ሹፌርና ረዳቱን በመግደል 100 ኩንታል ሰሊጥ የጫነን FSR መኪና ይዘው የተሰወሩ ወንጀለኞችን በቁጥጥር ስር ማዋሉን የደብረወርቅ ከተማ አስተዳደር ፖሊስ አስታወቀ፡፡

በምስራቅ ጎጃም ዞን ደብረወርቅ ከተማ አስተዳደር አባጀምበር ቀበሌ የጨረቃን ጎጥ ከተባለው ቦታ ፣ ሰኔ 28 ቀን 2015 ዓ/ም ፣ ከምዕራብ ጎንደር ዞን ገንዳ ውሃ ከተማ መቶ ኩንታል ሰሊጥ ጭኖ ወደ አዲስ አበባ በመጓዝ ላይ የነበረን FSR መኪና ፣ ሌሊት ባልታወቀ ሰዓት ማንነታቸው ያልታወቁ ሰወች መኪናውን አስቁመው ሾፌርና ረዳቱን በመግደል መኪናውን ይዘው ይሰወራሉ::

የደብረወርቅ ከተማ አስተዳደር ፖሊስ ከአካባቢው ነዋሪዎች የደረሰውን መረጃ መሰረት በማድረግ በሰራው እጅግ ፈጣንና ጥብቅ የሆነ ክትትል ፣ ወንጀለኞቹ መኪናውን ወደኋላ በመመለስ በእነብሴ ሳር ምድር ወረዳ ዲቦ ከተማ ወስደው ማሳደራቸውን መረጃ ይደርሰዋል፡፡

ፖሊስ የወንጀለኞችን ዱካ ይዞ ጠንካራ ክትትል በማድረግና እግር በእግር በመከታተል ላይ እያለ ፣ ወንጀለኞቹ ሰኔ 29/2015 ዓም መኪናውን ይዘው ወደ ግንደወይን ከተማ በመመለስ ላይ ሳሉ ፣ ግንደወይን ከተማ አካባቢ ሲደርሱ በጎንቻ ሲሶ እነሴና በግንደወይን ከተማ ህዝብና የጸጥታ አካላት ብርቱ ጥረት አንዱ ወንጀለኛ ከመኪናው ጋር በቁጥጥር ስር ሲውል ፣ ሌሎች ወንጀለኞችን ለመያዝ ርብርብ እየተደረገ መሆኑን የደብረወርቅ ከተማ አስተዳደር ፖሊስ አስታወቋል፡፡

ወንጀለኞችን ለመያዝ በተደረገው ጥረትም የጎንቻ ሲሶ እነሴና የግንዶይን ከተማ አስተዳደር ህዝብና የፀጥታ አካላትን ፣ እንዲሁም መረጃ በመስጠት ለተባበሩት ሁሉ የደብረወርቅ ከተማ አስተዳደር ፖሊስ ጽ/ቤት ከፍተኛ ምስጋና አቅርቧል ።

ምንጭ- ምስራቅ ጎጃም ፖሊስ

ዜና፡ በ #ሸዋሮቢት ከተማ እንድ የፖሊስ አባል ተደገለ፤ ግድያው በአማራ ክልል በአንድ ሳምንት ውስጥ የተገደሉ የአካባቢ ባላስልጣንና የፀጥታ አካልን ብዛት ወደ አራት ከፍ አድርጎታል

ምክትል ሳጅን ያለለት ደጉ ትላንት ሰኔ 29 ቀን ማታ በሸዋሮቢት ከተማ አስተዳደር 08 ቀበሌ ከምሽቱ 4 ስዓት በስራ ላይ እያሉ ባልታወቁ ግለሰቦች በጥይት መገደላቸውን የከተማ አስተዳደሩ አስታወቀ፡፡

የአሁኑ ግድያ በአማራ ክልል በአንድ ሳምንት ውስጥ የተገደሉ የአካባቢ ባላስልጣንና የፀጥታ አካልን ብዛት ወደ አራት ከፍ አድርጎታል፡፡
https://rb.gy/5uzd6

በ #ሶማሊ ክልል ርእሰ መዲና #ጅግጅጋ ከተማ በንግድ ቦታ የተከሰተው የእሳት አደጋ እንዳይዛመት ርብርብ እየተደረገ ነው።

በጅግጅጋ ከተማ አዲሱ ታይዋን ገበያ ተብሎ በሚጠራው የመገበያያ ስፍራ ለጊዜው መነሻው ያልተወቀ ከባድ የእሳት ቃጠሎ ተነስቷል።

የድንገተኛ አደጋዎች መከላከል ቡድን፣ የፀጥታ አካላት እና የህክምና ባለሙያዎች ቡድን በአደጋው ስፍራ በመሰማራት የእሳት አደጋው ወደሌሎች አከባቢዎች እንዳይዛመት በጋራ እየተረባረቡ እንደሚገኙ ሶማሊ ፈጣን መረጃ ዘግቧል።

በ #ሶማሊ ክልል #ጅግጅጋ ከተማ የተነሳው የእሳት አደጋ ወደ ሌሎች አካባቢዎች ሳይዛመት በቁጥጥር ስር ውሏል

በእሳት አደጋው ሳቢያ #932 ሱቆች ወድመዋል፡፡

የክልሉ ርዕሰ መስተዳደር አቶ ሙስጠፋ ሙሁመድ የተመራ ልዑክ ከፌዴራል እና ክልል ሃላፊዎች ጋር በመሆን ዛሬ ጠዋት የደረሰውን ውድመት ለመመልከት በቦታው ተገኝተዋል፡፡

ዛሬ ጠዋት ከጎረቤት #ሶማሊላንድ ዋና ከተማ #ሀርጌሳ ከንቲባ የተመራ የእሳት አደጋ አጥፊ ቡድን ወደ ስፍራው አምርቷል። ባለፈው አመት በሚያዝያ ወር በሀርጌሳ ከተማ #ዋሄን ገበያ ላይ ከፍተኛ የእሳት ቃጠሎ በደረሰበት ወቅት የሶማሊ ክልል የነፍስ አድን ቡድን ወደ ስፍራው መላኩ ይታወሳል።

አዲሱ ታይዋን ተብሎ በሚጠራው የገበያ ማእከል ላይ የደረሰው የእሳት አደጋ መንስዔውእስካሁን አልታወቀም፡፡ በእሳት አደጋው ሳቢያ #932 ሱቆች ሲወድሙ የደረሰውን ጉዳት የሚያጣራ ኮሚቴ ተቋቁሞ ወደ ስራ መግባቱ ተገልጧል። SRTV_Somali ያጋራው ምስል ከባድ ውድመት መድረሱን ያመላክታል፡፡

በቅዱስ ፓትርያርኩ የሚመራ ልዑካን ቡድን መቐለ ከተማ ገባ

በኢትዮጵያ ኦርቶዶክስ ተዋሕዶ ቤተክርስቲያን በቅዱስ ፓትርያርክ የሚመራ ልዑካን ቡድን በትግራይ ክልል ከሚገኙ ብፁዓን አባቶች ጋር የሰላም ውይይት ለማድረግና የሰብዐዊ ድጋፍ ለማድረስ መቐለ ከተማ መግባቱን የ/ኢ/ኦ/ተ/ቤተክርስቲያን ሕዝብ ግንኙነት መምሪያ አስታወቀ።

ቀደም ሲል የተቋቋመው ኮሚቴው ወደ ክልሉ ከመጓዙ አስቀድሞ በብፁዕ ወቅዱስ ፓትርያርኩ የሚመራ ልዑካን ቡድን ወደ መቐለ እንዲጓዝና የሰብዐዊ ድጋፍ ከማድረግ በተጨማሪ በክልሉ ከሚገኙ ብፁዓን አበው ሊቃነ ጳጳሳት ጋር ውይይት አድርጎ እንዲመለስ በቋሚ ሲኖዶስ መወሰኑና ይኸው በመቐለ ሊካሔድ የታሰበው መርሐ ግብርም አስቀድሞ ለክልሉ ጊዜያዊ አስተዳደር እንዲደርስ ተደርጓል።

በዚህም መሰረት በብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት የሚመራ የልዑካን ቡድን ዛሬ ሐምሌ 3ቀን 2015 ዓ.ም ማለዳ ወደ ክልል ትግራይ መቐለ ከተማ አምርቷል።

ልዑካን ቡድኑ በትግራይ ክልል ጊዜያዊ አስተዳደር በመገኘት የሰብዐዊ ድጋፉን የሚያበረክት ሲሆን በክልሉ ጊዜያዊ መንግስት በኩል በሚመቻቸው መሠረት ተፈናቃይ ወገኖችን ይጎበኛሉ ተብሎ ይጠበቃል።

በመርሐ ግብሩ መሰረትም ቅዱስ ፓትርያርኩና የልዑካን ቡድኑ አባላት በትግራይ ከሚገኙ ብፁዓን አባቶች ጋር ውይይት ያደርጋሉ።ቅዱስ ሲኖዶስ በቅርቡ ባስተላለፈው ውሳኔ መሠረት የትግራይን ሕዝብ ይቅርታ መጠየቁ ይታወሳል።