በሁለተኛው ሀገር በቀል የኢኮኖሚ ማሻሻያ ረቂቅ ላይ ምክክር ተካሄደ
****************
(ኢ.ፕ.ድ)

በሁለተኛው የሀገር በቀል የኢኮኖሚ ማሻሻያ ረቂቅ ላይ የሚደረገው ምክክር በገንዘብ ሚኒስቴር ተጀምሯል፡፡

የገንዘብ ሚኒስቴር ሚኒስትር ድኤታ ዶክተር እዮብ ተካልኝ በሁለተኛው አገር በቀል የኢኮኖሚ ማሻሻያ አጀንዳ ረቂቅ ላይ ከአጋሮች ጋር እየተካሄደ ያለውን የቴክኒክ ምክክር የመሩት ሲሆን፤ በመድረኩ ላይ የተለያዩ ለጋሽ አካላትና ሌሎች ባለድርሻዎች ተሳትፈዋል።

በረቂቁ ላይ ከቀረበው ገለጻ በኋላ በማሻሻያው ቁልፍ ምሰሶዎች እና ለጋሽ አካላት እገዛ ሊያደርጉባቸው ስለሚችሉት ዘርፎችና በመጪዎቹ ሶስት ዓመታት ማሻሻያውን ተግባራዊ ለማድረግ በሚያስፈልጉ ግብዓቶች ላይ ሰፋ ያለ ውይይት ተካሂዷል።

በዚሁ ውይይት ላይም ለጋሽ አካላት የማሻሻያውን አጠቃላይ ጥንካሬ ገምግመው በኢኮናሚው ላይ የሚኖረውን አጠቃላይ መረጋጋትና ሊያስከትል የሚችለውን እድገት አድንቀዋል።

በቀጣይ ሳምንትም ረቂቁ ለለጋሽ አገራት አምባሳደሮች ቀርቦ ሊደረግ በሚችሉ ድጋፎች ዙሪያ ያለው ሃሳብ ይዳብራል ተብሎ ይጠበቃል።

በሙሳ ሙሐመድ

መልካም እድል🙏

በወላይታ ዞን እየተካሄደ የሚገኘው የድጋሚ ሕዝበ ውሣኔ አስመልክቶ የተሰጠ ጋዜጣዊ መግለጫ‼️

የወላይታ ዞን የድጋሚ ህዝበ ውሳኔ የድምፅ መስጠት ሂደት ዛሬ ማለዳ
12፡00 ተጀምሯል። ቦርዱ የድጋሚ ህዝበ ውሳኔውን የሚያከናውኑ የምርጫ አስፈፃሚዎችን በተለያየ መንገድ የመለመለ ሲሆን፤ ከአዲስ አበባ 5215 የምርጫ አስፈፃሚዎች እና ከወላይታ 3845 የምርጫ አስፈፃሚዎች ተሳትፈዋል።

በዛሬው እለት ሁሉም አስፈፃሚዎች በስራ ላይ ተሰማርተው መራጮችን በማስተናገድ ላይ ይገኛሉ። አንድ አንድ ሰልፎች የበዙባቸው ጣቢያዎች ላይ ቦርዱ አሰልጥኖ በተጠባባቂነት የያዛቸውን አስፈፃሚዎችን አሰማርቷል። በ1812 የምርጫ ጣቢያዎች የተሟላ የምርጫ ቁሳቁሶች መድረሳቸውን ቦርዱ አረጋግጧል።

ከጠዋት 12፡00 ሰዓት እንከ 6፡00 ሰዓት በተገኘው መረጃ 370,552 መራጭ ድምፅ ሰጥቷል። በተያያዘም የድምፅ መስጠት ሂደት ቦርዱ ለሶስት የሀገር ውስጥ ተቋማት የታዛቢነት እውቅና ሰጥቶ በዞኑ የተለያዩ ጣቢያዎች ላይ 214 ታዛቢዎች ተሰማርተዋል።

የድምፅ መስጠት ሂደቱ ከተጀመረ በኋላ በርከት ያሉ መራጮች ከተሠጣቸው 6 ወር ያልሞላው መታወቂያ ሆኖ ተገኝቷል። ነገር ግን የቦርዱ መመሪያ አንድ ዜጋ ድምፅ መስጠት የሚችለው በመኖርያ ስፍራው ቢያንስ ለስድስት ወር እና ከዚያ በላይ መኖሩ መረጋገጥ እንዳለበት ተጠቅሷል። ስለዚህ እነዚህ መራጮች ከያዙት የነዋሪነት መታወቂያ በተጨማሪ ነዋሪነታቸውን የሚያረጋግጡበት የሶስት ሰዎች ምስክርነት ወይም ሌሎች የሠነድ ማስረጃዎችን በማቅረብ ድምፅ እንዲሰጡ ተደርጓል።

የኢትዮጵያ ብሔራዊ ምርጫ ቦርድ
ሰኔ 12 ቀን 2015 ዓ.ም

በኢትዮጵያ የቻይና አምባሳደር የተመራ ልዑክ የመቀሌ ኢንዱስትሪ ፓርክ ወቅታዊ እንቅስቃሴን ተመለከቱ
************
(ኢ.ፕ.ድ)

በኢትዮጵያ የቻይና አምባሳደር ዣኦ ዥዩአን፣ የቻይና የካውስል ሚኒስትር ሚስተር ያንግ እንዲሁም የሲሲሲሲ ( CCCC ) ኢትዮጵያ ምክትል ዋና ስራ አስፈፃሚ የመቀሌ ኢንዱስትሪ ፓርክን ወቅታዊ የስራ እንቅስቃሴ ተዟዙረው ተመልክተዋል።

ልዑኩን የመቀሌ ኢንዱስትሪ ፓርክ ስራ አስኪያጅ አቶ ፊሊሞን ተረፈ እና የፓርኩ የስራ ኃላፊዎች ልዑኩን ተቀብለው ያነጋገሩ ሲሆን የቻይናው ኮንስትራክሽን ካምፓኒ ( CCCC ) በፓርኩ እያከናወናቸው የሚገኙ ፕሮጀክቶች ላይ በጋራ ጉብኝት የተካሄደ ሲሆን በቀጣይ ፕሮጀክቱ በፓርኩ ስለሚያከናውናቸው ስራዎችም ውይይት ተካሂዷል።

ከዚህ ጋር በተያያዘም የመቀሌ ኢንዱስትሪ ፓርክ ወደ ስራ እየገባ መሆኑን ተከትሎ የቻይና ባለሀብቶች በፓርኩ በተለያዩ ዘርፎች በኢንቨስትመንት እንዲሰማሩ ለአምባሳደር ዣኦ ዥዩአን ጥሪ ቀርቧል።

የኢንዱስትሪ ፓርኮች ልማት ኮርፖሬሽን የመቀሌ ኢንዱስትሪ ፓርክን ወደ ስራ ለመመለስ በአመራሮች የታገዘ ቡድን በማቋቋም አስፈላጊውን ቅድመ ዝግጅት ማጠናቀቁ የሚታወስ ነው ሲል ኮርፓሬሽኑ ዘግቧል።