Өфө хосписында Башҡорт дәүләт медицина университеты студенттары өсөн оҫталыҡ дәресе ойошторолдо

Рәсәйҙә үткән паллиатив ярҙам көнө уңайынан Өфө хосписында Башҡорт дәүләт медицина университеты студенттары өсөн оҫталыҡ дәресе ойошторолдо. Буласаҡ аҡ халатлылар ауыр сирҙәр менән ауырыған пациенттар менән эшләү үҙенсәлектәренә өйрәнеп, белемен камиллаштарҙы. Июндә асылған хосписта әле 58 пациент тәрбиәләнә.

Көйөргәҙелә ҡорот байрамы үткән

Мәмбәтҡол ауылы “Айыҡ ауыл” республика конкурсының муниципаль этабында ҡатнаша. Ярыш шарты буйынса, урында төрлө саралар ойошторола. “Бында һәр ғаиләлә хужабикәләр ҡорот яһай. Милли аҙыҡты әҙерләү һәм һаҡлау ысулдары менән уртаҡлаша”, ти район хакимиәте башлығы урынбаҫары Данил Акилов.
Быйыл Хәйбулла районында иң ҙур йомарлам ҡорот әҙерләнде. Юғары күрһәткес илдең рекордтар китабына индерелде.

Башҡортостан туристары Ҡара диңгеҙ буйынан биш көнлөк ялдан ҡайтты

«Башҡортостан оҙон ғүмерлелеге. Туризм» проекты буйынса асылған йүнәлештә хаҡлы ялдағыларҙың 46 кешенән торған тәүге төркөмөн БЮТ ижади төркөмө ҡаршы алды.

Республикала “Амкодор-Алға” заводы төҙөлә

Ул “Алға” махсус иҡтисади зонаһында була. Республика көнө алдынан Башҡортостанда “Амкодор-Ағиҙел” предприятиеһы асылды. Завод Белоруссияның “Амкодор” холдингы инвестиция проекты. Предприятие иген эшкәртеү ҡорамалдары, шулай уҡ ҡатнаш аҙыҡ һәм асфальт бетон заводтары өсөн металл конструкциялар етештерә. Заводты файҙаланыуға тапшырыу тантанаһында Рәсәй Хөкүмәте рәйесе урынбаҫары Александр Новак, Беларусь премьер-министры Роман Головченко ҡатнашты.

Дәүләт ярҙамын алыуға дәғүә итеүсе инновация проекттары фәнни экспертиза үтергә тейеш

Республика парламентында ошондай закон проекты әҙерләнгән. Документ октябрь аҙағында тәүге уҡыуҙа ҡарала. Эскпертизаны Республика фәндәр академияһы уҙғара. Проекттың сифаты, уны ғәмәлгә ашырыу һәм табыш алыу мөмкинлектәре анализланасаҡ.

Быйыл Башҡортостан еңел сәнәғәт предприятиелары 10 миллиард 700 миллион һумлыҡ тауар етештергән

Был уҙған йылдың ошо осоро менән сағыштырғанда миллиард ярым һумға күберәк, тип яҙа социаль селтәрҙә вице-премьер-сәнәғәт, энергетика һәм инновациялар министры Александр Шельдяев. Башҡортостанда еңел сәғәткә ярҙам буйынса программа эшләп килә.

Үткән аҙнала мутлашыусылар Өфө халҡы иҫәбенә 19 миллионға байыған

Баш ҡалала 50-нән ашыу кеше енәйәтселәргә аҡса күсергән. Өфө ҡалаһы буйынса эске эштәр министрлығы идаралығының штаб етәксеһе Артур Хафизов ошо турала белдерҙе. Ялған шылтыратыуҙарға алданыусылар исемлегендә тәүге урында пенсионерҙар. Ҙур предприятие хеҙмәткәрҙәре лә йыш ҡына мутлашыусылар тоҙағына эләгә. Студенттар һәм хатта мәктәп уҡыусылары ла алдана. Халыҡты иҫкәртеүгә ҡарамаҫтан, ҡайһы бер кешеләр кредит юллай, уны мутлашыусыларға күсерә. Белгестәр таныш булмаған кешеләр менән телефон аша һөйләшмәҫкә, банк картаһы мәғлүмәттәрен бер кемгә лә хәбәр итмәҫкә саҡыра.

Махсус хәрби операцияла ҡатнашыусылар һәм уларҙың ғаиләләренә ярҙам саралары артҡан

Социаль программаларҙың үтәлеше бөгөн Радий Хәбиров рәйеслегендә уҙған оператив кәңәшмәлә тикшерелде. Кәңәшмәлә шулай уҡ торлаҡ коммуналь хеҙмәттәрҙең ҡышҡы миҙгелгә әҙерлеге, ураҡ компанияһының йомғаҡтары ҡаралды. Төп темалар тураһында ентекләберәк киләһе яҙмала.

Юл хәрәкәте хәүефһеҙлеге дәүләт инспекцияһы хеҙмәткәрҙәре 12 мең самаһы иҫерек водителде туҡтатҡан

Быйыл Башҡортостанда юл хәрәкәте хәүефһеҙлеге дәүләт инспекцияһы хеҙмәткәрҙәре 12 мең самаһы иҫерек водителде туҡтатҡан. Эскән килеш руль артына ултырған водителдәр ҡатнашлығындағы фажиғәләрҙә 78 кешенең ғүмере өҙөлгән, 300-гә яҡын кеше төрлө тән йәрәхәттәре алған.
Ошондай хәлдәрҙе булдырмау маҡсатында бөгөн республика башлығы Радий Хәбиров рәйеслегендә Башҡортостанда юл хәрәкәте хәүефһеҙлеген тәьмин итеү буйынса ведомство-ара комиссия ултырышы үтте.

Баш ҡаланың 226-сы маршрутына яңы автобустар өҫтәлде

Файҙаланыуға тапшырылған 50 автобус та ҙур класлы. Башҡортостандың Транспорт һәм юл хужалығы министрлығы баш ҡалала йәмәғәт транспорты етмәүе мәсьәләһен танып, уны хәл итеү сараларын күрә. Бөгөн яуаплы вәкилдәр баш ҡаланың Инорс биҫтәһендә иртәнге сәғәт 7-лә, машиналар күп йөрөгән, тығындар буйлап үҙҙәре уҙҙы.

Башҡортостандың халыҡ шағиры Гөлфиә Юнысова китап уҡыусылар менән осраша

18 октябрҙә әҙибәнең "Рәхмәт, яҙмыш!" тип аталған шиғыр һәм йыр кисәһе үтә. Ул әҙибәнең 75 йәшлек юбилейы уңайынан ойошторола. Тамашала күренекле яҙыусылар һәм сәнғәт әһелдәре ҡатнаша. Сара "Башҡортостан" дәүләт концерт залында була, киске сәғәт 7-лә башлана. Инеү бушлай. Гөлфиә Юнысова 20-нән ашыу китап авторы. Әҫәрҙәре сит телдәргә тәржемә ителгән, шиғырҙарына йырҙар яҙылған.

Өфө районында 112-се маршрутта үҙгәрештәр була

Бында урта кластағы ПАЗ машиналарын ҙур автобустар алмаштыра. Транспорт һәм юл хужалығы министрлығынан хәбәр итеүҙәренсә, 20 процентҡа күберәк пассажир йөрөтөү мөмкинлеге була. 112-се маршрут Өфөләге Үҙәк баҙарҙан Миловка ауылына тиклем үтә.

Өфөлә күп профилле ветеринария үҙәге төҙөлә

Проект ҡала хакимиәтендә инвестиция кәңәшмәһендә ҡаралды. Ҡалала 50 меңгә яҡын эт һәм шунса бесәй бар. Улар өсөн юғары технологиялы медицина ярҙамы ҡаралмаған. Хужалары ауырыу хайуандарҙы башҡа төбәктәргә алып барырға мәжбүр. Ветеринария үҙәге тураһында проект ҡала хакимиәтендә хупланды.

Стәрлебаш районында йәшәүсе эшҡыуар тирмән төҙөй һәм халыҡты сифатлы он менән тәьмин итә

Ҡаланы ауылға алмаштыра. Хәҙер ауыл еренә аңлы рәүештә күсеп килгән йәштәрҙе бик һирәк осратырһың. Булат Фархшатов тап шундай замандаштарыбыҙҙың береһе. Өфөлә юғары белем алған егет ҡулына диплом алғас та тыуған районына ҡайта. Дәүләт ярҙамы менән ул Стәрлебашта тирмән төҙөй һәм халыҡты сифатлы он менән тәьмин итә.

Белорет районы Берештамаҡ ауылында Береш йылғаһы аша күпер яңыртылды

Берҙәм көс менән. Белорет районы Берештамаҡ ауылында урындағы халыҡ һәм эшҡыуарҙар көсө менән Береш йылғаһы аша күпер яңыртылды. Ауыл халҡын берләштергән һәм ярҙарҙы тоташтырған ҡоролманы асыу ҙур байрамға әйләнде. Тулырыҡ киләһе яҙмала.

Башҡортостанда ВУЗ-ара кампустың икенсе өлөшө төҙөлә башланды

Әле инженер ҡоролмалары әҙерләнә. Кампус төҙөлөшөн проеклау офисы етәксеһе урынбаҫары Сергей Гладких шулай тип белдерҙе. Студент кампусының беренсе өлөшө 74 проценҡа әҙер.

Башҡортостанда махсус хәрби операцияла ҡатнашҡан яугирҙәргә өҫтәмә ярҙам күрһәтелә

Вице-премьер–Финанс министры Лира Иғтисамова белдереүенсә, республикала яугирҙәр һәм уларҙың ғаиләләре 37 ярҙам сараһы менән файҙалана ала. Быйыл исемлек тағы тулыланды. Махсус хәрби операцияла ҡатнашып Рәсәй Геройы исеме алған йәки орден һәм миҙалдар менән бүләкләнгән яугирҙәргә бушлай ер биреү буйынса закон проекты әҙерләнә.

Башҡортостанда 3 миллион 225 мең тонна ашлыҡ һуғып алынған

Вице-премьер–Ауыл хужалығы министры Илшат Фәзрахманов шул турала белдерҙе. Бөгөнгә республика икмәк менән үҙен тулыһынса тәьмин иткән. Ураҡ 90 процентҡа теүәлләнгән. Хужалыҡтарға 25 мең гектар майҙанда һуңғы һәм техник культураларҙы урып йыйырға ҡалған, шәкәр сөгөлдөрөн ҡаҙыу тамамланып килә.

Башҡортостанда бөтә торлаҡ йорттар һәм социаль биналарға йылы бирелә

Торлаҡ-коммуналь хужалыҡ министры вазифаһын башҡарыусы Юрий Палтусов шулай тип белдерҙе. Бөгөн үҙәк йылылыҡ системаһына 16 меңгә яҡын күп фатирлы йорт һәм 4 меңдән ашыу социаль объект тоташтырылған. Әле торбаларҙа һауа баҫымы тикшерелеп тығындар бөтөрөлә. “Уҙған аҙнала йорттарға йылы биреүҙә тотҡарлыҡтар булыу сәбәпле 119 мөрәжәғәт ҡабул ителгән”, - тине Юрий Палтусов.

Башҡортостанда радиоэлектроник технопарк булдырыуға федераль ҡаҙнанан 504 миллион һум бирелә

Премьер-министр Михаил Мишустин ҡул ҡуйған бойороҡҡа ярашлы дүрт төбәккә субсидия тапшырыла. Өфөлә “РВ-1” тигән радиоэлектроник технопарк асыу ҡарала. Бының өсөн 1,2 миллиард һум йәлеп ителә. Технопаркта импортҡа алмаш шарттарында электроника сәнәғәте өсөн әйберҙәр етештереләсәк.

Башҡортостандың Мәскәүҙәге тулы хоҡуҡлы вәкиллегендә республика көнө уңайынан тантаналы сара үтте

Концерт программаһын Хөсәйен Әхмәтов исемендәге Башҡорт дәүләт филармонияһы артистары тәҡдим итте. Ҡурайға халыҡ йырҙары, билдәле романстар яңғыраны. Илебеҙ баш ҡалаһында төпләнгән яҡташтарыбыҙ бер аҙға булһа ла тыуған төййәгенә, атайсалына ҡайтып килгәндәй булды. Республика көнөнә арналған саранан төньяҡ баш ҡала йәшәгән милләтәштәребеҙ ҙә ситтә ҡалманы.