ለመዲናዋ የመንግሥት ሠራተኞች ሁለት ነጥብ ስምንት ቢሊዮን ብር የቤት ኪራይ ድጎማ ተደርጓል
******************
(ኢ ፕ ድ)
በ2015 በጀት ዓመት ለአዲስ አበባ ከተማ የመንግሥት ሠራተኞች ሁለት ነጥብ ስምንት ቢሊዮን ብር የቤት ኪራይ ድጎማ መደረጉን የፐብሊክ ሰርቪስና የሰው ሀብት ልማት ቢሮ አስታወቀ።

በምክትል ከንቲባ ማዕረግ የቢሮው ኃላፊ ወይዘሮ ሂክማ ከይረዲን የበጀት ዓመቱን የሥራ እንቅስቃሴ አስመልክተው ከኢትዮጵያ ፕሬስ ድርጅት ጋር ባደረጉት ቆይታ፤ ከቤት ኪራይ ዋጋ መጨመር ጋር ተያይዞ ከሠራተኞች ጥያቄ ሲነሳ እንደነበር ጠቅሰዋል።

የከተማ አስተዳደሩ አመራር ውይይት አድርጎ አቅም በፈቀደ መጠን ሁለት ነጥብ ስምንት ቢሊዮን ብር የቤት ኪራይ ድጎማ መደረጉን ገልጸዋል። ይህም ሠራተኞች ያላቸውን የክፍያ ምጣኔ ታሳቢ ያደረገና እስከ አንድ ሺህ 500ብር እንደሆነ ጠቁመው፤ ይህ አሁን ያለውን መሠረታዊ የቤት ኪራይ ክፍያ ጥያቄ የሚፈታ ባይሆንም በተወሰነ ደረጃ ችግሩን ማቃለል ያስቻለ ነው ብለዋል።

ከኑሮ ውድነቱ ጋር ተያይዞ ሠራተኛው የሚያነሳቸው ጥያቄዎች እንዳሉ የገለጹት ኃላፊዋ፤ በሁሉም የመንግሥት መስሪያ ቤት ካፍቴሪያዎች ላይ የሚከፈሉ ክፍያዎችን በተወሰነ መጠን መንግሥት መደጎም መቻል እንዳለበት ታምኖ በ2015 መመሪያ ተዘጋጅቶ…………

ሙሉውን ለማንበብ ሊንኩን ይጫኑ
https://press.et/?p=106158

በምስክሮች ላይ በማቆያ ውስጥ ይደርስ የነበረውን ችግር ይፈታል የተባለ ስምምነት ተፈረመ
*******************
(ኢ ፕ ድ)
በሰዎች የመነገድ ወንጀል ተይዘው በሚቀርቡ ተጠርጣሪዎች ላይ ለምስክርነት በሚጠሩ ዜጎች በማቆያ ውስጥ ይደርስ የነበረውን ችግር ይፈታል የተባለ ስምምነት ተፈረመ።

ስምምነቱን የፈረሙት ፍትህ ሚኒስቴር፣ ፌዴራል ፖሊስ ኮሚሽን፣ የአዲስ አበባ ፖሊስ ኮሚሽንና ሰባት አጋር ድርጅቶች ናቸው።

ስምምነቱ መኖሩ በኢትዮጵያ በምስክርነት የሚቀርቡ በሰው መነገድ ወንጀል እና ተጋላጭ ፍልሰተኞችን በምርመራና በፍርድ ሂደት ያላቸውን ተሳትፎ ለማሻሻል ይረዳል ነው አጋሮቹ ያሉት።

ተጎጂ ምስክሮች ፍርድ ቤት ቀርበው እንዲመሰክሩ ከለላና ጥበቃ በማድረግ ለመደገፍ የሚያስችል ነው።
የወንጀል ድርጊቱን ለመቀነስ እንደሚያግዝ፣ በምርመራና በፍርድ ሂደት ደህንነታቸው ተጠብቆ እንዲመሰክሩ እንደሚያስችልም ነው የተነገረው።

የፍትህ ሚኒስትር ደኤታ አቶ ፍቃዱ ጸጋ ምስክሮች ስፍራ በማጣታቸው ከተጠርጣሪዎች ጋር አብረው እንዲቆዩ ይደረግ ስለነበር ለሰብአዊ መብት ጥሰት፣ ለድለላና ለተለያዩ ነገሮች ይጋለጡ እንደነበር ተናግረዋል።

ስምምነቱ ችግሮቹን በመፍታት አጥፊዎች ለሕግ ቀርበው እንዲቀጡ ለማድረግ ያስችላል ነው ያሉት።
የፌዴራል ፖሊስ ምክትል ኮሚሽነር ጀነራል ዘላለም መንግስቴ በበኩላቸው፤ ህገወጥ የሰዎች ዝውውርና በሰዎች መነገድ ወንጀል ግዙፍ ኔትወርክ ተደራጅቶ የሚንቀሳቀስበት መሆኑን አስታውሰዋል።

ትግበራው ወንጀለኞችን ለማስቀጣት፣ ተጎጂዎች ፍትህ እንዲያገኙና እንዲካሱ እንሰሚያደርግና የተጎጂዎችን ስነልቦና ለመጠበቅ እንደሚያግዝም ነው የተናገሩት።

የጂአይዜድ የፕሮግራም አማካሪ ወ/ሮ የማርያም ደመቀ ከአጋሮች ጋር ቅንጅታዊ አሰራርን ማጎልበት እንደሚገባ ገልጸዋል።

የተሻለ የምስክሮች ጥበቃ እንዲኖር በሚደረገው ሂደት አጋሮችን በማስተባበርና የትግበራውን ሂደት ውጤታማነት በመከታተል ድጋፍ ይደረጋልም ብለዋል።

ዘላለም ግዛው
ሐምሌ 27 ቀን 2015 ዓም

የአዲስ አበባ ከተማ አስተዳደር የ2015 በጀት አመት ለአባይ ግድብ ግንባታ ከ682 ሚሊዮን ብር በላይ ገቢ አሰባስቧል
***************
(ኢ ፕ ድ)
በተጠናቀቀው የ2015 በጀት ዓመት ለአባይ ግድብ 682 ሚሊዮን 562 ሺህ በላይ ብር ከማህብረሰቡ ማሰባሰቡን የአዲስ አበባ ከተማ አስተዳድር የግድቡ ግንባታ ህዝባዊ ተሳትፎ ማስተባበሪያ ጽህፈት ቤት አስታወቀ።

ጽህፈት ቤቱ በ2015 ዓ.ም በጀት ዓመት በአስራ አንዱም ክፍለ ከተማ ህዝቡን በማሰተባበር ለግድቡ ግንባታ ገቢ ላሰባሰቡ አካላት የእውቅናና የምስጋና መርሃ ግብር አካሂዷል።

በእውቅናና በምስጋና መረሃ ግብር ላይ ንግግር ያደረጉት የጽህፈት ቤቱ ሀላፊ አቶ ምስክር ነጋሽ፤ በ2015 በጀት ዓመት ከአስራ አንዱም ክፍለ ከተማ 682 ሚሊዮን 562 ሺህ 488 ብር ለግድቡ ግንባታ ገቢ ተሰብስቧል ብለዋል።

ከተማ አሰተዳድሩ የግድቡ መሰረተ ድንጋይ ከተጣለበት ጊዜ ጀምሮ አራት ነጥብ ሰባት ቢሊዮን ብር አሰባስቦ ለታለመለት አላማ እንዲውል ማድረጉን አቶ ምስክር ገልጸዋል።

በታደሰ ብናልፈው
ሐምሌ 27 ቀን 2015 ዓም

በአማራ ክልል ያጋጠመውን የፀጥታ መደፍረስ በመደበኛ የህግ ማስከበር ስርአት ለመቆጣጠር አዳጋች ሆኖ በመገኘቱ የፌደራል መንግስት አስፈላጊውን የህግ ማዕቀፍ እንዲተገብር የአማራ ብሄራዊ ክልላዊ መንግስት ጠየቀ
**************
(ኢ.ፕ.ድ)

በአማራ ክልል ያጋጠመውን የፀጥታ መደፍረስ በመደበኛ የህግ ማስከበር ስርአት ለመቆጣጠር አዳጋች ሆኖ በመገኘቱ የፌደራል መንግስት አስፈላጊውን የህግ ማዕቀፍ እንዲተገብር የአማራ ብሄራዊ ክልላዊ መንግስት ጠየቀ።

በአማራ ክልል የተከሰተው የሰላም መደፍረስ በክልሉ ከፍተኛ ሰብአዊ፤ ማህበራዊና ኢኮኖሚያዊ ኪሳራ እያደረሰ መሆኑን የክልሉ መንግስት አስታውቋል።

የተከሰተውን የፀጥታ ችግር በቁጥጥር ስር ለማዋል እስካሁን በክልሉና በፌደራል የፀጥታ ሃይሎች በኩል በርካታ ስራዎች ሲሰሩ መቆየታቸው ይታወቃል።

ሆኖም በክልሉ ያለው የፀጥታ መደፍረስና ጥቃት በንፁሃን ዜጎች ላይ እያደረሰ ያለውን ጉዳት በአስቸኳይ ለማስቆም የፌደራል መንግስት ከመደበኛው የህግ ማስከበር ስርአት ባሻገር በኢፌዴሪ ህገ መንግስት መሰረት አስፈላጊውን የህግ ማዕቀፍ በአፋጣኝ እንዲተገበር ነው የአማራ ብሄራዊ ክልላዊ መንግስት የጠየቀው።

ክልሉ ወደ ቀደመ መረጋጋቱ እንዲመለስ ዜጎች ሰላማቸው ተመልሶ አርሶአደሩ ወደ እርሻው ክልሉም ወደ ልማት ስራዎች ፊቱን እንዲያዞር ለማድረግ መንግስት ያለበትን ሃላፊነት በአግባቡ ሊወጣ ይገባልም በሚል የፌደራል መንግስትን ጠይቋል።