Yaqindagina, 6-dekabr kuni "Aston Villa" so'nggi daqiqalarda Buendiyaning goli evaziga "Arsenal"ni mag'lub etgandi. Hozirgi 11 o'yindan iborat g'alabali seriya ichida bu mavsum chempionlik uchun favorit deyilayotgan klub ustidan ham g'alaba bor. Ikki jamoa yilning so'nggi o'yinida yana o'zaro to'qnash kelishmoqda. Bu safar endi Emeri jamoasi yutsa, ochkolar tenglashadi. Shuningdek, tarixiy seriyani ham davom ettirish ustuvor maqsadlardan. Arteta esa o'tgan o'yindagi mag'lubiyat alamini bugungi bahs uchun motivatsiya o'laroq ishlatish ilinjida. Bundan ortiq intrigani hozir topish qiyin.

Yil so‘nggida qanday kino ko‘rsam ekan deb o‘ylab turibsizmi? Unday bo‘lsa, barcha "ekshn" janri shinavandalarini bugungi to‘qnashuvga taklif etaman. Haqiqiy triller kafolatlanadi! Bosh rolda murabbiylar va futbolchilar. Ikkinchi darajadali rolda men:)

Kanal: 📺Setanta Sports 1
Premyera: 01:15

Muhammadali

Bugungi o'yinim

2026-yilni "Liverpul" - "Lids" bahsi boshlab beradi. 6-dekabrda jamoalar 3:3 hisobida durang o'ynashgandi. O'sha uchrashuvda "qizillar" Ekitikening 2 daqiqada 2 ta gol kiritgani hisobiga oldinga chiqib olishgan, ammo yakunda bu ustunlikni qo'ldan chiqarishgandi. U vaqtlar o'yinda ham, natijada ham barqarorlik yetishmas edi. Oradan ko'p o'tmadi, biroq Slot yigitlari shundan keyin ketma-ket 4 o'yindan beri g'alaba qozondi, 2 tasi quruq o'yin.

Jamoaning hozirgi formasi va "Enfild"dagi atmosferadan kelib chiqsak, har tomonlama "Liverpul" ustunlikka ega. Uning ustiga "Aston Villa"ning seriyasi yakunlangani ham liverpulliklarga qo'shimcha motivatsiya. Agar bugun ular g'alaba qozonishsa, ochkolar farqi 4 taga yetadi.

Ushbu uchrashuvni siz bilan birga soat 22:30 da 📺 Setanta Sports 1 telekanali orqali tomosha qilamiz.

Muhammadali

Fransiya chempionati. 18-tur markaziy uchrashuvi: PSJ — Lill

Bugun tunda "Park de Prens" stadionida Liga 1 ning 18-turidan o‘rin olgan markaziy bahs bo‘lib o‘tadi. Turnir jadvalida yetakchilikni qaytarishni maqsad qilgan PSJ Chempionlar Ligasi yo‘llanmasi uchun kurashayotgan "Lill"ni qabul qiladi.

Luis Enrike shogirdlari uchun bu uchrashuv o‘ziga xos reabilitatsiya vazifasini o‘taydi. Parijliklar yaqinda Fransiya Kubogida kutilmaganda quyi liga vakiliga imkoniyatni boy berib, turnirni tark etishdi. "Lans" yetakchilik qilayotgan jadvalda birinchi o‘ringa qaytish uchun PSJga faqat g‘alaba kerak. Jamoa o‘z uyida juda ishonchli o‘ynamoqda: Liga 1 doirasidagi so‘nggi 9 ta uy uchrashuvining 8 tasida raqiblar mag‘lub etilgan. Qolaversa, parijliklarning "Lill"ga qarshi o‘zaro o‘yinlardagi mag‘lubiyatsiz seriyasi 9 ta o‘yinga yetgan.

Bruno Jeneziyo boshchiligidagi "Lill" uchun 2026-yil omadsiz boshlandi. Jamoa avvaliga chempionatda "Renn"ga, keyin Kubokda "Lion"ga yutqazib qo‘ydi. "Doglar" ayni damda kuchli uchlik uchun kurashmoqda va ochko yo‘qotish huquqiga ega emas. Mehmonlarning umidi ularning so‘nggi safar o‘yinlaridagi ijobiy seriyasidan: jamoa mehmondagi oxirgi ikki bahsida g‘alaba qozongan.

Har ikki jamoada ham jiddiy yo‘qotishlar mavjud. Afrika Millatlar Kubogi finali sababli PSJ yetakchisi Ashraf Hakimi va "Lill" hujumchisi Igamane bugungi o‘yinni o‘tkazib yuboradi. Shuningdek, parijliklardan Safonov va Li Kan In, mehmonlardan esa Ture jarohat sabab maydonga tusha olmaydi.

Ushbu qiziqarli kechishi kutilayotgan bahsni bugun 📺 Setanta Sports Football YouTube kanalida sharhlab boraman.

⚽️Boshlanish vaqti: 00:55
📌Havola: https://youtu.be/LvtWTCVrslk

Muhammadali

La Liga. "Real Madrid" — "Levante"

Bugun "Bernabeu"da Ispaniya chempionatining navbatdagi tur uchrashuvi bo‘lib o‘tadi. O‘z maydonida yarador "Real" jonlanayotgan "Levante"ni qabul qiladi.

"Real Madrid" ayni damda qiyin davrni boshdan kechirmoqda. Xabi Alonsoning iste’fosidan so‘ng bosh murabbiy etib tayinlangan Alvaro Arbeloa debyutdayoq muvaffaqiyatsizlikka uchradi: jamoa kutilmaganda Ispaniya Kubogida quyi liga vakili "Albasete"ga yutqazib, musobaqadan chiqib ketdi. Undan oldinroq esa Superkubok finalida "Barselona"ga imkoniyat boy berilgandi. Bugungi bahs Arbeloa uchun La Ligadagi ilk jiddiy sinov va muxlislar oldida reabilitatsiya qilish imkoniyatidir.

"Levante"da esa aksincha, ijobiy o‘zgarishlar kuzatilmoqda. Yangi murabbiy Luish Kashtru qo‘l ostida jamoa o‘yini mazmunan boyidi. Valensiyaliklar yaqinda safarda "Sevilya"ni yirik (3:0) hisobda mag‘lub etib, "Espanyol" bilan durang o‘ynashdi va turnir jadvalining eng quyi pog‘onasidan qutulishga erishdi.

Garchi so‘nggi o‘zaro o‘yinlarda "Real" yirik hisobda g‘alaba qozongan bo‘lsa-da, bugungi uchrashuv oson kechmasligi aniq. "Levante" mezbonlarning hozirgi ruhiy holatidan foydalanib qolishga urinadi.

Ushbu qiziqarli bahsni 📺 Setanta Sports Football YouTube kanalida sharhlab boraman.

⚽️Boshlanish vaqti: 18:00
📌Havola: youtu.be/6OkplACpLH8

Muhammadali

APL. "Nottingem Forest" — "Arsenal"

Bugun "Arsenal" kubok bahslaridagi tanaffusdan so‘ng bor e’tiborini yana Premer-ligadagi chempionlik poygasiga qaratadi. Mikel Arteta shogirdlarini "Siti Graund"da jiddiy sinov kutib turibdi.

Bu stadion "to’pchilar" uchun noqulay maydon hisoblanadi: o‘tgan mavsumda londonliklar aynan shu yerda muhim ochkolarni yo‘qotib, nursiz durang (0:0) qayd etishgan edi.

"Nottingem Forest" ruhiy tomondan og‘ir holatda. Jamoa Angliya Kubogida quyi liga vakili "Reksem"ga penaltilar seriyasida imkoniyatni boy berib, musobaqani tark etdi. Bosh murabbiy Shon Daych ushbu o‘yinda imkoniyat berilgan zaxira futbolchilarini, jumladan, sobiq "Arsenal" futbolchisi Aleksandr Zinchenkoni ham qattiq tanqid ostiga olib, ularning o‘yinini "qabul qilib bo‘lmas holat" deb baholadi. Bugungi bahs ular uchun o’zini oqlash imkoniyati bo‘ladi.

"Arsenal" esa Liga Kubogida "Chelsi" ustidan qozonilgan g‘alaba bilan Nottinghamga tashrif buyurmoqda. Biroq Mikel Arteta "Stemford Brij"dagi o‘yinda jamoasi yirik hisobdagi ustunlikni saqlab qola olmaganidan va intrigani ochiq qoldirganidan to‘liq qoniqish hosil qilmagan. Bugun londonliklardan yanada sovuqqon o‘yin talab etiladi.

Ushbu qiziqarli to‘qnashuvni soat 22:30 da 📺Setanta Sports 1 telekanalida sharhlab boraman.

Muhammadali

Bugun tunda San-Sebastyanda qiziqarli to‘qnashuv bo‘lib o‘tadi. Ajoyib seriya qayd etayotgan peshqadam "Barselona"ni o‘z uyida "tish ko‘rsata oladigan" "Real Sosyedad" kutib turibdi.

🇪🇸 "Real Sosyedad": Yangi murabbiy, yangi umidlar

Basklar dekabr oyini omadsiz o‘tkazishdi ("Alaves" va "Jirona"dan mag‘lubiyat), bu esa bosh murabbiy Serxio Fransiskoning ketishiga sabab bo‘ldi. Endi jamoani amerikalik/italiyalik mutaxassis — Pellegrino Matarazzo boshqarmoqda.

Matarazzo effekti: Yangi murabbiy qo‘l ostida jamoa hali yutqazmadi. "Atletiko" bilan jangovar durang (1:1) va "Xetafe" ustidan so‘nggi daqiqalardagi irodali g‘alaba muxlislarga umid bag‘ishladi.

Kubokdagi qahramonlik: Hafta o‘rtasida "Osasuna"ga qarshi kechgan dramatik bahsda 0:2 hisobida yutqazayotib, hisobni tenglashtirishdi va penaltilar seriyasida (4:3) g‘alaba qozonib, chorak finalga yo‘l olishdi.

🇪🇸 "Barselona": To‘xtatib bo‘lmas mashina

Xansi Flik shogirdlari ayni damda Ispaniyaning eng yaxshi formasidagi jamoasi bo‘lib turibdi.

Dahshatli seriya: Jamoa barcha musobaqalarda qatorasiga 11 ta o‘yinda g‘alaba qozondi! Bu so‘nggi 10 yillikdagi (Luis Enrike davridan beri) eng yaxshi natija.

Sovrindor kayfiyat: "Barsa" yilni ajoyib boshladi: Superkubok yarim finalida "Atletik"ni tor-mor etishdi (5:0) va finalda "Real Madrid"ni mag‘lub etib (3:2), mavsumdagi ilk sovrinni qo‘lga kiritishdi.

Kubokdagi yurish: Segunda peshqadami "Rasing" ham qiyinchilik bilan bo‘lsa-da mag‘lub etildi (2:0). Ferran Torres va Lamin Yamal o‘z so‘zini aytdi.

Birinchi davrada "Barselona" o‘z uyida "Sosyedad"ni qiyinchilik bilan 2:1 hisobida yenggan edi. "Anoeta" esa har doim kataloniyaliklar uchun noqulay maydon sanaladi.

"Barsa"ning charchoq alomatlari va basklarning o‘z uyidagi agressiv o‘yini bugungi bahsga o‘zgacha intriga qo‘shadi.

Ushbu uchrashuvni bugun soat 00:55 da 📺 Setanta Sports Football Youtube kanalida sharhlab boraman!

📌Havola: youtube.com/live/5K9cZe5OQoM

Muhammadali