በኢንዱስትሪ ፓርኮች የሚሰሩ ባለሀብቶች ወደ እንግሊዝ ሀገር ከታሪፍ ነፃ ገበያ ምርቶቻቸውን ሊያቀርቡ ነው
**************
(ኢፕ.ድ)

የታዳጊ ሀገራት አምራቾች በዩናይትድ ኪንግደም ገበያ ምርቶቻቸውን ከታሪፍ ነፃ እንዲያቀርቡ የሚያስችል የመክፈቻ መርሃ ግብር በቦሌ ለሚ ኢንዱስትሪ ፓርክ ተካሂዷል።

በፕሮግራሙ መክፈቻ ላይ የተገኙት የዩናይትድ ኪንግደም የንግድ ሚኒስቴር ናይጄል ሀድልስተን የታዳጊ ሀገራት ነፃ የንግድ ፕሮግራም በ65 የዓለም ሀገራትና በ37 የአፍሪካ ሀገራት የሚጀመር መሆኑን ገልፀው በኢትዮጵያ በአልባሳትና ጨርቃ ጨርቅ እንዲሁም በሌሎች የማኑፋክቸሪንግ ዘርፎች ምርት የተሰማሩ አምራቾች በዩናይትድ ኪንግደም ገበያ ላይ ምርቶቻቸውን በነፃ እንዲያቀርቡ ያግዛል ብለዋል።

የኢንዱስትሪ ሚኒስትር ዴኤታ አቶ ሀሰን መሀመድ በበኩላቸው ሂደቱ እየተስተዋለ ያለውን የተዛባ የዓለም አቀፍ የንግድ ምጣኔና ስርዓት በመረዳት ፍትሀዊና የጋራ ተጠቃሚነትን የሚያሰፍን ፤ በማደግ ላይ ያሉ ሀገራትን ፍትሃዊ የኢኮኖሚ ተጠቃሚ የሚያደርግ የማበረታቻ ማዕቀፍ ነው ብለዋል፡፡

የኢትዮጵያ መንግስት በ2030 የፋብሪካዎችን የማምረት አቅም ወደ 85 በመቶ በማሳደግ ከአምራች ኢንዲስትሪው ዘርፍ 5 ሚሊየን የስራ እድል እና 9 ቢሊየን ዶላር ለማሳካት አቅዶ የተለያዩ ፕሮጀክቶችን ሲተገብር ቆይቷል ያሉት አቶ ሀሰን ባለፉት ተከታታይ አመታት የCOVID , AGOA እና የሩስያና ዩክሬን ጦርነት እና በሌሎች ምክንያቶች ኢትዮጵያን ጨምሮ የአብዛኛው ሀገር ኢንዱስትሪ የመቀዝቀዝ አዝማሚያ አሳይቷል።

መንግስት ግን ኢትዮጵያ ታምርት የሚል ሀገራዊ የአምራች ኢንዱስትሪ ንቅናቄ አብዮት በመፍጠር አለማቀፍ ጫናን መቋቋም የሚችል አምራች ኢንዱስትሪ በመገንባት ላይ ነው ብለዋል፡፡

የኢንዱስትሪ ፓርኮች ልማት ኮርፓሬሽን ዋና ስራ አስፈፃሚ አክሊሉ ታደሰ፣የኢንቨስትመንት ኮሚሽን ኮሚሽነር ወ/ሮ ሌሊሴ ነሜ እና የሚመለከታቸው ባለድርሻ አካላትና የዘርፉ ተዋናዮች ተገኝተዋል፡፡

ከሐምሌ ወር ጀምሮ 169 የፌደራል ተቋማት ግዥዎቻቸውን በኤሌክትርኒክስ ስርዓት ይፈፅማሉ
*************
(ኢ.ፕ.ድ)

ከሐምሌ ወር 2015 ዓ.ም ጀምሮ 169 የሚሆኑ የፌዴራል የመንግስት ተቋማት ግዥዎቻቸውን በኤሌክትሮኒክስ ስርዓት እንደሚፈጽሙ ተገለፀ።

የመንግስት ግዥና ንብረት ባለስልጣን ከአቅራቢና ከአቅራቢ ማህበራት ጋር በኤሌክትሮኒክስ ግዥ ስርአት ዙሪያ ውይይት እያካሄደ ይገኛል።

የመንግስት ግዥና ንብረት ባለስልጣን ዋና ዳሬክተር አቶ ሀጂ ኢብሳ ባደረጉት ንግግር፤ 169 የፌዴራል የመንግስት ተቋማት ከመጪው የሐምሌ ወር ጀምረው የኤሌክትሮኒክስ የግዥ ሰርአትን ይከተላሉ ብለዋል።

ባለፋት አስር ወራት 70 የፌዴራል የመንግስት ተቋማትና 10 ሺህ በላይ አቅራቢዎች በኤሌክትሮኒክስ ግዥ መፈፅመቸውን ጠቁመው በኤሌክትሮኒክስ ግዥ መፈፀማቸው ከ5 እሰከ 25 በመቶ የሚሆነውን የመንግስት በጀት ወጪ ማስቀረት ችለዋል ሲሉ ተናግረዋል።

ከመንግስት ዓመታዊ በጀት ውስጥ ከ60 እስከ 70 በመቶ የሚሆነው በጀት ለግዥ የሚውል በመሆኑ በጀቱ ለታለመለት አላማ እንዲውል በኤሌክትሮኒክስ ግዥ መፈጸም አስፈላጊ ነው ብለዋል።

አንድ የመንግስት ተቋም ከወረቀት ወደ ኤሌክትሮኒክስ ግዥ በመግባት ማንኘውንም ግዥ ሲፈፅም የበጀቱን 5 እሰከ 25 በመቶ ያተርፋል፤ በቀላሉ 5 በመቶ የሚሆን ወጪን ቢቆጠብ 40 ሚልየን ብር ቆጠበ ማለት ነው፤ ይህ ደግሞ ለመንግስት ዓመታዊ በጀት ትልቅ ድጋፍ ነው ሲሉ አብራርተዋል።

የክልል የመንግሰት ተቋማትን ሙሉ በሙሉ ከወረቀት የግዥ ሰርአት በማላቀቅ የኤሌክትሮኒክስ ግዥ ሰርአትን እንዲከተሉ የማድረግ ስራ እየተሰራ ነው፤ በ2017 ዓ.ም ሁሉም ተቋማት ሙሉ ለሙሉ የኤሌክትሮኒክስ የግዥ ስርአትን ተከትለው ግዥ እንደሚፈጽሙ አሳውቀዋል።

የኤሌክትሮኒክስ የግዥ ሰርአት ብልሹ የግዥ ሰርአትን በመቅረፍ የመንግስት በጀት በታለመለት አገልግሎት እንዲውል በማድረግ የሀገርን ስልጣኔ ያመጣል ሲሉ ገልፀዋል።

ከፌዴራል የመንግስት ተቋማት በተሻለ የግል አቅራቢዎች የግዥ ሰርአቱ ላይ በንቃት እየተሳተፉ ነው ያሉት ዋና ዳሬክተሩ፤ ተሳትፏችሁን በማጠናከር ሌብነትን ሙሉ ለሙሉ ማጥፋት ባይቻልም በከፍተኛ ሁኔታ መቀነስ ይገባናል ሲሉም አመላክተዋል።
በታደሰ ብናልፈው

የጣሪያ እና ግድግዳ ግብርን ምክንያት በማድረግ የቤት ኪራይ መጨመርም ሆነ ተከራይ ማስወጣት እንደማይቻል ከተማ አስተዳደሩ አስታወቀ
*************
(ኢ.ፕ.ድ)

የጣሪያ እና ግድግዳ ግብርን ምክንያት በማድረግ የቤት ኪራይ መጨመርም ሆነ ተከራይ ማስወጣት እንደማይቻል የአዲስ አበባ ከተማ አስተዳደር አስታውቋል፡፡

የከተማ አስተዳደሩ “ከጣሪያ እና ግድግዳ ግብር ጋር በተያያዘ አንዳንድ አከራዮች በተከራዮች ላይ የዋጋ ጭማሪ እያደረጉ መሆኑን በተደረገ ክትትል ደርሰንበታል” ብሏል፡፡

የከተማ አስተዳደሩ ካቢኔ የካቲት 30 ቀን 2015 ዓ.ም ባደረገው ውይይት ማንኛውም አከራይ የቤት ኪራይ እስከ ሰኔ 30 ቀን 2015 ዓ.ም ድረስ መጨመር የማይቻል መሆኑን መወሰኑንም አስታውሷል::

በመሆኑም የከተማ አስተዳደሩ ካቢኔ በወሰነው ውሳኔ መሰረት ማንኛውም አከራይ የቤት ኪራይ እስከ ሰኔ 30 ቀን 2015 ዓ.ም ድረስ መጨመርም ሆነ ተከራይ ማስወጣት እንደማይቻል ከከከተማ አስተዳደሩ የተገኘው መረጃ አያመለክታል፡፡

በቤኒሻንጉል ጉሙዝ ክልል ባለፉት አስራ አንድ ወራት ከሶስት ነጥብ ሁለት ቢሊዮን ብር በላይ ገቢ ተሰበሰበ
****************
(ኢ.ፕ.ድ)

ባለፉት አስራ አንድ ወራት ከ ሶስት ነጥብ ሁለት ቢሊዮን ብር በላይ ገቢ መሰብሰቡን የቤኒሻንጉል ጉሙዝ ክልል ገቢዎች ባለስልጣን አስታወቀ።

የቤኒሻንጉል ጉሙዝ ክልል ገቢዎች ባለስልጣን በ2015 በጀት ዓመት አስራ አንድ ወራት ሁለት ነጥብ ሁለት ቢሊዮን ብር ገቢ ለመሰበሰብ አቅዶ ባከናወናቸው ስራዎች ከሶስት ነጥብ ሁለት ቢሊዮን ብር በላይ መሰብሰቡን የባለስልጣኑ ዋና ዳይሬክተር አቶ መለሰ ኪዊ ገልፀዋል።

ባለስልጣን መ/ቤቱ ከቀጥተኛ ታክስ ሁለት ነጥብ ሁለት ቢሊዮን፣ ቀጥተኛ ካልሆኑ የታክስ አይነቶች 726 ሚሊዮን፣ ታክስ ካልሆኑ 161 ሚሊዮን እንዲሁም ከማዘጋጃ ቤታዊ ገቢ 170 ሚሊዮን ብር ገቢ መሰብሰቡንም አቶ መለሰ አስታውቀዋል።

የተሰበሰበው ገቢ ካለፈው ዓመት ተመሳሳይ ወቅት ጋር ሲነጻጸር በ942 ሚሊዮን ብር ብልጫ እንዳለውም ዋና ዳይሬክተሩ ተናግረዋል።

ለተመዘገበው የአፈጻጸም መሻሻል አስተዋጽዖ ያበረከቱ በየደረጃው የሚገኙ ግብር ከፋዮችን እንድሁም ግብር ሰብሳቢ ተቋማትና ባለሙያዎችን ዋና ዳይሬክተሩ አቶ መለሰ ኪዊ አመስግነዋል።

በቀጣዩ የ2016 በጀት ዓመት የተሻለ ገቢ ለመሰበሰብ ከወዲሁ የቅድመ ዝግጅት ስራዎች እየተሰሩ መሆኑን የጠቆሙት ዋና ዳይሬክተሩ፣ ያለደረሰኝ የሚከናወኑ ክፍያዎችንና በዘርፉ የሚስተዋሉ ብልሹ አሰራሮችን ለማስወገድ ባለስጣን መ/ቤቱ ትኩረት ሰጥቶ ይሰራል ብለዋል።

የግብር አሰባሰብ ሂደቱን ዘመናዊ ለማድረግ ቴሌብርን እና ሌሎች የዲጅታል አገልግሎቶችን ለማስፋፋት እንሰራለን ሲሉ ዋና ዳይሬክተሩ ማስታወቃቸውን ኢቢሲ ዘግቧል።