ЗУР КАЙГЫ

29 октябрь көнне Тыва Җөмһүриятендә юл казасында Татар милли хәрәкәте һәм «Азатлык» Татар яшьләре берлеге активисты Батырхан Әгъзамов вафат булды. 19 ноябрьда Батырханга 25 яшь тулган булыр иде.

Батырхан бик кыю һәм милли җанлы егет иде. Ул татар халкын үлеп яратты һәм милләтебезгә бөтен көчен бирде. Батырхан татар халкының хокукларын яклап барлык митинг, пикет һәм җыеннарда катнашты, үзе дә оештырды. Батырхан – милләтебезгә тугрылык, халкыбызга сөю һәм кыюлык үрнәге булып калачак.

Милләтебезгә хезмәт итү – аның өчен бик мөһим иде. Батырханда Кол Шәриф һәм Япанча, Батырша һәм Исхакый рухы бар иде.

Батырханны югалту бик авыр. Милләтебез бүген батыр, каһарман бер улын югалтты. «Азатлык» Татар яшьләре берлеге һәм Татар халкы зур югалту кичерә. Батырхан “Азатлык” оешмасын бик яратты һәм милли хәрәкәткә бөтен энергиясен, көчен тулысы белән бирергә тырышты.

Батырхан Әгъзамов 1 ноябрь көнне Тыва башкаласы Кызыл шәһәрендә җирләнәчәк.

Батырханның әти-әнисе, туганнары, якыннары һәм дусларының кайгыларын уртаклашабыз. Аның китүенә һаман да ышанып булмый...

Батырхан мәңге безнең йөрәкләребездә яшәячәк!

C большим прискорбием сообщаем, что наш друг и соратник, активный участник Татарского национального движения, член Союза татарской молодежи «Азатлык» Батырхан Агзамов трагически погиб в результате автомобильной аварии. 19 ноября Батырхану исполнилось бы 25 лет.

Батырхан был очень искренним и смелым, настоящим патриотом татарского народа. Он активно участвовал практически во всех акциях, пикетах и митингах в защиту прав татарского народа. Батырхан – пример мужества, отваги и безмерной любви к своему народу. Для него служение татарскому народу было делом всей жизни. Батырхан был очень сильный духом человек, в его характере проявились лучшие черты нашего народа. Он воплощал в себе дух Кул-Шарифа и Япанчи, Батырши и Исхаки.

Cегодня мы, Союз татарской молодежи «Азатлык» и весь татарский народ переживаем большую боль. Наша нация потеряла одного из лучших и верных сынов. Мы все еще не можем поверить и осознать, что Батырхан погиб. Батырхан искренне любил «Азатлык» и отдавал деятельности в национальном движении всю свою энергию.

Батырхан будет похоронен 1 ноября в г. Кызыл (Тыва).

Мы скорбим и выражаем самые искренние соболезнования родителям, родственникам, друзьям и близким Батырхана!

Батырхан навсегда останется в наших сердцах!

Батырханның әти-әнисенә ярдәм җыюны бераздан игълан итәчәкбез.

Сбор помощи для родителей Батырхана мы объявим в ближайшее время.

Батырхан Татар театрын бик ярата иде. Алга таба театр белән бәйле бер очрак язырбыз әле.

Бәхил бул, Батырхан энем!

Саян таулары буеннан, Тыва төрки далаларыннан кайгылы хәбәр килде – татарның бер газиз баласы, милләт көрәшчесе Батырхан Әгъзәмов һәлак булган... 25 яше тулырга берничә көн кала, юл казасына очрап, дөньядан киткән.

Ул ата-анасына соңлап туган бердәнбер бала иде, Монголия чик буйларыннан Казанга килеп, милләтне уятып киткән яшь каһарман булды...

Батырхан 2016-2019 елларда Казан федераль университетында укыды, Тывада татар мөхитендә үсмәсә дә, университетның татар теле бүлегенә керде, туган якларында Миңзифа әбисе авырый башлагач, читтән торып укырга күчеп, аны карарга Кызылга кайтып китте. Әбисе үлгәч, аны үз куллары белән мөселманча җирләде, аннан соң яңадан Казанга кайту хыялы белән яшәде. Әмма тәкъдирендә башкача язылган булып чыкты...

Мин Батырханны Казанда милли хәрәкәт җыелышларында, Хәтер көннәрендә, тел буенча митингларда еш күрдем. Анда борынгы татар-монголларда булган борынгы Чыңгызхан рухы сизелә иде, көч-гайрәт кайнап торды. Шул ук вакытта ул чәчрәп тә чыкмады, шауламый гына, ирләрчә басынкылык белән гамәл кылды. Гади халыкны яклап, пенсия реформаларына каршы пикетта торганы өчен, 8 тәүлек утырып та чыкты. Моннан тыш татар телен яклаганы өчен дә берничә тапкыр тоткарланды, Гаяз Исхакый музее турында даими рәвештә түрәләрнең исенә төшереп торды.

Батырхан һәм Яуширмә белән бәйле бер кызыклы хәл искә төште. 2018 елның карлы-буранлы март башы иде, Чистай районының Яуширмә авылында Гаяз Исхакыйның 140 еллыгын уздырырга чыгып киттек, анда Казаннан һәм Чаллыдан Исхакый бүләге ияләре чакырылган иде. Без Чаллыдан язучы Факил Сафин белән киләбез, Яуширмә борылышында, ак бураннар эчендә, юлдан ике егетнең җәяүләп атлаганын күрдек, аларның кулларында зур-зур сумкалар иде, чак өстерәп баралар. Мин шунда “Азатлык” татар яшьләре берлеге җитәкчесе Наил Нәбиуллинны һәм Батырхан Әгъзәмовны танып алдым, тиз генә машинаны туктаттык та, егетләрне үзебез белән алдык. Алар Казаннан килгән ниндидер машинадан төшеп калганнар һәм калган юлны җәяү дәвам иткәннәр, ә сумкалары таш кебек китаплар, татарча газета-журналлар, байракчыклар, тагы әллә нинди милли сувенирлар белән тулган иде. Ә Яуширмәгә чаклы әле тагы 25 чакрым! Исхакый рухы, яшьлек егәрлеге аларны шушы юлга чыгарган һәм алар аны кар түгел, таш яуса да үтәргә әзер иде... Алып килгән бүләкләрен алар халык арасында сөенә-сөенә таратып йөрделәр.

2016 елны Татарстан Президенты Рөстәм Миңнеханов Тывага килгәч, аның белән очрашуга татарларны 18 яшьлек Батырхан җыеп алып бара. Хәер, Тыва Республикасында татарлар күп яшәми, хәзер алар 200-300 тирәсе генә, аларның да күбесе тывалар һәм руслар белән катнаш никахларда. Кызганычка каршы, биредә татарларның милли оешмалары бик зәгыйфь, дини оешмалары, мәчетләре бөтенләй юк. Моның сүлпәнлекнең сәбәбен катнаш гаиләләрдән дә күрәләр, Батырханның да әнисе татар, Сания исемле, ә әтисе Игорь татар һәм рус катнаш гаиләдән. Батырханның да башта исеме Кирилл була, ул аны, рәсми рәвештә, бөтен документларында Батырхан, дип үзгәртә, ә Әгъзәмов фамиясен, рәсми рәвештә, әнисенекен ала. Һәм Казанга ул инде БАТЫРХАН булып килә, мәңгелеккә дә мөселман-татар булып, БАТЫРХАН булып китә... Бәхил бул, Батырхан энем, рухың шат булсын, рәхмәт фәрештәләре каршы алсын! Милләт күгендә якты йолдыз булып исемең һәм хезмәтләрең калсын...

Фәүзия Бәйрәмова,
1.11.23.

(t.me/fauziyabayramova)

Кызыл шәһәрендә 15.18.
Хәзер Батырханны җирләргә алып баралардыр мөгаен.
Эх, дустыбыз!

Союз татарской молодежи «Азатлык» приносит соболезнования в связи с кончиной соратника, подчеркивая, что боль после утраты переживает и весь татарский народ.

https://kazanreporter.ru/news/57307_souz-azatlyk-soobsil-o-gibeli-v-dtp-24-letnego-soratnika-batyrhana-agzamova