"የካዛንቺስ አካባቢን ለኑሮ ምቹ ለማድረግ በምንሰራው ስራ የከተማችን ነዋሪዎች እንዲተባበሩ ጥሪ አቀርባለሁ" - ከንቲባ አዳነች አቤቤ
*****************

የአዲስ አበባ ከተማ ከንቲባ አዳነች አቤቤ ማምሻውን ካዛንቺስ አካባቢ በኮሪደር ልማት መልሶ ማልማት የሚነሱ የተወሰኑ ተነሺዎችን ቤት ጎብኝተዋል::

ከንቲባዋ ይህን አስመልክቶ በማህበራዊ ትስስር ገጻቸው ባሰፈሩት ፅሁፍ፤ "ከሚያማምሩ ፎቆች ጀርባ እጅግ በጣም አሳዛኝ እግር መዘርጊያ እንኳን የሌላቸው፣ በቆርቆሮ እና በሸራ የተለበዱ ያረጁ፣ መፀዳጃና መኖሪያ ቤት የተቀላቀሉ፣ መፀዳጃ የሌላቸዉ በቆጥ ላይ ሳይቀር የሚኖሩ እንዲሁም ማብሰያ ቦታ ሳይኖር የሚኖሩበት አስቸጋሪ እና ለመኖር ከባድ ሁኔታ ውስጥ መሆናቸውን አይተናል" ብለዋል::

እኛ ጎብኝተን ለመውጣት እንኳን አስቸጋሪ መሆኑን አየን እነሱ ግን ለረዥም አመታት እንደኖሩበት ስናስብ በእጅጉ አዝነናል ሲሉም ገልፀዋል::

ይህንን ሁኔታ ከመቀየር በላይ ቅድሚያ የምንሰጠው ምንም ስራ የለም ያሉት ከንቲባዋ፤ "እንደተለመደው ሁሉ የከተማችን ነዋሪዎች ተባብረን ይህንን አካባቢ በመቀየር ለነዋሪዎችና ለኑሮ ምቹ እንድናደርግ ጥሪ አቀርባለሁ" ብለዋል::

በጋምቤላ ክልል በደረሰ የመኪና አደጋ የ7 ሰዎች ህይወት አለፈ
*********************

በጋምቤላ ክልል በጂካዎ ወረዳ ትላንት ምሽት በደረሰ የመኪና አደጋ የ7 ሰዎች ህይወት ማለፉ ተገልጿል፡፡

አደጋው ያጋጠመው ከጋምቤላ ከተማ ወደ ኑዌር ዞን በመጓዝ ላይ የነበረ አምቡላንስ በጂካዎ ወረዳ የባሮ ወንዝን ድልድይ ጥሶ ወንዝ ውስጥ በመግባቱ መሆኑን የጋምቤላ ክልል ፖሊስ ኮሚሽን አስታውቋል፡፡

በአደጋው እስካሁን የ7 ሰዎች ህይወት ማለፉንም የክልሉ ፖሊስ ኮሚሽን ኮሚሽነር ኡጉላ ኡጁሉ ተናግረዋል፡፡

የአደጋው መንስኤ በመጣራት ላይ መሆኑን የጠቆሙት ኮሚሽነሩ፤ ከሟቾች ውስጥ የጤና ባለሙያዎች እንደሚገኙበት አመላክተዋል፡፡

በትራፊክ አደጋ በዜጎች ህይወት እና አካል ላይ የሚደርሰው ጉዳት ለመቀነስ አሽከርካሪዎች በኃላፊነት ስሜት ሊያሽከረክሩ አንደሚገባም አሳስበዋል፡፡

ሚፍታህ አብዱልቃድር

የዓለም አቀፍ አሸማጋይ ድርጅት ምስረታ ላይ ያተኮረ ምክክር ተካሄደ
*******************

የዓለም አቀፍ አሸማጋይ ድርጅት ምስረታ ላይ ያተኮረ ገላፃ እና ምክክር በአዲስ አበባ ተካሄዷል፡፡

መድረኩ ሰላማዊ እና ምቹ ዓለም በመፍጠር ሂደት ውስጥ ሽምግልናን ውጤታማ የግጭት አፈታት ዘዴ ለማድረግ የሚደረገውን ጥረት እንደሚያግዝ በውጭ ጉዳይ ሚኒስቴር የመካከለኛው ምስራቅ፣ እስያ እና ፓሲፊክ አገራት ጉዳዮች ዳይሬክተር ጀኔራል አምባሳደር ንጉስ ከበደ ተናግረዋል።

የቻይና የውጭ ጉዳይ ሚኒስተር የህግ ጉዳዮች ዳይሬክተር ጄኔራል ማ ዢንሚን በበኩላቸው፤ ድርጅቱ ዓለማቀፍ አለመግባባቶችን በሽምግልና የሚፈታ የመጀመርያው የበየነ-መንግሥታት ድርጅት እንደሚሆን ገልጸዋል፡፡

በተጨማሪም ድርጅቱ የዓለም አቀፉን ማኀበረሰብ ሰላም፣ ጸጥታ፣ ፍትሃዊነት እንዲሁም ሁሉንም ወገን አሸናፊ የሚያደርግ ትብብርን ያበረታታል ብለዋል።

መድረኩን የመሩት በውጭ ጉዳይ ሚኒስቴር የህግ ጉዳዮች ዳ/ጄኔራል አምባሳደር ረታ አለሙ ኢትዮጵያ የድርጅቱን ምስረታ መርሆች እና ሂደት ደጋፊ መሆኗን ገልጸው የተቀሩ የአፍሪካ አገራትም ድርጅቱን እውን ለማድረግ በሚደረገው ጥረት ላይ እንዲሳተፉ ጥሪ አቅርበዋል፡፡

ድርጅቱ በሁለትዮሽ እና በባለብዙ ወገን መድረኮች አለመግባባቶች ሲከሰቱ መፍትሔ ለመስጠት እንደሚያስችልም አስታውቀዋል፡፡

በምክክር መድረኩ ላይ የኢትዮጵያና የቻይና የውጭ ጉዳይ ሚኒስቴር ከፍተኛ የሥራ ኃላፊዎች፣ ተቀማጭነታቸውን በአዲስ አበባ ያደረጉ የአፍሪካ አገራት የዲፕሎማቲክ ማኀበረሰብ አባላት፣ ምሁራን እና ሌሎች ጥሪ የተደረገላቸው እንግዶች መታደማቸውን ከውጭ ጉዳይ ሚኒስቴር የተገኘው መረጃ ያመላክታል፡፡

ኢትዮጵያ በተ.መ.ድ. ጠቅላላ ጉባኤ ላይ በመሳተፍ ላይ ትገኛለች
*********************

ኢትዮጵያ በኒውዮርክ እየተካሄደ በሚገኘው 79ኛው የተባበሩት መንግስታት ድርጅት (ተመድ) ጠቅላላ ጉባኤ እየተሳተፈች ነው።

በውጭ ጉዳይ ሚኒስትር አምባሳደር ታዬ አጽቀሥላሤ የተመራ የኢትዮጵያ ልዑካን ቡድን በመድረኩ በመሳተፍ ላይ ይገኛል።

በልዑካን ቡድኑ ውስጥ የትምህርት ሚኒስትር ብርሃኑ ነጋ (ፕ/ር)፣ የጤና ሚኒስትር ዶክተር መቅደስ ዳባ እና የኢኖቬሽንና ቴክኖሎጂ ሚኒስትር በለጠ ሞላ (ዶ/ር) ይገኙበታል።

#etv #EBC

የኢትዮጵያ ፌደራል ፖሊስ የመስቀል ደመራ በዓልን በሰላም ለማክበር ከሃይማኖት አባቶች ጋር ውይይት አደረገ
*************

የኢትዮጵያ ፌደራል ፖሊስ የመስቀል ደመራ በዓልን በሰላም ለማክበር ከሃይማኖት አባቶች ጋር በዋና መሥሪያ ቤቱ ውይይት አድርጓል።

የኢትዮጵያ ፌደራል ፖሊስ ኮሚሽነር ጀነራል ደመላሽ ገ/ሚካኤል፥ ኅብረተሰቡ የመስቀል ደመራ በዓልን በሰላም እንዲያከብር፤ ከውጭ ሀገራት የሚመጡ ኢትዮጵያውያን እና ትውልደ ኢትዮጵያውያን፣ ቱሪስቶች፣ የሃይማኖት መሪዎች እና ሌሎች ታዳሚዎችም በዓሉን በሰላም አክብረው ወደ መጡበት እንዲመለሱ በቂ የሰው ኃይል እና አነፍናፊ ውሾችን በመጠቀም የተጠናከረ ፍተሻ በማካሄድ አካባቢዎቹን የማጥራት ሥራ እየተሠራ መሆኑን ገልፀዋል።

ፖሊስ የተለያዩ አደረጃጀቶችን በመፍጠር ኦሬንቴሽን በመስጠት ወደ ሥራ መግባቱን እና የፖሊስ ሠራዊቱ በፖሊሳዊ ሥነ-ምግባር በጨዋነት ፍተሻውን እንደሚያካሄድ የገለፁት ኮሚሽነር ጀነራል፤ ሕዝቡም ፍተሻው ለጋራ ጥቅም መሆኑን በመገንዘብ ቀና ትብብር እንዲያደርግ መልዕክት አስተላልፈዋል።

የሃይማኖት አባቶች በበኩላቸው፥ የፀጥታና ደኅንነት አካላት በዓሉ በሰላም እንዲከበር ተግተው መሥራታቸውን አንስተው ለሠሩት የቅድመ ወንጀል መከላከል ተግባር ምስጋና አቅርበዋል።

የተከለከሉና የተፈቀዱ ነገሮችን በመለየት ለምዕመናን ግንዛቤ የማስጨበጥ ሥራ ማከናወናቸውንም ተናግረዋል።

ሁላችንም የየድርሻችንን በመወጣት፤ ችግሮቻችንን በመቀራረብና በሰላማዊ መንገድ በመፍታት፤ ሰላምን አንግሶ ጥላቻን በማስወገድ በዓሉን በሰላም፣ በደስታ እና በፍቅር ማክበር ይጠበቅብናል ሲሉ የሃይማኖት አባቶች መልዕክት ማስተላለፋቸውን የኢትዮጵያ ፌደራል ፖሊስ መረጃ ያመለክታል።