Өфөлә 4 йәшлек ҡыҙҙы тешләгән хужаһыҙ эт тотолған

Был хәл баш ҡаланың Пушкин урамында була. Бала ныҡ йәрәхәтләнә һәм дауаханаға оҙатыла. Өфө ҡала хакимиәтенең рәсми сайтында “Берәҙәк эттәр тураһында хәбәр ит” тигән интерактив карта булдырылған. Сервис хужаһыҙ хайуандарҙы тиҙерәк аулау маҡсатында асылған. Өфөлә йыл башынан 5 меңдән ашыу эт тотолған.

Мәғариф министрлығы ВУЗ-ға инеү өсөн иң түбән балдарҙы атаны

Мәҫәлән, киләһе йылда юғары уҡыу йорто студенты булыу өсөн рус теле, рус әҙәбиәте һәм географиянан кәмендә 40 балл йыйырға кәрәк. Математика, физика, биология һәм химиянан 39, йәмғиәтте өйрәнеү фәненән 45 балл алған осраҡта университетҡа документ тапшырырға мөмкин. Информатиканан иң түбән күрһәткес - 44, сит телдән – 30 балл.

Илдә бер миллиондан ашыу кешелә грипп һәм ОРВИ асыҡланған

Ҡулланыусылар хоҡуғын яҡлау хеҙмәтенән белдереүҙәренсә, сирҙең артабан да артыуы күҙаллана. Көндәр һалҡынайта, кешеләр ялдан һуң эшкә сыҡты, ти белгестәр. Коронавирус йоҡторғандар ҙа күбәйә. Рәсәйҙә бер тәүлектә 14 мең самаһы кешелә “ковид-19” вирусы раҫланған. Башҡортостан мәктәптәрендә грипп һәм ОРВИ таралыуға бәйле 18 класс карантинға киткән. Мәғариф һәм фән министрлығынан хәбәр итеүҙәренсә, әлегә тулыһынса ябылған мәктәптәр юҡ. Кластағы уҡыусыларҙың 20 проценты инфекция йоҡторған осраҡта, белем биреү туҡтатыла.

Радий Хәбиров IV Бөтә Рәсәй музыкаль конкурсы лауреаттарын ҡотланы

Сулпан Лысенкова, Яҙгөл Ишбаева һәм Екатерина Пименова составындағы трио Өфөлә уҙған Бөтә Рәсәй музыкаль конкурсы лауреаттары булды. Яҡташтарыбыҙҙың оло ҡаҙанышы менән социаль селтәрҙәрҙә Радий Хәбиров ҡотланы.

Баш ҡаланың Онежская урамында төҙөлә башлаған яңы балалар баҡсаһы 50 процентҡа әҙер

Генераль подрядсы бинаның өс ҡатында ла кирбес һалыуҙы тамамлап, фасад ҡороу, эске биҙәү эштәрен башланы. 240 урынға иҫәпләнгән мәктәпкәсә белем биреү учреждениеһы декабрҙә әҙер булыр тип көтөлә.

Өфөлә «Таҡыя» беренсе Халыҡ-ара балалар милли кейеме оҫталары конкурсының икенсе этабы тамамланды

Еңеүсегә - 100 мең һум. Өфөлә «Таҡыя» беренсе Халыҡ-ара балалар милли кейеме оҫталары конкурсының икенсе этабы тамамланды. Бәйгелә ҡатнашыуға Башҡортостандан тыш, Ырымбур, Ҡурған өлкәләренән, Саха- Яҡут, Мордва, Үзбәкстан, Ҡырғыҙстан, Белоруссия республикаларынан да ғаризалар ҡабул ителгәйне. Икенсе турға үткән 43 оҫтаның эштәренә БЮТ ижади төркөмө лә шаһит булды.

Джефф Монсон һәм Олег Тактаров осраша

ММА ҡағиҙәләре буйынса алыш Өфөлә уҙа. “Спорт Экспресс” промоутеры Владимир Хрюнов белдереүенсә, ул ноябрҙең икенсе яртыһында ойошторола. “Беҙ Монсондың һуңғы алышын үткәрергә булдыҡ. Уны Башҡортостанда уҙғарыу дөрөҫ булыр. Джефф республика парламенты депутаты итеп һайланды. Өфөлә ойошторолған сара ошо спорт төрөн популяр итеүгә лә йоғонто яһарға тейеш”, - тигән Хрюнов.

1 октябрҙән Башҡортостанда комендант сәғәте ваҡыты үҙгәрә

18 йәше тулмағандарға ата-әсәләренән башҡа йәмәғәт урындарында булыу тыйыла. Сикләү киске сәғәт 10-дан таңғы сәғәт 6-ға тиклем дауам итә. Ҡағиҙәне үтәмәгән ата-әсәләргә 100 һумдан 500 һумға тиклем штраф түләргә тура килә. Төнгө ваҡытта йөрөргә яратҡан үҫмерҙәр бер нисә тапҡыр тотолһа, улар профилактик иҫәпкә ҡуйыла.

Өфөлә Октябрь революцияһы урамында ремонт дауам итә

Эштәрҙең икенсе этабы өсөн ярты миллиард һумдан ашыу аҡса бүленә. Төҙөкләндереү 2025 йыл аҙағына тамамланырға тейеш. Аҡсаның ҙур өлөшө Башҡортостан ҡаҙнаһынан ҡаралған. Республика Башлығы Радий Хәбиров белдереүенсә, был үҙенә күрә Өфө Арбаты була. -Йәйәүлеләр биләмәһендә йорттар ҙа тәртипкә килтерелә, матурлана. Төҙөүселәр менән бергә ғалимдар һәм археологтар эшләй, - тине ул. Октябрь революцияһы урамында 74 мәҙәни мираҫ объекты бар.

Башҡортостанда фотоника үҙәге, наноүҙәк һәм нанофаб булдырыла

Яңы майҙансыҡтар Өфөлә ВУЗ-ара кампус биләмәһендә барлыҡҡа килә. Уларҙа заманса технологиялар үҫешәсәк. Республика Хөкүмәтенән хәбәр итеүҙәренсә, студенттар кампусының икенсе өлөшөн 2025 йылда файҙаланыуға тапшырыу көтөлә. Бында заманса тикшеренеү үҙәктәре урынлаша. Шулай уҡ торлаҡ корпустары, лабораториялар була. Евразия фәнни-мәғариф үҙәгенең студенттар кампусы Өфөнөң үҙәк өлөшөндә төҙөлә. Эштәрҙең тәүге этабын быйыл тамамлау көтөлә.

Башҡортостан ихаталарына – яңы һулыш

Йәрмәкәй районы үҙәгендә “Башҡорт ихаталары” республика программаһына ярашлы биш ихата биләмәһе төҙөкләндерелгән. Унда йәйәүлеләр өсөн тротуарҙар, автомобиль хужалары өсөн туҡталҡалар, балалар майҙансығы булдырылған.
“Башҡорт ихаталары” республика программаһы йорттар янындағы ихаталарҙы комплекслы төҙөкләндереүҙе күҙ уңында тота. Уның сығымдарының 94 проценты республиканан, биш проценты район ҡаҙнаһынан, бер проценты күп фатирлы йорттар милекселәренән финанслана.

Еңел машиналарға хаҡ артыуы көтөлә

"Рәсәй автомобиль дилерҙары" берлеге башҡарма директоры Вячеслав Жигалов белдереүенсә, хаҡтарға Рәсәй һумының курсы ныҡ йоғонто яһай. Ғинуар айында автобилдәрҙең 30 процентҡа тиклем ҡиммәтләнеүе мөмкин. Быйыл илдә 607 мең яңы еңел машина һатылған.

Башҡортостанда илдең иң яҡшы педагогик династияһы асыҡлана

Уҡытыусы һәм остаз йылына арналған конкурсҡа 78 төбәктән 600-ҙән ашыу ғариза килгән. Финалға 21 династия һайлап алынған. Мифтахетдин Аҡмулла исемендәге Башҡорт дәүләт педагогия университеты ректоры Салауат Сәғитов әйтеүенсә, Дағстандан уҡытыусылар династияһының 1300 йыл педагогик стажы бар. Бөтә Рәсәй иң яҡшы педагогик династия конкурсы 8 октябрҙә башлана. Ярышта өс номинация буйынса лауреаттар билдәләнә, шулай уҡ абсолют еңеүсе асыҡлана.

Республикала халыҡ һанын иҫәпләнеләр

Статистика буйынса, республикала 4 миллион 77 мең кеше теркәлгән. Уларҙың күбеһе ҡалаларҙа йәшәй. Ауыл халҡы - миллион ярымдан күберәк. Халыҡ һаны буйынса Өфөнән һуң Стәрлетамаҡ, Салауат, Нефтекама һәм Октябрьский килә. Иң бәләкәй ҡала - Ағиҙел. Бында 14 мең кеше йәшәй. Райондар араһында халыҡ һаны буйынса Туймазы беренсе. Иң бәләкәйҙәре тип Йылайыр һәм Йәрмәкәй аталған.

Бөгөн Дәүләт Йыйылышы-Ҡоролтайҙың етенсе саҡырылыш депутаттары ойоштороу кәңәшмәһенә йыйылды

Был Башҡортостан парламентының яңы составта тәүге тапҡыр тулыһынса осрашыуы. Депутаттар корпусы 110 кешенән тора, состав яҡынса 60 проценттан ашыуға яңырған. Тауыш биреү һөҙөмтәләре буйынса парламентҡа 6 сәйәси фирҡә вәкилдәре ингән, әммә 4 партия ғына 5 процентлыҡ кәртәне үткән. Улар-Берҙәм Рәсәй, Коммунистар, Либерал-демократик һәм «Ғәҙел Рәсәй-Патриоттар хаҡлыҡ өсөн» партиялары.

Башҡортостанда йәштәре "Киләсәк коды" менән ҡыҙыҡһына

Был проектҡа ярашлы мәктәп уҡыусылары программа яҙыу буйынса курстар үтә ала. Һанлы үҫеш министрлығынна белдереүҙәренсә, әле 13 мең ярым бала ғариза биргән. Уҡытыу онлайн һәм офлайн тәртиптә ойошторола. Курстар 8-се-11-се класс уҡыусылары, колледж студенттары өсөн тәғәйенләнә. Аҡса түләргә кәрәкмәй, сығымдарҙы дәүләт ҡаплай.

Республикала эшҡыуарҙар хоҡуҡтарын яҡлау буйынса вәкилдең йәмәғәт ярҙамсылары конференцияһы үтте

Йүнселдәргә дөрөҫ юл күрһәтеү. Башҡортостанда эшҡыуарҙар хоҡуҡтарын яҡлау буйынса вәкилдең йәмәғәт ярҙамсылары төбәк конференцияһы үтте.
Бөгөн республика төбәктәрендә бизнес-омбудсмендың йәмәғәт ярҙамсылары эшләй. Улар эшҡыуарҙарҙың мөрәжәғәттәренә оператив яуап бирә, хоҡуҡтарын күҙәтә, айырым муниципалитетта системалы проблемаларҙы асыҡлай. Ярҙам сараларын тағы ла киңәйтеү өсөн йәмәғәт ярҙамсыларының белемен камиллаштырыу мөһим. Ошо маҡсатта Өфөлә фекер алышыу майҙансығы ойошторолдо.

Башҡортостан «Иң яҡшы педагогик династия» конкурсын ҡабул итергә әҙерләнә

Һөнәри оҫталыҡ бәйгеһе 2012 йылдан Мифтахетдин Аҡмулла исемендәге Башҡорт дәүләт педагогия университеты тәҡдиме менән ойошторола.
Педагогик династиялар конкурсы уҡыу йортоноң бер факультеты нигеҙендә генә башланғыс ала. Артабан ул тотош уҡыу йорто буйынса уҙғарыла башлай. Йылдар үткәс ярыш республика, төбәк-ара статусы ала. Абруйлы конкурсҡа быйыл Рәсәйҙең төрлө төбәктәренән 600-ҙән ашыу ғариза килгән.

Ҡотҡарыусылар һөнәри оҫталығын һынай

Өфөлә эҙләү-ҡотҡарыу отрядтарының Республика чемпионаты башланды. Ғәҙәттән тыш хәлдәр системаһында хеҙмәт итеүселәр ярышы йыл һайын ойошторола. Конкурс оҫталарҙы асыҡларға булышлыҡ итә, яңы эш алымдары, технологиялар менән танышыу мөмкинлеге лә булып тора, ти Ғәҙәттән тыш хәлдәр буйынса дәүләт комитеты рәйесе Фәрит Ғүмәров. Чемпионат аҙна буйы бара. Тәүге этап Өфөлә үтте. Ҡотҡарыусылар емерелгән биналарҙа, юл-транспорт фажиғәләрендә, зарарлы һауа шарттарында эшләне. Ярыштың икенсе этабы Белорет районында ойошторола. Конкурста ҡатнашыусылар урман-тауҙарҙа юғалған кешеләрҙе эҙләй, һыуға батыусыларҙы ҡотҡарасаҡ.

Башҡортостан хеҙмәтте һаҡлау рейтингы буйынса тәүге урында

Сочиҙа Бөтә Рәсәй хеҙмәтте һаҡлау аҙналығы барышында йыллыҡ мониторинг иғлан ителде. Уҙған йыл йомғаҡтары буйынса Республика төбәктәр рейтингында беренсе баҫҡысҡа ҡуйылған. Был турала социаль селтәрҙәрҙә Ғаилә, хеҙмәт һәм халыҡты социаль яҡлау министры Ленара Иванова хәбәр итә. Бөтә Рәсәй хеҙмәтте һаҡлау аҙналығында 150-нән ашыу сара менән илдең 89 төбәге ҡатнаша.

Республика халҡы ипотека менән әүҙем ҡуллана

Башҡортостан Милли банкынан белдереүҙәренсә, торлаҡ кредиты ике тапҡырға күберәк бирелгән. Быйыл 9 айҙа 152 миллиард һумға ипотека тапшырылған. Росреестр идаралығынан хәбәр итеүҙәренсә, күсемһеҙ милек баҙарында килешеүҙәр 46 процентҡа артҡан. Республикала 8 айҙа 85 мең самаһы документ төҙөлгән.