#ኢትዮጵያ: ኦዲት በተደረጉ 131 መስሪያ ቤቶች ከ15 ቢሊዮን ብር በላይ ውዝፍ ተሰብሳቢ ሂሳብ መገኘቱን የፌደራል ዋና ኦዲተር መስሪያ ቤት የ2014 በጀት ዓመት ሪፖርት አመላከተ።

እንደ ፓርላማው ዘገባ በወቅቱ ያልተወራረደ ውዝፍ ተሰብሳቢ ሂሳብን በተመለከተ ኦዲት በተደረጉ 131 መስሪያ ቤቶች በጠቅላላው ከ15 ቢሊዮን 125 ሚሊዮን ብር በላይ ብር በወቅቱ ያልተወራረደና ያልተሰበሰበ ሂሳብ መኖሩ በኦዲት መረጋገጡን ዋና ኦዲር መሰረት ዳምጤ ገልጸዋል፡፡

"ጤና ሚኒስቴር፣ የውሃ፣ መስኖ፣ ቆላማ አካባቢና አካባቢ ልማት ሚኒስቴር፣ የፌደራል ፖሊስ ኮሚሽን፣ ባህልና ስፖርት ሚኒስቴር፣ የአደጋ ስጋት ስራ አመራር ኮሚሽን እና ትምህርት ሚኒስቴር በወቅቱ ያልተወራረደ ውዝፍ ተሰብሳቢ ሂሳብ ከተገኘባቸው ተቋማት ተጠቃሽ መሆናቸውንም ዋና ኦዲተሯ በሪፖርታቸው አንስተዋል፡" በማለት ፓርላማው በተጨማሪ ዘግቧል።

ወይዘሮ መሰረት እንዳሉት ተሰብሳቢ ሒሳቦቹ ከዓመት ወደ ዓመት በሂሳብ መግለጫዎቹ ላይ የሚታዩ ከሆነ ታአማኒነትን ከማሳጣታቸውም በላይ የመንግስትና የሕዝብ ኃብት ለብክነት ስለሚጋለጥ ተቋማቱ በደንብና መመሪያ መሰረት እንዲያወራርዱ እና መሰብሰብ የማይችሉትን ደግሞ አጣርተው እርምጃ እንዲወስዱ አስተያየት ተሰጥቷል ብለዋል፡፡

የፀጥታ ኃይል ልብስ በለበሱ ሰዎች ታግቼ ከ2 ሚሊዮን ብር በላይ ንብረት ተዘርፍኩ ያለው አሽከርካሪ ንብረቱን ሸጦ የሀሰት ክስ መመስረቱን የአዲስ አበባ ፖሊስ አስታወቀ።

አሽከርካሪው ሰኔ 9 ቀን 2015 ዓ/ም የሰሌዳ ቁጥሩ ኮድ 3-35747 ኢ/ት በሆነ ተሽከርካሪ አዳማ ከሚገኝ ድርጅት ግምቱ 2 ሚሊዬን 7መቶ ሰላሳ ሺ 240 ብር የሚያወጣ የፌሮ ብረት መርካቶ ከሚገኝ የግል ተበዳይ ሱቅ ለማራገፍ ይጭናል።

የፀጥታ ኃይል ልብስ የለበሱ አካላት ከቀኑ 10 ሰዓት ላይ አግተው ንበረቱን እንደዘረፉት በአቃቂ ክፍለ ከተማ ፖሊስ መምሪያ ለቃሊቲ አካባቢ ፖሊስ ጣቢያ ያመለክታል፡፡

ፖሊስ ጣቢያው ለጉዳዩ ልዮ ትኩረት በመስጠት ወንጀል ፈፃሚዎችን በቁጥጥር ስር በማዋል ንብረቱን ለማስመለስ ባደረገው በርቱ ክትትልና ባሰባሰበው መረጃ አሽከርካሪው ብረቱን በአቃቂ ቃሊቲ ክፍለ ከተማ ወረዳ 13 አካባቢ ሸጦ ተሽከርካሪውን ጀሞ አካባቢ ማቆሙን ይደርስበታል፡፡

በግለሰቡ ላይ ምርመራው ቀጥሎ ከተሰረቀው ንብረት መካከል ግምቱ 648ሺ 432 ብር የሚያወጣ ብረት ማስመለሱን ፖሊስ ጣቢያው አስታውቋል። የተጣለበትን እምነት ወደኋላ በማለት ንብረቱን ሸጦ ሳይታገት ታግቻለሁ በማለት ፖሊስን ለማሳሳት ሀሰተኛ ክስ የመሰረተው አሽከርካሪ እና የተሰረቀውን ንብረት የገዛውን ጨምሮ በአጠቃላይ ሁለት ግለሰቦችን በቁጥጥር ስር አውሎ ምርመራውን መቀጠሉን ፖሊስ አስታውቋል።

አንዳንድ ግለሰቦች ያልተገባ ጥቅም ለማግኘት በማቀድ ሳይታገቱ ታግተናል በማለት ሀሰተኛ መረጃ የሚያሰራጬ እና ሳይዘረፋ ተዘርፈናል በማለት የግል ጥቅማቸውን በህገወጥ መንገድ ለሟሟላት የሚሯሯጡ መኖራቸውን ያስታወቀው የአዲስ አበባ ፖሊስ የተለያዩ ሚዲያዎች የእነዚህ ህገወጦች መጠቀሚያ እንዳይሆኑ ጥንቃቄ ሊያደርጉ እንደሚገባ መልእክቱን አስተላልፏል ።