Башҡортостанда иң һөҙөмтәле эшләгән муниципаль берәмектәр иғлан ителде

Еңеүселәр федераль һәм республика кимәлендә биләдәләнә. Башҡортостан конкурсы еңеүселәрен бүләкләү тантанаһы бөгөн Хөкүмәт кәңәшмәһендә үтте. Улар Республика етәксеһенең «Йыл ҡаҙанышы» грантына лайыҡ булды. Оператив кәңәшмәлә шулай уҡ креатив индустрияларҙы үҫтереү, махсус хәрби операцияла ҡатнашыусыларға ярҙам саралары тураһында ла һүҙ барҙы.

Башҡортостан ярҙамы менән Красный Луч ҡалаһының 1-се поликлиникаһы яңыртылды

Донбасс халҡының һаулығын ҡайғыртып. Башҡортостан шефлыҡҡа алған Красный Луч ҡалаһында иң боронғо медицина учреждениеларының береһе-хәҙерге 1-се поликлиника ремонтланды. Бөйөк Ватан һуғышы йылдарында был бинала хәрби госпиталь урынлашҡан. Донбасс ерҙәрен дошмандан азат итеүсе яҡташтарыбыҙ ҙа тап ошонда дауаланған, ти табиптар. Республика ярҙамы менән медицина учреждениеһы яңы һулыш алды.

Махсус хәрби операция башланыу менән республикала ирекмәнлек хәрәкәте көсәйҙе

Ишембай районы Алаҡай ауылында йәшәүселәр ҙә көн һайын мәҙәниәт йортонда йыйылып, маскировка селтәрҙәре үрә, ойоҡбаштар бәйләй, окоп шәмдәре яһай. Ирекмәндәр араһында эшләгән, шулай уҡ хаҡлы ялда булған гүзәл заттар ҙа бар. Улар шәхси ваҡытын йәлләмәй, алғы һыҙыҡтағыларҙың теләктәрен иҫәпкә алып, заказдар буйынса эш итә.

Салауат Шербаков ТВЦ-ла «Минең герой» тапшырыуында ҡатнашты

Билдәле скульптор Салауат Шербаков ТВЦ каналында яҙыусы Татьяна Устинованың авторлыҡ программаһында ҡатнашты. «Минең герой» тип аталған тапшырыуҙа ул рәссам булараҡ тарихи дәүерҙе тойоуы, ни өсөн һәр самбист бер аҙ скульптор булыуы, рәссамдың кеше образдарында нимә күреүе, шулай уҡ скульптор өсөн ижадта тыйылған темалар бармы-юҡмы икәнлеге хаҡында һөйләне.

Ауырғазы районында ҙур һәм татыу ғаиләләр йылы сағыу итеп башланды

Ижади ҡараш һәм берҙәмлек. Республикала Башҡортостан Башлығы иғлан иткән ҙур һәм татыу ғаиләләр йылын Ауырғазы районының Татар Нуғаҙағы ауылында йәшәүселәр күңелле һәм сағыу итеп ҡаршылаған. Олоһо-кесеһе тырышлығы менән ихаталар, йәмәғәт биләмәләре байрамса биҙәлгән.

Башҡортостан Милли музейында журналистар өсөн асыҡ ишектәр көнө үтте

Башҡортостан Милли музейында республиканың матбуғат һәм киң мәғлүмәт саралары хеҙмәткәрҙәре өсөн асыҡ ишектәр көнө үтте. Журналистарға учреждение буйлап махсус экскурсия ойошторолдо. Улар фондтарҙа һаҡланған экспонаттар менән яҡындан танышты, ҡыҙыҡһындырған һорауҙарына яуап алды.

«Ватанды һаҡлаусылар» фондында МХО ветерандарına адаптив кейем тапшырылды

«Ватанды һаҡлаусылар» дәүләт фондының Башҡортостан филиалында махсус хәрби операция ветерандарына адаптив кейем тапшырылды. Алғы һыҙыҡта яраланып зыян күргән яугирҙар өсөн ҡулланышта уңайлы кейемдең бер нисә комплекты ҡаралған. Ветерандарға костюм, ҡышҡы кейем, джинс, пижама һәм көндәлек әйберҙәр тапшырылды. Тыныс тормошта адаптация үткән ҡаһарман яугирҙарға «Ватанды һаҡлаусылар» фондында башҡа төрлө ярҙам саралары ла күрһәтелә. Социаль координаторҙар ҡатнашлығында ир-егеттәргә психологик, юридик һәм башҡа ярҙам төрҙәре ойошторола.

2026 йыл Башҡортостанда Ҙур, татыу ғаилә йылы тип иғлан ителде

Рәсми мәғлүмәттәр порталында ошо турала указ донъя күргән. Документҡа ярашлы, республика хөкүмәтенә 16 февралгә, ҡала һәм район хакимиәттәренә 27 февралгә тиклем саралар планын төҙөү бурысы йөкмәтелә.

Республикала киҙеү һәм тын юлы сирҙәренең артыуы көтөлә

Ҡулланыусылар хоҡуғын яҡлау хеҙмәтенән белдереүҙәренсә, эпидемиологик хәл тотороҡло, ул контролдә тотола. Грипты йышыраҡ өлкән йәштәгеләр һәм балалар йоҡтора. Вирус таралған осорҙа халыҡ күпләп йөрөгән урындарға бармай торорға кәңәш ителә. Йәмәғәт транспортында битлек кейергә була. Бүлмәләрҙе даими елләтергә, саф һауала йөрөргә, гаджеттарҙы таҙартып торорға кәрәк. Үҙаллы дауаланыу зыянлы. Ауырыуҙың тәүге билдәләре күренеү менән табипҡа мөрәғәжәт итергә кәрәк.

Башҡортостан мотоуҙышсылары Рәсәй ярышында еңеү яуланы

Никита Богданов, Иван Гаврилов һәм Дмитрий Солянников боҙҙа уҙышыу буйынса 66-сы шәхси чемпионаттың икенсе этабында пьедесталдағы бөтә урындарҙы алды. Был Ғабдрахман Ҡадыров исемендәге техник спорт төрҙәре үҙәге тарихындағы тәүге һөҙөмтә. Белгестәр уны шулай уҡ Өфө мотоспортындағы ҙур ҡаҙаныш тип атаны. 24 ғинуарҙа Өфөлә “Ғабдрахман Ҡадыров мемориалы” Бөтә Рәсәй ярыштары ойошторола. Турнир СССР-ҙың атҡаҙанған спорт мастеры, боҙҙа мотоуҙыш буйынса алты тапҡыр донъя чемпионы Ғабдрахман Фәйзерахман улының 85 йылллығына арнала.

Радий Хәбиров баш ҡаланан 11 йәшлек Богдан Әбиловтың хыялын тормошҡа ашырҙы

Республика башлығы Радий Хәбиров баш ҡаланан 11 йәшлек Богдан Әбиловтың хыялын тормошҡа ашырҙы. «Теләктәр шыршыһы»нда ҡатнашҡан малай өсөн Мостай Кәрим исемендәге «Өфө» халыҡ-ара аэропортында махсус рейс ойошторолдо. Терминал һәм музейға экскурсиянан һуң ул һауа судноһының экипаж кабинаһында булды, командирҙан самолет менән идара итеү буйынса оҫталыҡ дәресе алды.

Христиандарҙың крещение байрамында күңелһеҙ ваҡиғаларға юл ҡуйылмаған

Был турала Ғәҙәттән тыш хәлдәр министрлығының Башҡортостан буйынса баш идаралығы хәбәр итә. Республикала һыуҙа ҡойоноу өсөн бөтәһе 99 мәке уйылған. Ҡотҡарыусылар тәүлек әйләнәһенә дежурҙа торҙо, ә медицина хеҙмәткәрҙәре кәрәк булғанда тиҙ арала ярҙам күрһәтергә әҙер ине. Ғәҙәттән тыш хәлдәрҙе иҫкәртеү маҡсатында, халыҡ араһында аңлатыу эштәре лә алып барылды.

Кушнаренко районында үлемесле юл-транспорт ваҡиғаһы теркәлгән

Дәүләт автоинспекцияһының яҡынса мәғлүмәттәре буйынса, уҙған төндә «Mercedes-Benz» йөк машинаһы водителе туҡтап торған «Лада»ға бәрелмәҫ өсөн ҡаршы һыҙатҡа сыға. Ошо мәлдә ул «ГАЗель» автомобиле менән бәрелешә. Алынған йәрәхәттәрҙән һуңғы транспорт сараһы водителе вафат була. Әлеге ваҡытта юл-патруль хеҙмәте инспекторҙары авария сәбәптәрен асыҡлай.

Ишембай районында «Урындағы башланғыстарҙы яҡлау» программаһына 14 заявка бирелде

Быйыл Ишембай районынан «Урындағы башланғыстарҙы яҡлау» республика программаһында ҡатнашыуға 14 заявка бирелгән. Алаҡай ауылында йәшәүселәр ҙә йыйылыштар уҙғарып, балалар уйын майҙансығына хәүефһеҙ резина ҡатламы түшәтергә ҡарар иткән. Әлегә документтар әҙерләнә. Әйткәндәй, улар былтыр «Айыҡ ауыл» конкурсында ҡатнашып 200 мең һумлыҡ дәртләндереү сараһына ла лайыҡ булған. Аҡса балалар уйын майҙансығын ҡойма менән уратыуға йүнәлтелгән.

Архангел районының Асҡын ауылы халҡы автомобиль күпере хаҡында хыяллана

Архангел районының Асҡын ауылы халҡы автомобиль күпере хаҡында хыяллана. Сөнки ауылға йылға кисеүе йәки йәйәүлеләр өсөн һалынған ағас күпер аша ғына эләгергә мөмкин. Асҡындар проблеманы урындағы башланғыстарҙы хуплау программаһында ҡатнашып хәл итергә ниәтләй. Ауыл бөтә Рәсәйгә билдәле мәмерйә янында урынлашыуы менән үҙенсәлекле, бында илдең төрлө төбәктәренән ғалимдар, туристар килә.

Быйыл республика мәғрифәтселәренә арналған байтаҡ саралар ойошторола

2026 йылда Мифтахетдин Аҡмулланың тыуыуына - 195, Мөхәмәтсәлим Өмөтбаетың тыуыуына 185 йыл тула. Василий Катаринскийҙың 180 йыллығы билдәләнә. Яҙыусы Сергей Аксаковтың 235 йыллығына бағышланған саралар планлаштырылған. Ҡурайсы Ишмөхәмәт сәсәндең 245 йыллығы ла киң билдәләнә. Режиссер Яков Протазановтың тыуыуына 145 йыл тулыуға арналған юбилей осрашыуҙары ҡаралған. Быйыл балерина Нинель Юлтыева, бейеүсе Закир Исмәғилев һәм рәссам Анатолий Романовтың - 100, Ғәзизә Насрованың 110 йыллығы билдәләнә. Танылған педагог, бик күп опера йондоҙҙарын тәрбиәләгән Миләүшә Мортазинаның бер быуатлыҡ юбилейы була.

Башҡортостандың урман фонды 100 процентҡа йыһан мониторингына алынған

Башҡортостандың урман фонды 100 процентҡа йыһан мониторингына алынған. Был төбәктең федераль урман хужалығы агентлығы менән системалы эш һөҙөмтәһе. Радий Хәбиров социаль селтәрҙәрҙә яҙыуынса, 2018 йылда урман фондының ни бары 6 проценты ғына спутник күҙәтеүендә булһа, бөгөн ул 5,7 миллион гектар тәшкил итә.

Өфөнөң Октябрь районында Миңлеғәле Шайморатов исемендәге ирекмәндәр штабы асылды

Өфөнөң Октябрь районында Миңлеғәле Шайморатов исемендәге ирекмәндәр штабы асылды. Үҙәктә ветерандар ойошмаһы, мәғариф учреждениелары менән берлектә гуманитар ярҙам йыйыу, илһөйәрлек саралары уҙғарыу буйынса комплекслы эш алып барыласаҡ. Яңы бинаға күсенгән штабта беҙҙең ижади төркөм дә булды.

Хәйбулла районы Бүребай ауылы мәктәбендә «Селтәр-ул тормош» акцияһы уҙҙы

Сара «Беҙ бергә-көс» хәйриә фонды башланғысы менән ойошторолдо. Ирекмәндәр Миңлеғәле Шайморатов класы уҡыусыларына хәрбиҙәр өсөн маскировка селтәрҙәре үреү буйынса оҫталыҡ дәресе үткәрҙе.

Башҡортостанда янғындар һаны артыуы күҙәтелә

Бер тәүлек эсендә күп балалы ике ғаилә торлаҡһыҙ ҡалды. Сәбәбе-янғын. Бәхетһеҙ осраҡ Иглин һәм Шаран райондарында теркәлде. Зыян күреүселәр бар. Ғәҙәттән тыш хәлдәр министрлығынан белдереүҙәренсә, йыл башынан алып янғын сығыу осраҡтары, утта һәләк булыусылар артыуы кҙәтелә. Был хаҡта тулыраҡ киләһе яҙмала.

Башҡортостанда урта һөнәри белем биреү кластерҙарын арттырыу мөһим

Уҡыу йорттарына заманса технологиялар, эш биреүселәргә әҙер белгестәр. Кластерҙарға берләшеү һөҙөмтәһе ике яҡ өсөн дә отошло. Башҡортостанда улар һанына арттырыу мөһим. Был турала урта һөнәри белем биреү буйынса республика советы ултырышында билдәләнде. Кәңәшмә Салауат мәғариф һәм һөнәри технологиялар колледжында үтте.