Фәйзуллин майҙанында марганец рудаһы эшкәртелмәйәсәк

Баймаҡ һәм Әбйәлил халҡына борсолорға урын юҡ, тине Радий Хәбиров аҙналыҡ оператив кәңәшмәлә. Быға тиклем предприятие эҙләнеү эштәре башҡарған. Дәүләт программаһына ярашлы, илдәге ҡаҙылма байлыҡ ятҡылыҡтары инвентаризация үтә. Эштәр ошо ҡағиҙәләр сиктәрендә башҡарылған һәм марганец сығарыу күҙ уңында тотолмай.

Республикала эксперттар үткән һайлауҙарҙың яҡынса йомғаҡтарына аңлатма бирҙе

Халҡыбыҙҙың берҙәмлек сағылышы. Эксперттар Башҡортостанда үткән электораль цикл хаҡында шундай фекерҙә. Махсус хәрби операция, коллектив көнбайыштың баҫымы һәм иҡтисади санкциялар тауыш биреүселәрҙе берләштерҙе генә. Халыҡ илебеҙ һайлаған курсты хуплай, Дәүләт Йыйылышы - Ҡоролтайҙың яңы составына был йүнәлештә ең һыҙғанып эшкә тотонорға кәрәк тигән һығымта яһаған сәйәсәт белгестәре. Етенсе саҡырылыштағы республика парламентының тәүге ултырышы октябрь башында үтә, Берҙәм тауыш биреү көнө һөҙөмтәләрен 13 сентябрҙә иғлан итеү ҡарала.

Башҡортостанда йәшәү минимумы арта

1 ғинуарҙан ул 13 мең 576 һумға еткерелә. Әле суммаһы 12 мең 650 һумға тиң. Йәшәү минимумы киләһе йыл буйы ғәмәлдә була. Уның суммаһын республика хөкүмәте билдәләй. 1 ғинуарҙан минималь хеҙмәт хаҡының да артыуы көтөлә. Ул 18 ярым процентҡа күтәрелә.

Башҡортостанда 280 километр оҙонлоҡта яңы федераль юл төҙөлә

Беҙҙең республика биләмәһе аша М-12 трассаһы үтә. Ул Мәскәүҙән Екатеринбурга тиклем һалына. Аҙаҡ магистраль Санкт-Петербургтан Владивостокка тиклем һуҙыла. Уның оҙонлоғо 12 мең километрҙан ашыу була. Беҙҙең республикала яңы трасса Дүртөйлө, Борай һәм Тәтешле райондары аша үтә.

Башҡортостанда ауылда йәшәгән инвалидтарҙы дауаханаға махсус транспортта алып баралар

Республика Башлығы ошоға бәйле ҡарарға ҡул ҡуйҙы. Инвалидтар һәм ҡаты сирләгән пациенттар табипҡа күренеү өсөн социаль транспорт менән файҙалана ала. Быға тиклем ауылда йәшәгән 65 йәштән өлкәндәр генә ошондай мөмкинлеккә эйә ине. Бынан тыш, медицина хеҙмәткәрҙәре үҙҙәре махсус транспортта инвалид йортона килеп дарыуҙар тапшыра ала.

Башҡортостанға төрлө илдәрҙән геологтар йыйыла

17 сентябрҙә Өфөлә “Геоһынау” тигән халыҡ-ара чемпионат башлана. Унда 50-гә яҡын Рәсәй төбәге, шулай уҡ Ҡаҙағстан, Беларусь һәм Үзбәкстандан студент командалары ҡатнаша. Йәштәр аҙна дауамында геология буйынса белемдәрен күрһәтә. Беҙҙең республикала Өфө фән һәм технологиялар университеты, Өфө дәүләт нефть-техник университеты, шулай уҡ Октябрьский нефть колледжында геологтарҙы әҙерләйҙәр.

Өфөлә алданған өлөшсөләр мәсьәләһе йыл аҙағына хәл ителә

Төҙөлөш һәм архитектура министры вазифаһын башҡарыусы Владислав Сидоркин шулай тип белдерҙе. Әле Өфөлә 1,3 мең кеше алданған өлөшсөләр исемлегендә ҡала, 12 проблемалы объект иҫәпләнә. Баш ҡалала өс йортта төҙөлөш бара, 11 торлаҡ буйынса компенсация түләнә, тағы бер йорт буйынса ҡарар тиҙҙән ҡабул ителә.

Дәүләт комиссияһы Өфөлә Салауат Юлаев һәйкәлен постаменттан алыуҙы хупланы

Проектҡа ярашлы, һәйкәлгә реставрация кәрәк. Был эш цехта башҡарылырға тейеш. Скульптураның төҫө лә үҙгәрә, ул тәүҙә булған ҡуйы-һоро төҫкә буяла. Биләмәлә видеокамералар ҡуйыла, һәйкәл урынлашҡан биләмә нығытыла. Реставрация башланыу ваҡыты әлегә билдәле түгел.

Башҡортостанда ауыл почта бүлексәләрен яңыртыу дауам итә

Ике йыл эсендә 55 бүлексә ремонтланған. Был хаҡта социаль селтәрҙә республика башлығы яҙған. Радий Хәбиров билдәләүенсә, төбәк почта бүлексәләренең 80 проценты ауылдарҙа урынлашҡан, улар миллион ярым кешене хеҙмәтләндерә. Күп кенә тораҡ пункттарҙа почта мөһим социаль инфраструктура үҙәге булып тора, унда хат ебәрергә һәм алырға, дәүләт хеҙмәттәре аккаунтын раҫларға йәки тергеҙергә, ҡан баҫымын үлсәргә, кәрәкле тауарҙар һатып алырға мөмкин. Бүлексәләрҙә инженер коммуникациялары реконструкциялана һәм модуль конструкцияларҙан яңы стеналар төҙөлә. Унда килеү ҡыуаныслы һәм уңайлы, тип яҙған Радий Хәбиров.

Башҡортостанда яҙғы сәсеү өсөн орлоҡ әҙерләнә

Әлегә был план 77 процентҡа үтәлгән. 218 мең тонна тупланған, тип хәбәр итәләр Ауыл хужалығы министрлығынан. Тиҙҙән яғыулыҡ-майлау материалдары менән тәьмин итеү өсөн предприятиелар исемлеге төҙөлә башлай. Ужым сәсеү ҙә дауам итә. Бөгөнгә был эш 324 мең гектарҙа башҡарылған. Пландың 54 проценты үтәлгән.

Төбәктә һайлауға бәйле ойошторолған «ҡыҙыу линия» телефонына 300-ҙән ашыу шылтыратыу ҡабул ителгән

Берҙәм тауыш биреү көнөндә 95 кеше мөрәжәғәт иткән. «Берҙәм Рәсәй» партияһы брифингында шылтыратыуҙарҙың төп өлөшө мәғлүмәти һорауҙарына ҡағылышлы булған. Партиялар буйынса һайлау күрһәткестәренә килгәндә, «Берҙәм Рәсәй» 68,9 процент тауыш менән беренсе урынды биләй.

Көндәр һыуыта башлау менән өйҙәргә йылы бирелергә тейеш

Башҡортостан Башлығы Радий Хәбиров яуаплы органдарҙы һауа шарттарының үҙгәреүен иғтибар менән күҙәтеп барырға ҡушты.
«Республикала барыһы ла әҙер. Температура түбәнәйеү менән йылытыу миҙгелен башларбыҙ»,- тине Башҡортостан башлығы. Иҫегеҙгә төшөрәбеҙ, федераль ҡануниәткә ярашлы, уртаса һауа температураһы биш көн рәттән 8 градус йылынанан түбәнерәк күрһәтһә, йылы бирелергә тейеш. Башҡортостанда тәү сиратта балалар баҡсалары, мәктәп һәм дауалау учреждениеларына йылы бирелә.

Ишембай районы Маҡар ауылы эргәһендә айыу һыйырға һөжүм иткән

Йыртҡыстан зыян күргән хайуан менән видеояҙма социаль селтәргә урынлаштырылған. Автор кадр артында хужаның иртәнге сәғәт етелә һыйырҙы ауыл көтөүе менән бергә көтөүлеккә ҡушҡанын һөйләй. Һыйырҙың умыртҡа һөйәге һынған, тип билдәләй шаһит.

Иглин районы пенсионерҙарына Өфө буйлап бай йөкмәткеле экскурсия ойошторолдо

Туристик сәфәр «Башҡортостан оҙон ғүмерлелеге» республика программаһы сиктәрендә ойошторолдо. «Башҡортостан оҙон ғүмерлелеге» республика башлығы Радий Хәбировтың грантына тормошҡа ашырылған үҙенсәлекле проекттарҙың береһе. Программа буйынса хаҡлы ялдағылар республиканың тарихи урындарына сәйәхәткә бара, ял итә. Иглин районы ла программала әүҙем ҡатнаша. Быйыл был мөмкинлек менән төбәктә йәшәгән 266 кеше файҙаланған. Иглиндар өсөн 5 туристик сәфәр ойошторолған.

Башҡортостанда 55 почта бүлексәһен яңыртып ҡороуға 238 миллион һум тотонолған

Республика Башлығы Радий Хәбиров социаль селтәрҙә яҙыуынса, Рәсәй Почтаһы һәм “Берҙәм Рәсәй” партияһы менән берлектә биналарҙа ремонт үткәрелә. Башҡортостанда 1 мең 30 почта бүлексәһе иҫәпләнә. Уларҙың 80 проценты ауылда урынлашҡан һәм 1,5 миллион кешене хеҙмәтләндерә. “Почта бүлексәләре яңыртыла. Бында килеүе күңелле була бара һәм эшләү өсөн уңайлы. Мәсьәләләр бар, әммә улар эҙмә-эҙлекле хәл ителә”, - тип яҙа Радий Хәбиров.

Башҡортостанда грипп таралыу хәүефе юҡ

Халыҡҡа прививка эшләнә. Ҡулланыусылар хоҡуҡтарын яҡлау хеҙмәтенән хәбәр итеүҙәренсә, бөгөнгә бер генә кешенең киҙеү йоҡтороуы теркәлгән. Республикала 500 мең прививка яһалған. Быйыл 2 миллион кешене вакциналау бурысы ҡуйылған.

Башҡортостандың индустриаль парктар булдырыу буйынса тәжрибәһен Удмурт республикаһында өйрәнәләр

Республика үҫеш корпорацияһында Ижевск вәкилдәре менән осрашыу булды. Удмурт делегацияһы индустриаль парктар булдырыу тәжрибәһе менән ҡыҙыҡһына. Улар шулай уҡ "Өфө" индустриаль паркы майҙансығын ҡараны, инфраструктура менән танышты. Делегация вәкилдәре белдереүенсә, Глазов ҡалаһында сәнәғәт паркы булдырыла. Шуға Башҡортостан тәжрибәһен өйрәнеү тураһында ҡарар ҡабул ителгән.

Башҡортостанда Һайлауға 14 меңгә яҡын күҙәтеүсе йәлеп ителде

8 меңгә яҡын кеше республика Йәмәғәт палатаһы ҡарамағында берҙәм тауыш биреү процессын контролдә тоторға булышлыҡ итте. Төбәктең бөтә һайлау участкаларында мониторинг алып барған Йәмәғәт күҙәтеүселәре махсус уҡыуҙар үтте. Улар Үҙәк һайлау комиссияһынан ебәрелгән оператив мәғлүмәткә таянып тауыш биреүселәр менән эш алып барҙы, сәйәси кампанияны асыҡ һәм ғәҙел ойошторорға булышлыҡ итте. Тәүге тапҡыр 2016 йылда ойошторолған Йәмәғәт күҙәтеүселәре штабын киңәйтеү көтөлә. Һайлауҙы күҙәтеүгә төрлө һөнәр эйәләре ҡушыла ала.

«Башҡорт сувениры» предприятиеһында инвалидтар өсөн тегеү цехы асылды

Сәләмәтлеге буйынса физик мөмкинлектәре сикләнгән граждандарға эш урыны булдырыу Республика мәшғүллек үҙәге ярҙамында тормошҡа ашырылған.

Башҡорт дәүләт опера һәм балет театрының «Садко» спектакле Мәскәүҙә күрһәтеләсәк

Башҡорт дәүләт опера һәм балет театрының иң күләмле, иң оҙон спектакле Мәскәүҙә күрһәтеләсәк. «Садко» тәүгә Ҙур театр сәхнәһенә сығарыла. Премьера алдынан Рәсәйҙең иң билдәле театрында Башҡортостан артистары репетиция үткәрҙе. Төп тамаша алдынан ижади коллектив бер көн эсендә яңы сәхнәне өйрәнеп өлгөрөргә тейеш ине.

“Әйҙә уйнарға” фестивалендә һөнәр һайлау һәм эшкә урынлашыу буйынса консультация алырға була

Үҫмерҙәр шунда уҡ “Профоткрытка” автор уйынында ҡатнаша ала. Башҡортостан Ғаилә, хеҙмәт һәм халыҡты социаль яҡлау министры Ленара Иванова белдереүенсә, социаль мәсьәләләр буйынса ла белгестәр менән кәңәшләшергә мөмкин.