Бәләбәй районында теркәлгән юл-транспорт ваҡиғаһында 4 кешенең ғүмере өҙөлгән

Бәләбәй-Аксаков-Аксенов юлында «Лада Гранта» автомобиле «Камаз» менән бәрелешкән. Насар һауа торошо шарттарында еңел автомобиль водителе идара итеү һәләтен юғалтып йөк машинаһы аҫтына ингән.

Илеш районында Дәүләт автоинспекцияһы хеҙмәткәрҙәре янғындан мал-тыуарҙы һәм йортто ҡотҡарған

Дәүләт автоинспекцияһы хеҙмәткәрҙәре Илеш районы Базытамаҡ ауылында йәшәүселәрҙең мөлкәтен һәм мал-тыуарын ҡотҡарған. Денис Дауытов менән Ғәлим Шәмсиев төнгө патруль ваҡытында ихаталарҙың береһендә янғын сығыуын күрә. Ялҡын телдәре мунса, һарай һәм йәйге йортто ялмап алған була. Был ваҡытта хужалар утҡа ҡаршы үҙаллы көрәшеп маташа. Инспекторҙар оҙаҡ уйлап тормай. Улар янғын торлаҡ йортҡа күсмәһен өсөн мөмкин булған бөтә сараларҙы күрә.

Ирина Панькина махсус хәрби операция яугирҙарының ғаиләләрен ҡабул итте

«Берҙәм Рәсәй» партияһының төбәк йәмәғәт ҡабул итеү бүлмәһендә махсус хәрби операцияла ҡатнашыусылар һәм уларҙың ғаилә ағзаларын борсоған көнүҙәк мәсьәләләр ҡаралды. Дәүләт Думаһының дәүләт төҙөлөшө һәм закондар сығарыу буйынса комитеты рәйесе беренсе урынбаҫары Ирина Панькина халыҡты ҡабул итеп, социаль һәм страховка түләүҙәре, ярҙам саралары буйынса һорауҙарға яуап бирҙе.

Баҡалы үҙәк район дауаханыһының яңы корпусын төҙөү тамамланыу алдында

Милли проектҡа ярашлы, ҡалҡып сыҡҡан бина менән Башҡортостан буйынса Баш федераль инспектор Александр Окатьев танышты. Үҙәк район дауаханаһының яңы поликлиникаһы сменаһына 150 кешене ҡабул итә аласаҡ. Бер урында консультация-диагностика блогы, фильтр-бокс, ҡатын-ҡыҙҙар консультацияһы урынлашасаҡ.

Бүздәк районының Ҡаран ауылы «Айыҡ ауыл» конкурсына ҡушылды

Бүздәктәр айыҡ тормош яҡлы. Районда сәләмәт йәшәү рәүешен пропагандлауға арналған саралар йыл дауамында бара. Бүздәк ауылдары «Айыҡ ауыл» республика конкурсында ла даими ҡатнаша. Быйыл абруйлы ярышта Ҡаран ауылы ла үҙ көсөн һынап ҡарарға ниәтләй. «Һомай» һәм «Чемпион менән бергә» проекттары ошо конкурс сиктәрендә тормошҡа ашырыла.

Өфөнөң 30-сы коррекция мәктәп-интернатына спорт ҡоролмалары тапшырылды

Сара «Спорт һәр кемгә лә асыҡ» хәйриә проекты сиктәрендә үтте. Быға «Милләт йәшлеге» төбәк йәмәғәт фондының Президент гранттары фонды конкурсында еңеү яулауы булышлыҡ иткән. Былтыр республиканың йәмғеһе 12 дөйөм белем биреү һәм 3 реабилитация үҙәге яңы спорт ҡоролмалары менән йыһазландырылған. Яҡын арала тағы ла 5 коррекция мәктәбенең матди-техник базаһын тулыландырыу көтөлә.

Быйыл Башҡортостанда 3 миллион 300 мең квадрат. метр торлаҡ сафҡа индереләсәк

Был 2030 йылға төбәк алдына ҡуйылған маҡсатҡа өлгәшеү өсөн мотлаҡ шарт. Был хаҡта республика төҙөүселәр ассоциацияһы ултырышында Радий Хәбиров хәбәр итте. Былтыр тармаҡ күп төбәктәргә хас булған ҡатмарлыҡтар менән осрашты, әммә торлаҡты сафҡа индереү буйынса йыллыҡ план үтәлде. Беҙгә тупланған темптарҙы мөмкин тиклем һаҡлап ҡалыу мөһим. Бының өсөн власть, бизнес һәм профессиональ берләшмәнең берлектәге системалы эше кәрәк, тине Башҡортостан етәксеһе.

Радий Хәбиров креатив индустриялар сәғәтендә ҡатнашты

Башҡортостан башлығы Радий Хәбиров «Квартирник» тип аталған музыкаль майҙансыҡта ойошторолған креатив индустриялар сәғәтендә ҡатнашты. Күсмә форматта үткәрелгән осрашыуҙа республика киң танылған йырсылар, артистар, музыкаль төркөмдәр ойоштороусы белгестәр ҡатнашты. Сарала Башҡортостанда креатив индустриялар йүнәлешен үҫтереү, был тармаҡта эшләүсе йәштәргә ярҙам юлдары ҡаралды.

Республикала ҡар таҙартыуға 1700 берәмек техника һәм 3900 самаһы юлсы сығарылған

Бөгөн республикала ҡар таҙартыуға 1700 берәмек техника һәм 3900 самаһы юлсы сығарылған. Өфөлә ҡар эҙемтәләре менән көрәш төндә үк башланған. Иртәнге сәғәттәрҙә Өфө урамдарында 400-ҙән ашыу берәмек коммуналь техника һәм меңдән ашыу юл эшсеһе һәм урам һепереүселәр эшләгән.

Башҡортостанда МХО ветерандарына реабилитация, эш һәм социаль адаптация

Медицина реабилитацияһы, эшкә урынлаштырыу һәм социаль адаптация-бөгөн республикала махсус хәрби операция ветерандары менән эш өс йүнәлештә алып барыла. Башҡортостан башлығы Радий Хәбиров Дәүләт Йыйылышы-Ҡоролтайға йыллыҡ мөрәжәғәтнамәһендә алғы һыҙыҡтан ҡайтҡан һәр яугир менән иғтибарлы һәм һаҡсыл эшләү мөһимлеген билдәләне. Республика һуғыш ветерандары госпиталендә алып барылған һөҙөмтәле эш алымдары һәм төбәктә тормошҡа ашырылған «Көслө кешеләр» социаль проекты тураһында репортаж.

Башҡортостан онкологтары «Йәшәйек әле» Бөтә Рәсәй премияһына лайыҡ булды

Бөгөн Бөтә донъя яман шешкә ҡаршы көнө. Ошо көндәрҙә Дәүләт Кремль һарайында Башҡортостан онкологтары «Йәшәйек әле» тип исемләнгән Бөтә Рәсәй премияһы менән бүләкләнде. Абруйлы награда илдең иң яҡшы табиптарына һөнәри оҫталыҡ һәм яман шешкә ҡаршы көрәшкә ҙур өлөш индереүселәргә тапшырыла.

1 февралдән ғаилә ипоеткаһы программаһына үҙгәрештәр ғәмәлгә индерелде

Бер ғаилә-бер ипотека. 1 февралдән ғаилә ипоеткаһы программаһына үҙгәрештәр ғәмәлгә индерелде. Хәҙер льготалы кредитты юллағанда ир менән ҡатын заемсылар булып һанала, шулай уҡ баланың ата-әсәһе менән бер урында теркәлеүе шарт. Үҙгәрештәр күсемһеҙ милек баҙарына нисек йоғонто яһаясаҡ?

Өфөлә «Күпер» мәғариф проекты тамамланды

Өфөлә Мәрйәм Солтанова исемендәге Ислам колледжында республика күләмендәге «Күпер» мәғариф проекты тамамланды. Проект сиктәрендә Башҡортостандың төрлө-район ҡалаларынан 25 дин әһеле белемен камиллаштырҙы. Улар «Махсус хәрби операция яугирҙары һәм уларҙың ғаилә ағзалары менән эшләү» программаһы буйынса рухи һәм психологик ярҙам күрһәтәсәк. Социаль проект хаҡында ентекләберәк киләһе яҙмала.

Өфө Ботаника баҡсаһында яңы сортлы сирень үҫтерелә

Гөлнәзирә, Шәүрә, Айгөл, Нәфисә, Салауат Юлаев-был исемдәрҙе нимә берләштерә. Улар бөтәһе лә Өфөләге Ботаника- баҡсаһында үҫә һәм сәскә ата. Һүҙебеҙ Башҡортостан селекционерҙары сығарған яңы сорт сирендәр тураһында. Институт лабораторияһында декоратив ағастар, сәскәләр, «Ҡыҙыл китап»ҡа ингән үҫемлектәр үрсетелә.

Ауыл хужалығы өсөн кадрҙар әҙерләүгә 9 миллион 800 мең һум йүнәлтелә

Ул юғары уҡыу йорто һәм агрокласс уҡытыусыларына ҡағыла. Программа “Агросәнәғәт комплексында кадрҙар” федераль проект ярҙамында тормошҡа ашырыла. Уҙған йылда Башҡорт дәүләт аграр университетынан 42 уҡытыусы был мөмкинлек менән файҙаланған. Аҡса күләме 1 миллион 400 мең һумға еткән. Республика Хөкүмәте Премьер-министры урынбаҫары- ауыл хужалығы министры Илшат Фәзрахманов белдереүенсә, быйыл мәғариф инфраструктураһын үҫтереү ҡаралған. Башҡорт дәүләт аграр университетының өсөнсө уҡыу корпусын тәртипкә килтереү, өс мәктәптә агротехнологик кластар булдырыу һәм йыһазландырыу планлаштырылған.

Махсус хәрби операция биләмәһендә бөгөн 150-ләп афған һуғышы ветераны хәрби хеҙмәт үтә

Уларҙың өс тиҫтәләбе «Башҡортостан» полкында. Яугирҙарға медицина ярҙамы кеүек һәм башҡа мәсьәләләр бөгөн республика Хөкүмәтендә үткән кәңәшмәлә күтәрелде. Рәсми ултырышта Совет ғәскәрҙәрен Афғанстандан сығарыуға 37 йыл тулыуға арналған саралар планы билдәләнде.

Ҡышҡы осорҙа янғын хәүефе көсәйә: инспекторҙар рейдтар уҙғара

Быйыл Башҡортостанда 400-ҙән ашыу янғын сыҡҡан, егерме кешенең ғүмере өҙөлгән. Күңелһеҙ статистика 2025 йылдың ошо уҡ осоро менән сағыштырғанда тағы ла артҡан.
Ҡышҡы осорҙа электр селтәрҙәренә һәм йылытыу системаларына көсөрәгеш арта. Шуға ла инспекторҙар шәхси сектор һәм баҡса ширҡәттәре буйлап даими рейдтарға сыға, кешеләргә хәүефһеҙлек тураһында иҫкәртә.

Башҡортостан шифаханаларында бушлай һауыҡтырыу курсы үтә ала

Балалар һәм уларҙың ата-әсәләре Башҡортостан шифаханаларында бушлай һауыҡтырыу курсы үтә ала. Республикала медицина күрһәткестәренә ярашлы, «Әсә һәм бала» программаһы уңышлы тормошҡа ашырыла. Һуңғы статистик мәғлүмәттәргә ярашлы, балаларҙы һауыҡтырыу өлкәһендә ойошторолған саралар буйынса Башҡортостан Волга буйы федераль округында беренсе урынды биләне. Тулыраҡ киләһе яҙмала.

Уҡыусылар Сталинград һуғышы тарихын уйын форматында өйрәнә

Өфөләге Республика Хәрби дан музейында мәктәп уҡыусылары өсөн Бөйөк Ватан һуғышының мөһим ваҡиғаларына арналған интеллектуаль турнирҙар ойошторола. Был юлы балалар Сталинград һуғышына бағышланған 30 һорауға яуап бирҙе.

Өфө сәнғәт галереяһында Рәйеф Баҙыҡовтың фотокүргәҙмәһе асылды

Ул авторҙың 80 йәшлек юбилейына арналған. Рәйеф Карам улы Рәсәйҙең һәм Башҡортостандың атҡаҙанған мәҙәниәт хеҙмәткәре, Шәһит Хоҙайбирҙин исемендәге Хөкүмәт премияһы лауреаты. Ижадсының объективынан тупланған архивта ил һәм республика етәкселәре, танылған мәҙәниәт эшмәкәрҙәре, табиптар, спортсыларҙың фотоһүрәттәре лә байтаҡ. Экспозицияла оҫтаның уҙған быуаттың 80-се йылдарынан йыйылған иң яҡшы хеҙмәт емештәре менән танышырға мөмкин.

Башҡортостанда йәшәүсе 18 миллион һумға алданған

Салауат ҡалаһынан 43 йәшлек ҡатын полицияға мөрәжәғәт иткән. Уҙған йылдың ноябрендә ул социаль селтәрҙә аралашыу барышында инвестиция ярҙамында ҙур аҡса эшләү мөмкинлеге тураһында белеп ҡалған. Ошондай компания етәксеһе менән таныштырғандар, уҡытыу курстары уҙғарылған. Инвестицияны бәләкәй генә суммаларҙан башлағандар. Һуңынан, яҡшы табыш алыу өсөн ҙур аҡса һалырға күндергәндәр. Ялған инвестиция белгестәренә ышанған ҡатын 10 миллион һумын һәм уға өҫтәп 8 миллион һум кредит аҡсаһын инвестиция иҫәбенә күсергән. Бер аҙ ваҡыт үткәс, ҡатын табышын сығарып алырға ниәтләгән, унан өҫтәп тағы 3 миллион һум һорағандар, ошонан һуң ғына мутлашыусылар тоҙағына эләгеүен аңлап ҡалған.