Өфөнөң Совет майҙанында почетлы ҡарауыл сафҡа баҫты

Рәсәй Геройы Миңлеғәле Шайморатов һәм Бөйөк Ватан һуғышы йылдарында башын һалған яҡташтарыбыҙ иҫтәлегенә ҡуйылған мемориалда тәүге хәтер вахтаһы киске сәғәт етелә башланды. Бынан һуң, ҡарауыл һәр шәмбе үтәсәк, тип көтөлә.

Төҙөкләндерелгәндән һуң Башҡорт дәүләт ҡурсаҡ театры 2 ярым тапҡырға киңәйә

Төҙөкләндерелгәндән һуң Башҡорт дәүләт ҡурсаҡ театры 2 ярым тапҡырға киңәйә, йәғни 6 мең ярым квадрат метр самаһы майҙанды биләй. Тамашасылар өсөн урындар һаны арттырыла. Улар 300-ҙән 435-кә еткерелә. Был турала Башҡортостан Башлығы социаль селтәрҙәге сәхифәләрендә яҙып сыҡты. Әле унда төҙөлөш эштәре йылдам бара. Мәҙәниәт усағының төкөтмәһе күтәрелә.

Бөгөн Башҡортостанда Һөт иле фестивале үтте

Байрамға ҡушыл! Бөгөн Башҡортостанда Һөт иле фестивале үтте, унда республиканың район-ҡалаларынан ғына түгел, Рәсәйҙең иң алыҫ төбәктәренән дә ҡунаҡтар йыйылды. Хужалыҡтар байрамға килеүселәрҙе һөт ризыҡтары менән һыйланы, шулай уҡ урында ойошторолған йәрминкәлә республикала етешетерлгән аҙыҡ-түлек тауарҙарҙы һатылды.

Башҡортостандан махсус хәрби операция биләмәһенә мобилизацияланыусылар төркөмө юлланды

Ике аҙна ялдан һуң, алғы һыҙыҡҡа. Башҡортостандан махсус хәрби операция биләмәһенә мобилизацияланыусылар төркөмө юлланды. Яугирҙарҙы «Өфө-Арена» майҙанынан оҙаттылар. Күптәр отпуск ваҡытын ғаиләһе менән үткәрергә тырышҡан.

Башҡортостанда «Үҫеш биләмәһе» проектының яңы миҙгеле башланды

Мәктәп йәштәрен гражданлыҡ-патриотик тәрбиләүгә йүнәлтелгән»Үҫеш биләмәһе 4.0»мәғариф проекты республикала 2019 йылдан алып йыл һайын үткәрелеп килә. Яңы миҙгел Рәсәй Геройы Максим Серафимов исемендәге «Патриот» паркында асылды. Унда республика район һәм ҡалаларынан 140 уҡыусы осрашты. Мәғариф проекты «Һанлы хәрәкәт-йәштәргә яңы мөмкинлектәр»тигән билдә менән 2-4 сентябргә тиклем үткәрелә.

Әлшәй районы үҙәгендә быйыл төҙөлгән белем усағы тәүге уҡыусыларын ҡабул итте

Яңы уҡыу йылында яңы мәктәптә. Әлшәй районы үҙәгендә быйыл төҙөлгән белем усағы тәүге уҡыусыларын ҡабул итте. Бынан тыш Түбәнге Әүрез ауылында ла ремонттан һуң мәғариф учреждениеһы файҙаланыуға тапшырылды. Тулыраҡ киләһе яҙмала.

Бөгөн баш ҡалала халыҡ-ара марафон уҙа

Спорт байрамында ете меңгә яҡын йүгерергә яратыусы, скандинав йөрөшө, роллер спорты менән мауығыусылар ҡатнаша.Ике, биш, 10, 21.1, 42.2 километр арауыҡта үҙ көсөн һынағандарҙы иҫтәлекле бүләктәр, иң етеҙҙәрҙе шәп приздар көтә. Марафонға бәйле, иртәнге сәғәт 7-нән 15 сәғәт 30 минутҡа тиклем Зәки Вәлиди, Мәжит Ғафури, Пушкин, Карл Маркс, Ленин, Революция, Мостай Кәрим, Достоевский, Крупская, Киров, Коммунистик һәм Театр урамдары өлөшләтә ябыла. 5-се һәм 16-сы трамвайҙар йөрөшө туҡтатыла.

Башҡорт дәүләт ҡурсаҡ театры декабрҙә хәйриә тамашаһы менән асыла

Республика Башлығы Радий Хәбиров төҙөкләндереү барышы менән танышты. Реконструкция “Мәҙәниәт” милли проектына ярашлы алып барыла. Яңыртылған театрҙа 300 урынлыҡ ҙур тамаша залы була. Бында өс ҡатламлы сәхнә урынлаштырыла. Спектаклдәрҙе төрлө бейеклектә күрһәтергә мөмкинлек тыуа. Беренсе ҡатта бәләкәй тамаша залы, кафе, икенсе ҡатта ҡурсаҡтар музейы һәм интерактив уйын бүлмәһе асыла. Үҙгәртеп ҡороуҙан һуң бинаның майҙаны ике тапҡырға арта.

Башҡортостанда күсемһеҙ милекте теркәү өсөн һәр икенсе ғариза электрон тәртиптә ҡабул ителә

Республика буйынса Росреестр идаралығынан хәбәр итеүҙәренсә, быйыл 7 айҙа 252 меңдән ашыу документ интернет аша ебәрелгән. Был күрһәткес йылдан-йыл арта бара. “Дәүләт хеҙмәттәре” порталы һәм Росреестр сайтында электрон ғариза юлларға мөмкин. Бынан тыш, идаралыҡтың рәсми порталында белгестәрҙән бушлай онлайн консультация алырға була.

Башҡортостан Башлығы Радий Хәбиров “Үҫеш биләмәһе 4.0” республика балалар форумында ҡатнашты

Сара ошо көндәрҙә Рәсәй Геройы Максим Серафимов исемендәге “Патриот” хәрби-илһөйәрлек паркында уҙа. Унда 13-18 йәшлек 140 егет һәм ҡыҙ сығыш яһай. Радий Хәбиров балалар менән аралашты, уларҙың һорауҙарына яуап бирҙе. Форум барышында үҫмерҙәр социаль башланғыстарын тәҡдим итте. Сибай ҡалаһынан мәктәп уҡыусылары махсус хәрби операцияла ҡатнашҡан ғаиләләргә ярҙам итеү проекты менән таныштырҙы. Ул беренсе урын алды. Еңеүселәрҙе форум авторы һәм “Бәхет биләмәһе” хәйриә фонды попечителлек советы рәйесе Каринэ Хәбирова бүләкләне.

Благовещен районында ҙур логистик үҙәк төҙөлөшө дауам итә

Республика Хөкүмәтенән хәбәр итеүҙәренсә, биләмәлә бәләкәй бизнес кластеры ойошторола. “Озон” компанияһы келәттәре һәм тауарҙарҙы таратыу урынын төҙөү өсөн 6 миллиард һум инвестиция йәлеп ителде. Быйыл 1 августа Республика Башлығы Радий Хәбиров ҡатнашлығында буласаҡ логистик комплексҡа нигеҙ ташы һалынды. Үҙәк 2025 йылда файҙаланыуға тапшырылырға тейеш. Бәләкәй эшҡыуарҙар маркетплейс ярҙамында комплекс аша тауарҙарын һата аласаҡ.

Республикала 78 рөхсәтһеҙ сүплек асыҡланған

Башҡортостан буйынса Ауыл хужалығын күҙәтеү идаралығынан хәбәр итеүҙәренсә, 59 гектар ер ҡаты көнкүреш ҡалдыҡтарын түгеү сәбәпле бысранған. Етешһеҙлектәр асыҡланған район һәм ҡалалар хакимиәттәренә, шулай уҡ ойошмаларға иҫкәртеү яһалған. Әле 27 гектар биләмәлә рөхсәтһеҙ сүплектәр бөтөрөлгән.

Башҡортостандағы “Ҙур опера” концерты федераль каналда күрһәтелә

Мәҙәниәт министрлығынан хәбәр итеүҙәренсә, тамашаны бөгөн киске сәғәт 6-нан “Культура” телеканалында ҡарарға була. Июндә “Евразия йөрәгендә Славян баҙары” халыҡ-ара сәнғәт фестивале барышында классик музыка концерты уҙҙы. Унда Башҡортостан Милли симфоник оркестры, шулай уҡ танылған йырсылар сығыш яһаны.

Өфөнөң Дим районында яңы мәктәп төҙөлә

Бөгөн Республика хөкүмәтендә оператив кәңәшмәлә ошо турала белдерелде. Радий Хәбиров төҙөлөш майҙансығын һайларға ҡушты. - Район йылдам үҫешә. Күп йорттар төҙөлә, йәш ғаиәләләр күп. Уларға яңы мәктәп кәрәк. Дим районында белем усағы төҙөлөшөнә айырыуса иғтибар булырға тейеш, - тине ул.

«Патриот» паркында 3 көн дауам иткән «Үҫеш биләмәһе» балалар форумы тамамланды

Шишмә районындағы Максим Серафимов исемендәге «Патриот» паркында 3 көн дауам иткән «Үҫеш биләмәһе» балалар форумы тамамланды. Сарала республика район-ҡалаларынан 140 уҡыусы ҡатнашты. Йәкшәмбе форумда ҡатнашыусылар менән осрашыуға республика башлығы килде. Форумдың иң яҡшы социаль башланғыстар авторы Радий Фәрит улын үҙҙәренең проекттары менән таныштырҙы. Төбәк етәксеһе йәштәр сәйәсәтенең өҫтөнлөклө йүнәлештәре тураһында һөйләне. Башҡортостан башлығы шулай уҡ егет-ҡыҙҙарҙы ҡыҙыҡһындырған һорауҙарға яуап бирҙе.

«Белая река» нәшриәт йорто типографияһында һайлау бюллетендәрен баҫтырыу тамамланды

Һайлауға әҙерлек тамам. Благовар районында урынлашҡан «Белая река» нәшриәт йорто типографияһында һайлау бюллетендәрен баҫтырыу тамамланды. Үҙәк һайлау комиссияһы барлыҡ тиражды ҡабул итте. Заказ үтәлгән, ялған бланктар баҫтырыу бөтөнләй мөмкин түгел.

Екатеринбургта башҡорт мәҙәниәте көнө үтте

Екатеринбург 300 йыллығын билдәләне. Юбилей уңайынан ҡалала башҡорт мәҙәниәте көнө үтте. Унда Башҡортостан вәкилдәре лә ҡатнашты. Делегацияны республика мәҙәниәт министры Әминә Шафиҡова етәкләне. Сара барышында Башҡортостандың Балаҡатай һәм Свердловск өлкәһенең Сысертск райондары араһында туғандаш мөнәсәбәт булдырылыуы тураһында клешеүгә ҡул ҡуйылды. Башҡорт мәҙәниәте көнөндә уҡ атыу турниры, оҫталыҡ дәрестәре, республика артистары ҡатнашлығында концерт үтте. Свердловск өлкәһендә 17 меңдән ашыу башҡорт йәшәй.

Шаран районында капиталь ремонттан һуң дүрт мәктәп асылды

Мәғариф учреждениелары комплекслы яңыртылып, заман талаптарына яраҡлаштырылған. Уҡыу процессын ойоштороу өсөн уңайлы һәм хәүефһеҙ шарттар булдырылған. Саҡты һәм Салмалы ауылдарында белем алыусылар һәм педагогик коллективтың шатлығын Дәүләт думаһы депутаты Рима Баталова ла уртаҡлашты. Дөйөм алғанда, ике объектта төҙөкләндереү эштәре башҡарыуға туҡһан миллион һумдан ашыу аҡса йүнәлтелгәйне.

Ата-әсәләр мәктәптәге ашатыуға бәйле мөрәжәғәт ҡалдыра ала

Бөгөн республикала “ҡыҙыу бәйләнеш” телефоны эшләй башланы. Һорауҙарға Ҡулланыусылар хоҡуғын яҡлау хеҙмәте белгестәре яуап бирә. 8-800-77-50-170 телефоны буйынса дүшәмбенән кесаҙнаға тиклем иртәнге сәғәт 10-дан көндөҙгө 5-кә, йома иртәнге сәғәт 10-дан 15 сәғәт 45 минутҡа тиклем шылтыратырға була. Мөрәжәғәттәр 15 сентябргә тиклем ҡабул ителә. Шулай уҡ Берҙәм консультация үҙәге менән элемтәгә инергә мөмкин. 8-800-555-49-43 телефоны тәүлек әйләнәһе эшләй.

Башҡортостандың 14 районында ураҡ тамамлана

Баҫыуҙарҙың 70 проценттан ашыуында эш теүәлләнгән. 27 районда план 50 процентҡа үтәлгән. 1 миллион 240 мең гектарҙа иген һуғып алынған. 2 миллион ярым тонна ашлыҡ келәттәргә һалынған. -Тағы 1 миллион тонна уңыш алыу көтөлә, тип белдерҙе Вице-премьер-Ауыл хужалығы министры Илшат Фәзрахманов. Ураҡ менән бер рәттән ужым сәселә. Бөгөнгә 240 мең гектарҙа эш башҡарылған.

Бөгөн Өфөләге "Әр Рәхим" мәсете төҙөлөшө буйынса кәңәшмә үтте

Уны Республика Башлығы Радий Хәбиров уҙғарҙы. Башҡортостан мосолмандары Диниә Назараты рәйесе Айнур Бирғәлин белдереүенсә, сентябрь уртаһында тағы бер кәңәшмә көтөлә. Был ваҡытҡа мәсет бинаһының ниндәй хәлдә булыуы аныҡлана. Ошонан һуң проектлау документтары менән эш башлана. Тәүге фараздар буйынса киләһе йылдың яҙында төп төҙөлөш эштәре башланыуы көтөлә тине ул. Өфөлә "Әр Рәхим" мәсетенә 2007 йылда нигеҙ һалынды. Әммә финанс ҡатмарлыҡтар арҡаһында төҙөлөш тамамланманы.