Башҡортостанда турбина заводы төҙөү өсөн 9 миллиард һум инвестиция һалыныуы мөмкин

Проект Башҡортостан башлығы Радий Хәбиров рәйеслегендә уҙған «Инвестиция сәғәте»ндә ҡаралды. Осрашыуҙа инвесторҙар үҙ проекттары менән таныштырҙы. Дүрт проект Республика етәкселегендә ҡыҙыҡһыныу уятты, улар сәнәғәт һәм хеҙмәтләндереү өлкәһе буйынса. Был проекттарға өҫтөнлөклө статусы һәм һалым ташламалары бирергә тәҡдим ителде.

Радий Хәбиров МХО-ла ҡатнашҡан бер төркөм яугирҙарҙы дәүләт наградалары менән бүләкләне

«Беҙ һеҙҙең менән ғорурланабыҙ!» Республика көнө алдынан Башҡортостан башлығы махсус хәрби операцияла ҡатнашҡан бер төркөм яугирҙарҙы дәүләт наградалары менән бүләкләне. Тантана бөгөн Өфөлә уҙҙы. Һеҙ беҙҙең геройҙар. Һөр берегеҙ тураһында айырым йылы һүҙҙәр әйтергә мөмкин. Тоғро хеҙмәтегеҙ өсөн рәхмәт белдерәм,- тине Радий Хәбиров тәбрикләү телмәрендә.

Республикала махсус хәрби операция геройҙарына арналған китап донъя күрҙе

Уның авторы яҙыусы, "Ағиҙел " журналының баш мөхәррире Мөнир Ҡунафин. Ул быйыл Луганск һәм Донецк Халыҡ Республикаларында эш сәфәрендә булды. “СВОими глазами” китабына Тәтешле егете Фәнис Хөсәйенов хаҡында "Бер ғүмер етмәй икән" очергы һәм "Ҡыҙарып сейә бешкән мәл ине" юлъяҙмаһы ингән. Был әҫәрҙәрҙе халыҡ яратып ҡабул иткән. Мәҫәлән, очеркты социаль селтәрҙәрҙә 7 миллиондан ашыу кеше уҡыған.

Республика Үзбәкстанға күберәк тауар оҙата башлаған

Башҡортостан Хөкүмәте премьер-министрының беренсе урынбаҫары – Иҡтисади үҫеш һәм инвестиция сәйәсәте министры Рөстәм Моратов белдереүенсә, быйыл Ташкентҡа экспорт 26 процентҡа артҡан. “Тышҡы тауар әйләнәше буйынса Үзбәкстан 8-се урында тора. Үзбәкстан төбәктәре менән хеҙмәттәшлек итеү тураһында план әҙерләнек. Ауыл хужалығы, мәғариф, мәҙәниәт, спорт өлкәһендә бәйләнештәрҙе нығытыу ҡарала”, - тине Рөстәм Моратов. Быйыл Ташкентта Башҡорт эшҡыуарҙары клубы булдырылды. Ул республиканың иҡтисади мөмкинлектәре менән таныштыра. Шулай уҡ Сауҙа йорто асыу ниәте бар.

Илдә хәрби хеҙмәткә көҙгө саҡырылыш башланды

Республиканан Ҡораллы көстәргә 4 мең самаһы ир-егетте алыу ҡарала. Улар 18 йәштән 27 йәшкә тиклемгеләр. Башҡортостан хәрби комиссары Михаил Блажевич белдереүенсә, тәүге эшелонды октябрь уртаһында оҙатыу көтөлә. Повестка алып та, хәрби комиссариатҡа килмәүселәргә 30 мең һумға тиклем штраф һалыныуы ихтимал.

Бөгөн Өфөнөң «Салауат Юлаев» клубы Магнитогорскиҙа урындағы «Металлург» менән көс һынаша

«Металлург» әлеге ваҡытта 23 мәрәй менән турнир таблицаһының беренсе баҫҡысын биләй. 14 мәрәй туплаған «юлаев»сылар һигеҙенсе урында. Иҫегеҙгә төшөрәбеҙ, Шаршамбы үткән ситтәге матчта яҡташтарыбыҙ Силәбенең «Трактор»ын 4:0 иҫәбе менән ҡыйратҡайны. Хужалар ҡапҡаһына яуапһыҙ шайбаларҙы Евгений Бирюков, Вячеслав Лещенко һәм ике тапҡыр Артём Пименов индерҙе. Бөгөнгө осрашыу киске сәғәт 7-лә башлана. Уйындың тура трансляцияһын беҙҙең телеканалда ҡарағыҙ.

Коронавирус менән ауырыусылар арта

Һаулыҡ һаҡлау министрлығынан хәбәр итеүҙәренсә, бер тәүлектә 79 кешелә “ковид-19” вирусы асыҡланған. Кисә 75 кешелә инфекция раҫланған. Әле дауаханала 100-ҙән ашыу пациент, өй шарттарында 850-нән ашыу кеше дауалана. Табиптар әйтеүенсә, уларҙың өстән бер өлөшө өлкән йәштәгеләр. Үткән тәүлектә 136 кеше һауыҡҡан. Республикала халыҡты грипп һәм коронавирустан вакциналау дауам итә.

Өфөлә йәшәүсе ҡатынға смас-лифтинг процедураһы ҡот осҡос эҙемтәләргә килтергән

Йәшәреү урынына, йәрәхәт. Өфөлә йәшәүсе ҡатынға смас-лифтинг процедураһы ҡот осҡос эҙемтәләргә килтергән. Ҡиммәтле хеҙмәтте ул баш ҡала клиникаларының береһендә алған. Осраҡ буйынса республиканың тәфтиш комитеты тикшереү башлаған. Тулыраҡ киләһе яҙмала.

Өфөлә полковник, дәүләт һәм йәмәғәт эшмәкәре Иршат Фәхретдиновҡа иҫтәлекле таҡтаташ асылды

“Иршат Фәхретдинов яугир иптәштәренә һәр ваҡыт ярҙам итте. Ғәҙел һәм намыҫлы кеше булараҡ хәтәрҙе ҡалды”, - ти Башҡортостан Хәрби хәрәкәттәр ветерандары ойошмаһы рәйесе Тимерйән Рәжәпов. Иршат Фәхретдинов ике йыл элек 56 йәшендә коронавирустан вафат булды.

Башҡортостан башлығы яугирҙәргә дәүләт наградалары тапшырҙы

Махсус хәрби операцияла ҡатнашыусыларҙы бүләкләү тантанаһы Өфөлә үтте. “Республика көнө алдынан яҡташтарыбыҙ исеменән дәүер геройҙарына рәхмәт белдерәм. Беҙ һеҙҙең менән ғорурланабыҙ! Һеҙгә һәм ғаиләләрегеҙгә һәр саҡ терәк буласаҡбыҙ”, - тине сығышында Радий Хәбиров. Республика Башлығы Башҡортостан яугирҙәренә Генерал Шайморатов миҙалын тапшырҙы.

Бөгөн "Башавтотранс" предприятиеһына 50 яңы автобус тапшырылды

Сарала Республика Башлығы Радий Хәбиров ҡатнашты. "НефАЗ" машиналары 226-сы маршрутҡа сыға, үҙәк урамдарҙан Инорс биҫтәһенә тиклем йөрөй. Көн һайын был маршрут менән 26 мең пассажир файҙалана. - Тиҙҙән тағы 250 автобус килергә тейеш. "Башавтотранс" ышаныслы партнер, - тине Радий Хәбиров.

Өфөлә йорттар алдағы дүшәмбенән йылытыла башлай

Бөгөн ошо турала күрһәтмәгә ҡала хакимиәте башлығы урынбаҫары Сергей Кожевников ҡул ҡуйҙы. Был аҙнала иһә социаль учреждениеларға - мәктәп, балалар баҡсаһы, дауаханаларға йылы бирелде.

Өфөлә Бөтә Рәсәй Олимпия советтары форумы башланды

Унда 70-тән ашыу төбәктән вәкилдәр ҡатнаша. Йыйында Олимпия хәрәкәтен үҫтереү стратегияһы ҡарала. Документ 2028 йылға тиклем иҫәпләнгән. Форумда спортсыларҙың халыҡ-ара турнирҙа ҡатнашыуына бәйле мәсьәлә лә ҡарала. Рәсәй Олимпия комитеты президенты Станислав Поздняков әйтеүенсә, сәйәси сәбәптәр арҡаһында Олимпия уйындарында сығыш яһай алмаған атлеттарға компенсация түләнә.

Башҡортостан парламенты хәмер менән интернет аша сауҙа итеү башланғысын кире ҡаҡты

Федераль кимәлдә онлайн алкоголь һатыу тәҡдиме өйрәнелә. Дәүләт Йыйылышы – Ҡоролтайҙың профилле комитет рәйесе, “Айыҡ Башҡортостан” хәрәкәте координаторы Рөстәм Ишмөхәмәтов әйтеүенсә, республика парламенты спиртлы эсемлектәр менән интернет аша сауҙа итеүгә ҡаршы. “Бындай проекттарҙы ҡарағанда, төбәктәр фекере лә иҫәпкә алынырға тейеш”, ти депутат.

Көйөргәҙеләр сәләмәт тормош яҡлы

Бөгөн район үҙәге – Ермолаев ауылында Бөтә Рәсәй йәйәү йөрөү көнө уңайынан саралар ойошторолдо. Халыҡ паркка йыйылып спорт байрамында ҡатнашты. Иртәгә Өфөлә “Ҡашҡаҙан” мәҙәниәт һәм ял паркында Бөтә Рәсәй йәйәү йөрөү көнө уңайынан ҙур спорт байрамы ойошторола. Унда 2 мең 23 метр араны атлап үтәләр. Акцияла Рәсәй Олимпия комитеты президенты Станислав Поздняков, танылған Олимпия уйындары чемпиондары, ил төбәктәренән ҡунаҡтарҙың ҡатнашыуы көтөлә.

Быйыл Башҡортостанда 3 мең 700 социаль контракт төҙөлгән

Улар буйынса 538 миллион һум түләнгән. Был турала Ғаилә, хеҙмәт һәм халыҡты социаль яҡлау министрлығынан хәбәр итәләр. Башҡортостанда аҙ килемле ғаиләләр, яңғыҙ йәшәүселәр, махсус хәрби операцияла ҡатнашыусыларҙың яҡындарына социаль контракт нигеҙендә адреслы ярҙам күрһәтелә. Аҡсаны тәғәйен маҡсатта ғына тотонорға мөмкин. Эшҡыуарҙар өсөн иң күбе 350 мең һум бирелә, шәхси хужалығы булған граждандарға ярҙам 200 мең һум менән сикләнә.

Махсус тәғәйенләнештәге мобиль отряд ойошторолоуға - 35 йыл

Рәсәй гвардияһының ОМОН хеҙмәткәрҙәрен һөнәри байрам уңайынан Башҡортостан Башлығы Радий Хәбиров тәбрикләне. Махсус тәғәйенләнештәге мобиль отряд йәмәғәт хәүефһеҙлеген һаҡлау, террорға һәм экстримизмға ҡаршы күп яҡлы эш алып барыусы подразделение. Байрам уңайынан хеҙмәткәрҙәргә дәүләт наградалары һәм почет грамоталары тапшырылды.

Радий Хәбиров «Башавтотранс» предприятиеһына 50 яңы автобус тапшырыу тантанаһында ҡатнашты

Республика көнө алдынан баш ҡала халҡына бүләк. Бөгөн Башҡортостан башлығы Радий Хәбиров «Башавтотранс» предприятиеһына «НефАЗ» маркалы 50 яңы автобус тапшырыу тантанаһында ҡатнашты.
Ҙур класлы транспорт саралары Инорс биҫтәһен баш ҡаланың үҙәк урамдары менән тоташтырыусы 226-сы маршрутҡа сығасаҡ. Көн һайын был маршрут менән 24 мең самаһы пассажир файҙалана.

Капиталь ремонттан һуң Стәрлетамаҡ ҡалаһындағы 30-сы мәктәп асылды

Бинаны ремонтлауға федераль һәм төбәк бюджеттарынан 117 миллион һум самаһы аҡса бүленгән. Мәктәптә ремонт эштәре быйыл мартта башланған. Ярты йыл эсендә электр үткәргестәр, вентиляция тулыһынса алмаштырылған, кластар яңыртылған, тамаша һәм спорт залы ремонтланған, яңы тәҙрәләр һәм ишектәр ҡуйылған. Компьютерҙар, ноутбуктар, интерактив панелдәр һәм таҡталар, һанлы пианино, спорт ҡорамалдары һатып алынған.

Башҡортостан бөгөн донъя кимәлендә данлыҡлы спортсыларҙы ҡабул итте

Өфөлә Башҡортостан Спорт министрлығының 100 йыллығына арналған тантаналы ултырыш үтә һәм Олимпия Советтарының Бөтә Рәсәй форумы старт алды. Тарихи сарала Республика башлығы Радий Хәбиров, Рәсәй Олимпия комитеты президенты Станислав Поздняков, Рәсәй спорт министрлығының физик культура һәм күләмле спорт департаменты директоры Максим Уразов, илдең төрлө төбәктәренән, шул иҫәптән Донецк, Луганск республикаларынан, Запорожьье, Херсон өлкәләренән делегациялар ҡатнаша.

Башҡортостан делегацияһы Мәскәүҙә «Алтын көҙ - 2023» агросәнәғәт күргәҙмәһендә эш башланы

Башҡортостан делегацияһы илдең баш ҡалаһында үткән «Алтын көҙ - 2023» агросәнәғәт күргәҙмәһендә эш башланы. Төбәктең ауыл хужалығы министрлығы, предприятиелар, кооперативтар һәм фермер хужалыҡтары вәкилдәре, муниципалитет башлыҡтарынан торған команданы Башҡортостан Хөкүмәте Премьер-министры урынбаҫары, ауыл хужалығы министры Илшат Фәзрәхманов етәкләй.