Рафаэль Байдәүләтов 80 йәшлек юбилейы уңайынан Халыҡтар дуҫлығы ордены менән бүләкләнде

Башҡортостан Хөкүмәтенең элекке премьер-министры Рафаэль Байдәүләтов 80 йәшлек юбилейы уңайынан Халыҡтар дуҫлығы ордены менән бүләкләнде. Оператив кәңәшмә барышында республика башлығы Радий Хәбиров күренекле дәүләт эшмәкәренең төбәк үҫешенә индергән өлөшөн билдәләп үтте.

Башҡортостан төҙөүселәре көсө менән Красный Луч ҡалаһында күп функциялы үҙәк сафҡа инде

Башҡортостан төҙөүселәре көсө менән Луганск халыҡ республикаһы Красный Луч ҡалаһында күп функциялы үҙәк сафҡа инде. Объект 80 меңдән ашыу кешене хеҙмәтләндереүгә иҫәпләнгән. Унда халыҡҡа 40 төрҙән ашыу дәүләт хеҙмәте күрһәтеләсәк. Луганск халыҡ республикаһы Красный Луч районы 112-се башҡорт атлы дивизияһы командиры Миңлеғәли Шайморатов һәм уның яуҙаштарының һуңғы төйәге. Шуға ла республика башлығы Радий Хәбировтың башланғысы менән Башҡортостан был төбәкте шефлыҡҡа алды.

Республикала хәрби хирург Әхмәт Дәүләтов тураһында кинофильм төшөрөлә

«Башҡорт батальоны» телеграм-каналы ошо турала хәбәр итә. Әхмәт Дәүләтов 112-се Башҡорт кавалерия дивизияһы медицина-санитар эскадроны командиры була. Һуғыштың аҙағына тиклем алғы һыҙыҡта яралы һалдаттарҙы дауалай. Легендар табип 3 мең 600 яугирҙең ғүмерен ҡотҡарып ҡала тигән мәғлүмәт бар. Табип хаҡындағы картинаның сценарийы тулыһынса әҙер. Ижади төркөмгә геройҙың бүләсәре Ангелина ярҙам итә. Башҡортостанда Әхмәт Дәүләтов исемендәге медицина ротаһы төҙөлдө. Ул «Башҡортостан» мото уҡсылар полкы составына инә.

Башҡортостанда билдәле хирург һәм хәрби табип Әхмәт Дәүләтов тураһында фильм төшөрөлә

Был турала "Башҡорт батальоны" телеграм-каналы хәбәр итә. Фильм геройҙың тормош юлына нигеҙләнеп төшөрөлә. Рәсми мәғлүмәттәр буйынса Әхмәт Дәүләтов 3 мең ярымдан ашыу һалдаттың ғүмерен ҡотҡара. Бөйөк Ватан һуғышына тиклем үк ул ҡулдарҙы һәм яраларҙы эшкәртеү өсөн шыйыҡса уйлап таба. Әле "Башҡортостан" мотоуҡсылар полкы составында Әхмәт Дәүләтов исемендәге медицина ротаһы булдырылған.

Башҡортостанда милли сәйәсәткә ярты миллиард һумдан ашыу аҡса бүленә

2028 йылға тиклем иҫәпләнгән дәүләт программаһы әҙерләнгән. Аҡсаның ҙур өлөшө төбәк ҡаҙнаһһынан ҡаралған. Документ менән рәсми мәғлүмәттәр порталында танышырға мөмкин. Программа ярашлы, халыҡтар берҙәмлеген нығытыу, башҡорттарҙың мәҙәниән үҫтереү эштәре, сит ил кешеләре өсөн социаль һәм мәҙәни адаптация сараларын уҙғарыу ҡаралған.

Өфөлә "Тулҡын" паркы төҙөкләндерелә

Затон микрорайонындағы биләмәлә эштәрҙең икенсе этабы бара. Күл тирәләй һуҡмаҡтар тәртипкә килтерелә, халыҡ хәүефһеҙлеге өсөн ҡоролмалар урынлаштырыла. Ремонт өсөн аҡса республика ҡаҙнаһынан бүленгән, эштәр быйыл сентябрь аҙағына тамамланырға тейеш.

Башҡортостанда күп фатирлы йорттарҙы капиталь ремонтлауға 6 миллиард ярым һумға яҡын аҡса йүнәлтелгән

Сираттағы оператив кәңәшмә барышында подъездар, ихата һәм йәмәғәт биләмәләрен төҙөкләндереү буйынса тормошҡа ашырылған программалар үтәлеше ҡаралды. «Сәләмәт республика - сәләмәт төбәк» акцияһы һөҙөмтәләре һәм хеҙмәт баҙарындағы хәл барланды.

Башҡортостанда иген һәм ҡуҙаҡлы культураларҙы йыйыу 54 процентҡа теүәлләнгән

Башҡортостанда иген һәм ҡуҙаҡлы культураларҙы йыйыу 54 процентҡа теүәлләнгән, ике миллион тоннаға яҡын уңыш келәттәргә оҙатылған. Уртаса гектар ҡеүәте 20 центнер. Был миҙгелдә ярауайға ҡарағанда, ужым бойҙайының уңдырышлығы 8-10 центнерға юғары. Ауыл эшсәндәре иртә майлы культуралар йыйыуҙы ла тамамлау алдында. Ведомство етәксеһе билдәләүенсә, ураҡ эштәрен тамамлау өсөн республика хужалыҡтарына тағы ла 80 мең тонна дизель яғыулығы һатып алырға кәрәк.

Башҡортостан хужалыҡтары ужым культураларын сәсеүгә төштө

Шишмә районынында 300 гектар майҙанда арыш орлоғо сәселгән. Ауыл эшсәндәре әле ужым бойҙайы баҫыуына күскән.

Башҡортостанда яңы уҡыу йылы алдынан мәктәптәрҙе ремонтлау тамамлана

1 сентябрҙә республиканың 77 мәктәбе уҡыусылары төҙөкләндерелгән шарттарҙа уҡыу йылын башлаясаҡ. Төҙөүселәр төп ремонт эштәрен тамамлаған, әле етештеҙһеҙлектәрҙе бөтөрөү бурысы тора.

2023 йылда баланы мәктәпкә әҙерләү күпмегә төшә

Августың һуңғы көндәрендә сауҙа үҙәктәрендәге иң үтемле тауар мәктәп кәрәк-яраҡтары. Ата-әсәләр ғаилә бюджетын планлаштырып малай-ҡыҙҙарҙы уҡыу йылына әҙерләй. Мәктәп тауарҙарына хаҡтар нисек? Тулыраҡ мәғлүмәт видеояҙмала.

Бөрйән районында «Урал батыр» эпосын яттан һөйләүсе балаларҙың 25-се юбилейлы ижад байрамы үтте

Башҡортостандың мәғариф министрлығы Бөрйән районы хакимиәте менән берлектә халҡыбыҙҙың шиғри һәм проза ҡомартҡыһы «Урал батыр» эпосын яттан һөйләүсе балаларҙың 25-се юбилейлы ижад байрамын үткәрҙе. Сирек быуат эсендә төбәк-ара йәш сәсәндәр конкурсында 5 меңгә яҡын уҡыусы һәм мәктәпкәсә йәштәге балалар ҡатнашҡан.

Стәрлетамаҡ ҡалаһында «Юлдаш» радиоһы «Беҙ бергә!» йыр фестивален үткәрҙе

«Юлдаш»тар йәнә тамашасыһы менән бергә. Стәрлетамаҡ ҡалаһының Юрий Гагарин исемендәге ял паркында радио хеҙмәткәрҙәре башҡорт эстрадаһы йырсылары ҡатнашлығындағы «Беҙ бергә» фестивален үткәрҙе. Мәҙәни-ял үҙәгенең төп сәхнәһенән танһыҡ көй-моңдар, мауыҡтырғыс уйындар, оҫталыҡ дәрестәре лә ойошторолдо.

Мәжит Ғафури исемендәге Башҡорт драма театрына “Килен” төшә

Коллектив яңы ижад миҙгелен премьера менән башлай. Артистар йәш яҙыусы Заһиҙә Мусинаның повесын сәхнәләштерә. “Килен” ғаилә мөнәсәбәттәре тураһында”, - ти автор. Премьера 4 һәм 5 октябрҙә була.

Йылытыу миҙгеленә әҙерлек аҙағына яҡынлаша

Быйыл яңы федераль программа аҡсаһы ла ҡулланыла, торлаҡ-коммуналь хужалыҡ объекттары яңыртыла. Коммуналь өлкәлә иң ҙур проблемаларҙың береһе - иҫкергән торбалар, ти тармаҡ хеҙмәткәрҙәре. Республикала йорттарҙы йылытыуға әҙерлек 15 сентябргә тиклем тамамланырға тейеш.

Башҡортостанда күп фатирлы йорттарҙа подъездар төҙөкләндерелә

21 муниципалитетта 760-ҡа яҡын подъезда комплекслы ремон ҡаралған. Был маҡсатта 732 миллион һум аҡса бүленгән, шул иҫәптән республика бюджетынан – 660 миллион һум. “Күп фатирлы йорттарҙың подъездарын ремонтлауҙы 21 ноябргә тамамлау күҙаллана”, - тип белдерҙе Хөкүмәттең оператив кәңәшмәһендә республиканың торлаҡ-коммуналь хужалыҡ министры вазифаһын башҡарыусы Ирина Голованова.

26 августа Санкт-Петербургта Башҡортостан көнө үтә

Илдең төньяҡ баш ҡалаһында бер нисә рәсми осрашыу ҡаралған. “Петербургта Республика көнөн уҙғарыу ҙур ваҡиға. Был ҡаланың яңы парктар булдырыу буйынса тәжрибәһе ҙур. Уны өйрәнергә кәрәк”, - тип белдерҙе республика етәксеһе Радий Хәбиров.

Башҡортостан бадминтон оҫталары Бөтә Рәсәй турнирында алтын миҙалдар яуланы

Ярыштар Һарытауҙа үтте. Унда илдең төрлө төбәктәренән 140 спортсы ҡатнашты. Ҡатнаш парҙар араһында беҙҙең республиканан Родион Әлимов һәм Алина Дәүләтова еңеүсе булды. Бынан тыш Родион Әлимов ирҙәр турнирында тағы бер алтын миҙалға лайыҡ булды. Алина Дәүләтова ҡатын-ҡыҙҙар араһында ярыштарҙа бронза награда алды.

Башҡортостанда "Юлдың ҡаршы һыҙаты" тигән акция башланды

Уның барышында автоинспекторҙар ҡаршы һыҙатҡа сығыуҙың хәүефе тураһында әңгәмәләр уҙғара. Юл хәрәкәте хәүефһеҙлеге дәүләт инспекцияһынан хәбәр итеүҙәренсә, быйыл ошо сәбәпле 93 авария булған. Уларҙа 33 кешенең ғүмере өҙөлгән, 154 кеше йәрәхәттәр алған. Акция аҙна аҙағына тиклем дауам итә.

Башҡортостанда "Атайлыҡ даны" наградаһына 191 кеше дәғүә итә

Конкурсты ойоштороу комитетында ғаризалар ҡабул итеү һөҙөмтәләре барланды. Еңеүселәр 4 октябрҙә Өфөлә бүләкләнә. Уларға "Атайлыҡ даны" билдәһе һәм диплом тапшырыла. Быйыл номинанттар араһында күп балалы аталар, ирекмәндәр, спортсылар, музыканттар, ҡотҡарыусылар, экологтар, донорҙар бар. Йәмәғәт палатаһы "Атайлыҡ даны" наградаһын 2020 йылда булдырҙы. Ирҙәрҙең балалар тәрбиәләүҙәге һәм йәмғиәт үҫешендәге ролен баһалау маҡсат итеп ҡуйыла.

Рәсәйҙә бөгөн Дәүләт флагы көнө билдәләнә

Илебеҙҙең өс төҫлө әләме 300 йылдан ашыу тарихҡа эйә. Дәүләт флагы 17-се быуат аҙағында барлыҡҡа килә. Тәүге тапҡыр сәмерғош сигелгән был байраҡ «Орел» хәрби карабында күтәрелә. Аҙаҡ Петр Беренсе указына ярашлы флагтың өлгөһө, горизонталь һыҙаттарҙың тәртибе раҫлана. Өс төҫлө байраҡ 1991 йылдың 22 авгусында тергеҙелә.