🪖Бөйөк Ватан һуғышында Еңеүгә - 80 йыл!

Ошо айҡанлы ҡотлайбыҙ һәм аяҙ күк йөҙө теләйбеҙ!

🧧Иғтибарығыҙға Бөйөк Ватан һуғышында һәләк булған шағир, журналист һәм уҡытыусы Төхфәт Фәттәхетдин улы Моратовтың шиғырын тәҡдим итәбеҙ.

🧧Төхфәт Моратов 1942 йылда үҙ теләге менән фронтҡа китә. 1944 йылдың 27 декабрендә Латвияны азат итеү өсөн барған алыштарҙың береһендә Будэниске ауылы эргәһендәге Курзим бейеклектәрендә һәләк була.

🪔ДУҪ ҠӘБЕРЕ ЯНЫНДА

Хуш бул, дуҫҡай,
ҡәбереңә, бәлки,
Һуңғы тапҡыр килеп торамдыр.
Ишетәһеңме, позициялар буйлап,
- Һөжүмгә! – тип сигнал уйналды.
Был сигнал,
ҡаты оран булып,
Үс алырға беҙҙе саҡыра.
Ғәфү ит, дуҫ,
оҙаҡ тора алмайым,
Тағы атакаға ашығам.
Һәм ғәфү ит, дуҫҡай,
ҡәбереңде
Сәскә менән биҙәп торманыҡ.
Һәйкәл өсөн баш осоңа тағы
Йондоҙ-фәлән яһап торманыҡ.
Үҙ окобың – һинең ҡәберең булды,
Һәм һин – һалдат – уны аңларһың:
Хаҡыбыҙ юҡ беҙҙең үпкәләргә
Ҡаты яҙмышына һалдаттың.
Башыбыҙҙы эйҙек окобыңа,
Бер минутҡа ғына теҙләнеп.
Үс алырға өнһөҙ анттар бирҙек,
Автоматты ҡыҫып, тешләнеп.
Залп бирмәнек,
һиңә тигән залптар
Дошман йөрәгенә атылыр.
Һеҙ ҡорбандар өсөн
иң ҙур һәйкәл –
Еңеү тигән һәйкәл һалыныр.

Төхфәт МОРАТ.