынан белдереүҙәренсә, 11 сентябрь туған телдәр, 12-еһендә тарих, биология, физика һәм география, 15 -е йәмғиәтте өйрәнеү, химия, информатика һәм ИКТ, әҙәбиәт һәм сит телдәр буйынса имтихандар була. 19-23 сентябрҙә лә өҫтәмә осорҙа төп дәүләт имтиханын тапшырыу өсөн резерв көндәр ҡаралған. Өҫтәмә осор туғыҙынсы кластарға һөҙөмтәләрен төҙәтергә һәм төп дөйөм белем тураһында аттестат алырға мөмкинлек бирә.

Башҡортостанда “Сәләмәтлек” милли проекты өсөн быйыл 7 миллиард һумдан ашыу аҡса бүленгән

Республика Хөкүмәтендә һаулыҡ һаҡлау өлкәһендә федераль һәм төбәк программалар үтәлеше ҡаралды.Быйыл өс поликлиника, үҙәк район дауаханаһы, Балалар онкология һәм гематологияһы үҙәге файҙаланыуға тапшырыла, 90 фельдшер-акушер пункты ҡорола, шулай уҡ 168 автомобиль һәм 4 мең 300-ҙән ашыу медицина ҡоролмаһы һатып алына. Былтыр “Сәләмәтлек” милли проектына 8 миллиард һум йүнәлтелде.

Башҡортостан хужалыҡтарына 105 миллион һумға страховка түләнгән

Аграрийҙар 30 килешеү буйынса компенсация ҡайтара алған. Милли агростраховкалаусылар союзынан белдереүҙәренсә, илдә хужалыҡтарға зыян күргән баҫыуҙар өсөн өс йылда 8,5 миллиард һум страховка түләнгән. Быйыл республикала ҡырыҫ һауа шарттары арҡаһында ҡайһы бер райондарҙа ғәҙәттән тыш хәл тәртибе иғлан ителде.

Өфөлә “Әйҙә уйнарға” Бөтә Рәсәй фестивале уҙғарыла

Сарала уйынсыҡтар күргәҙмә-йәрминкәһе, конкурстар һәм оҫталыҡ дәрестәре ойошторола. Республика халыҡ ижады үҙәге директоры урынбаҫары Нәфисә Тулыбаева әйтеүенсә, фестивалгә килгәндәр билдәле йәнһүрәт геройҙары менән осрашып, иң яҡшы балалар спектаклдәрен һәм анимация проекттарын ҡарай ала.
“Әйҙә уйнарға” фестивале Совет майҙанында 14-17 сентябрҙә уҙа. Унда килгәндәр хәйриә акцияһына ҡушылып, балалар йорттарына, дауаханаларға, Өфө хосписына уйынсыҡтар бүләк итә ала.

Республикала туризмды үҫтереү мөмкинлеге булған майҙансыҡтар асыҡланды

Башҡортостан Үҫеш корпорацияһы инвестицион майҙансыҡтар исемелеген әҙерләгән. Улар Архангел, Мәләүез, Бөрө, Учалы, Нуриман, Ишембай, Дәүләкән һәм башҡа райондарҙа урынлашҡан. Инвесторҙарға биләмәләрҙә туризмды үҫтереү өсөн шарттар тыуҙырыла. Майҙансыҡтар менән Үҫеш корпорацияһы сайтында танышырға була.

Өфөлә Евразия фәнни-мәғариф үҙәге йорто реконструкцияланды

Был турала Радий Хәбиров социаль селтәрҙә хәбәр итте. - Башҡортостанда фәнгә ҙур иғтибар бирелә. Һуңғы бер нисә йылда фән менән шөғөлләнеү өсөн өҫтәмә мөмкинлектәр булдырылды. Инженер мәктәптәре асылды, юғары уҡыу йорттары "Приоритет" программаһында ҡатнаша, кампус төҙөлә, йәш ғаилмдарға ярҙам ҡаралған. Башҡортостан фәнни-технологик үҫеш рейтингында ил төбәктәре араһында 4-се урында. Һәр ваҡыт алға ынтылабыҙ, - тип яҙа Радий Хәбиров.

Бөгөн Милли кейем көнө билдәләнә

Башҡортостанда ул йылына ике тапҡыр - апрелдең өсөнсө һәм сентябрҙең икенсе йомаһында билдәләнә. Байрам уңайынан төбәк халҡын социаль селтәрҙәрҙә Радий Хәбиров тәбрикләне. «Был изге йолаға беҙ өс йыл элек нигеҙ һалдыҡ. Милли кейем - халыҡтың визит карточкаһы, унда уның тарихы, үҙенсәлеге, йәне сағыла. Һәм бөгөн уның менән ҡыҙыҡһыныу яңынан тергеҙелеүенә шатмын. Күп быуаттар дауамында республикала йәшәгән халыҡтар берҙәм һәм татыу йәшәй. Беҙҙең дуҫлыҡ, мәҙәниәттәрҙең күп төрлөлөгө, үҙ-ара ихтирам һәм ҡыҙыҡһыныу - бөгөн беҙгә яуызлыҡҡа ҡаршы торорға ярҙам иткән төп байлыҡ һәм ҡеүәтле көс. Беҙ төрлө, әммә беҙ берҙәм һәм һәр ваҡыт шулай буласаҡ. Халыҡтарыбыҙҙың йолаларын бергәләп һаҡлайыҡ, был матурлыҡты киләсәк быуындарға еткерәйек. Байрам менән!» - тип яҙған, Башҡортостан башлығы.

Өфөнөң Зинин ауылы эргәһендә тимер юл аша сыҡҡан күпер төҙөлөшөндә эш тамамланыу алдында

Әммә юл конструкцияһында етешһеҙлектәр табылған. Контроль тикшереү барышында объект таянысында 100 миллиметр тайпылыш теркәлгән. Быйыл ноябрҙә файҙаланыуға тапшырылға тейеш объект менән бәйле күрһәткестәр Мәскәүгә фәнни-тикшереү экспертизаһына ебәрелгән.

Баш ҡалала билдәле прозаик Динә Гаврилова менән әҙәби сәғәт ойошторолдо

Әхмәтзәки Вәлиди исемендәге Милли китапханала билдәле прозаик Динә Гаврилова менән әҙәби сәғәт ойошторолдо. Тыуған еренән ситтә йәшәгән әҙибә өсөн Башҡортостан илһам сығанағы. Уның китаптарының геройҙары ла Башҡортостанда йәшәүселәр. Теманың дауамы киләһе яҙмала.

Башҡортостанда 19 меңдән ашыу уҡыусы "Мәктәп туризмы" программаһында ҡатнашҡан

Эшҡыуарлыҡ һәм туризм министрлығынан хәбәр итеүҙәренсә, проект 5-се-11-се класс уҡыусыларына иҫәпләнгән. Уның маҡсаты - сәфәрҙәр барышында тыуған төйәк тарихы менән таныштырыу. Балалар өсөн оҫталыҡ дәрестәре лә ҡаралған. Уҡыусылар кейеҙ баҫыуҙа, милли аш-һыу әҙерләү, уҡтан атыу, һыбай йөрөүҙә үҙҙәрен һынап ҡарай ала.

Рәсәйҙә бөтә төр аттракциондар эшмәкәрлеге контролгә алына

Ошо турала федераль закон әҙерләнә, тип яҙа "Известия". Уға ярашлы, төбәктәр аттракциондарҙы теркәү һәм ҡабул ителгән нормаларҙы үтәмәүселәрҙең эшмәкәрлеген туҡтатыу хоҡуғын ала. Әле урындарҙа ғәҙәттән тыш хәл булғанда ғына саралар күрелә. Бынан тыш илдә аттракциондарҙың берҙәм исемлеге булдырыла.

Башҡортостан колледждарының 30 миллион һумлыҡ гранттар алыу мөмкинлеге бар

Был тема Республика хөкүмәтендә ҡаралды. 30-ар миллион һумлыҡ грантты 3 колледж ала. Аҡса конкурс нигеҙендә бирелә. Һайлап алыу этабы ошо айҙа башлана. Гранттар йыл һайын тапшырыласаҡ. Башҡортостан Рәсәйҙә урта һөнәри белем биреү учреждениелары һаны буйынса алдынғы төбәктәрҙең береһе. Беҙҙә 92 колледж бар. Уҙған йылда республикала колледждарҙы капиталь ремонтлау программаһы башланды. Быйыл бының өсөн 12 уҡыу йортона 500 миллион һум бүленде.

Башҡортостан археологтары Ҡырғыҙстанда боронғо ҡаласыҡ урынлашҡан биләмәлә ҡаҙыныу эштәре алып бара

Халыҡ-ара экспедиция Ала-Тоо итәгендә эшләй. Был урындар билдәле дәүләт һәм дин эшмәкәре Хөсәйенбәктең тыуған төйәге булараҡ билдәле. Шишмә районында уның мавзолейы бар. Боронғо ҡаласыҡты өйрәнеүҙә алынған халыҡ-ара тәжрибә Башҡортостан археологик ҡомартҡыларҙы тикшереүҙә ҡулланыласаҡ.

Радий Хәбиров Мәләүез районынан спортсы-паралимпиясы Фәнүр Аҡназаровты ҡунаҡҡа саҡырҙы

Йәш кеше, һаулыҡ мөмкинлектәре сикле булыуына ҡарамаҫтан, бала саҡтан «Толпар» ат спорты клубында һыбай йөрөү менән шөғөлләнә. Быйыл августа ул «Башҡорт аты» халыҡ-ара фестивалендә ҡатнаша. Унда төбәк етәксеһенә үҙ ҡулдары менән ат һүрәте төшөрөлгән ағас панно бүләк итә.
Фестивалдә Фәнүр Аҡназаров Башҡортостан Башлығы хакимиәтендә һәм төбәк етәксеһенең эш кабинетында булырға хыялланыуы хаҡында ла әйтә. Шуға ла төбәк башлығы спортсының ғаиләһен ҡунаҡҡа саҡыра.

Радий Хәбиров «ЛУКОЙЛ-Уралнефтепродукт « йәмғиәтен 30 йыллыҡ юбилейы менән тәбрикләне

Республика етәксеһе нефть продукттары һатыу буйынса махсуслашҡан ойошманың хеҙмәткәрҙәренә дәүләт наградалары һәм рәхмәт хаттары тапшырҙы. «ЛУКОЙЛ-Уралнефтепродукт» йәмғиәтенең төбәктә 54 автомобиль заправкалау станцияһы иҫәпләнә, һуңғы ике йылда республикаға һалынған инвестиция күләме 429 миллион һумға еткән. Башҡортостан менән «ЛУКОЙЛ» йәмғиәте араһында хеҙмәттәшлек килешеүе төҙөлгән.

Өфөнөң янғын һүндереүселәре заманса ут һүндереү ҡорамалдары менән эш итеү оҫталығын үҙләштерҙе

Баш ҡаланың Өфө шоссеһы урамындағы авария хәлендәге йортта улар өсөн махсус уҡыуҙар ойошторолдо. Ғәҙәттән тыш хәлдәр министрлығының йылдан-йыл техник мөмкинлектәре камиллаштырыла. Янғын һүндереүселәр заманса ҡорамалдар менән эш итә белергә, ут менән көрәш тактикаһын теүәл үҙләштерергә тейеш.

Башҡортостан аграрийҙары рапс баҫыуҙарының 60 процентын урып алған

Уңыш күләме буйынса Ауырғазы, Ҡырмыҫҡалы һәм Стәрлетамаҡ райондары алдынғылыҡ күрһәтә. Уртаса гектар ҡеүәте 10 центнер, быйыл күрһәткес былтырғынан түбәнерәк. Әле майлы культураны йыйыуҙы ямғыр тотҡарлай.

Республикала «Башҡортостан» ирекле мотоуҡсылар полкына адреслы посылка ебәреү акцияһы башланды

Өфөнөң Калинин районы «Ғаилә» үҙәгендә был эш «Бергә» хәрәкәте сиктәрендә ойошторола. Әлегә тиклем хәрбиҙәрҙең яҡындары, туғандары, йомарт кешеләрҙең тырышлығы менән йөҙҙән ашыу посылка ебәрелгән. Һалдаттарға йылы кейем, нәски, бирсәткә, медицина һәм гигиена кәрәк-яраҡтары, боҙолмай торған аҙыҡ-түлек менән посылкалар үҙәктә 14 сентябргә тиклем туплана, һуңынан ул таратыу үҙәге аша махус хәрби операцияһы биләмәһенә оҙатыла.

Башҡортостанда Милли кейем көнө

Йылына ике тапҡыр билдәләнгән сараны бөгөн дә республика халҡы дәррәү күтәреп алды. Төрлө быуын вәкилдәре милли кейемдәрҙә, биҙәүестәр тағып эшкә барҙы. Был көн шулай уҡ мәғариф учреждениеларында ла киң билдәләнде.