Бөгөн Өфөлә "Әйҙә уйнарға" Бөтә Рәсәй фестивале башланды

Бөгөн Өфөлә "Әйҙә уйнарға" Бөтә Рәсәй фестивале башлды. Ул Совет майҙанында үтә. Сараны асыу тантанаһында Республика Башлығы Радий Хәбиров ҡатнашты. - Фестивалгә килгән балаларҙы сәләмләйем. Фестиваль - улар өсөн. Беҙ балалар уйынсыҡтары ниндәй булыуы тураһында ла уйланырға тейешбеҙ. Сифатлы, мауыҡтырғыс, аңлайышлы булыуы мөһим, - тине Радий Хәбиров. Республика Башлығы бер нисә майҙансыҡты ҡараны, уйынсыҡ етештереүселәр менән әңгәмәләште. Бөгөн халыҡ күп килде.
"Әйҙә уйнарға" фестивале 17 сентябргә тиклем дауам итә. Конкурс, оҫталыҡ дәрестәре, спорт ярыштары уҙғарыла, асыҡ балалар студияһы эшләй. Байрамда “Непоседы”, “Домисолька»” балалар коллективтары, шулай уҡ Ваня Дмитриенко һәм Милана Хаметова сығыш яһай. “Союзмультфильм” геройҙары ҡатнашлығында флешмоб үтә. Сараның бөтә көндәрендә лә “Тәмле урам” исемле аш-һыу биләмәһендә тамаҡ ялғарға мөмкин. Фестиваль барышында илдә уйынсыҡ индустрияһы үҫеше мәсьәләләре лә ҡарала.

Айбулат Хажин Мәғариф һәм фән министры вазифаһында 4 октябргә тиклем эшләй

Был турала мәғариф ведомствоһынан хәбәр итәләр. Ул парламентҡа депутат итеп һайланды. Шуға әлеге вәкәлләттәрен һалырға тейеш була. Ғәҙәттән тыш хәлдәр буйынса дәүләт комитеты рәйесе Фәрит Ғүмәров шулай уҡ депутат мандатын ала. Законға ярашлы депутат һәм чиновник эшен бер юлы башҡарырға ярамай, береһен һайларға кәрәк. Республика парламенты яңы составта тәүге ултырышҡа 5 октябрҙә йыйыла.

Геологтар Башҡортостанда ярыша

16 сентябрҙә Өфөлә “Геоһынау” тигән халыҡ-ара чемпионат башлана. Унда ил төбәктәрге, шулай уҡ Ҡаҙағстан, Беларусь һәм Үзбәкстандан студент командалары ҡатнаша. Йәштәр аҙна дауамында геология буйынса белемен күрһәтә. Беҙҙең республикала Өфө фән һәм технологиялар университеты, Өфө дәүләт нефть-техник университеты, шулай уҡ Октябрьский нефть колледжында геологтарҙы әҙерләйҙәр. Нефть-техник университет проректоры Александр Могучев белдереүенсә, геолог студенттар ярышы белем биреү системаһы өсөн яңы мөмкинлектәр асырға тейеш.

Өфөлә «Әйҙә, уйнарға!» Бөтә Рәсәй уйындары фестивале үтә

Башҡортостан Башлығы Радий Хәбиров балаларҙы уйнарға саҡырҙы. Өфөнөң Совет майҙанында бөгөн «Әйҙә, уйнарға!» Бөтә Рәсәй уйындары фестивален тантаналы асыуҙа төбәк етәксеһе ҡатнашты. Форумға Рәсәй төбәктәренән һәм Ирандан ҡунаҡтар ҙа килгән.

Радий Хәбиров Мария Львова-Белова менән осрашты

Мөмкинлектәре сикләнгән балаларға күберәк ярҙам күрһәтеү өсөн, «Содействие» хәйриә фонды ҡеүәтен нығытыу мөһим. Был мәсьәлә буйынса Башҡортостан башлығы Рәсәй Президенты ҡарамағындағы Бала хоҡуҡтары буйынса вәкил Мария Львова-Белова менән фекер алышты. Осрашыу Республика йортонда уҙҙы. Әңгәмә барышында «Рәсәй үҫмерҙәре» федераль стратегия программаһы сиктәрендә Өфөлә асылған «Тап шул урын» үҫмерҙәр клубын өҫтәмә финанслау юлдары ла ҡаралды. Мария Львова-Белова Башҡортостанда Әсәлек һәм балалыҡты яҡлау буйынса башҡарылған дәүләт сәйәсәтен юғары баһаланы.

Салауат Юлаев исемендәге икенсе батальонды туплау тамамлана

Әлегә шәхси состав 85 процентҡа әҙер. Подразделениеға 55 йәшкә тиклемге яугирҙар һәм 60 йәшкә тиклемге офицерҙар ҡабул ителә. Батальонға яҙылырға теләүселәр күп, әммә ир-егеттәрҙең бөтәһе лә тейешле талаптарға яуап бирмәй. Комиссия физик һәм психологик яҡтан көслөләрҙе генә һайлап ала. Улар ай ярымдан ашыу Росгвардия частарендә етди күнекмәләр үтә. Батальонға эләгеү өсөн Өфөләге штабҡа йәки республика буйынса филиалдарға мөрәжәғәт итергә кәрәк.

Баймаҡ районы халҡы махсус хәрби операцияла ҡатнашҡан яҡташтарына сираттағы гуманитар ылау әҙерләй

Берҙәмлектә -көс. Дамир Муллағилдин - махсус хәрби операцияла ҡатнашыусы яҡташтар менән яҡын туғандарҙай. Ул тәүҙә шәхси техникаһында хәрби зонаға райондан төҙөлөш эшселәре алып бара, аҙаҡ егеттәрҙең һорауы буйынса, уларҙы ҡыҫҡа ваҡытлы ялға алып ҡайтыу һәм кире алып барыу бурысын үҙ өҫтөнә ала. Дамир һалдаттарға туғандары ебәргән посылкаларҙы ла бушлай илтеп ҡуя.

Башҡортостанда ирекле янғын һүндереү дружиналары көслөләрҙе асыҡланы

Янғын һүндереүселәр оҫталығын һынай. Ирекле янғын һүндереү дружиналары көслөләрҙе асыҡланы. Республика кимәлендәге сара Рәсәй Геройы Максим Серафимов исемендәге «Патриот» хәрби-патриотик паркында ойошторолдо.
Бөгөнгө бәйге етеҙҙәрҙе асыҡлау менән бер рәттән ирекмәнлекте популярлаштырырға, уға битараф булмаған граждандарҙың иғтибарын йәлеп итергә тейеш.

Өфөлә «Шаңдау» китабының исем туйы

Мәүлит Ямалетдиновтың шиғырҙары һәм поэмалары ингән йыйынтыҡты йәмәғәтселеккә сығарыуға шағирә Тамара Искәндәриә өлөш индергән. Китапты рәссам Азамат Ғарипов биҙәгән. Мәжит Ғафуриҙың йорт-музейында үткән кисәлә билдәле ҡәләм оҫталары, яҙыусының ҡыҙы, «Шоңҡар» йәш шағирҙар ойошмаһы вәкилдәре ҡатнашты.

Башҡортостан хужалыҡтары көнбағыш урыуға төштө

Кушнаренко, Миәкә һәм Стәрлебаш райондарында эштәр әүҙем бара, тип белдерәләр Ауыл хужалығы министрлығынан. Әле көнбағыш 600 гектар майҙанда һуғылған, гектарынан 10 центнер уңыш алына. Быйыл республикала был культура 288 мең гектар майҙанда ултыртылған. Көнбағыштан тыш, хужалыҡтар етен, гәрсис, соя һәм башҡа майлы культураларҙы урып йыя.

Өфөлә ҡайын, йүкә, миләш, сирень, барбарис ағастары арта

23 сентябрҙә баш ҡалала “Йәшел Башҡортостан” акцияһы уҙғарыла. Уның барышында 5 меңдән ашыу ағас һәм ҡыуаҡ ултыртыу ҡарала. 100-ҙән ашыу ихатала һәм 70-кә яҡын биләмәлә урындар әҙерләнгән. Өфө ҡала хакимиәте башлығы Ратмир Мәүлиев белдереүенсә, “Йәшел Башҡортостан” уның яратҡан акцияһы. Баш ҡаланың 450 йыллығына иһә 45 мең төп ағас һәм ҡыуаҡ ултыртыу ҡарала.

"Сәләмәтлек поезы" 150 меңенсе кешенең һаулығын тикшерҙе

Һаулыҡ һаҡлау министры Айрат Рәхмәтуллин социаль селтәрҙә ошо турала хәбәр итә. Өфө районы Березовка ауылынан Юлия Шундееваға фитнес-беләҙек тапшырылды. Башҡортостанда сәләмәтлек акцияһы быйыл да дауам итте. Уға ярашлы, квалификациялы табиптар төрлө ауылдарҙа булып халыҡ сәләмәтлеген тикшерә. Быйылғы акция ошо аҙнала тамамлана.

Башҡортостанда сүп-сарҙы сорттарға бүлеү комплексы төҙөлә

Ул Бәләбәйҙә урынлаша, объект киләһе йылда файҙаланыуға тапшырылырға тейеш. Тәбиғәттән файҙаланыу һәм экология министрлығынан белдереүҙәренсә, бында эш урындары булдырыла. Комплекста йыл һайын 100 мең тонна ҡалдыҡ эшкәртелә.

Өфөлә һыу инеү миҙгеленә йомғаҡ яһалды

Ҡала хакимиәтенән хәбәр итеүҙәренсә, быйыл рәсми пляждарҙа 250 меңдән ашыу кеше булған. Был уҙған йылдағынан 30 меңгә күберәк. Йәйге айҙарҙа 12 кеше батып үлгән. Улар рөхсәт ителмәгән урындарҙа һыу ингән. Рәсми урындарҙа ҡотҡарыусылар батып барған 44 кешене сығарған, шул иҫәптән биш бала ҡотҡарылған.

Башҡортостанда уҡыусылар өсөн этнографик уйын ойошторола

Ул онлайн һәм офлайн форматта үтә. Маҡсаты балаларға мәҙәниәт, тарих һәм тыуған ил тураһында белем биреүгә йүнәлтелгән. Уйында 4 меңдән ашыу уҡыусы ҡатнашыуы көтөлә. Этнографик уйында республика мәктәптәренән 7 -се - 10-сы класс уҡыусылары көс һынаша. Улар араһында 40 еңеүсе билдәләнә. Һәләтле балалар өсөн Мәскәүгә сәфәр ойошторола.

Көйөргәҙе районында Кинйә Арыҫлановтың тыуыуына 300 йыл тулыуға арналған йыйын уҙғарылды

Көйөргәҙе районы Кинйә-абыҙ ауылында 1773-1775 йылдарҙағы крәҫтиәндәр һуғышында Емельян Пугачевтың арҡаҙашы, башҡорт старшинаһы, хәрби етәксе Кинйә Арыҫлановтың тыуыуына 300 йыл тулыуға арналған йыйын уҙғарылды. Тантаналы сарала Башҡортостан башлығы Радий Хәбиров ҡатнашты. Рәсми ҡунаҡтар Кинйә Арыҫланов ерләнгән тип фаразланған урында булды. Урындағы музей эшмәкәрлеге менән танышты. «Кинйә йыйыны» республика фестиваленән киләһе репортаж

«Берҙәм Рәсәй» партияһының Башҡортостан төбәк бүлексәһе конференцияһы үтте

Сарала сәйәси фирҡәнән Дәүләт Йыйылышы-Ҡоролтайға рәйес һайланды. Күпселек тауыш менән был вазифаға ошоға тиклем Башҡортостан Парламенты рәйесе булып эшләгән Константин Толкачев үтте. Шулай уҡ делегаттар партия исемлеге буйынса һайланған депуттарҙы раҫланы. Конференцияла ҡатнашыусылар алдында Республика башлығы, төбәк бүлексәһе секретары Радий Хәбиров сығыш яһаны. Ул «Берҙәм Рәсәй» фирҡәһе ағзаларын һайлауҙа ышаныслы еңеүҙәре менән ҡотланы һәм тауыш биреү һөҙөмәтәләрен йомғаҡлап үтте.

Дыуан районы махсус хәрби операция биләмәһенә гуманитар ярҙам әҙерләгән

Дыуан районы махсус хәрби операция биләмәһенә ебәреү өсөн ауыр тоннажлы алты фурала гуманитар ярҙам әҙерләгән. Яугирҙарға яҡындарынан посылкалар, хеҙмәт ҡоралдары, аҙыҡ-түлек, медицина кәрәк-яраҡтары оҙатыла. «Башҡортостан» полкы хәрбиҙәренә иһә «Уаз»иктар һәм «Нива» автомобилдәре тапшырыласаҡ.

Башҡортостанда элиталы Ҡораллы көстәр сафы - һауа-десант ғәскәрҙәренең махсус танк батальонына ҡабул итеү ойошторола башланы

Ирекле батальон составында хеҙмәт итергә теләгән ир-егеттәргә 117 телефон һандарына, Хәрби комиссариатҡа йәки ирекле батальондар штабына мөрәжәғәт итергә кәрәк. Килешеүҙе 65 йәшкәсә тиклем граждандар төҙөй ала. Хәрби контракт кәмендә 6 айға төҙөлә. Танк батальонына быға тиклем хәрби хеҙмәт үтмәгән ир-аттар ҙа ҡабул ителә.

Башҡортостанда Бөтә Рәсәй уйын фестиваленең икенсе көнө тамамланды

Өфө - бала саҡ илендә. Башҡортостанда Бөтә Рәсәй уйын фестиваленең икенсе көнө тамамланды. Бөгөн дә күләмле форум баш ҡала халҡын һәм ҡунаҡтарын хайран ҡалдырҙы. Теләге булған һәр кем сараларҙа ҡатнашып, күңеленә яҡын уйынсыҡтарҙы һайлап алды. Эксперттар ролендә балалар үҙҙәре сығыш яһаны.

Ауыл фельдшерҙарын автомобиль йөрөтөргә өйрәтеү мөмкинлектәре ҡарала

Буласаҡ медицина хеҙмәткәрҙәре өсөн водитель курстары уҙғарыу тураһында илдең һаулыҡ һаҡлау министры Михаил Мурашко белдерҙе. Ул Өфө медицина колледжы нигеҙендә урта кимәлдәге һөнәри белем биреү йорттары етәкселәре менән кәңәшмә уҙғарҙы. Башҡортостанда медицина кадрҙарын әҙерләү системаһы эшмәкәрлеге менән яҡындан танышты.