Башҡортостандың өс предприятиеһына баҫыуҙарҙы һуғарыу өсөн 126 миллион һум аҡса бүленгән

Шишмәләге ике компания, Әбйәлилдәге шәхси хужалыҡ Һыу һиптереү ҡоролмалары алған. Улар бының өсөн 253 миллион һумдан ашыу аҡса тотонған. Предприятиеларҙың сығымының яртыһы ҡапланған.

Башҡортостанда геопарктар буйынса попечителдәр советы составына үҙгәрештәр индерелде

Республика Башлығы указы менән рәсми мәғлүмәттәр порталында танышырға мөмкин. Документҡа ярашлы, совет составына "Красноусол" шифаханаһы директоры Рәмил Бәҙретдинов, Рәсәйҙең ЮНЕСКО эштәре буйынса яуаплы секретары Татьяна Довгаленко, ""Торатау геопаркы" фән, мәғариф, экология, мәҙәниәт һәм туризм үҙәге" генераль директоры Артур Иҙелбаев, Транспорт һәм юл хужалығы министры Александр Клебанов индерелде.

Башҡортостанда иң яҡшы студенттарға махсус стипендиялар түләнә

Премьер-министр Андрей Назаров ошо турала документтарға ҡул ҡуйҙы. Был уҡыу йылында Сосланбәк Тавасиев исемендәге стипендияны Башҡорт дәүләт педагогия университеты студенты Анастасия Сизова ала. Уның суммаһы 5 мең 750 һум. Шулай уҡ Рауил Бикбаев, Ирек Мөҡсинов, Мостай Кәрим исемендәге стипендия алыусылар билдәләнде. Уларҙың күләме 1 мең 200 һум.

Бөгөн Өфөлә махсус хәрби операцияла ҡатнашыусыларҙың бер төркөмө оҙатылды

Улар Башҡортостанға ҡыҫҡа ялға ҡайтҡайны. "Өфө-Арена" янындағы майҙанға яугирҙәр, уларҙың яҡындары йыйылды. Вице-премьер Ирек Сәғитов хәрбиҙәргә мөрәжәғәт итте, республика яғынан һәр төрлө ярҙам барлығы тураһында белдерҙе.

Быйыл Башҡортостанда 28 мең ярым уҡыусы "Мәктәп туризмы" проектында ҡатнашҡан

Турҙар апрель айында башланған. Бының өсөн 300 миллион һумға яҡын аҡса бүленгән. -Проектҡа ярашлы уҡыусылар республика буйлап сәйәхәт итә ала. Йәш туристар өсөн оҫталыҡ дәрестәре, спорт ярыштары ҡаралған, улар үҙенсәлекле урындарҙа була. Балалар тыуған яҡ тарихын һәм мәҙәниәтен өйрәнә, - тип белдерҙе Эшҡыуарлыҡ һәм туризм министры Рөстәм Афзалов. Проектта 5-се-9-сы класс балалары ҡатнаша.

Башҡортостанда милли проекттар теүәл үтәлә

Рәсәй Хөкүмәте вице-премьеры Марат Хөснуллин үткәргән ултырышта беҙҙең республика маҡтап телгә алынды. 10 төбәктә, шул иҫәптән Башҡортостанда, төҙөлөш һәм юл хужалығы тармаҡтарында ыңғай күрһәткестәр һаҡлана. Рәсәйҙә 80 миллион квадрат метр торлаҡ файҙаланыуға тапшырылған. Беҙҙең республикала быйыл төҙөлөш өсөн 400-гә яҡын рөхсәт бирелгән. Йыл аҙағынаса 3 миллион квадрат метр торлаҡ төҙөлөргә тейеш.

Башҡортостанда капиталь ремонт өсөн түләү берҙәм квитанцияға индерелә

Төбәк операторынан шул турала хәбәр итәләр. Ноябрҙән Өфөнән тыш бөтә район һәм ҡалаларҙа берҙәм документ була. Квитанцияла капиталь ремонт өсөн иғәнә айырым юлда күрһәтелә һәм янында QR-код урынлаштырыла.

Өфөнән яугирҙарҙы ҡыҫҡа ваҡытлы ялдан һуң махсус операция биләмәһенә оҙаттылар

Ялға ҡайтҡан яугирҙар «Өфө арена» боҙ һарайы майҙаны алдынан йәнә махсус хәрби операция биләмәһенә юлланды. Ике аҙналыҡ отпуск ялынан һуң хәрби хеҙмәткә юлланған ир-егеттәрҙе туғандары, яҡындары, дуҫтары, Башҡортостан Хөкүмәте Премьер-министры урынбаҫары Ирек Сәғитов оҙатып ҡалды. Яугирҙар махсус хәрби операцияла ҡатнашыусы хеҙмәттәштәренә шәхси посылкалар һәм хаттар ҙа алып китте.

Дим биҫтәһендә «Атайҙар аллеяһына» нигеҙ һалынды

Иртәгә - Бөтә Рәсәй Атайҙар көнө. Ул ил президенты бойороғона ярашлы, 2021 йылдан билдәләнә. Календарҙағы махсус датаға бәйле, республикала төрлө саралар ойошторола. Күптән түгел Өфөлә «Атай даны» йәмәғәт наградаһы тапшырылһа, бөгөн ҡаланың Дим биҫтәһендә «Атайҙар аллеяһына» нигеҙ һалынды. Республикалағы өлгөлө ғаилә башлыҡтары тураһында киләһе яҙмала.

Башҡортостанда балалары колледждарҙа түләүле уҡыған күп балалы ғаиләләргә компенсация түләнәсәк

Яҡынса мәғлүмәттәргә ярашлы, уҡыу йылы тамамланғас, дәүләт ярҙамын алыу хоҡуғы менән ике мең ярым самаһы бала файҙалана аласаҡ. Өфөлә йәшәүсе Виктория Лирен яңғыҙы өс бала тәрбиәләй. Өлкән улы Олег радиоэлектроника, телекоммуникациялар һәм хәүефһеҙлек колледжының икенсе курсында белем ала. Быйылғы уҡыу йылы өсөн улар 60 мең һумдан ашыу аҡса түләгән. Әммә ишле ғаилә уҡыу йылы аҙағында сығымдарҙың яртыһын ҡайтара аласаҡ.

Өфө медицина колледжында бушлай махсус курс ойошторолдо

Тәүге медицина ярҙамы һәм ҡоро душ. Бөгөн Өфө медицина колледжында бушлай махсус курс ойошторолдо. Тәжрибәле белгестәр ғәҙәттән тыш хәлдәр килеп сыҡҡанда ашығыс медицина ярҙамы күрһәтергә өйрәтте, махсус хәрби операцияла ҡатнашҡан яугирҙарыбыҙға йыуыныу кәрәк-яраҡтары әҙерләү буйынса оҫталыҡ дәресе үткәрҙе.

Ҡырмыҫҡалы районы Ҡолош ауылы урындағы башланғыстарҙы яҡлау республика программаһында ҡатнаша

Ауыл халҡы зыяратты кәртәләргә теләй. Бөгөн урында йәшәүселәр һәм унан ситтә йәшәүселәр йыйылыш үткәрҙе. Тулыраҡ киләһе яҙмала.

Өфөлә Вера Фролованың күргәҙмәһе асылды

Өфөлә рәссам, Шәйехзада Бабич исемендәге республика дәүләт йәштәр премияһы лауреаты Вера Фролованың күргәҙмәһе асылды. «Байрам килде» тип аталған экспозицияла 80-дән ашыу картина тәҡдим ителгән.

Башҡортостан ишле ғаиләләр һаны буйынса илдә алдынғы урында килә

Беҙҙең республикала 59 меңдән ашыу ғаиләлә өс һәм унан күберәк бала тәрбиәләнә. Был күрһәткес буйынса Башҡортостан Волга буйы округында – беренсе, илдә – етенсе урында. Ишле ғаиләләргә дәүләт һәр яҡлап ярҙам итә. Мәҫәлән, быйылдан урта һөнәри уҡыу йорттарында түләүле уҡыған студенттарға 50 процент компенсация була. Бындай мөмкинлек менән 2,5 мең күп балалы ғаилә файҙалана аласаҡ. Әйткәндәй, бөгөн Рәсәйҙә Атайҙар көнө билдәләнә. Башҡортостан Йәмәғәт палатаһы булдырған “Атайлыҡ даны” бүләген алғандар араһында быйыл өс һәм унан күберәк бала тәрбиәләгән ир-уҙамандар күп булды.

Башҡортостандың финанс мөмкинлектәре тотороҡло иҫәпләнә

“Эксперт РА” рейтинг агентлығы беҙҙең республикаға “ruАА+” баһаһын ҡуйған. Былтыр төбәк эске тулайым продукты 2,2 триллион һумға еткән. Быйыл ул 3,2 процентҡа юғарыраҡ булыр тип көтөлә. Сәнәғәттә тотороҡло үҫеш күҙәтелә, инвестициялар күберәк йәлеп ителә. Аналитиктар фекеренсә, Башҡортостанда уйланылған консерватив бюджет сәйәсәте алып барыла. Ҡаҙна социаль йүнәлешле булып ҡала һәм милли, төбәк проекттары үтәләшен маҡсат итеп ҡуя.

Рәсәй халҡы президент Владимир Путинға ышаныс белдерә

Бөтә Рәсәй йәмәғәт фекерен өйрәнеү үҙәге социологик тикшеренеү үткәргән. Унда сәйәсмәндәргә ышаныс рейтингы баһаланған. Респонденттарҙың 78 проценты дәүләт башлығы эшмәкәрлеген хуплай. Был күрһәткес уҙған фекер алышыуға ҡарағанда бер аҙ артҡан. Премьер-министр Михаил Мишустинға халыҡтың 61 проценты ышаныс белдергән. Һәр икенсе респондент Хөкүмәт эшмәкәрлеген ыңғай баһалай.

Йылытыу миҙгеленә бәйле субсидия түләнә

Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, финанс ҡыйынлыҡтар сәбәпле торлаҡ-коммуналь хеҙмәттәр өсөн түләй алмаған ғаилә йәки айырым кеше дәүләттән ярҙамға өмөт итә ала. Республикала йылытыу миҙгеле сентябрҙән апрелгә тиклем тәғәйенләнгән. Быйыл ул октябрҙә башланды. Сентябрь өсөн субсидия ҡайтанан иҫәпләнә.

Башҡортостан парламенты яңы составта ҡануниәт эшмәкәрлеген башлай

Был аҙнала даими комитет ултырыштары уҙа. Бөгөн Торлаҡ сәйәсәте һәм инфраструктура үҫеше, шулай уҡ Аграр мәсьәләләр, экология һәм тәбиғәттән файҙаланыу буйынса комитеттар депутаттары йыйылыш үткәрә. Унда күп фатирлы йорттарҙа капиталь ремонт үткәреү, ер аҫты байлыҡтары менән файҙаланыу, орлоҡсолоҡҡа бәйле закон проекттары ҡарала. Документтар хупланған осраҡта, пленар ултырышҡа сығарыла. Ул октябрь аҙағында була.

Белорет халҡы үҙ көсө менән күпер ремонтлаған

Берештамаҡ ауылында эргәләге йылға аша йәйәүлеләр күпере төҙөкләндерелгән. Был турала социаль селтәрҙә район хакимиәте башлығы Андрей Иванюта хәбәр итә. Ауылда ике күпер бар. Күптән түгел ремонтланғаны аша күберәк йөрөйҙәр. Күперҙе урман хужалығы төҙөгән булған. Быға тиклем дә бер нисә тапҡыр ремонтланған. Был юлы ул әүҙем халыҡ, эшҡыуарҙар көсө менән тәртипкә килтерелгән.

Быйыл Башҡортостанға 1 миллион 660 мең турист килгән

Ғинуар-август айҙары буйынса шундай һан иғлан ителде. Был уҙған йылдың ошо осоронан 31 проценҡа күберәк. Башҡортостан туристар һаны буйынса Волга буйы округы төбәктәре араһында икенсе урында. Быйыл республикала туризм үҫеше өсөн 1 миллиард 900 миллион һум бүленгән, төрлө проекттар ғәмәлгә ашырыла.

Өфө хосписында Башҡорт дәүләт медицина университеты студенттары өсөн оҫталыҡ дәресе ойошторолдо

Рәсәйҙә үткән паллиатив ярҙам көнө уңайынан Өфө хосписында Башҡорт дәүләт медицина университеты студенттары өсөн оҫталыҡ дәресе ойошторолдо. Буласаҡ аҡ халатлылар ауыр сирҙәр менән ауырыған пациенттар менән эшләү үҙенсәлектәренә өйрәнеп, белемен камиллаштарҙы. Июндә асылған хосписта әле 58 пациент тәрбиәләнә.