የምክትል ጠቅላይ ሚኒስትር ተመስገን ጥሩነህ መልዕክት
ኢትዮጵያ የወንዞች ሀገር ናት!
የተፋሰስ ምክር ቤትን በፀሀፊነት ከሚመሩት የውሃና ኢነርጂ ሚኒስቴር አመራሮች ጋር ውይይት አካሂደናል፡፡

በውይይታችንም በኢትዮጵያ ተፋሰሶች ገፅታ ተግዳሮቶችና ትኩረት በሚሹ ጉዳዮች ዙሪያ ምክክር አድርገናል፡፡

በቀጣይ ሀገሪቱን ተጠቃሚ የሚያደርግ የተቀናጀ የውሀ ሀብት አስተዳደርን ለመገንባት በምክር ቤት ደረጃ ትኩረት ተሰጥቶባቸው ሊሰሩ በሚገባቸው ዋና ዋና ተግባራት ዙሪያ ተወያይተን መግባባት ላይ ደርሰናል፡፡
ሐምሌ 19 ቀን 2016 ዓም

የመልካ ቁንጡሬ ባልጪት የአርኪዮሎጂ እና ፓሊዮንቶሎጂ ሥፍራ በዓለም ቅርስነት በዩኔስኮ ተመዘገበ
************
(ኢ.ፕ.ድ)
በሕንድ ኒው ዴልሂ እየተካሄደ በሚገኘው 46ኛው የዩኔስኮ የዓለም ቅርስ ማዕከል ዓመታዊ ጉባዔ የመልካ ቁንጡሬ ባልጪት የአርኪዮሎጂ እና ፓሊዮንቶሎጂ ሥፍራ ሶስት መስፈርቶችን በማሟላት የዓለም ቅርስ ሆኖ ተመዝግቧል።

የቱሪዝም ሚንስትር አምባሳደር ናሲሴ ጫሊ ለጉባኤው በላኩት የፅሁፍ መልእክት ይህ ቅርስ የተመዘገበው ሉሲ የተገኘችበትን 50ኛ አመት በምናከብርበት ወቅት መሆኑ ለሀገራችን ትልቅ ትርጉም ያለው መሆኑን ገልፀዋል::

ይህ ቅርስ ተጠብቆ እንዲቆይም የኢትዮጵያ መንግስት አስፈላጊውን ሁሉ እንደሚያደርግ አረጋግጠዋል::
መልካ ቁንጡሬ ባልጪት ከአዲስ አበባ ወደ ቡታጂራ በሚወስደው ጎዳና 50 ኪሎ ሜትር ርቀት ላይ አዋሽ ወንዝ ዳርቻ ላይ የሚገኝ ሲሆን ኢትዮጵያ በዩኔስኮ ካስመዘገበቻቸው ቋሚ የሚዳሰሱ ቅርሶች 12ኛው ነው፡፡

ሥፍራውን በዓለም ቅርስነት ያበቁት መስፈርቶች የሚከተሉት ናቸው፦
- ከ2.5 ሚሊየን ዓመት እስከ መጨረሻው የድንጋይ ዘመን የሰው ልጅ ይጠቀምባቸው የነበሩ የድንጋይ መገልገያዎች ይዞ የሚገኝ በመሆኑ፡፡
- እስከ 2.5 ሚሊየን ዓመት እድሜ ያላቸው የተለያዩ የሰውና የእንስሳት ቅሪተ አካሎች በብዛት የሚገኙበት በመሆኑ::

- የሰው ልጅ ከድንጋይ የተለያዩ መገልገያዎችን (መሳሪያዎችን) ይሰራ እንደ ነበር የሚያሳዩ ስምንት የባልጩትና ሌሎች የድንጋይ መሳሪያ ማምረቻ ሥፍራዎችን ይዞ የሚገኝ በመሆኑ የሚሉት ናቸው፡፡

አመታዊው የቁልቢ ቅዱስ ገብርኤል ክብረ በዓል በድምቀት ተከብሮ ተጠናቋል
*****************
(ኢ.ፕ.ድ)
በኢትዮጵያ ኦርቶዶክስ ተዋህዶ ቤተክርስቲያን እምነት ተከታዮች ዘንድ በታላቅ ድምቀት የተከበረው አመታዊው የቁልቢ ቅዱስ ገብርኤል ንግስ ያለአንዳች የፀጥታ ችግር በሰላም ተከብሮ መጠናቀቁን የምስራቅ ኢትዮጵያ አጎራባች ክልሎች የጋራ ፀጥታ ግብረ ኃይል ገለጸ።

በዓሉ በድምቀት ተከብሮ እንዲጠናቀቅ መከላከያ ሠራዊት፣ የኢትዮጵያ ፌደራል ፖሊስ ምሥራቅ ፈጥኖ ደራሽ ፖሊስ፣ ብሔራዊ መረጃና ደህንነት አገልግሎት፣ የድሬዳዋ ፖሊስ፣ የምስራቅና ምዕራብ ሐረርጌ ፖሊስ፣ የሐረሪ ክልል ፖሊስ፣ የምስራቅ እና ምዕራብ ኦሮሚያ እንዲሁም የሚሊሻ ኃይሉ ጋር የጋራ ዕቅድ በማውጣትና ከቤተክርስቲያኗ አባቶች ጋር በመምከር ከቅድመ ዝግጅት ጀምሮ በዓሉ ያለ ምንም የፀጥታ ችግር እንዲጠናቀቅ ሰፊ ስራዎች መሰራታቸውን ግብረ ኃይሉ ገልጿል፡፡

በዓሉን ለማክበር በመጡ ምዕመናን ላይ አንዳንድ የሞባይል ስርቆት ወንጀል በፈፀሙ አካላት ላይ በተቋቋመው ፈጣን ችሎት አማካኝነት ከአንድ ዓመት ከሁለት ወር እስከ አንድ አመት ከስምንት ወር የሚደርስ የቅጣት ውሳኔ የተላለፈባቸው መሆኑን የጋራ ፀጥታ ግብረ-ኃይሉ ገልጿል ሲል የፌዴራል ፖሊስ መረጃ አስታውቋል።
ሐምሌ 19 ቀን 2016 ዓ.ም

ከስህተቱ የማይማረው ኦሊምፒክ ኮሚቴ ‼️

በታላቁ የስፖርት መድረክ ኦሊምፒክ የመክፈቻ ስነስርአት ትልቅ ትኩረት የሚሰጠው ጉዳይ ነው። በብዙ ሚሊየን የሚቆጠር የአለም ህዝብ በቀጥታ የቴሌቪዥን ስርጭት በሚከታተለው የመክፈቻ ስነስርአት አገራት ራሳቸውን ለማስተዋወቅ ከአለባበስ ጀምሮ የተለየ ነገር ይዘው ይቀርባሉ።

ኢትዮጵያ በበርካታ የኦሊምፒክ የመክፈቻ ስነስርአቶች ከአበበ ቢቂላ ጀምሮ፣ በምሩፅ ይፍጠር፣ ደራርቱ ቱሉና ኃይሌ ገብረስላሴን በመሳሰሉ የኦሊምፒክ ጀግኖች በተለያየ ጊዜ ሰንደቅአላማ ይዘው ከፊት በመምራት ያሸበረቀችበት አጋጣሚ ብዙ ነው። ይሁን እንጂ ካለፉት ሁለት ኦሊምፒኮች ወዲህ በኦሊምፒክ የመክፈቻ ስነስርአት ላይ ይህ ባህል ችላ ሲባል እየታየ ነው።
የኢትዮጵያ ኦሊምፒክ ኮሚቴ ዘንድሮም ከስህተቱ መማር የፈለገ አይመስልም።
በምሽቱ  ኦሊምፒክ መክፈቻ ስነ-ስረዓት ላይ የኢትዮጵያ ሰንደቅ ዓላማ የሚይዙ አትሌቶች የተለዩ ሲሆን፣ እልፍ የኦሊምፒክ ጀግኖች ያሏት አገር ሰንደቅ አላማዋን አንግበው ከፊት እንዲመሩ የተመረጡት በመድረኩ ስም የሌላቸው ሆነዋል።
የኢትዮጵያን ሰንደቅ የሚይዙት የ20 ኪሎ ሜትር ርምጃ ተወዳዳሪው አትሌት ምስጋና ዋቁማ እና የ50 ሜትር የነፃ ቀዘፋ ውሃ ዋና ተወዳዳሪዋ ሊና አለማየሁ መሆናቸው ታውቋል።
ሰንደቅ አላማውን ጀግናውና የማራቶን ቡድኑን የሚመራው አትሌት ቀነኒሳ በቀለ መያዝ አለበት የሚል ተደጋጋሚ አስታየት ቢሰጥም፣ ማራቶን የሚከናወነው የፍፃሜው እለት በመሆኑና ይህም ለአትሌቱ ዝግጅት ምቹ ባለመሆኑ ቀድመው ፓሪስ በገቡት አትሌቶች እንዲያዘ ተደርጓል። ስፍር ቁጥር የሌላቸው የኦሊምፒክ ጀግኖች ባሏት አገር ይህ ጉዳይ ቀድሞውንም እንደሚከሰት እየታወቀ ሌላ የተሻለ አማራጭ ለመውሰድ አለመቻሉ ግን ኦሊምፒክ ኮሚቴውን በስፖርት ቤተሰቡ ዘንድ  ትዝብት ላይ የሚጥለው ነው።