Өфө районында йәшәүсе махсус операцияла ҡатнашыусы яҡташтарыбыҙға УАЗ автомобиле тапшырырға йыйына

Хәрбиҙәргә тәғәйен посылка. Өфө районынан Рөстәм Минғәзов сираттағы оҙон сәфәргә сығырға әҙерләнә. Был юлы ла ул махсус хәрби операцияла ҡатнашыусы яҡташтарыбыҙға УАЗ автомобиле тапшырырға йыйына. Ирекмәндең юлға сығыуын «Сарафан радио»һы аша хәрбиҙәрҙең яҡындары ла ишетә. Мөмкинлек менән файҙаланып улар ҙа Ватан һаҡсыларына үҙ күстәнәстәрен әҙерләгән.

Туристик инфраструктураны үҫтереүгә 1 миллиард ярым һум күләмендә федераль ярҙам

Башҡортостан эшҡыуарҙары кемпингтар һәм автокемпингтар төҙөүгә, пляждарҙы һәм милли турмаршруттарҙы төҙөкләндереүгә, мөмкинлектәре сикләнгән кешеләр өсөн уңайлы туристик мөхитте үҫтереүгә грант еңгән. Проекттарҙың береһе Ҡариҙел районының Ҡыҙыл Үреш ауылында тормошҡа ашырыласаҡ. Урындағы «Груздевтар ихатаһы» эргәһендәге йылға буйында пляж барлыҡҡа киләсәк.

Башҡортостанда 74-се йәшендә күренекле ғалим-лингвист Фирҙәүес Хисамитдинова арабыҙҙан китте

Башҡортостан фәне ауыр юғалтыу кисерҙе. 74-се йәшендә күренекле ғалим-лингвист, башҡорт теле белгесе, филология фәндәре докторы, профессор, дәүләт һәм йәмәғәт эшмәкәре Фирҙәүес Ғилметдин ҡыҙы Хисамитдинова арабыҙҙан китте.
Фирҙәүес Ғилметдин ҡыҙы тыуғын яғы - Әбйәлил районы Рәхмәт ауылында ерләнәсәк.

Башҡортостан кинематографияһы йәнә бер фильм менән тулыланасаҡ

Күгәрсен районы Түләбай ауылында Әмир Абдразаҡов исемендәге «Башҡортостан» киностудияһы яңы картина өҫтөндә эш башланы. Тыуған яҡ, атай йорто, туғандар араһындағы мөнәсәбәттәрҙе яҡтыртҡан социаль драмалы әҫәрҙә республика театрҙары актерҙары уйнай. Проект «Рәсәй йәштәре гранты» ярҙамында тормошҡа ашырыла.

Башҡортостанды туристар үҙ итә

Быйыл ете айҙа беҙҙең республика миллион ярымдан ашыу сәфәр ҡылыусыны ҡабул иткән. Был күрһәткес буйынса Башҡортостан округ төбәктәре араһында икенсе урын алған. Быйыл туризмға миллиард ярым һумлыҡ дәүләт ярҙамы бүленгән. Башҡоростанда уҙған йылда 2 миллион турист булған.

Быйыл Башҡортостан хужалыҡтары 2 мең 600-ҙән ашыу тоҡомло тана һатып алған

Бының өсөн субсидия бирелә, сығымдарҙың 50 проценты ҡаплана. Ауыл хужалығы министрлығынан хәбәр итеүҙәренсә, дәүләт ярҙамы тармаҡ үҫеше өсөн ҙур әһәмиәткә эйә, һөт һәм ит етештереү арта. Уҙған йылда республикала һәр һыйырҙан 6 мең 632 килограмм һөт һауылған.

Өфөлә Зинин күперен проектлауҙа асыҡланған етешһеҙлек енәйәт кодексы буйынса тикшерелә

Был турала ҡаланың Октябрь район прокуратураһынан хәбәр итәләр. Бындағы объект билдәләнгән ваҡыттан алда төҙөлөп бөттө, сентябрҙә файҙаланыуға тапшырылырға тейеш ине. Әммә күпер таяуҙарының береһе дөрөҫ урынлаштырылмауы асыҡланды. Дәүләт эспертизаһынан һуң Зинин күперендә етешһеҙлектәр бөтөрөлә, ул ноябрҙә асылырға тейеш.

Башҡортостанда 8 кеше хәүефле сир йоҡторған

Ҡулланыусылар хоҡуҡтарын яҡлау хеҙмәтенән хәбәр итеүҙәренсә, менингокок инфекцияһы шул иҫәптән биш балала теркәлгән. Инфекция һауа һәм уртаҡ һауыт-һаба аша йоға. Ауырыусыларҙың һәр икенсеһе генә һауыға. Был сирҙән вакцина менән һаҡланалар.

Өфөлә коммуналь техниканың ҡышҡылыҡҡа әҙерлеге тикшерелде

Санаңды йәй әҙерлә. Өфөлә коммуналь техниканың ҡышҡылыҡҡа әҙерлеге тикшерелде. Орджоникидзе районын төҙөкләндереү хужалығында 56 берәмек техника иҫәпләнә, тиҙҙән ойошмаға тағы ла 4 яңы махсус автомашина ҡайтарыласаҡ. Бөгөн хужалыҡ боҙлауыҡ менән көрәшеү өсөн юлдарға һибелә торған тоҙ һәм махсус ҡатнашма - бионорд ҡабул итә.

Республика юлдарында автоматлаштырылған теркәү системаһы яңыртыуҙар кисерә

Йылмайығыҙ һеҙ объективта. Республика юлдарындағы видеокамералар ҡаптырылмаған хәүефһеҙлек ҡайышы, телефондан һөйләшеү һәм туҡталыш линияһын үтеү кеүек ҡағиҙә боҙоу осраҡтарын теркәй башланы. Был саралар юл-транспорт вағиҡаларын кәметергә тейеш, тигән фекерҙә автоинспекторҙар.

Республикала эшҡыуарлыҡ аҙналығы дауам итә

Уның сиктәрендә Өфө, Стәрлетамаҡ, Бөрө ҡалаларында билдәле эшҡыуарҙар менән осрашыуҙар үтте. Бизнес башлаусылар тәжрибә уртаҡлашыу майҙансыҡтарында сығыш яһаны. Ғаилә һәм социаль эшҡыуарлыҡҡа тотоноусылар, һөнәрселәр етештергән продукция, сувенирҙар менән күргәҙмәлә танышырға мөмкин булды.

Өфөлә «Айыҡ ауыл: граждандар башланғыстары һәм социаль практика» төбәк-ара семинар-кәңәшмәһе үтте

Бөгөн Бөтә донъя айыҡлыҡ һәм алкоголизмға ҡаршы көрәш көнө. Ошо уңайҙан «Торатау» конгресс-холында «Айыҡ ауыл: граждандар башланғыстары һәм социаль практика» төбәк-ара семинар-кәңәшмәһе үтте. Осрашыуҙы Бөтә донъя башҡорттары ҡоролтайы республиканың Ғаилә, хеҙмәт һәм халыҡты социаль яҡлау министрлығы менән берлектә ойошторҙо.

Башҡортостанда 74-се йәшендә күренекле ғалимә Фирҙәүес Хисамитдинова арабыҙҙан китте

Башҡортостан фәне ауыр юғалтыу кисерҙе. 74-се йәшендә күренекле ғалим-лингвист, башҡорт теле белгесе, филология фәндәре докторы, профессор, дәүләт һәм йәмәғәт эшмәкәре Фирҙәүес Хисамитдинова арабыҙҙан китте. Фирҙәүес Хисамитдинова - 300-ҙән ашыу ғилми һәм фәнни-методик хеҙмәт, монографиялар, һүҙлектәр, уҡыу әсбаптары, дәреслектәр, хрестоматиялар һәм мәҡәләләр авторы - башҡорт тел ғилемен камиллаштырыуҙа төрлө башланғыстарға нигеҙ һалған арҙаҡлы шәхесебеҙ ине.

Өфөлә «Төбәктең тотороҡло үҫешендә тел сәйәсәте» төбәк ара- ғилми- ғәмәли кәңәшмәһе асылды

Мифтахетдин Аҡмулла исемендәге Башҡорт дәүләт педагогия университетында «Төбәктең тотороҡло үҫешендә тел сәйәсәте» төбәк ара- ғилми- ғәмәли кәңәшмәһе асылды. «Минең туған телем» программаһы сиктәрендә уҙған форумда ил төбәктәре, Һиндостандан вәкилдәр ҡатнаша. Кәңәшмәлә милли телдәрҙе һаҡлау, уҡытыуҙа яңы йүнәлештәр ҡарала.

Башҡортостанда инфраструктура объекттарын төҙөү сығымдары яртылаш субсидиялана

Республика Хөкүмәте ҡаҙнанан субсидия биреү тәртибен билдәләне. Документ менән рәсми мәғлүмәттәр порталында танышырға мөмкин. Унда шулай уҡ юл яны сервисы объекттары төшөнсәһе аныҡлана. Был исемлеккә ҡунаҡхана, яғыулыҡ ҡойоу һәм техник хеҙмәтләндереү станциялары, автомобиль йыуыу урындары индерелә.

Бөгөн Мәскәүҙә "Алтын көҙ" Бөтә Рәсәй агросәнәғәт күргәҙмәһе асыла

Унда йылдағыса Башҡортостан предприятиелары ла ҡатнаша. Республика экспозицияһында агросәнәғәт ҡаҙаныштары, инвестиция мөмкинлектәре, төбәк брендтары тураһында мәғлүмәттәр урын ала. “Алтын көҙ” күргәҙмәһе ауыл хужалығы һәм эшкәртеү сәнәғәте хеҙмәткәрҙәре көнө алдынан йыл һайын ойошторола.

Салауат районында Әлкә һәм Тәкәй ауылдары араһында юл төҙөкләндерелә

4 километрға яҡын ара тәртипкә килтерелә. Эште "ДорТрансСтрой" компанияһы башҡара. Тәкәй ауылы янында ремонт башланған ла инде. Тиҙҙән бында "Салауат ере" тарихи паркы булдырыла. Туристарҙың күпләп килеүе көтөлә. Комплекс "Янғантау" геопаркы биләмәһендә була.

Башҡортостан депутаттарына портфель бирелмәй

Был турала Республика парламенты рәйесе Константин Толкачев белдерҙе. Вәкәләттәрҙе үтәй башлағанда ғәҙәти булған ҡағыҙ документтар менән депутат портфелен тапшырыу сараһы булмай. Республика парламенты был эште электрон форматҡа күсергән. - Һәр депутаттың эш урынында планшет һәм тауыш биреү системаһы бар. Ултырыш алдынан бөтә документтар электрон рәүештә ҡабул ителә, - тине Константин Толкачев. Республика парламенты был аҙнала яңы составта тәүге ултырыш уҙғара. Ул 5 октябрҙә була.

Башҡортостан халҡын башҡорт теленән олимпиадала белемен һынарға саҡыралар

Онлайн интеллектуаль сара 11-15 октябрҙә ойошторола. Унда һәр кем ҡатнаша ала. Олимпиада өс кимәлдә уҙа. Башҡорт телен өйрәнә башлағандар, иркен аралашҡандар һәм төрлө диалектарҙа һөйләшкәндәр өсөн айырым үткәрелә. Туған телдән белемде һынап ҡарау өсөн олимпиада сайтында теркәлергә һәм 45 минут дауамында 30 һорауға яуап бирергә кәрәк. Һәр ҡатнашыусыға сертификат тапшырыла.

Өфөнән Айгөл Аллағолова “Башҡортостан” мотоуҡсылар полкы сафына баҫҡан

46 йәшлек ҡатын улы һәләк булғандан һуң махсус хәрби операцияға барырға ҡарар итә. Альберт Аллағолов Өфө кадет корпусында белем ала, нефть университетын тамамлай. Бала саҡтан хәрби булырға хыяллана. Диплом алғандан һуң контракт төҙөй. Хәрби бурысын үтәгәндә ғүмере өҙөлә. үлгәндән һуң Ҡаһарманлыҡ һәм Шайморатов ордендарына күрһәтелә. Ул йәшәгән йортҡа иҫтәлекле таҡтаташ ҡуйылған. Һалдаттың әсәһе бер нисә тапҡыр махсус операция биләмәһенә барырға тырышып ҡарай. Ялан кухняһы ашнаҡсыһы курсын тамамлай. Июндә Оборона министрлығы менән килешеү төҙөй. Әммә ҡатын икенсе хәрби часткә эләгә. “Был турала Республика Башлығы Радий Хәбиров белеп ҡалған. Рәхмәт уға! Мине “Башҡортостан” полкына күсерҙеләр. Бөгөн мин үҙебеҙҙең егеттәр янында”, - тип белдергән Айгөл Аллағолова.

Рәсәй бюджеты социаль йүнәлешле булып ҡала

Премьер-министр Михаил Мишустин вице-премьерҙар менән кәңәшмәлә киләһе йылдарға ҡаҙна проекты буйынса фекер алышты. Финанс документ сентябрь аҙағында Дәүләт Думаһына индерелде. Балалы ғаиләләргә берҙәм пособие түләү өсөн алдағы өс йылда 4,4 триллион һум һалына. Мохтаждарға дарыуҙар тапшырыу, медицина ойошмалары һәм мәктәптәрҙе төҙөкләндереү, торлаҡ шарттарын яҡшыртыу өсөн етерлек аҡса бүленә. 2024 йылда бюджет 35 триллион һумға тулылана.