Өфөлә йылдың тәүге ауыл хужалығы йәрминкәләре башланды

Сауҙа баш ҡалала өс урында-Рабкоров урамында, Серго Орджоникидзе исемендәге һәм Спорт һарайы алдындағы майҙандарҙа ойошторолған. Ауыл хужалығы продукцияһын етештереүселәр тәү сиратта ит һәм һөт ризыҡтары, бал, йәшелсә-емеш тәҡдим итә. Һатыусылар әйтеүенсә, баҙарға кешеләр экологик яҡтан таҙа, сифатлы аҙыҡ-түлек эҙләп килә. Сөнки бында фермер йәки шәхси хужалығында үҫтерелгән продукция тәҡдим ителә.

Ауырғазы районында ҡышҡыһын балыҡтарҙы ҡотҡарыу акцияһы үтте

Ҡышҡыһын һыу ятҡылыҡтарындағы балыҡтар етди һынауға дусар була. Ҡалын боҙ ҡатламы һыуға һауа инеүенә ҡамасаулай. Был һыу аҫты донъяһында йәшәүсе тереклеккә хәүеф тыуҙыра. Айырыуса һай һыулы быуа-күлдәрҙә кислород етмәүҙән балыҡтарға тонсоғоу хәүефе янай. Ауырғазы районында ойошторолған балыҡтарҙы ҡотҡарыу сараһында

17 ғинуарҙа Рәсәйҙә тәүге тапҡыр Артист көнө билдәләнә

Иҫтәлекле дата көнө осраҡлы һайланмаған. Был көндө СССР-ҙың беренсе халыҡ артисы Константин Станиславский тыуған. Артист көнө уңайынан республика сәхнәләрендә мәҙәни саралар үтә, фильмдар күрһәтелә, йәш актерҙар өсөн оҫталыҡ дәрестәре ойошторола. Байрам көнөндә артистарға ярҙам итеүсе ирекмәндәр ҙә бүләкләнде.

Белорет районы Манышты ауылында милли һәм этник спорт төрҙәре буйынса республика ярышы үтте

Белорет районы Манышты ауылында Бигарыҫлан Солтанов иҫтәлегенә милли һәм этник спорт төрҙәре буйынса республика ярышы үтте. Шәхестең исеме күптәргә профессиональ башҡорт һынлы сәнғәтенә нигеҙ һалыусы Ҡасим Дәүләткилдиевтың «Башҡорт һунарсыһы» картинаһы аша таныш. Дүртенсе тапҡыр ойошторолған сарала республика район-ҡалаларынан 150-нән ашыу кеше ҡатнашты.

Баймаҡта уҡтан атыу буйынса турнир уҙҙы

Баймаҡ ҡалаһының «Баһадир» физкультура-һауыҡтырыу комплексында традицион уҡтан атыу буйынса турнир уҙҙы. Ярыш тәүгә Баймаҡ районы башҡорттары ҡоролтайы призына ойошторолдо. Тулыраҡ,киләһе яҙмала.

Кушнаренко районында өлкән лейтенант Илвир Ғәлләмовтың исеме мәңгеләштерелде

Урамға-батыр исеме. Кушнаренко районында өлкән лейтенант Илвир Ғәлләмовтың исеме мәңгеләштерелде. Танк взводы командиры махсус хәрби операция башланған йылда һәләк булғайны, бала саҡтан спорт, илһөйәрлек сараларында әүҙем ҡатнашҡан егетте ауылдаштары йылы хәтирәләр менән иҫкә ала. Офицер иҫтәлегенә биләмәлә күләмле ярыштар ҙа уҙғарыла. Тулыраҡ киләһе материалда

20 ғинуарҙан 14 йәшкә тиклем балалар сит илдәргә нәҡ сит ил паспорты буйынса ғына сыға ала

Яңы ҡағиҙәләр буйынса ял. 20 ғинуарҙан 14 йәшкә тиклем балалар сит илдәргә нәҡ сит ил паспорты буйынса ғына сыға ала. Әгәр быға тиклем Рәсәй сиген үтеп, ҡайһы бер илдәргә, шул иҫәптән Абхазия, Белоруссия, Ҡырғыҙстан, Ҡаҙағстан һәм Көньяҡ Осетияға юлланғанда тыуыу тураһында таныҡлыҡ күрһәтеү ҙә етһә, хәҙер талаптар үҙгәрә. Ә бына 14 йәштән өлкәнерәктәргә Рәсәй гражданының эске паспорты буйынса был илдәргә инеү мөмкинлеге һаҡлап ҡалынған.

Башҡортостанда иң һөҙөмтәле эшләгән муниципаль берәмектәр иғлан ителде

Еңеүселәр федераль һәм республика кимәлендә биләдәләнә. Башҡортостан конкурсы еңеүселәрен бүләкләү тантанаһы бөгөн Хөкүмәт кәңәшмәһендә үтте. Улар Республика етәксеһенең «Йыл ҡаҙанышы» грантына лайыҡ булды. Оператив кәңәшмәлә шулай уҡ креатив индустрияларҙы үҫтереү, махсус хәрби операцияла ҡатнашыусыларға ярҙам саралары тураһында ла һүҙ барҙы.

Башҡортостан ярҙамы менән Красный Луч ҡалаһының 1-се поликлиникаһы яңыртылды

Донбасс халҡының һаулығын ҡайғыртып. Башҡортостан шефлыҡҡа алған Красный Луч ҡалаһында иң боронғо медицина учреждениеларының береһе-хәҙерге 1-се поликлиника ремонтланды. Бөйөк Ватан һуғышы йылдарында был бинала хәрби госпиталь урынлашҡан. Донбасс ерҙәрен дошмандан азат итеүсе яҡташтарыбыҙ ҙа тап ошонда дауаланған, ти табиптар. Республика ярҙамы менән медицина учреждениеһы яңы һулыш алды.

Махсус хәрби операция башланыу менән республикала ирекмәнлек хәрәкәте көсәйҙе

Ишембай районы Алаҡай ауылында йәшәүселәр ҙә көн һайын мәҙәниәт йортонда йыйылып, маскировка селтәрҙәре үрә, ойоҡбаштар бәйләй, окоп шәмдәре яһай. Ирекмәндәр араһында эшләгән, шулай уҡ хаҡлы ялда булған гүзәл заттар ҙа бар. Улар шәхси ваҡытын йәлләмәй, алғы һыҙыҡтағыларҙың теләктәрен иҫәпкә алып, заказдар буйынса эш итә.

Салауат Шербаков ТВЦ-ла «Минең герой» тапшырыуында ҡатнашты

Билдәле скульптор Салауат Шербаков ТВЦ каналында яҙыусы Татьяна Устинованың авторлыҡ программаһында ҡатнашты. «Минең герой» тип аталған тапшырыуҙа ул рәссам булараҡ тарихи дәүерҙе тойоуы, ни өсөн һәр самбист бер аҙ скульптор булыуы, рәссамдың кеше образдарында нимә күреүе, шулай уҡ скульптор өсөн ижадта тыйылған темалар бармы-юҡмы икәнлеге хаҡында һөйләне.

Ауырғазы районында ҙур һәм татыу ғаиләләр йылы сағыу итеп башланды

Ижади ҡараш һәм берҙәмлек. Республикала Башҡортостан Башлығы иғлан иткән ҙур һәм татыу ғаиләләр йылын Ауырғазы районының Татар Нуғаҙағы ауылында йәшәүселәр күңелле һәм сағыу итеп ҡаршылаған. Олоһо-кесеһе тырышлығы менән ихаталар, йәмәғәт биләмәләре байрамса биҙәлгән.

Башҡортостан Милли музейында журналистар өсөн асыҡ ишектәр көнө үтте

Башҡортостан Милли музейында республиканың матбуғат һәм киң мәғлүмәт саралары хеҙмәткәрҙәре өсөн асыҡ ишектәр көнө үтте. Журналистарға учреждение буйлап махсус экскурсия ойошторолдо. Улар фондтарҙа һаҡланған экспонаттар менән яҡындан танышты, ҡыҙыҡһындырған һорауҙарына яуап алды.

«Ватанды һаҡлаусылар» фондында МХО ветерандарına адаптив кейем тапшырылды

«Ватанды һаҡлаусылар» дәүләт фондының Башҡортостан филиалында махсус хәрби операция ветерандарына адаптив кейем тапшырылды. Алғы һыҙыҡта яраланып зыян күргән яугирҙар өсөн ҡулланышта уңайлы кейемдең бер нисә комплекты ҡаралған. Ветерандарға костюм, ҡышҡы кейем, джинс, пижама һәм көндәлек әйберҙәр тапшырылды. Тыныс тормошта адаптация үткән ҡаһарман яугирҙарға «Ватанды һаҡлаусылар» фондында башҡа төрлө ярҙам саралары ла күрһәтелә. Социаль координаторҙар ҡатнашлығында ир-егеттәргә психологик, юридик һәм башҡа ярҙам төрҙәре ойошторола.

2026 йыл Башҡортостанда Ҙур, татыу ғаилә йылы тип иғлан ителде

Рәсми мәғлүмәттәр порталында ошо турала указ донъя күргән. Документҡа ярашлы, республика хөкүмәтенә 16 февралгә, ҡала һәм район хакимиәттәренә 27 февралгә тиклем саралар планын төҙөү бурысы йөкмәтелә.

Республикала киҙеү һәм тын юлы сирҙәренең артыуы көтөлә

Ҡулланыусылар хоҡуғын яҡлау хеҙмәтенән белдереүҙәренсә, эпидемиологик хәл тотороҡло, ул контролдә тотола. Грипты йышыраҡ өлкән йәштәгеләр һәм балалар йоҡтора. Вирус таралған осорҙа халыҡ күпләп йөрөгән урындарға бармай торорға кәңәш ителә. Йәмәғәт транспортында битлек кейергә була. Бүлмәләрҙе даими елләтергә, саф һауала йөрөргә, гаджеттарҙы таҙартып торорға кәрәк. Үҙаллы дауаланыу зыянлы. Ауырыуҙың тәүге билдәләре күренеү менән табипҡа мөрәғәжәт итергә кәрәк.

Башҡортостан мотоуҙышсылары Рәсәй ярышында еңеү яуланы

Никита Богданов, Иван Гаврилов һәм Дмитрий Солянников боҙҙа уҙышыу буйынса 66-сы шәхси чемпионаттың икенсе этабында пьедесталдағы бөтә урындарҙы алды. Был Ғабдрахман Ҡадыров исемендәге техник спорт төрҙәре үҙәге тарихындағы тәүге һөҙөмтә. Белгестәр уны шулай уҡ Өфө мотоспортындағы ҙур ҡаҙаныш тип атаны. 24 ғинуарҙа Өфөлә “Ғабдрахман Ҡадыров мемориалы” Бөтә Рәсәй ярыштары ойошторола. Турнир СССР-ҙың атҡаҙанған спорт мастеры, боҙҙа мотоуҙыш буйынса алты тапҡыр донъя чемпионы Ғабдрахман Фәйзерахман улының 85 йылллығына арнала.

Радий Хәбиров баш ҡаланан 11 йәшлек Богдан Әбиловтың хыялын тормошҡа ашырҙы

Республика башлығы Радий Хәбиров баш ҡаланан 11 йәшлек Богдан Әбиловтың хыялын тормошҡа ашырҙы. «Теләктәр шыршыһы»нда ҡатнашҡан малай өсөн Мостай Кәрим исемендәге «Өфө» халыҡ-ара аэропортында махсус рейс ойошторолдо. Терминал һәм музейға экскурсиянан һуң ул һауа судноһының экипаж кабинаһында булды, командирҙан самолет менән идара итеү буйынса оҫталыҡ дәресе алды.

Христиандарҙың крещение байрамында күңелһеҙ ваҡиғаларға юл ҡуйылмаған

Был турала Ғәҙәттән тыш хәлдәр министрлығының Башҡортостан буйынса баш идаралығы хәбәр итә. Республикала һыуҙа ҡойоноу өсөн бөтәһе 99 мәке уйылған. Ҡотҡарыусылар тәүлек әйләнәһенә дежурҙа торҙо, ә медицина хеҙмәткәрҙәре кәрәк булғанда тиҙ арала ярҙам күрһәтергә әҙер ине. Ғәҙәттән тыш хәлдәрҙе иҫкәртеү маҡсатында, халыҡ араһында аңлатыу эштәре лә алып барылды.

Кушнаренко районында үлемесле юл-транспорт ваҡиғаһы теркәлгән

Дәүләт автоинспекцияһының яҡынса мәғлүмәттәре буйынса, уҙған төндә «Mercedes-Benz» йөк машинаһы водителе туҡтап торған «Лада»ға бәрелмәҫ өсөн ҡаршы һыҙатҡа сыға. Ошо мәлдә ул «ГАЗель» автомобиле менән бәрелешә. Алынған йәрәхәттәрҙән һуңғы транспорт сараһы водителе вафат була. Әлеге ваҡытта юл-патруль хеҙмәте инспекторҙары авария сәбәптәрен асыҡлай.

Ишембай районында «Урындағы башланғыстарҙы яҡлау» программаһына 14 заявка бирелде

Быйыл Ишембай районынан «Урындағы башланғыстарҙы яҡлау» республика программаһында ҡатнашыуға 14 заявка бирелгән. Алаҡай ауылында йәшәүселәр ҙә йыйылыштар уҙғарып, балалар уйын майҙансығына хәүефһеҙ резина ҡатламы түшәтергә ҡарар иткән. Әлегә документтар әҙерләнә. Әйткәндәй, улар былтыр «Айыҡ ауыл» конкурсында ҡатнашып 200 мең һумлыҡ дәртләндереү сараһына ла лайыҡ булған. Аҡса балалар уйын майҙансығын ҡойма менән уратыуға йүнәлтелгән.