Башҡортостан йылытыу миҙгеленә 96 процентҡа әҙер

Республикала йылытыу миҙлегенә әҙерлек өсөн 8 миллиард һумдан ашыу аҡса тотонолған. Был сумма былтырғы менән сағыштырғанда 30 процентҡа күберәк. Торлаҡ-коммуналь хужалыҡ министры вазифаһын башҡарыусы Ирина Голованова белдереүенсә, 10 сентябргә йылытыу системаларына таҙартылған һыу тултырылырға тейеш. Район һәм ҡалалар 15 сентябргә тиклем йылытыу миҙгеленә әҙерлек тураһында паспорттар күрһәтергә бурыслы.

Башҡортостан автобустарҙа йөрөү буйынса илдә дүртенсе урынды биләй

Бындай мәғлүмәтте Росстат килтерә. Былтыр республикала 258 миллион сәфәр ойошторолған. Был төбәктең бер нисә йыл дауамында алып барған етди хеҙмәт емеше. Был хаҡта Башҡортостан башлығы социаль селтәрҙәге сәхифәһендә яҙҙы. 2019 йылдан алып республикаға бәләкәй, урта һәм ҙур класлы 1 мең 80 автобус һатып алынған.
Быйыл тағы ла 32 яңы туристик автобус ҡайтарылған. Улар республика буйлап һәм башҡа төбәктәргә әүҙем йөрөй. Сочи, Анапа һәм Ялтаға автобус турҙарын асыу планлаштырыла. Уңайлы түләү системаһы төҙөлгән. «Алға» транспорт картаһы билетты ҡулаҡса менән түләгәнгә ҡарағанда арзаныраҡ һатып алырға мөмкинлек бирә. Әммә был транспорт реформаһының бер өлөшө генә. Башҡортостанда автобус менән йөрөүҙе тағы ла уңайлыраҡ итеү өсөн үҫеш мөмкинлектәре ҙур, тип билдәләгән Радий Хәбиров.

Башҡорт дәүләт опера һәм балет театры «Садко» опера-былинаһын Мәскәү тамашасыһына тәҡдим итте

Башҡортостан артистары Мәскәү тамашасыһына премьера тәҡдим итте. Башҡорт дәүләт опера һәм балет театры «Садко» опера-былинаһын Ҙур театрҙың тарихи сәхнәһендә ҡуйҙы. Спектакль баш ҡалала тәүгә сығарылмай. Башҡортостан ижадсылары сәхнәләштереүен Мәскәү нисек ҡабул итте? Тулыраҡ видеояҙмала.

Рәсәйҙең финанс министрлығы Фәтхулла Исхаҡовҡа 32 миллион һумға яҡын аҡса түләргә бурыслы

Өфөнөң Ленин районы суды ошо турала ҡарар ҡабул итте. Баш ҡалала йәшәүсе ир 60 йыл элек өс кешене үлтереүҙә ғәйепләнеп, 13 йылға иркенән мәхрүм ителә. Төрмәнән сыҡҡас Фәтхулла Исхаҡов ярты быуаттан ашыу намыҫлы исемен тергеҙеү өсөн көрәшә. Пенсионер быға 2023 йылдың майында ғына өлгәшә. Рәсәй Юғары суды илдә тәүге тапҡыр күптәнге хөкөм ҡарарын ғәмәлдән сығара. Әхләҡи зыян 31 миллион 600 мең һум күләмендә билдәләнә.

Стәрлебаш районының 4 мәктәбе уҡыусылары белем көнөн заманса мәғариф учреждениеһында ҡаршы алды

Яңы уҡыу йылын - яңы мәктәптә. Стәрлебаш районының 4 мәктәбе уҡыусылары белем көнөн заманса мәғариф учреждениеһында ҡаршы алды. Стәрлебаш, Иҫке Ҡалҡаш, Айҙарале, Йәшергән ауылдарындағы объекттар «Мәғариф үҫеше» федераль программаһы сиктәрендә төҙөкләндерелгән. Белем усаҡтарын капиталь ремонтлауға 6 миллион һумдан ашыу аҡса йүнәлтелгән. Төҙөүселәр биналарҙы яңыртҡанда, педагогтар уҡыу программаһына үҙгәрештәр индергән. Сөнки заманса шарттар яңы мөмкинлектәр асҡан.

Башҡортостан Милли музейында уйынсыҡ донъяһына арналған күргәҙмә асылды

Өфөлә үтәсәк «Әйҙә, уйнарға!» беренсе Бөтә Рәсәй уйынсыҡтар фестивале сиктәрендә Башҡортостан Милли музейында уйынсыҡ донъяһына арналған күргәҙмә эшләй. Экспозицияла - совет осоро уйынсыҡтары. Шулай уҡ фестиваль көндәрендә Мәскәүҙән Вадим Вольфсон килтергән тарихи уйынсыҡтар күргәҙмәһен күрергә мөмкин.

Евразия ғилми-мәғариф үҙәгендә климат һәм тирә-яҡ мөхит мониторингы лабораторияһы эшләйәсәк

Өфө дәүләт нефть техник университетының климат һәм тирә-яҡ мөхит мониторингы лабораторияһы Евразия ғилми-мәғариф үҙәгенең вуз-ара кампусында эшләйәсәк. Тикшеренеү объекттарының береһе - карбонлы полигон. Урман, һаҙлыҡ, ауыл хужалығы биләмәләре - уникаль экосистемалы тәбиғи участкаларҙа заманса ҡорамалдар ярҙамында ташланған һәм һеңдерелгән парник газдары үлсәнә.

Өфөгә “Тыныс йоҡо, кескәйҙәр” тапшырыуы геройҙары килә

“Әйҙә уйнарға!” Бөтә Рәсәй уйын фестивалендә алып барыусы һәм актриса Оксана Федорова сығыш яһай. Уның менән бергә балаларҙың яратҡан геройҙары Хрюша, Каркуша, Филя һәм Степашка ла саҡырылған. Бөтә Рәсәй уйын фестивале бөгөндән 17 сентябргә тиклем Совет майҙанында ойошторола.Өфөгә “Тыныс йоҡо, кескәйҙәр” тапшырыуы геройҙары килә.

Башҡортостанда “Сәләмәт республика – сәләмәт төбәк” акцияһы барышында табиптар 318 ауылда булған

5 ай дауамында Өфөнән медицина белгестәре 149 меңдән ашыу кешене ҡабул иткән. 4 мең пациент артабан дауаланыу өсөн йүнәлтмә алған. “Сәләмәт республика – сәләмәт төбәк” акцияһы был аҙнала тамамлана.

Башҡорт телен үҫтереү буйынса гранттар конкурсында һәр кем ҡатнаша ала

Быйылдан шундай үҙгәреш көсөнә инде. Проект авторы 50 мең һумдан 200 меңгәсә грант юллай ала. Заявкалар 30 сентябргә тиклем ҡабул ителә. Башҡорт телен үҫтереү һәм һаҡлау фонды етәксеһе Гөлназ Йосопова әйтеүенсә, сараларҙы йыл дауамында тормошҡа ашырырға мөмкин.

Контракт буйынса хәрби хеҙмәткә яҙылыу дауам итә

60 йәшкә тиклемге ир-егеттәр Ҡораллы көстәр сафына баҫа ала. Бының өсөн урындағы хәрби комиссариатҡа мөрәжәғәт итергә һәм медицина тикшереүе үтергә кәрәк. Килешеүгә ҡул ҡуйғандарға кредит каникулы бирелә. Уларҙың эш урыны һаҡлана. Махсус хәрби операцияла ҡатнашыусыларға хәрби хәрәкәттәр ветераны статусы бирелә. Яугирҙәрҙең ғаиләләренә лә льготалар ҡаралған.

Өфөлә “Әйҙә уйнарға” фестивале үтә

4 көн дауамында Совет майҙанында Рәсәйҙә етештерелгән уйынсыҡтар күргәҙмәһе ойошторола. Конкурс, оҫталыҡ дәрестәре, спорт ярыштары уҙғарыла, асыҡ балалар студияһы эшләй. Байрамда “Непоседы”, “Домисолька»” балалар коллективтары, шулай уҡ Ваня Дмитриенко һәм Милана Хаметова сығыш яһай. “Союзмультфильм” геройҙары ҡатнашлығында флешмоб үтә. Өфөгә танылған алып барыусылар: Татьяна Веденеева, Антон Зорькин, Оксана Федорова килә. Сараның бөтә көндәрендә “Тәмле урам” исемле аш-һыу биләмәһендә тамаҡ ялғарға мөмкин. Фестиваль барышында пленар сессия була. Унда илдә уйынсыҡ индустрияһы үҫеше мәсьәләләре ҡарала.

Былтыр Башҡортостан халҡы автобустарҙа 258 миллион тапҡыр йөрөгән

Был илдәге 4-се күрһәткес. Республика етәксеһе Радий Хәбиров Рәсәй дәүләт статистика хеҙмәте мәғлүмәттәренә һылтанып, ошо турала телеграм-каналда хәбәр иткән. “Юғары күрһәткестәр транспорт реформаһы һөҙөмтәһе. 2019 йылдан башлап 1 меңдән ашыу автобус алынды. Төрлө финанс сығанаҡтар ҡулланыла, шулай уҡ федераль аҡсалар йәлеп ителә. Шәхси компаниялар ҙа автопаркын яңырта. Экологияны һаҡлауға ла ҙур иғтибар бирергә тырышабыҙ. Алынған күп автобустар газ мотор яғыулығында йөрөй”, - тип билдәләгән республика етәксеһе. Быйыл яңы 32 турист автобусы алынған. Сочи, Анапа һәм Ялтаға автовбус турҙары асыу ниәте бар. “Уңайлы иҫәпләшеү системаһы булдырылды. “Алға” транспорт картаһы буйынса билет арзанғараҡ төшә. “Бәхетле сәғәт” акцияһы Өфөлә бер билет буйынса бер нисә тапҡыр йөрөү мөмкинлеге бирә. Үҫеш нөктәләрен күрәбеҙ. Автобуста йөрөү уңайлы һәм популяр булһын өсөн бөтә мөмкинлектәрҙе ҡулланырға тырышабыҙ”, - тигән Радий Хәбиров.

Өфөлә Зинин ауылы янындағы юл үткәргес ноябрь аҙағына тиклем асыла

Был турала бөгөн ҡала хакимиәтендә белдерелде. Төҙөлөш барышында етешһеҙлектәр асыҡланды, әле күперҙе Мәскәү эксперттары тикшерә. Һөҙөмтәләр ошо аҙнала иғлан ителә. Ниндәй ҡарар булһа ла, етешһеҙлекте бөтөрөү өсөн иң күбе ике ай кәрәк була, тине Юл төҙөлөшө һәм ремонт идаралығы етәксеһе Константин Паппе. Зинин күперен сентябрь башында файҙаланыуға тапшырыу планлаштырылғайны.

Башҡортостан һәм Беларусь араһында сауҙа киңәйә

Быйыл ярты йылда тауар әйләнеше 14,8 процентҡа артҡан. Тышҡы иҡтисади бәйләнештәр һәм конгресс эшмәкәрлеге министры Маргарита Болычева белдереүенсә, сауҙаның ҙур өлөшө импортҡа тура килә. Башҡортостан Белоруссиянан башлыса машиналар етештереү продукцияһын ала. Беҙҙең республиканан химия тауарҙары, аҙыҡ-түлек һәм сеймал оҙатыла.

Башҡортостан Башлығы Радий Хәбиров балаларҙы уйнарға саҡырҙы

Өфөнөң Совет майҙанында бөгөн «Әйҙә, уйнарға!» Бөтә Рәсәй уйындары фестивален тантаналы асыуҙа төбәк етәксеһе ҡатнашты. Дүрт көн дауамында бында Рәсәй уйынсыҡ етештереүселәренең күргәҙмә-сауҙаһы, уйынсыҡтарҙың тест-драйвы, оҫталыҡ дәрестәре, тематик конкурстар, спорт турнирҙары, квест-уйындар үтә.

Бөгөн Өфөлә "Әйҙә уйнарға" Бөтә Рәсәй фестивале башланды

Бөгөн Өфөлә "Әйҙә уйнарға" Бөтә Рәсәй фестивале башлды. Ул Совет майҙанында үтә. Сараны асыу тантанаһында Республика Башлығы Радий Хәбиров ҡатнашты. - Фестивалгә килгән балаларҙы сәләмләйем. Фестиваль - улар өсөн. Беҙ балалар уйынсыҡтары ниндәй булыуы тураһында ла уйланырға тейешбеҙ. Сифатлы, мауыҡтырғыс, аңлайышлы булыуы мөһим, - тине Радий Хәбиров. Республика Башлығы бер нисә майҙансыҡты ҡараны, уйынсыҡ етештереүселәр менән әңгәмәләште. Бөгөн халыҡ күп килде.
"Әйҙә уйнарға" фестивале 17 сентябргә тиклем дауам итә. Конкурс, оҫталыҡ дәрестәре, спорт ярыштары уҙғарыла, асыҡ балалар студияһы эшләй. Байрамда “Непоседы”, “Домисолька»” балалар коллективтары, шулай уҡ Ваня Дмитриенко һәм Милана Хаметова сығыш яһай. “Союзмультфильм” геройҙары ҡатнашлығында флешмоб үтә. Сараның бөтә көндәрендә лә “Тәмле урам” исемле аш-һыу биләмәһендә тамаҡ ялғарға мөмкин. Фестиваль барышында илдә уйынсыҡ индустрияһы үҫеше мәсьәләләре лә ҡарала.

Айбулат Хажин Мәғариф һәм фән министры вазифаһында 4 октябргә тиклем эшләй

Был турала мәғариф ведомствоһынан хәбәр итәләр. Ул парламентҡа депутат итеп һайланды. Шуға әлеге вәкәлләттәрен һалырға тейеш була. Ғәҙәттән тыш хәлдәр буйынса дәүләт комитеты рәйесе Фәрит Ғүмәров шулай уҡ депутат мандатын ала. Законға ярашлы депутат һәм чиновник эшен бер юлы башҡарырға ярамай, береһен һайларға кәрәк. Республика парламенты яңы составта тәүге ултырышҡа 5 октябрҙә йыйыла.

Геологтар Башҡортостанда ярыша

16 сентябрҙә Өфөлә “Геоһынау” тигән халыҡ-ара чемпионат башлана. Унда ил төбәктәрге, шулай уҡ Ҡаҙағстан, Беларусь һәм Үзбәкстандан студент командалары ҡатнаша. Йәштәр аҙна дауамында геология буйынса белемен күрһәтә. Беҙҙең республикала Өфө фән һәм технологиялар университеты, Өфө дәүләт нефть-техник университеты, шулай уҡ Октябрьский нефть колледжында геологтарҙы әҙерләйҙәр. Нефть-техник университет проректоры Александр Могучев белдереүенсә, геолог студенттар ярышы белем биреү системаһы өсөн яңы мөмкинлектәр асырға тейеш.

Өфөлә «Әйҙә, уйнарға!» Бөтә Рәсәй уйындары фестивале үтә

Башҡортостан Башлығы Радий Хәбиров балаларҙы уйнарға саҡырҙы. Өфөнөң Совет майҙанында бөгөн «Әйҙә, уйнарға!» Бөтә Рәсәй уйындары фестивален тантаналы асыуҙа төбәк етәксеһе ҡатнашты. Форумға Рәсәй төбәктәренән һәм Ирандан ҡунаҡтар ҙа килгән.

Радий Хәбиров Мария Львова-Белова менән осрашты

Мөмкинлектәре сикләнгән балаларға күберәк ярҙам күрһәтеү өсөн, «Содействие» хәйриә фонды ҡеүәтен нығытыу мөһим. Был мәсьәлә буйынса Башҡортостан башлығы Рәсәй Президенты ҡарамағындағы Бала хоҡуҡтары буйынса вәкил Мария Львова-Белова менән фекер алышты. Осрашыу Республика йортонда уҙҙы. Әңгәмә барышында «Рәсәй үҫмерҙәре» федераль стратегия программаһы сиктәрендә Өфөлә асылған «Тап шул урын» үҫмерҙәр клубын өҫтәмә финанслау юлдары ла ҡаралды. Мария Львова-Белова Башҡортостанда Әсәлек һәм балалыҡты яҡлау буйынса башҡарылған дәүләт сәйәсәтен юғары баһаланы.