Өфөлә Спорттың милли һәм Олимпия булмаған төрҙәре буйынса халыҡ-ара уйындар тамамланды

Баш ҡаланың 5 спорт обьектында уҙған ярыштарҙа Европа, Азия һәм Африканың 28 иленән 700-ҙән ашыу спортсы ҡатнашты. Армрестлинг, гер күтәреү, арҡан тартыу, полиатлон, бысаҡ ырғытыу, компьютер спортында иң яҡшылар асыҡланды. Рәсәй йыйылма командаһы составында 14 сығыш яһаны, шуларҙың 7-әүһе - Башҡортостандан вәкилдәре.

"Төньяҡ амурҙары" Рәсәй кинотеатрҙарына 12 октябрҙә күрһәтелә башлай

Был турала Радий Хәбиров хәбәр итте. "Беҙҙең тулы метражлы йәнһүрәт әҙер. Ул 31 августа ҙур экранға сыға. Иң беренсе булып Башҡортостанда күрһәтелә, унан һуң Рәсәй төбәктәрендә ҡарарға була", - тине ул. Йәнһүрәтте рус һәм башҡорт телдәрендә ҡарарға мөмкин, телде тамашасылар үҙҙәре һайлай. Бында 1812 йылғы Ватан һуғышында башҡорт яугирҙәре батырлығы һүрәтләнә.

Өфө студенттарын пилотһыҙ осоу аппараттары менән идара итергә өйрәтәләр

Проект Өфө фән һәм технологиялар университетында, IQ-паркта ғәмәлгә ашырыла, тип хәбәр итәләр Республика хөкүмәтенән. Белем биреү барышында уйын технологиялары ҡулланыла, - дрон менән идара итеү киберспорт менән бергә алып барыла. Рәсәй электрон спорт федерацияһының төбәк бүлексәһе етәксеһе Святослав Пегов белдереүенсә, киберспорт клубтары Өфөләге бөтә ҙур уҡыу йорттарында булдырылған. Уларҙа пилотһыҙ осоу аппараттары менән идара итеү курстарын ойошторорға мөмкин.

Дәүләт Думаһында мәктәп формаһын ябайыраҡ итеү башланғысы менән сыҡтылар

Мәғариф министры Сергей Кравцов исеменән ошо турала документ тапшырылған. Әле дәүләт стандарттары ҡабул ителмәгән. Һәр мәктәп уҡыусылар өсөн үҙ талаптарын ҡуя. Йыш ҡына мәктәп формаһы өлкәндәрҙең эш костюмына оҡшатып тегелә. Депутаттар фекеренсә, бындай кейем балалар өсөн тура килеп бөтмәй. Иң мөһиме форма уңайлы, хәүефһеҙ, хаҡы ҡулай булырға тейеш ти улар.

Башҡортостандан 35-се гуманитар ылау махсус хәрби операция биләмәһенә юлға сыҡты

Ирекле батальондар һәм мобилизацияланған яугирҙар өсөн ярҙам илтә. Ылау 13 йөк машинаһы, 3 тралдан тора. Ярҙам тотош республиканан тупланған. Яугирҙар өсөн эш ҡоралдары, аҙыҡ-түлек, техника оҙатылһа, Луганск халыҡ республикаһының мәғариф учреждениеларфы өсөн канцелярия тауарҙары, уыҡ кәрәк-яраҡтары һәм спорт формалары әҙерләнгән. Красный Луч ҡалаһы поликлиникаһынан стоматалогия кабинеты йыһаздары ла гуманитар ылау менән Донбасҡа юланды.

Баймаҡ районы халҡы «Башҡортостан» мотоуҡсылар полкы өсөн гуманитар ярҙам тупланы

Махсус хәрби операция биләмәһенә автомобилдәр, күсмә мунса, маскировкалау селтәрҙәре һәм шәхси посылкалар оҙатылды. Тулыраҡ видеояҙмала.

«Өфө-Арена» комплексы янында ҡыҫҡа ваҡытлы ялға ҡайтҡан яугирҙарҙы оҙатыу тантанаһы үтте

Майҙанда Рәсәй һәм Башҡортостан гимндары яңғыраны, тигеҙ сафҡа баҫҡан ҡыйыу яҡташтарыбыҙ алдында Хәрби комиссариат, урындағы хакимиәт вәкилдәре сығыш яһаны. Ир-егеттәрҙең күбеһе мобилизацияның тәүге көндәренән үк хәрби хеҙмәткә алынған. Ғаиләләре янында улар ике аҙна булған.

Радий Хәбиров Санкт-Петербургта үткән Башҡортостан көндәрен ойоштороусыларға рәхмәт һүҙҙәрен еткерҙе

Радий Хәбиров Санкт-Петербургта үткән Башҡортостан көндәрен ойоштороусыларға, артистарға рәхмәт һүҙҙәрен еткерҙе. 25 августан 27-нә тиклем дауам иткән сараға 115 меңдән ашыу кеше килгән.
Иҫегеҙгә төшөрәбеҙ, илдең төньяҡ баш ҡалаһында республиканың иҡтисади, инвестиция мөмкинлектәре тәҡдим ителде, төбәк предприятилары тарафынан йөҙҙән ашыу бизнес-осрашыу уҙғарылды. Башҡортостан Хөкүмәте Дәүләт Эрмитажы менән хеҙмәттәшлек тураһында килешеү төҙөнө.

Өфөлә «Төньяҡ амурҙары» анимация фильмының презентацияһы үтте

«Төньяҡ амурҙары» ҙур экранға сыға! Анимация фильмының презентацияһы Рәсәй киноһы көнөндә «Родина» кинотеатрында үтте. Башҡортостанда донъя күргән йәнһүрәт тәүге тапҡыр Рәсәй тамашасыһына тәҡдим ителәсәк.

Башҡортостанда тағы өс логистика үҙәге төҙөлә

Был проекттарҙы ғәмәлгә ашырыу өсөн 1 миллиард 930 миллион һум бүленә, тип белдерҙе Сауҙа һәм хеҙмәттәр министры Алексей Гусев. Иң ҙур үҙәк Өфөлә урынлаша. Икенсеһе Өфө районы Михайловка ауылында була. Өсөнсөһөнөң урыны әлегә һайланмаған. Быға тиклем Өфөнөң Дим районында 7 миллиард һумлыҡ логистика үҙәгенә нигеҙ һалынды.

"Башҡорт оҙон ғүмерлелеге. Туризм" программаһының географияһы киңәйтелә

Унда ҡатнашыусыларға "Бишбүләк- балыҡсылыҡ төбәге" тигән тур тәҡдим ителә. Районда әлегә Өфө һәм Ишембай туристары булған. Башҡортостанда ғәмәлгә ашырылған проект өлкән йәштәгеләргә тәғәйенләнә. Быйыл унда 14 мең 400 кеше ҡатнашҡан. 60 йәшкә еткән ирҙәр һәм 55 йәштән ҡатын-ҡыҙҙар йылына бер тапҡыр сәфәр ҡыла ала.

Өфө ҡалаһында яңы сквер булдырыла

Ял итеү урыны Дәүләткилдеев бульвары янында барлыҡҡа килә. Тротуарҙар төҙөкләндерелә, аллея быйыл көҙ "Йәшел Башҡортостан" акцияһы барышында ултыртыла. Бында йүкә һәм муйыл ағастары була. Шулай уҡ яңы эскәмйәләр ҡуйыла, тип хәбәр итәләр ҡала хакимиәтенән.

Башҡорт телен өйрәнеүҙә инновацион алымдар

Донъяуи киңлектәрҙә башҡорт мөхите. Әкренләп, әммә етди аҙымдар менән үҙ урынын таба килә, тип әйтергә мөмкин. Әсә телен сәсән теленә тиңләгән Рәми Ғариповтың телмәре социаль селтәрҙәрҙә; йомартлығын, олпатлығын һәм дә бөйөклөгөн билдәләгән Зәйнәб Биишева теле кеҫә телефондары клавиатураһында. Башҡортса ижад иткән Мостай Кәрим телендә, ғөмүмән, яҙырға ғына түгел, аҡыллы колонка аша ишетергә, һөйләшергә лә мөмкин буласаҡ.
Был турала тулыраҡ, Башҡортостан Юлдаш телевидениеһы хәбәрсеһе Азат Ғәлиуллин әҙерләгән махсус репортажда.

Ауыл урамдары тағы ла яҡтыраҡ буласаҡ

Республика программаһы буйынса быйыл эштәрҙе башҡарасаҡ компания һайланды. 97 ауыл һәм ҡалала электр селтәрҙәре яңыртыла, лампалар алмаштырыла. Эштәр ай ярымда башҡарылырға тейеш. Радий Хәбиров программаны тергеҙергә ҡушты. Бының өсөн йыл һайын 300 миллион һум бүленә. Был проект 2018 йылда башланы, әммә коронавирус пандемияһы ваҡытында туҡтатылды.

Радий Хәбиров аҙналыҡ оператив кәңәшмәлә суррогат алкоголь һатыусылар менән көрәште көсәйтергә ҡушты

Аҙ ғына уяулыҡты кәметһәк, улар килеп тә сыға. Күрәһең, килемле бизнес. Әммә беҙ уларҙы юҡ итәсәкбеҙ. Радий Хәбиров аҙналыҡ оператив кәңәшмәлә суррогат алкоголь һатыусылар менән көрәште көсәйтергә ҡушты. Илдең төрлө төбәктәрендә ялған спиртлы эсемлектәр менән ағыуланыу осраҡтары теркәлеп тора. Башҡортостан был афәт менән етди көрәш алып бара. Һөҙөмтәләр бар, әммә баҫымды кәметергә ярамай, тине республика башлығы.

Башҡортостанда «Сәләмәт республика- сәләмәт төбәк» акцияһы дауам итә

Ауыл халҡына медицина ярҙамын күрһәтеү мөмкинлеген арттырыу, социаль әһәмиәтле сирҙәрҙе, хроник инфекцион булмаған ауырыуҙары иртә асыҡлауға йүнәлтелгән күләмле сара быйыл 17 апрелдән үткәрелә. Өфө районының Лебяжий ауылы халҡы ла бөгөн беренсел медицина тикшереүен үтте.

Нефтекама 60 йыллығын лайыҡлы ҡаршы алды

Юбилей датаһы уңайынан ҡаланың Үҙәк майҙанында мәҙәни-спорт саралары үтте. Урындағы халыҡты республиканың билдәле артистары йыр-бейеүҙәре менән тәбрикләне, шулай уҡ биләмәлә төрлө милләт халыҡтарының ихаталары, халыҡ кәсептәре өлгөләре күргәҙмәһе эшләне, төрлө оҫталыҡ дәрестәре уҙғарылды. Сара сиктәрендә ике йөҙ килограммлыҡ «Ҡырмыҫҡа иләүе» торты ла бешерелде. Байрам ҡунаҡтары «Йондоҙ менән зарядка» акцияһында, велоуҙышта ҡатнашты.

Ишембайҙа ҡала көнө уңайынан байрам саралары үтте

Ишембай ҡалаһына нигеҙ һалыныуға 83 йыл. Башҡортостандың тәүге нефть табылған төбәге -Юрматы ерендә ҙур байрам саралары бер-нисә көн дауам итте. Тантаналарҙың иң мөһимдәренән, халыҡсан ретро-шлягер конкурсы гала-концертына БЮТ ижади төркөмө лә тамаша ҡылды.

Башҡортостанда пенсионерҙар ял итеү һәм белем биреү сараларына сертификаттар менән файҙалана ала

“Өлкән быуын” төбәк проектына ярашлы хаҡлы ялдағыларға 2 мең һум бирелә. Был аҡсаға төрлө курстарға яҙылырға йәки спорт түңәрәктәренә йөрөргә була. Мәҫәлән, бейеү, йога, сигеү менән шөғөлләнергә, бассейнға барырға йәки балыҡсылыҡҡа өйрәнергә мөмкин. Быйыл программаға ярашлы 2,5 миллион һум бүленде. Сертификат юллау өсөн Күп функциялы үҙәккә йәки Республика халыҡты социаль яҡлау ойошмаһы бүлексәләренә мөрәжәғәт итергә кәрәк.

Башҡортостанда 2 миллион 250 мең тонна ашлыҡ йыйылған

Вице-премьер – Ауыл хужалығы министры Илшат Фәзрахманов ураҡ барышы менән таныштырҙы. Иген һәм ҡуҙаҡлылар 1 миллион 160 мең гектарҙан ашыу майҙанда йыйып алынған. План 68 процентҡа үтәлгән. 32 районда аграрийҙар рапс, гәрсис һәм етен йыйыуға тотондо. “Хужалыҡтарҙа ужым культураларын сәсеү, тупраҡты эшкәртеү һәм шәкәр сөгөлдөрөн йыйыуға техника әҙерләү эштәре ла бара”, тине Илшат Фәзрахманов.

Өфөлә Йәштәр инновацион проекттар үҙәге барлыҡҡа килә

Республика Хөкүмәтенән хәбәр итеүҙәренсә, үҙәнсәлекле ойошма Евразия фәнни-мәғариф үҙәге студент ҡаласығында урынлашасаҡ. “Яңы бизнес биләмәһе” тип аталған үҙәктә йәш эшҡыуарҙар тәжрибә уртаҡлашып проекттарын тормошҡа ашыра ала. Бында бизнес алып барыу өсөн уңайлы шарттар булдырыла, шулай уҡ семинар, тренинг, конференциялар ойошторола.