Башҡортостан халҡының үҙ эшен башлау өсөн 350 мең һум алыу мөмкинлеге бар

Субсидия социаль контракт нигеҙендә адреслы ярҙам программаһы буйынса бирелә. Эшҡыуарлыҡ һәм туризм министрлығынан хәбәр итеүҙәренсә, был түләү халыҡты эш менән тәьмин итеү үҙәктәрендә теркәлгәндәр өсөн тәғәйенләнә. Программа шарттарына ярашлы, бизнес-проект, финансты тотоноу планы булырға тейеш. Быйыл республика эшҡыуарҙарға 2 миллиард һумдан ашыу ярҙам бүленде.

Киләһе йыл республикала 3 мәғариф кластеры барлыҡҡа киләсәк

Махсус үҙәктәр ойоштороу күләме буйынса Башҡортостан илдә алдынғылыҡты биләй. Төрлө ведомство-ойошмалар менән тығыҙ бәйләнеш булдырған уҡыу йорттары араһында Өфө радиоэлектроника, телекоммуникациялар һәм хәүефһеҙлек колледжы ла бар. Белем көнө менән студенттарҙы бөгөн Радий Хәбиров тәбрикләне.

Белем көнө уңайынан Республика мәктәптәрендә тантаналы линейкалар үтте

Республикала 7 мең ярым уҡыусы яңы уҡыу йылын заманса полилингваль мәктәптә ҡаршыланы. Улар Учалы, Сибай ҡалалары, Аҡьяр һәм Мишкә ауылдарында эшләй башланы. Бөгөн беренсе класс уҡыусылары ғына тәүге тапҡыр парта артына ултырмай, баш ҡала гимназияларына уҡырға ингән малай-ҡыҙҙар өсөн дә яңы осор башланды. Өфөләге Ғәзиз Әлмөхәмәтов исемендәге республика гиманзия-интернаты быйыл 100 уҡыусыға артҡан. Республика мәктәптәрендә үткән байрам линейкалары тураһында репортаж.

Өфөлә 1 сентябрь уңайынан йәштәр өсөн диско-тамаша ойошторолдо

Өфө-аренала «Студент яҙы» фестивалендә еңеүсе ижади коллективтар һәм һәүәҫкәр артистар иң яҡшы концерт номерҙары менән сығыш яһаны. Йәштәрҙе белем көнө менән Башҡортостан Башлығы Радий Хәбиров тәбрикләне.

Башҡортостан мәктәптәрендә Белем көнөндә яңы стоматология кабинеттары асылды

Сәләмәтлек нигеҙе - һау тештәрҙә. Башҡортостан Башлығы Радий Хәбиров тәҡдиме менән республика мәктәптәрендә «Ҡанатлан» проекты сиктәрендә «Сәләмәт йылмайыу» модуле тормошҡа ашырыла. Республикала был программа старт алыу менән 206 стоматология кабинеты эшләй башлаған. Өфө районы Зубов ауылы «Белем» үҙәгендә лә теш дауалау кабинеты асылды.

Башҡортостанда быйыл милли проект буйынса 50 автобус һатып алына

Транспорт һәм юл хужалығы министрлығынан белдереүҙәренсә, пассажирҙар ташыуҙы ойоштороу өсөн федераль аҡса бүленгән. “Хәүефһеҙ сифатлы юлдар” милли проектына ярашлы йәмәғәт транспорты ҡайтарыла. Бынан тыш, Милли муллыҡ фонды иҫәбенә алдағы ике йылда 190 автобус тапшырыла. Махсус казначейлык кредитына тағы 250 берәмек транспорт һатып алына.

Республикала быйыл 8 айҙа 3 мең 700-ҙән ашыу кеше шифаханаларҙа дәүләт иҫәбенә һаулығын нығытҡан

Рәсәй социаль фонды төбәк идаралығынан хәбәр итеүҙәренсә, Башҡортостан шифаханалары, шулай уҡ Краснодар һәм Ставрополь крайҙары, Ҡабарҙы-Балҡар республикаһы санаторийҙарына юлламалар тапшырылған. Социаль хеҙмәттәр менән файҙаланғандар шифаханала бушлай һаулығын нығыта ала. Бының өсөн 1 октябргә тиклем ғариза бирергә кәрәк.

Евразия фәнни-мәғариф үҙәге студент ҡаласығында һауа торошо тикшерелә

Өфө дәүләт нефть техник университетында климат һәм тирә-яҡты күҙәтеү лабораторияһы эшләй. Тиҙҙән ул Евразия фәнни-мәғариф үҙәгендә урынлашасаҡ. Белгестәр карбон полигонына бәйле тикшеренеүҙәр үткәрә. Рәсәй Президенты указына ярашлы һауаны бысратыуҙы өйрәнгән биләмә беҙҙең республикала былтыр булдырылды. Студенттар пилотһыҙ авиация һәм йыһан күҙәтеүҙәре, шулай уҡ ерҙәге фәнни ҡорамалдар буйынса һауала углерод кимәлен баһалай. Бындай мәғлүмәт сәнәғәт ойошмалары, ауыл хужалығы һәм башҡа тармаҡтар өсөн кәрәк.

Бөгөн һәм иртәгә баш ҡалала үҙәк урамдар ябыла

Сикләүҙәр Өфө халыҡ-ара марафонын уҙғарыуға бәйле индерелә. Бөгөн көндөҙгө сәғәт 12-нән Зәки Вәлиди урамының Карл Маркстан Совет урамына тиклемге өлөшөнә транспорт менән үтеп булмай. Был арауыҡ иртәгә төнгө 11-ҙән һуң асыла. 3 сентябрҙә иртәнге сәғәт 7-нән 15 сәғәт 30 минутҡа тиклем Зәки Вәлиди, Мәжит Ғафури, Пушкин, Карл Маркс, Ленин, Революция, Мостай Кәрим, Достоевский, Крупская, Киров, Коммунистик һәм Театр урамдары өлөшләтә ябыла. 5-се һәм 16-сы трамвайҙар йөрөмәй.

Махсус хәрби операцияла ҡатнашыусылар һәм уларҙың ғаиләләренә ярҙам саралары арттырылды

Радий Хәбиров ҡул ҡуйған документ менән рәсми мәғлүмәттәр порталында танышырға мөмкин. 37 ярҙам сараһы ҡаралған. Хәрбиҙәр һәм уларҙың яҡындарына газ үткәреү, кредит түләү, мәктәптәрҙә ашатыу, баланы баҡсаға урынлаштырыу, психологик ярҙам, шифаханала ял итеү, балаға белем биреү, транспорт һалымын түләү буйынса төрлө ташлама бар.

Өфөнөң Совет майҙанында почетлы ҡарауыл сафҡа баҫты

Рәсәй Геройы Миңлеғәле Шайморатов һәм Бөйөк Ватан һуғышы йылдарында башын һалған яҡташтарыбыҙ иҫтәлегенә ҡуйылған мемориалда тәүге хәтер вахтаһы киске сәғәт етелә башланды. Бынан һуң, ҡарауыл һәр шәмбе үтәсәк, тип көтөлә.

Төҙөкләндерелгәндән һуң Башҡорт дәүләт ҡурсаҡ театры 2 ярым тапҡырға киңәйә

Төҙөкләндерелгәндән һуң Башҡорт дәүләт ҡурсаҡ театры 2 ярым тапҡырға киңәйә, йәғни 6 мең ярым квадрат метр самаһы майҙанды биләй. Тамашасылар өсөн урындар һаны арттырыла. Улар 300-ҙән 435-кә еткерелә. Был турала Башҡортостан Башлығы социаль селтәрҙәге сәхифәләрендә яҙып сыҡты. Әле унда төҙөлөш эштәре йылдам бара. Мәҙәниәт усағының төкөтмәһе күтәрелә.

Бөгөн Башҡортостанда Һөт иле фестивале үтте

Байрамға ҡушыл! Бөгөн Башҡортостанда Һөт иле фестивале үтте, унда республиканың район-ҡалаларынан ғына түгел, Рәсәйҙең иң алыҫ төбәктәренән дә ҡунаҡтар йыйылды. Хужалыҡтар байрамға килеүселәрҙе һөт ризыҡтары менән һыйланы, шулай уҡ урында ойошторолған йәрминкәлә республикала етешетерлгән аҙыҡ-түлек тауарҙарҙы һатылды.

Башҡортостандан махсус хәрби операция биләмәһенә мобилизацияланыусылар төркөмө юлланды

Ике аҙна ялдан һуң, алғы һыҙыҡҡа. Башҡортостандан махсус хәрби операция биләмәһенә мобилизацияланыусылар төркөмө юлланды. Яугирҙарҙы «Өфө-Арена» майҙанынан оҙаттылар. Күптәр отпуск ваҡытын ғаиләһе менән үткәрергә тырышҡан.

Башҡортостанда «Үҫеш биләмәһе» проектының яңы миҙгеле башланды

Мәктәп йәштәрен гражданлыҡ-патриотик тәрбиләүгә йүнәлтелгән»Үҫеш биләмәһе 4.0»мәғариф проекты республикала 2019 йылдан алып йыл һайын үткәрелеп килә. Яңы миҙгел Рәсәй Геройы Максим Серафимов исемендәге «Патриот» паркында асылды. Унда республика район һәм ҡалаларынан 140 уҡыусы осрашты. Мәғариф проекты «Һанлы хәрәкәт-йәштәргә яңы мөмкинлектәр»тигән билдә менән 2-4 сентябргә тиклем үткәрелә.

Әлшәй районы үҙәгендә быйыл төҙөлгән белем усағы тәүге уҡыусыларын ҡабул итте

Яңы уҡыу йылында яңы мәктәптә. Әлшәй районы үҙәгендә быйыл төҙөлгән белем усағы тәүге уҡыусыларын ҡабул итте. Бынан тыш Түбәнге Әүрез ауылында ла ремонттан һуң мәғариф учреждениеһы файҙаланыуға тапшырылды. Тулыраҡ киләһе яҙмала.

Бөгөн баш ҡалала халыҡ-ара марафон уҙа

Спорт байрамында ете меңгә яҡын йүгерергә яратыусы, скандинав йөрөшө, роллер спорты менән мауығыусылар ҡатнаша.Ике, биш, 10, 21.1, 42.2 километр арауыҡта үҙ көсөн һынағандарҙы иҫтәлекле бүләктәр, иң етеҙҙәрҙе шәп приздар көтә. Марафонға бәйле, иртәнге сәғәт 7-нән 15 сәғәт 30 минутҡа тиклем Зәки Вәлиди, Мәжит Ғафури, Пушкин, Карл Маркс, Ленин, Революция, Мостай Кәрим, Достоевский, Крупская, Киров, Коммунистик һәм Театр урамдары өлөшләтә ябыла. 5-се һәм 16-сы трамвайҙар йөрөшө туҡтатыла.

Башҡорт дәүләт ҡурсаҡ театры декабрҙә хәйриә тамашаһы менән асыла

Республика Башлығы Радий Хәбиров төҙөкләндереү барышы менән танышты. Реконструкция “Мәҙәниәт” милли проектына ярашлы алып барыла. Яңыртылған театрҙа 300 урынлыҡ ҙур тамаша залы була. Бында өс ҡатламлы сәхнә урынлаштырыла. Спектаклдәрҙе төрлө бейеклектә күрһәтергә мөмкинлек тыуа. Беренсе ҡатта бәләкәй тамаша залы, кафе, икенсе ҡатта ҡурсаҡтар музейы һәм интерактив уйын бүлмәһе асыла. Үҙгәртеп ҡороуҙан һуң бинаның майҙаны ике тапҡырға арта.

Башҡортостанда күсемһеҙ милекте теркәү өсөн һәр икенсе ғариза электрон тәртиптә ҡабул ителә

Республика буйынса Росреестр идаралығынан хәбәр итеүҙәренсә, быйыл 7 айҙа 252 меңдән ашыу документ интернет аша ебәрелгән. Был күрһәткес йылдан-йыл арта бара. “Дәүләт хеҙмәттәре” порталы һәм Росреестр сайтында электрон ғариза юлларға мөмкин. Бынан тыш, идаралыҡтың рәсми порталында белгестәрҙән бушлай онлайн консультация алырға була.

Башҡортостан Башлығы Радий Хәбиров “Үҫеш биләмәһе 4.0” республика балалар форумында ҡатнашты

Сара ошо көндәрҙә Рәсәй Геройы Максим Серафимов исемендәге “Патриот” хәрби-илһөйәрлек паркында уҙа. Унда 13-18 йәшлек 140 егет һәм ҡыҙ сығыш яһай. Радий Хәбиров балалар менән аралашты, уларҙың һорауҙарына яуап бирҙе. Форум барышында үҫмерҙәр социаль башланғыстарын тәҡдим итте. Сибай ҡалаһынан мәктәп уҡыусылары махсус хәрби операцияла ҡатнашҡан ғаиләләргә ярҙам итеү проекты менән таныштырҙы. Ул беренсе урын алды. Еңеүселәрҙе форум авторы һәм “Бәхет биләмәһе” хәйриә фонды попечителлек советы рәйесе Каринэ Хәбирова бүләкләне.

Благовещен районында ҙур логистик үҙәк төҙөлөшө дауам итә

Республика Хөкүмәтенән хәбәр итеүҙәренсә, биләмәлә бәләкәй бизнес кластеры ойошторола. “Озон” компанияһы келәттәре һәм тауарҙарҙы таратыу урынын төҙөү өсөн 6 миллиард һум инвестиция йәлеп ителде. Быйыл 1 августа Республика Башлығы Радий Хәбиров ҡатнашлығында буласаҡ логистик комплексҡа нигеҙ ташы һалынды. Үҙәк 2025 йылда файҙаланыуға тапшырылырға тейеш. Бәләкәй эшҡыуарҙар маркетплейс ярҙамында комплекс аша тауарҙарын һата аласаҡ.