Мәрхүмнең дуслары сөйләвенчә, ике ел элек Батырханга кире үз шәһәренә Кызылга кайтып китәргә туры килгән. Сәбәбе — авыру әбисе, ул аны карашырга дип Казаннан киткән. Университеттагы укуында академик ял алган. Былтыр әбисе вафат булган. Батырхан кире Казанга кайтырга хыялланган, яңадан урам чараларында катнашу турында уйлаган, бу хакта көрәштәшләре белән дә сөйләшкән, әмма насыйп булмаган. Хәтер көне, Татарстан суверенитеты көне һәм башка истәлекле көннәрдә Казанда республика байраклары, түштамгалары таратылса, ул Кызылда да шундый ук чаралар уздырган, дип сөйли аның дуслары.

Батырханның "Вконтакте" сәхифәсенә күз салсаң, аның соңгы язулары Казанда түрәләрнең Хәтер көнен уздырырга рөхсәт итмәүләре, әмма милли җанлы кешеләрнең барыбер чыгуы, матәм көнендә намаз укылары, дога кылулары хакында.


Русия Украинага бәреп кергәннән соң да ул 2022 елның 5 мартында үз фикерен язып куйган һәм сугышка каршы булган шәхесләргә карата репрессия машинасы никадәр аяусыз эш итсә дә, ул аны ахыргача алып ташламаган.

Менә ни дип язган ул.

"Украина белән Русия авыр көннәр кичәргендә (гәрчә ике якка да төрлечә авыр), үземә җинаять яки административ эш пуля булып миңа килеп эләкмәсен өчен, мин - татар кешесе һәм Русия ватандашы буларак сак, әмма төгәл итеп әйтәм: Украинадагы махсус операциягә каршымын! Бу операция беркемгә дә кирәкми: ни урыска, ни украинга, аеруча татарга һәм башка асаба халыкларга кирәкми! Тынычлык!"
Мәрхүм Батырхан уку һәм җәмәгать эшләре белән берәттән спортны да үз иткән, мәсәлән, ул - йөзүдә мастерлыкка кандидат, ирекле көрәштә 2нче разряды булган. Тываларның милли хурешын (көрәш төре) да үз иткән.

Батырханның гаиләсенә теләктәшлек күрсәтү, улларының каберенә чардуган, таш куйдыру, өчесен, җидесен, кырыгынна ярдәмгә милли хәрәкәт вәкилләре акча туплый башлаган.

В память о Батырхане

Батырхан үлмәде, юк!
Ул китүеннән соң Татарның тагын бер милли символына әвереләчәк!
Батырхан исемен Татарны рухландыручы милли байрак итәчәкбез!
Хәзергедән Азатлык һәм Батырхан - ул синонимнар!
Батырхан сыман бул, дип без милләт яшьләренә мөрәҗәгать итәчәкбез!
Батырхан сыман рухлы бул, диячәкбез!
Батырхан сыман кыю бул, әйтәчәкбез!
Батырхан! Батырхан! Батырхан!

ТАТАРСТАААААН!
Бик көчле җыр, шәп сүзләре һәм матур видеоряд тупланган.
Карагыз рәхәтләнеп!
https://www.youtube.com/watch?v=6d-SBm2DRw4

Җомга котлы булсын!

Дуслар, бу изге көнне вафат булган Батырхан өчен бер дога кылыгыз!

Бу көннәрдә тагын бер авыр хәбәр алдык. Иң тәвәккәл, тырыш, баһадир гәүдәле, батыр йөрәкле дустыбыз Батырхан, юл фаҗигасына эләгеп, бакыйлыкка күчте.

Без танышканда аңа әле унсигез генә яшь иде. Ул чакта исеме дә Кирилл, КФУның татфагына яңа гына укырга кергән, татарча әле җүнле-рәтле сөйләшә белмәгән, Тувадан ук үз милләтенә, мәдәниятына тартылып килгән егет иде ул. Үзе төп кебек таза, үзе теләсә кайсы милли чарада катнашырга, хәтта инициатива белдереп, үзе башлап йөрергә ажгырып тора. Ул милли хәрәкәт белән генә түгел, гомумән, сәясәт, иҗтимагый-социаль темалар белән кызыксынучан булды. Активлыгы өчен Истанбулга барып, "Төрки яшьләр җыены" фестивалендә дә катнашу бәхетенә иреште. "Тюркский взгляд" газетасына төрки мәдәният турында кызыклы мәкаләләр дә язды. Укуын журналистика яки тюркология юнәлешендә дә дәвам итә алган булыр иде. Ләкин аның өчен, әүвәл, үз ана телен өйрәнү кызык булды. Безнең белән хәленнән килгәнчә татар телендә аралашты, бу аңа авыр бирелсә дә, хәтта язышканда да татарча язарга тырыша иде.

Камал театрына бергә спектакльләргә дә йөрдек. Бер спектакльдә "Батырхан" атлы персонаж бар. Дөрес, әлеге персонаж, патша хөкүмәтен большевиклар алмаштыргач, "Хан" кушымчасын"Җан"га алмаштыра. Бу "Хан"лы исем Наил Нәбиуллинны да әсәрләндерә иде: "Улым туса, Батырхан дип кушам!" - дип әйткәне булды. (Узган ел исә, Төркиядә Наилнең кызы - Сөембикә туды.) Кирилл шунран, җәйге каникулга туган ягына кайткан җиреннән Казанга яңа паспорт белән - Батырхан Әгъзәмов булып әйләнеп кайтты. Әлеге исеме белән чиксез горур иде ул.

Казанда чакта бергәләшеп шактый Татарстан байраклары җыйдык, тараттык, Татарстан тасмалары кистек, аларны төрле урам чараларында өләштек.

Батырхан ялгыз пикетларда да күп катнашты, милли хәрәкәткә бәйле булмаган каршылык чараларына да йөрде, төрмәгә дә утыргалады, штрафлар да түләде. Курку белмәс батыр йөрәкле егет иде ул. Уку процессы уртасында, кинәт, Кызыл шәһәренә - туган ягына кайтып китүендә органнар тарафыннан янаулар да сәбәп булды дип уйлыйм. Берничә кат төрмәдә утырып чыккан егетне чираттагы каршылык чарасыннан йолкып алып, озаккарак та утыртулары ихтимал иде. Ул безнең белән киңәшеп тә тормыйча, йөрәге куша икән, урам чараларына атыла да чыга иде. Военкомат белән бәйле хәл итәсе мәсәләләре дә бар иде аның.

Батырхан белән бәйле иң истә калган көн - икенче кызым Айсылу тугач, роддомнан гаиләмне каршы алышырга бер көтү "Азатлык" егетләренең килүе булды. Минем иң шатлыклы мизгелләремне уртаклашучыларның берсе иде ул. Безне фотоларга төшерде, үзе дә безнең белән төште. Мөгаен, бала табу йортыннан бер генә яшь әти-әнине котларга да моңарчы бу тикле егетнең килгәне булмагандыр. Дөрес, фотога һәммәсе эләкмәде

Кызганыч, дустыбызның үзенә өйләнү, нәселен калдыру, бала тәрбияләү бәхете насыйп булмаган, бакыйлыкка бик иртә күчте.

Соңгы аралашуыбызда, 2020 елны ул миңа "кешбек"лар белән бәйле яңа бизнес платформасына кушылырга тәкъдим иткән. Кызганыч, шуннан соң бүтән аралашмаганбыз.
Мин аны иртәме, соңмы Казанга әйләнеп кайтыр дип юрый идем.

Урының Җәннәт түрендә булсын, дустым! Синең арабыздан мәңгегә китүеңне аңлау, тану бик авыр һәм моңсу. Үзем кайчандыр син бүләк иткән Тывадан килгән тозлы "Хан чәе"н эчәм, үземнең күзләрдән тозлы яшь тама.

Кызганыч, бик кызганыч! Милләтебезнең тагын бер батыр йөрәкле баһадир улы мәңгегә арабыздан китеп барды!