"البيمشي ليك خطوة .. امشي ليه بلاد ."

صحيت الصباح وانا مشتاقة لشخص معين..

أحياناً لم اكون مشتاقة لزول بعينه، بعد ارسل ليه كذا مسدج ويصادف انه ما قاعد اونلاين ،بفضل منتظرة شوية..
براجع الدردشة بتاعتنا
وبسرح مع الفويسات

وبلاحظ التقلُب المزاجي بتاعي في المود !

وكيف في اليوم الفلاني كنت مستاءة وحزينة شديد؟ او كيف واضح اني كنت مُلخبطة وما عارفة اجيب كلمتين على بعض مفهومات !

وبلاحظ كمية الإحتواء البلقاها ساعتها، أحياناً على شكل كلام او فويس نوت بصوت مُهدئ لأعصابي خالص والتغير الـ 180 درجة بيحصل في مودي ! .


بتذكر مرة كنت بحكي مع شخص مُقرب مني ، طلبت منه يطلع من المكان الهو فيه عشان يسجل لي فويس ويطمّني.. كنت محتاجه لصوته بعيداً عن المحيط اللي هو فيه وجوطة الشُغل ..

وبالفعل طلع ، والدنيا شتاء وبرد ،ما إتردّد لم لمس حقيقة حوجتي لصوته، طلع ومشى مكان هادئ عشان يسجل لي .

فضلت محتفظة بالفويس نوت وبسمعها للآن كلما أراجع الشات بتاعنا❤️ ."


صحبتي الأقرب لقلبي لم اكون شايلة هم حاجة معينة واستشيرها بتضرب لي كول عديل وتناقشني فيها حتى لو نص الليل، وبعدها تقفل وتمشي تنوم ❤️.


ماف احلى من إحساس أنك تكون مقبول ومحبوب بالأخص في اكتر وقت محتاج تحس فيه بالمشاعر دي .

الكم دقيقة بتاعة الكويك ريڤيو للشات بتاعنا بتخليني أحب الشخص ده تاني اضعاف ، وبتملي إمتنان عجيب أنه كان موجود في اليوم الفلاني داك ، في اللحظة الفلانية ديك بدعمه وحبّه وتطمينه لي بكل شي كان متاح في يده .

كل المحبّة للشخص المُفضل الكان موجود أمس ، وموجود الليلة كمان عشاني ..

للبحاول دايماً يذكرني قدر شنو أنا مميزة ومُهمة في حياته❤️.

وأنا من ناحيتي حأبذل كل البقدر عليه عشان احافظ عليه ،وعشان أردّ المحبّة بـ محبة وتفهُم أكبر.

وفي النهاية ..

لـ البيمشي تجاهي خطوة بمحبّة .. أنا ح امشيه قُصادها ميل."


على الهامش:

" أحب التأكيد ،‏وأحب من يُعبر لي عن مَا يشعره نحوي دائِمًا ، أحب الذي لا يرتخي ولا يبخل بتذكيري أنني ما زلت كما أنا..مُميزة في أيامه وكثيرة في قلبه❤️."


#تنزيل_صابر.

ما أجمل أن يتعرف العقل على شخص، نسيه القلب منذ زمن!