የአልትራሳንውንድ ህክምና መሳሪያ መገጣጠሚያ ፋብሪካ ሥራ ጀመረ 
****
(ኢ.ፕ.ድ)

የአልትራሳንውንድ ህክምና መሳሪያ መገጣጠሚያ ፋብሪካ ሥራ ጀመረ።   

ፋብሪካው በአዲስ አበባ ጋርመንት በሚገኘው ሁዋጂያን ኢንዱስትሪ ፓርክ በይፋ ተመርቆ በዛሬው እለት ስራ ጀምሯል።

በምርቃት ሥነ ስርዓቱ ላይ የጤና ሚኒስትር ዴኤታ ፍሬህይወት አበበ፣ የቀድሞ የጤና ሚኒስትር ዶክተር ሊያ ታደሰ፣ የጀርመንና የእስራኤል አምባሳደሮችን ጨምሮ ሌሎች እንግዶች ተገኝተዋል።

የአልትራሳውንድ መገጣጠሚያ ፋብሪካው የተለያዩ ዓይነት ህመሞችን መመርመር የሚያስችል መሳሪያዎች የሚገጣጠሙበት ሲሆን ኤልስሜድ ሶሊሽንስና ሲመንስ የተሰኙ ኩባንያዎች በጋራ ኢንቨስት አድርገዋል።

የጤና ሚኒስትር ዴኤታ ፍሬህይወት አበበ፤ የፋብሪካው ወደ ሥራ መግባት ከኢትዮጵያም ባለፈ በአፍሪካ በላቀ ቴክኖሎጂ ህክምናን ተደራሽ ለማድረግ ቁልፍ ሚና ይኖረዋል ብለዋል።

ፋብሪካው በተለይም በህክምና ዘርፍ ለተሰማሩ ቴክኒሻኖች፣ መሃንዲሶችና ደጋፊ ባለሙያዎች የሥራ ዕድል በመፍጠር በኩል ወሳኝ ሀገራዊ ፋይዳ ያለው መሆኑንም ገልጸዋል።  

የኤልስሜድ ሶሉሽን ኩባንያ ፕሬዝዳንት ሮኔን ባሁር በበኩላቸው ከረጅም ዓመታት ዝግጅት በኋላ የፋብሪካው እውን መሆን አስደስቶናል ብለዋል።

ለፋብሪካው እውን መሆን የኢትዮጵያ መንግሥት ትልቁን ድርሻ የሚወስድ መሆኑን ጠቅሰው አድናቆታቸውንም ገልጸዋል።
 
እንደ ኢዜአ ዘገባ፤ "በኢትዮጵያ ያደረግነው ኢንቨስትመንት ሌሎች ኩባንያዎች ኢትዮጵያን ተመራጭ መዳረሻ እንዲያደርጉ በር የሚከፍት ነው" ብለዋል።

የኤልስሜድ የኢትዮጵያ ተወካይ የውዳሴ ዲያግኖስቲክ ማዕከል ባለቤትና ማኔጂንግ ዳይሬክተር ዳዊት ኃይሉ በበኩላቸው በፋብሪካው የሚመረቱ ማሳሪያዎች በኢትዮጵያ የተሰራ /ሜድ ኢን ኢትዮጵያ/ መለያ ብራንድ የሚጻፍባቸው በመሆኑ ለኢትዮጵያ ኩራት ነው ብለዋል። 

የካቲት 3 ቀን 2016 ዓ.ም

"እድል እና ትግል ሲገናኙ መከናወን ይሆናል፤ ኢትዮጵያዊነት የታደልነው ነው፤ ይህ መታሰቢያ ደግሞ ታግለን የሠራነው ነው"
- ጠቅላይ ሚኒስትር ዐቢይ አሕመድ (ዶ/ር)
****
(ኢ.ፕ.ድ)

የኢፌድሪ ጠቅላይ ሚኒስትር ዶክተር ዐቢይ አህመድ እና ፕሬዚዳንት ሳህለወርቅ ዘውዴ የዓድዋ ድል መታሰቢያን በይፋ መርቀው ከፍተዋል።

ጠቅላይ ሚኒስትር ዶክተር ዐቢይ አህመድ በመርሃግብሩ ላይ ባደረጉት ንግግር፤ "እድል እና ትግል ሲገናኙ መከናወን ይሆናል። ኢትዮጵያዊነት የታደልነው ነው፤ ይህ መታሰቢያ ደግሞ ታግለን የሠራነው ነው ብለዋል።

መታሰቢያው ኢትዮጵያዊ በመሆናችን ታድለን የመስራት ጥረት ታክሎበት የተሰራ መሆኑን ጠቅሰው፤ ከ128 ዓመት በኋላ ተከውኖ ለልጆች ማለፍ በሚችልበት መልኩ ከነግርማ ሞገሱ ኢትዮጵያን መስሎ ኢትዮጵያን አክሎ የታየበት መሆኑንም ገልጸዋል።

የዓድዋን ድል ማርከስ ማለት የአባቶቻችንን አጥንትና ደም ማርከስ መሆኑንም ገልጸዋል።

አባቶቻችን ዋጋ የከፈሉበት ነጻነትና ክብር እሴት መሆኑን ገልጸው ነጻነትን ለማግኘት የሄዱበት መንገድ እሳት መሆኑን ገልጸዋል።

ከአባቶቻችን ልንወርስ የሚገባው ነጻነቱን ክብሩንና አንድነቱን እንጂ እሳቱን መሆን አይጠበቅብንም ብለዋል።

በምረቃ መርሃግብ ላይ ጠቅላይ ሚኒስትር ዐቢይ አህመድ ፕሬዝዳንት ሳህለወርቅ ዘውዴ ምክትል ጠቅላይ ሚኒስትር አቶ ተመስገን ጥሩነህ እና ከንቲባ አዳነች አቤቤን ጨምሮ የሁለቱም ምክር ቤት አፈ ጉባኤዎች የብልጽግና ፓርቲ ምክትል ፕሬዚዳንት አቶ አደም ፋራህ ተገኝተዋል።

በተጨማሪም ሚኒስትሮች የክልል ርዕሳነ መስተዳድሮች የሀገር መከላከያና የፌድራል ፓሊስ አመራሮች የሃይማኖት አባቶች አባ ገዳዎች ታዋቂ ግለሰቦችና ጥሪ የተደረገላቸው እንግዶች ታድመዋል።

የዓድዋ ድል መታሰቢያ ለአሁኑ ትውልድ ኩራትና መማሪያ እንዲሆን በጠቅላይ ሚኒስትር ዶክተር ዐቢይ አህመድ ሀሳብ አመንጪነት በአዲስ አበባ አተማ አስተዳደር መገንባቱ ተገልጿል።

በማርቆስ በላይ
የካቲት 3 ቀን 2016 ዓ.ም