Яңы уҡыу йылынан мәктәп ашханаларында яңы туҡланыу нормалары индерелә

Балаларға ике меню әҙерләнгән. Уларҙа сәләмәт туҡланыу талаптары, диетолог һәм нутрициологтарҙың тәҡдимдәре иҫәпкә алынған. Был турала Ҡулланыусылар хоҡуҡтарын күҙәтеү федераль хеҙмәте идаралығының бүлек етәксеһе Регина Аҡмалова белдерҙе. Мәктәп ашханаһында порциялар балаларҙың йәшенән сығып талап ителгән калорийҙар күләме буйынса иҫәпләгән. Уҡыусыларға тәҡдим ителгән аш-һыу төрлөләндереп тәҡдим ителә.
Шишмә районының «Туҡланыу үҙәге «нә балаларҙы тәмле һәм файҙалы ризыҡтар менән туҡландырыу бурысы йөкмәтелгән. «Сифат йондоҙо» федераль наградаһына эйә булған ойошма эшмәкәрлеге хаҡында ентекләберәк видеояҙмала.

Журналистар өсөн Республика перинаталь үҙәгенә махсус тур ойошторолдо

Әсә наҙын бүләк итеүсе бала табыу йортона сәфәр. Матбуғат һәм киң мәғлүмәт саралары хеҙмәткәрҙәре өсөн Республика перинаталь үҙәгенә махсус тур ойошторолдо. Журналистар медицина учреждениеһының бөгөнгө мөмкинлектәре менән яҡындан танышты. Йылына 10 меңдән ашыу сабый ауаз һалған перинаталь үҙәк ил кимәлендә иң ҡеүәтлеләрҙән иҫәпләнә.

Башҡортостан мәктәптәрендә капиталь ремонт тамамлана

Быйыл 28 район һәм ҡалала 77 бина төҙөкләндерелгән. Улар 17 мең баланы ҡабул итә. 1 сентябргә тиклем эштәр тулыһынса тамамланырға тейеш. Мәктәптәрҙе капиталь төҙөкләндереү буйынса федераль программа ғәмәлгә ашырыла башлағас Башҡортостан 8 миллиард 610 миллион һум йәлеп иткән. Ремонтланған мәктәптәр һаны буйынса беҙҙең республика ил төбәктәре араһында икенсе урында. 2026 йылға тиклем Башҡортостанда 365 мәктәп бинаһын капиталь ремонтлау планлаштырыла. 1 сентябрҙә республикала 500 меңдән ашыу бала мәктәпкә бара.

1 сентябрҙән Башҡортостан электричкаларында спорт кәрәк-ярағын бушлай йөрөтөп була

Билет алғанда велосипед, самокат, гироскутер, скейтборд, саңғы, сноуборд, балалар санаһы өсөн айырым түләргә кәрәкмәй. Бер билет менән бер генә спорт кәрәк-ярағын алырға мөмкин, тип хәбәр итәләр "Башҡортостан ҡала яны пассажирҙар компанияһы"нан.

Республикала һыуһаҡлағыстар тәртипкә килтерелә

Башҡортостан хөкүмәтендә республика ҡарамағындағы гидротехник ҡоролмаларҙы капиталь ремонтлау барышы ҡаралды. 2005 йылдан 84 быуа һәм һыуһаҡлағыс төҙөкләндерелгән. Бының өсөн башлыса федераль аҡса тотонолған. Быйыл биш ҡоролманы ремонтлау өсөн 34 миллион һумға яҡын аҡса бүленгән. Алдағы ике йылда Күгәрсен районындағы Йомағужа һәм Баймаҡтағы Һаҡмар һыулағыстарында төҙөкләндереү эштәре ҡаралған. Бының өсөн 642 миллион һум тотонола. Тәбиғәттән файҙаланыу һәм экология министрлығы тейешле заявка әҙерләп тапшырған.

Быйыл "Һөт иле" фестивале яңы урында уҙғарыла

Байрам Өфөлә, Дуҫлыҡ монументы янында ойошторола. Республика сауҙа-сәнәғәт палатаһы вице-президенты Роман Ситдиков белдереүенсә, фестиваль ҡунаҡтары өсөн фермерҙар баҙары, авиация тамашаһы, төрлө конкурстар әҙерләнә.

Башҡортостанда "Атҡаҙанған халыҡ художество кәсептәре оҫтаһы" исеме тураһында положение раҫланды

Документ менән рәсми мәғлүмәттәр порталында танышырға мөмкин. Был исем халыҡ кәсептәре әйберҙәрен эшләү оҫталарына, кәсепселекте үҫтереүгә ҙур өлөш индереүселәргә бирелә. Уларға танытма һәм атҡаҙанған оҫта билдәһе тапшырыла.

Торлаҡ төҙөлөшөнә аҡса индереп алданыусылар 8 миллиард 900 миллион һумдан ашыу компенсация алған

Был турала "Төҙөлөш сәғәте" кәңәшмәһендә белдерелде. Аҡса 3 мең кешегә күсерелгән. Төҙөлөш һәм архитектура министрлығынан хәбәр итеүҙәренсә, әле республикала 31 проблемалы йорт бар. 12 объект республика ҡаҙнаһы иҫәбенә төҙөлөп бөтә. 1 мең 300 кеше торлаҡлы була. Шулай уҡ федераль фонд аҡсаһына эштәр алып барыла. Торлаҡ төҙөлөшөндә алданыусылар проблемаһы быйыл хәл ителеп бөтөргә тейеш.

Быйыл Башҡортостанда тағы 117 ауылда мобиль элемтә булдырыла

Һанлы үҫеш министрлығынан ошо турала хәбәр итәләр. Эштәр федераль программаға ярашлы алып барыла. Быйыл республикала 125 станция урынлаштырылған. 30 мең кеше өсөн мобиль элемтә ҡулланыу мөмкинлеге булдырылған.

Ял көндәрендә Өфөнөң тарихи үҙәгендә урамдар ябыла

Сикләүҙәр Өфө халыҡ-ара марафонын уҙғарыуға бәйле индерелә. 2 сентябрҙә көндөҙгө 12-нән Зәки Вәлиди урамының Карл Маркс һәм Совет урамына тиклемге өлөшөнән транспорт менән үтеп булмай. Был арауыҡ 3 сентябрҙә төнгө 11-ҙән һуң асыла. 3 сентябрҙә иртәнге сәғәт 7-нән көндөҙгө дүртенсе яртыға тиклем Зәки Вәлиди, Мәжит Ғафури, Пушкин, Карл Маркс, Ленин, Революция, Мостай Кәрим, Достоевский, Крупская, Киров, Коммунистик һәм Театр урамдары өлөшләтә ябыла. 5-се һәм 16-сы трамвайҙар хәрәкәте ваҡытлыса туҡтатыла.

Быйыл "Башҡорт ихаталары" программаһы буйынса 206 ихата төҙөкләндерелә

Бының өсөн 1 миллиард 272 миллион һум тотонола. Бөгөнгә 17 муниципаль берәмектә 97 ихатала эш теүәлләнгән. Башҡаларында ремонтты 30 сентябргә тиклем тамамлау маҡсаты ҡуйылған. Торлаҡ-коммуналь хужалыҡ министрлығынан хәбәр итеүҙәренсә, эштәр контролгә алынған, көн һайын мониторинг уҙғарыла. 2019 йылдан алып "Башҡорт ихаталары" программаһы буйынса 1 мең 120 биләмә тәртипкә килтерелгән.

Башҡортостанда гриппҡа ҡаршы вакцинация башланды

Быйыл республикала 1,8 миллион кешенең грипптан прививка эшләтеүе көтөлә. Вакцинацияға тәүгеләрҙән булып Һаулыҡ һаҡлау министрлығы хеҙмәткәрҙәре ҡушылды. Прививка сирҙе иҫкәртеү, ауырыуҙан ҡатмарлы осраҡтарға юл ҡуймау, кеше ғүмерҙәрен һаҡлап ҡалыу өсөн һөҙөмтәле алымдарҙың береһе булып тора.

Өфөлә «Атайсал. Беҙҙекеләр.» проекты сиктәрендә Тамыр телеканалы әҙерләгән видеофильмдар күрһәтелде

«Атайсал. Беҙҙекеләр.» проекты сиктәрендә «Тамыр» телеканалы әҙерләгән документаль фильмдар шәлкеменең исем туйы үтте. Медиа-проект буйынса Өфөнөң «Родина» кинотеатрында балалар өсөн халҡыбыҙҙың тарихи шәхестәре тураһында видеофильмдар күрһәтелде. Кинйә Арыҫланов, Кәрим Хәкимов, Фатима Мостафина, Зәйнәб Биишева, Исмәғил Тәсимов һәм башҡа арҙаҡлы шәхестәр тормошо иғтибарға алынды. Презентацияла балалар өсөн медиаконкурс, оҫталыҡ дәрестәре һәм уйындар ойошторолдо. Проект Башҡортостан башлығы гранты ярҙамында тормошҡа ашырылды.

Август айында Башҡортостанда 900-ҙән ашыу кеше хәрби хеҙмәт үтеүгә контракт төҙөгән

Август айында Башҡортостанда 900-ҙән ашыу кеше хәрби хеҙмәт үтеүгә Рәсәй Оборона министрлығы менән контракт төҙөгән. Ә йыл башынан алып 5 меңдән ашыу яҡташыбыҙ Ватан алдында бурысын үтәргә теләк белдергән.
Хәрби хеҙмәткә 18 йәштән 60 йәшкә тиклемге ир-егеттәр, айырым осраҡта 65 йәштәгеләр ҙә ҡабул ителә. Рядовойҙар өсөн контракт төҙөү ваҡыты алты айҙан башланһа, офицерҙар өсөн 3 йылдан 5 йылға тиклем. Хәрби комиссариаттан белдереүҙәренсә, контрактты армияла булмағандар ҙа төҙөй ала. Һайлап алыу пункттарында Рәсәй ҡораллы көстәре сафына инергә теләүселәрҙе ҡабул итеү дауам итә.

Саҡмағош районы мәктәбе үҙ продукцияһын мәктәп туҡланыуында ҡулланыу тәжрибәһе менән уртаҡлашты

Саҡмағош районының өс белем усағы мәктәп уҡыусыларын туҡландырыу буйынса йәмәғәт рейтингын төҙөү федераль пилот проектында ҡатнашҡан. Райондың14 мәғариф учреждениеһында уҡыусыларҙы төшкө ҡайнар аш менән туҡландырыуға сит ойошмалар йәлеп ителмәй, аш-һыу мәктәп ашханаларында әҙерләнә. Саҡмағош ауылы ғимназияһы «Рәсәйҙең иң яҡшы мәктәп ашханаһы « Бөтә Рәсәй конкурсында призлы урын яулаған. Был мәктәптә яңы уҡыу йылынан балалар нисек туҡланасағы хаҡында репортаж.

Ҡариҙел районында мөмкинлектәре сикләнгәндәр араһында спорт һәм туризм фестивале тамамланды

Биш көн дауамында барған сарала илдең тиҫтәләгән төбәгенән 50-гә яҡын кеше ҡатнашты. Профессионалдар менән бер рәттән һәүәҫкәр спортсылар ҙа һыу туризмының уңайлылығын һынаны.

Башҡортостанда “Атайлыҡ даны” наградаһы еңеүселәре асыҡланды

Республика Йәмәғәт палатаһынан хәбәр итеүҙәренсә, 51 кеше абруйлы бүләккә лайыҡ була. Быйыл конкурсҡа 191 ғариза ҡабул ителгән. Әлшәй, Белорет, Бөрө, Илеш, Краснокама райондары, Өфө һәм Октябрьский ҡалаларынан заявкалар күп килгән. “Атайлыҡ даны” йәмәғәт наградаһы менән бүләкләү сараһы 4 октябрҙә Өфөлә уҙа.

1 сентябрҙә Башҡортостанда 7 мәғариф кластеры асыла

Улар “Профессионалитет” федераль проектына ярашлы булдырылған. Химия буйынса ойошторолған мәғариф-етештереү үҙәге Стәрлетамаҡ химия-технология колледжы нигеҙендә була. Тау-байыҡтырыу тармағыныҡы – Учалы тау сәнәғәте, машиналар эшләү кластеры – Стәрлетамаҡ политехник колледжында асыла. Бөрө медицина-фармацевтика колледжында “Клиник һәм профилактик медицина” йүнәлеше буйынса кластер эшләй. Өфө һәм Стәрлетамаҡтағы колледждарҙа “Педагогика” тармағына ҡараған 3 кластер булдырылған. Ҡабул итеү кампанияһы барышында “Профессионалитет” программаһы буйынса белем алыуға 9 меңдән ашыу ғариза тапшырылған. Мәғариф-етештереү үҙәктәрендә 5 меңдән ашыу 1 курс студенты белем аласаҡ. Федераль проект оҫта белгестәр әҙерләү маҡсатын ҡуя.

Башҡортостандың Ҡаҙағстандағы яңы вәкиле тәғәйенләнде

Был дәүләттәге Рәсәй сауҙа вәкиллегендә беҙҙең республика мәнфәғәттәрен Дмитрий Ситников яҡлаясаҡ. Республика Башлығы Радий Хәбировтың ошо турала указы бар. Тейешле документ рәсми мәғлүмәттәр порталында донъя күргән. Килешеү 1 йылға төҙөлгән. Дмитрий Ситников 1964 йылда Алма-Атала тыуған. Ошо уҡ ҡалала иҡтисад университетын тамамлаған. Быға тиклем Ҡаҙағстанда Башҡортостан вәкиле булараҡ Урал Аҙнабаев эшләне. Ул үҙ теләге буйынса вазифаһынан бушатылды.

Башҡортостандың халыҡ шағиры Гөлфиә Юнысоваға “Өфөнөң Почетлы гражданы” исеме бирелде

Гөлфиә Аҙнағол ҡыҙы 20-нән ашыу китап авторы. Уның әҫәрҙәре байтаҡ телдәргә тәржемә ителгән, шиғырҙарына йырҙар яҙылған. Гөлфиә Юнысова оҙаҡ йылдар “Башҡортостан ҡыҙы” журналы редакцияһын етәкләй. Федераль һәм республика парламенты, Өфө ҡала Советы депутаты булды. “Маҡтаулы исемде юбилейым алдынан ҙур бүләк итеп ҡабул иттем”, - ти шағирә.10 сентябрҙә Гөлфиә Юнысоваға 75 йәш тула. Республикала халыҡ шағирына арналған саралар үткәрелә.

Башҡортостан теннис оҫталары Татарстандан алтын-көмөш миҙал алып ҡайта

Республика спорт министрлығынан хәбәр итеүҙәренсә, өҫтәл теннисы буйынса турнир Саба район үҙәгендә үткән. Унда илдең 12 төбәгенән 100-гә яҡын спортсы ҡатнашҡан. Башҡортостан спортсылары 4 алтын, 2 көмөш һәм 3 бронза миҙал яулаған.