Башҡортостанда 17 меңдән ашыу пенсионер туристик программала ҡатнашҡан

“Башҡорт оҙон ғүмерлелеге. Туризм” проекты әүҙем тормошҡа ашырыла. Эшҡыуарлыҡ һәм туризм министрлығынан белдереүҙәренсә, быйылғы план 84 процентҡа үтәлгән. Программа дауам итә. Хаҡлы ялдағылар республика буйлап бушлай сәйәхәт итә ала. Бының өсөн район йәки ҡала хакимиәттәренә мөрәжәғәт итергә кәрәк.

Башҡортостан табиптары яҡташ яугирҙәр сәләмәтлеге һағында

Республика Башлығы хакимиәте етәксеһе Максим Забелин социаль селтәрҙә яҙыуынса, медицина белгестәренең Луганскиҙа командировкаһы дауам итә. Уҙған айҙа табиптар 3 мең 400 кешене ҡабул иткән. Ошо көндәрҙә махсус бригада башҡорт батальондарының береһенә барған. Яугирҙәргә Красный Луч ҡалаһында тулы медицина тикшеренеүе ойошторорға ҡарар ителгән. “Табиптар анализдар алған һәм дауалау курсы үткәргән”, - тип яҙа Максим Забелин.

Бөгөн көйөргәҙеләр ағас ултыртты

Көйөргәҙе йәшелләнә. Бөгөн районда ағас ултыртыу буйынса өмә үтте. Иртәгә республикала ағас ултыртыу буйынса берҙәм өмә ойошторола. 7 мең төп эре ағас һәм 47 мең үҫенте ултыртыу ҡарала.

Өфөлә Республика көнөнә әҙерлек буйынса ойоштороу комитеты ултырышы үтте

Республика көнөндә Өфөлә иген эшкәртеү машиналары һәм ҡорамалдары етештереү буйынса завод файҙаланыуға тапшырыла. Яңы производство - «Амкодор» холдингының инвестиция проекты. Предприятияны асыу тантанаһына Белоруссия Премьер-министры етәкселегендә сил ил делегацияһы килеүе көтөлә. 11 октябрҙә үтәсәк байрам сараларына шулай уҡ Абхазия президенты ла саҡырылған. Республика көнөнә әҙерләнеү һәм уны уҙғарыу мәсьәләләре бөгөн ойоштороу комитеты ултырышында тикшерелде.

Өфөлә республика округы буйынса һайланған депутаттарға таныҡлыҡ тапшырылды

Бөгөн Башҡортостан үҙәк һайлау комиссияһының сираттағы 51-се ултырышы үтте. Колонна залында үткән сарала Дәүләт Йыйылышы - Ҡоролтайға республика исемлеге буйынса һайланған депутаттарға таныҡлыҡ тапшырылды.

Баймаҡ районында тағы ла бер «Үҫеш нөктәһе» асылды

«Мәғариф» милли проектының «Заманса мәктәп» төбәк проекты сиктәрендә Таулыҡай мәктәбендә мәғариф үҙәге ойошторолдо. Уҡыусылар өсөн яңы мөмкинлектәр асҡан тантананан репортаж.

Йәрмәкәй районында «Нур» мәсетенә нигеҙ һалынды

Иман йорто Тарҡаҙы ауылында сафҡа индерелә. Тарҡаҙы Йәрмәкәй районындағы тарихи ауылдарҙың береһе, уның тураһында тәүге мәғлүмәттәр 1782 йылда уҡ теркәлгән. Уҙған быуат баштарында бында өс мәсет була, Тарҡаҙы төбәк мосолмандарының дини-фәнни үҙәге һанала.

Стәрлетамаҡ районында йәшәүсе ғаилә Бөтә Рәсәй илһөйәрлек йыры конкурсында беренсе урынға лайыҡ булды

Мөхәббәт еңә. Стәрлетамаҡ районынан Олеся Спиридонова менән Владимир Денисов Ставрополдә үткән «Шишмәләр» Бөтә Рәсәй илһөйәрлек йыры конкурсында беренсе урынға лайыҡ булды. Уларҙың «Ишетәһеңме? « тип исемләнгән йыры халыҡ һөйөүен яулап, иң күп тауыш йыйҙы. Махсус хәрби операцияла ҡатнашыусылар һәм уларҙың ғаиләләренә арналған музыкаль композиция тураһында киләһе яҙма.

Башҡортостанда коронавирус йоҡтороусылар һаны артыуы күҙәтелә

Бер тәүлектә 55 кеше сир йоҡторған. Унан алда тәүлек өсөн 52 ковид диагнозы ҡуйылғайны. Әле 88 кеше дауаханаға һалынған. Уларҙың күбеһе - өлкән йәштәгеләр. 805 пациент өй шарттарында дауалана. Һуңғы тәүлектә коронавирустан үлеүселәр булмаған, 20 кеше һауыҡҡан, тип хәбәр итәләр Һаулыҡ һаҡлау министрлығынан.

Башҡортостанда айыуҙар ауылдарға яҡынлаша башлаған

Урман хужаһы ауылдарға сыға. Һуңғы арала интернет селтәрендә ихаталар эргәһенә килгән айыу төшөрөлгән видеояҙмалар тарала. Белорет районының Аҙналы ауылы эргәһендә лә «көтөлмәгән ҡунаҡ» мал-тыуарға һөжүм итә башлаған. Тулыраҡ видеояҙмала.

Башҡортостанда һөнәрҙәр фестивале уҙғарыла

"Киләсәккә билет" тип аталған сара 25-26 сентябрҙә Өфөлә, "Торатау" конгресс-холында була. Унда 6-сы-11-се класс уҡыусылар ҡатнаша. Мәғариф һәм фән министрлығынан хәбәр итеүҙәренсә, был фестивалдә уҡыусыларға төрлө һөнәрҙәр, карьера төҙөү тураһында мәғлүмәттәр бирелә. "Киләсәккә билет" тигән проект илдең бөтә төбәктәрендә ғәмәлгә ашырыла.

Башҡортостанда бөтә урындарҙа битлек режимын индереү өсөн сәбәп юҡ

Был турала Ҡулланыусылар хоҡуҡтарының яҡлау хеҙмәтенән хәбәр итәләр. Шулай ҙа һәр ойошма үҙ аллы сикләү ҡабул итеүе мөмкин. Медицина учреждениелары йыл һайын сирлеләр артҡан ваҡытта битлек режимына күсә. Башҡортостанда һалҡын тейҙереп ауырыусылар һаны артыуы теркәлде. Үткән аҙнала 25 мең кеше сирләгән, 5 кеше грипп йоҡторған.

Радий Хәбиров Сочи ҡалаһында уҙған Бөтә Рәсәй медиа форумында ҡатнашты

Мәғлүмәт фронтында ла ныҡлы еңеү кәрәк. Был яуаплы бурыс журналистар иңендә. Был турала бөгөн Башҡортостан Башлығы Сочи ҡалаһында уҙған Бөтә Рәсәй медиа форумы барышында белдерҙе.
Медийыйында Радий Хәбиров махсус хәрби операцияны яҡтыртҡан Рәсәй һәм Башҡортостан журналистарына дәүләт наградалары тапшырҙы. Хәбәрселәр Рәсәй Геройы Миңлеғәле Шайморатов миҙалы менән бүләкләнде.

Республиканың исемле батальондары, мобилизацияланған хәрбиҙәр сираттағы гуманитар ярҙам алды

Башҡортостан яугирҙарының хәрби арсеналына йәнә лә дрондарға ҡаршы ҡорал, яңы квадрокоптерҙар өҫтәлде. Республиканың исемле батальондары, мобилизацияланған хәрбиҙәр сираттағы гуманитар ярҙам алды. Ылауҙы алғы һыҙыҡҡа тиклем БЮТ хәбәрселәре лә оҙатып барҙы. Луганск, Донецк халыҡ республикалары, Запорожьенан репортаж.

«Геоһынау» Халыҡ-ара геология чемпионатына йомғаҡ яһалды

«Геоһынау» Халыҡ-ара геология чемпионатында Санкт-Петербург тау университеты командаһы еңеү яуланы. Хәтерегеҙгә төшөрәбеҙ, аҙна дауамында барған сарала Рәсәй, Ҡаҙағстан, Үзбәкстан һәм башҡа яҡын сит илдәрҙән 20 команда 11 төр ярышта көс һынашты. Бөгөн Шишмә районында республикала үткән беренсе форумға йомғаҡ яһалды.

Дүртөйлөлә шишмәләр төҙөкләндерелә

Райондың Көшөл ауылында яңыртылған ҡоҙоҡ асылған. Ауылдаштар уның биләмәһен таҙартҡан, ағастар ултыртҡан, йәйәүлеләр һуҡмағы булдырылған. Сығанаҡҡа Нурлығаян бабай ҡоҙоғо тигән исем бирелгән. Уны Граждандар һуғышы яугире Нурлығаян Нурғәлиев ҡаҙыта.

Рәсәйҙә ирекмәндәргә яңы ярҙам саралары әҙерләнә

Ҡануниәткә төҙәтмәләр Дәүләт Думаһында беренсе уҡыуҙа ҡабул итлгән. Проект авторҙары ирекмәндәр өсөн махсус билдә булдырырға, юғары уҡыу йорттарына ҡабул иткәндә волонтерлыҡ эшмәкәрлеген иҫәпкә алырға тәҡдим итә. Йәштәр сәйәсәте буйынса комитеттан белдереүҙәренсә, һәр төбәктә ирекмәнлек үҙәктәре асыла, волонтерҙарға ярҙам системаһы булдырыла.

Бөгөн Шишмәлә “Ҡатыҡ байрамы” уҙа

Район мәҙәниәт һарайы алдындағы майҙанда Башҡортостан, Рәсәй төбәктәренән ижади коллективтар төрлө халыҡтар милли мәҙәниәтенең байлығын һәм төрлөлөгөн күрһәтә. Байрам барышында биҙәү-ҡулланма сәнғәте менән шөғөлләнгән оҫталар, кәсепселәр күргәҙмә-сауҙа сараһы ла ойоштора. Теләүселәр милли аш-һыу әҙерләү буйынса оҫталыҡ дәрестәрендә ҡатнаша ала.

Өфөлә Кавказ халыҡтары милли мәҙәниәттәре фестивале уҙғарыла

Республика кимәлендәге сара 7-се тапҡыр ойошторола. Ул иртәгә Яҡутов исемендәге паркта була. Фестивалдә Кавказ халыҡтары милли-мәҙәни ойошмалары, үҫешмәкәр коллективтар, студенттар, профессиональ артистар ҡатнаша.

Республикала Евразия күсмә цивилизациялар музейы төҙөлөшө өсөн ер биләмәһе бүленә

Радий Хәбиров ошо турала документҡа ҡул ҡуйҙы. Уның менән рәсми мәғлүмәттәр порталында танышырға мөмкин. Төҙөлөш өсөн 19 ярым гектар ҡаралған. Ул Шишмә районы Йәрми ауыл биләмәһендә бүленә. Киләсәктә бында ҙур туристик зона булдырыу планлаштырыла.

Башҡортостанда 500-ҙән ашыу рөхсәтһеҙ сүплекте бөтөрөргә кәрәк

Республика Хөкүмәтендә үткән ултырышта ҡаты көнкүреш ҡалдыҡтары менән эш итеү реформаһы үтәлеше ҡаралды. “Генераль йыйыштырыу” федераль проекты буйынса 2030 йылға тиклем ҙур 100 сүплекте юҡ итеү маҡсаты ҡуйыла. Республиканың төньяҡ-көнбайыш райондарында сүп-сар сығарыу мәсьәләһе хәл ителгән. Яңы төбәк операторына графикты боҙмай эшләү бурысы ҡуйылды.