Радий Хәбиров эш сәфәре менән Балтас районында булды

Балтас районы Туҙлуба ауылында йәшәүселәр зәңгәр яғыулыҡ менән файҙалана башланы. Социаль газлаштырыу программаһы буйынса бөгөнгә дүрт тиҫтәнән ашыу йорт газға тоташтырылған. Урындағы халыҡтың оло шатлығын уртаҡлашырға Башҡортостан башлығы килде. Эш сәфәре барышында Радий Хәбиров шулай уҡ төбәктең агросәнәғәт комплексы өсөн белгестәр әҙерләүсе уҡыу йорто менән танышты.

Радий Хәбиров Балтас районында МХО-ла һәләк булған яугирҙарҙың ғаиләләре менән осрашты

Балтасҡа эш сәфәре барышында Радий Хәбиров район үҙәгендә яңы төҙөлгән Хәрби һәм хеҙмәт даны аллеяһында булды. Ул «Атайсал» программаһы сиктәрендә Балтас районында тыуып әле Ижевск ҡалаһында йәшәгән Фларид Фәйрушиндың финанс ярҙамы менән төҙөлгән. Бында махсус хәрби операцияла һәләк булған яугирҙар иҫтәлеге мәңгеләштерелеп, райондың күп кенә хөрмәтле кешеләре тураһында мәғлүмәттәр бирелгән. Радий Хәбиров мәхрүм булған балтастарҙы иҫкә алды һәм обелискка сәскә һалды. Башҡортостан башлығы шулай уҡ махсус хәрби операцияла һәләк булған Тимур Нухов, Зөфәр Вахиев, Денис Пихтовников, Фидан Йосопов һәм Айрат Фазлетдиновтың ғаиләләре менән осрашты.

Стәрлетамаҡ районы Оло Ҡуғанаҡ ауылында күп функциялы спорт майҙансығы сафҡа инде

Яңы объект урындағы предприятиеның финанс ярҙамы менән «Ал елкәндәр» ғаилә тәрбиәһенә булышлыҡ итеү үҙәге биләмәһендә төҙөлгән.

Шаран районы Түбәнге Зәйет ауылы халҡы ҡабаҡ байрамы ойошторҙо

Көҙгө муллыҡ байрамына ауылда йәшәгән һәр ғаилә үҙ өлөшөн индерҙе. «Айыҡ ауыл» республика конкурсында ҡатнашҡан ауыл байрамын БЮТ ижади төркөмө лә күҙәтте.

Өфөлә быйыл йәйәүлеләр ҡатнашлығында 297 авария булған

Уларҙа 300-ҙән ашыу кеше йәрәхәт алған. 4 йәйәүленең ғүмере өҙөлгән. Был турала Республика автоинспекцияһынан хәбәр итәләр. Өфөлә йәйәүлеләр араһында аварияла үлеүселәр һаны 73 процентҡа кәмегән. Юл-транспорт ваҡиғаларының күбеһе Магистраль, Ленин, Баязит Бикбай, Менделеев урамдарында теркәлгән, тигән мәғлүмәттәр бирә ведомство. Рәсәйҙә юл хәрәкәте хәүефһеҙлеге аҙналығы башланды.

Нуриман районында балыҡ биатлоны уҙғарыла

Үҙенсәлекле ярыш ошо шәмбе Павловка һыуһаҡлағысы буйында ойошторола. Район хакимиәте башлығы кубогына турнирҙа һәр кем ҡатнаша ала. Биатлонсылар 1 километрлыҡ өс әйләнеш йүгереп үтергә һәм һәр туҡталышта ике балыҡ ҡармаҡларға тейеш.

"Берҙәм Рәсәй" партияһы Дәүләт Думаһының көҙгө сессияһында үҙенең эш йүнәлешен билдәләне

Закон проекттары парламент ҡарауына тапшырылған. Улар федераль бюджет, махсус хәрби операцияла ҡатнашыусыларға ярҙам, халыҡты эш менән тәьмин итеүгә ҡағылышлы. Фирҡәнең Башҡортостан бүлексәһе секретары Радий Хәбиров белдереүенсә, махсус хәрби операция йәмғиәтте берләштерҙе. - Донбасҡа 95 гумантиар ылау оҙаттыҡ. Эшҡыуарҙар, ирекмәндәр был эштә әүҙем ҡатнаша. Бынан тыш яуирҙәр һәм уларҙың ғаиләләре өсөн федераль һәм республика ярҙам системаһы булдырылған, - тине Радий Хәбиров.

Радий Хәбиров: "Улар илдең геологик сәйәсәтен алып барасаҡ"

Республика Башлығы Радий Хәбиров "ГеоҺынау" чемпионатында ҡатнашыусылар тураһында шулай тип белдерҙе. - Башҡортостанда бындай белгестәр ике университетта һәм Октябрьский нефть колледжында әҙерләнә. Геология факультетын тамамлаған белгес эшһеҙ ҡалғаны юҡ. Әле ҙур геологик тикшеренеүҙәр алып барыла. Беҙҙә конкурс, ярыш үтә, үҙенә күрә геологик берләшмә туплана. Ошо егеттәр һәм ҡыҙҙар егерме йылдан илдең геологик сәйәсәтен билдәләй, - тине Радий Хәбиров. "ГеоҺынау" Башҡортостанда үтә, уның еңеүселәре бөгөн асыҡлана.

Контракт буйынса хеҙмәткә яҙылыу дауам итә

60 йәшкә тиклемге ир-егеттәр Ҡораллы көстәр сафына баҫа ала. Бының өсөн урындағы хәрби комиссариатҡа мөрәжәғәт итергә һәм медицина тикшереүе үтергә кәрәк. Килешеүгә ҡул ҡуйғандарға кредит каникулы бирелә. Уларҙың эш урыны һаҡлана. Махсус хәрби операцияла ҡатнашыусыларға хәрби хәрәкәттәр ветераны статусы бирелә. Яугирҙәрҙең ғаиләләренә лә льготалар ҡаралған.

Республикала 23 сентябрҙә ағас ултыртыу буйынса берҙәм өмә үткәрелә

Торлаҡ-коммуналь хужалыҡ министрлығынан хәбәр итеүҙәренсә, “Йәшел Башҡортостан” акцияһы барышында 36 тематик аллея булдырыла. 7 мең төп эре ағас һәм 47 мең үҫенте ултыртыу ҡарала. “Ағас ултыртыу – яҡшы йола. Йәш быуынға өлгө күрһәтеү мөһим”, - тигән фекерҙә Өфө лимонарийы етәксеһе, танылған селекционер Фәриҙә Садыҡова.

Башҡортостанда һыу ҡыуыу башнялары һәм һыу селтәрҙәре ремонтлана

Программа 2021 йылдан тормошҡа ашырыла. Уның барышында ауылдарҙа һыу үткәреү системаһы тәртипкә килтерелә. Быйыл 45 һыу ҡыуыу башняһы һәм 25 километрҙа торбалар алмаштырыла. Бының өсөн 100 миллион һум тотонола. Быға тиклем ике йылда 100 һыу башняһы һәм 100 километрҙа һыу селтәре ремонтланды.

Башҡортостанда «Геоһынау» Халыҡ-ара чемпионаты дауам итә

Рәсәй төбәктәренән, Ҡаҙағстан Республикаһынан килгән буласаҡ геологтар аҙна дауамында ярыштарҙа көс һынаша. Һәләтле йәштәр менән Башҡортостан Башлығы Радий Хәбиров осрашты. «Геоһынау» чемпионаты киләһе йыл да Башҡортостанда ойоштороласаҡ тип килешелде.

Өфөлә сираттағы мобилизациаланыусылар төркөмө алға һыҙыҡҡа юлланды

Ике аҙна отпускынан һуң, махсус хәрби операция биләмәһенә. Өфөлә сираттағы мобилизациаланыусылар төркөмө алға һыҙыҡҡа юлланды. Алда уларҙы ике көнлөк юл көтә. Хәрбиҙәрҙе яу биләмәһенә тиклем алып барыу өсөн республика тарафынан транспорт бүленгән. Яугирҙарҙы «Өфө-арена» майҙанынан уларҙың яҡындары, дуҫтары оҙатты.

Башҡортостан «Әйҙә ҡушыл» Бөтә Рәсәй марафонында ҡатнаша

Елек мейеһе донорлығына арналған сара Улан-Удэ ҡалаһында башланып, Архангельскиҙа тамамланасаҡ. Марафонда Башҡортостандың Һаулыҡ һаҡлау министры Айрат Рәхмәтуллин да ҡатнашты. Ведомство етәксеһе Республика ҡан тапшырыу станцияһында ҡан биреп, елек мейеһе донорҙары исемлеген тулыландырҙы. Әйткәндәй, Айрат Рәхмәтуллин Башҡортостан һаулыҡ һаҡлау министрҙары араһында регистрға иң беренсе булып ингән. Үҙ миҫалында ул изге эшкә башҡаларҙы ла йәлеп итмәксе. Сөнки республикала һәм илдә елек мейеһе донорҙарына ихтыяж юғары.

«Ҡатын-ҡыҙҙың бәхет биләмәһе» асыҡ академияһы Ғафури районында

Гүзәл заттарҙың ҡоро был юлы Красноусол ауылындағы мәҙәниәт йортонда үтте. Сара төрлө быуын, милләт ҡатын-ҡыҙҙарын берләштерҙе.
Асыҡ академия фәһемле һәм мауыҡтырғыс майҙансыҡтарға бай булды. Гүзәл заттар матурлыҡ, зауыҡ серҙәре менән бүлеште, сәләмәтлеген тикшерҙе, үҙҙәрен борсоған һорауҙар буйынса белгестәр менән кәңәшләште. Биләмәлә махсус хәрби операцияла ҡатнашыусыларға ярҙам буйынса брифинг та ойошторолдо.

Башҡортостанда Дүртөйлө-Әшит юлы төҙөлөшө дауам итә

Ул М-12 федераль трассаһының бер өлөшө була. Уның аша Санкт-Петербургтан Владивостокка тиҙ йөрөшлө маршрут һуҙыла. Башҡортостан билмәһендә 56 күпер һәм юл айырсаһы төҙөлә. Әле 49 объектта эш бара, тип хәбәр итәләр Федераль юл агентлығынан. Магистралдең 140 километры Дүртөйлө, Борай, Тәтешле райондары аша үтә. Был - төҙөлөштөң беренсе этабы. Артабан, эштәр Пермь крайында һәм Свердловск өлкәһендә дауам итә.

Өфөнән махсус хәрби операция биләмәһенә сираттағы гуманитар конвой оҙатылды

Төҙөлөш ҡоралдары, квадрокоптерҙар һәм дронға ҡаршы хәрби брипастар. Өфөнән махсус хәрби операция биләмәһенә сираттағы гуманитар конвой оҙатылды. Ярҙам «Башҡортостан» мотоуҡсылар полкы хәрбиҙәренә тәғәйенләнгән. Составтағы 10 машинаға мейестәр, газ баллондары, тәгәрмәстәр һәм башҡа кәрәк-яраҡтар тупланған. Бынан тыш, республика меценаттары Башҡортостан яугирҙарына мунса, утын, еңел машина һәм броня менән ҡапланған техника ла ебәргән. Водителдәр белдереүенсә, яугирҙар төбәк етәкселегенә һәм халыҡҡа рәхмәт еткерә.

Башҡортостан Башлығы республикала Йәшмә бүлмәһе булдырылыуы хаҡында белдерҙе

Ул был турала “ГеоҺынау” халыҡ-ара чемпионаты барышында һөйләне. “Башҡортостанға килгән туристар ҡыҙыҡлы геология объекттары менән дә танышырға теләй. Беҙ йәшмә бүлмәһе тигән проект башланыҡ. Республика йәшмә ятҡылыҡтарына бай, был таштан әйберҙәр яһала. Гәрәбә бүлмәһе бөтә донъяға танылған. Беҙ ҙә уға оҡшатырға теләйбеҙ. Проектты киләһе йылда башлайбыҙ. Бүләмәләге мозаика картиналары йәшмәнән була. Евразия күсмә цивилизациялар музейында ла йәшмә күргәҙмәһе ойоштороу ниәте бар”, тине Радий Хәбиров.

Өфөлә Черниковка биҫтәһендә машиналар йөрөшө сикләнә

Ҡала хакимиәтенән хәбәр итеүҙәренсә, был "1 мең велосипедсы төнө" акцияһын менән бәйле. Бөгөн киске 9-ҙан бер тәүлеккә Машина төҙөүселәр майҙаны ябыла. Шулай уҡ иртәгә кисен велосипедсылар маршрутында хәрәкәт сикләнә. Машина төҙөүселәр, Ҡулса, Ульянов һәм Беренсе май урамдарының айырым өлөштәренән автомобилдә үтеп булмай. Шулай уҡ велосипедсылар акцияһы ваҡытында 4-се, 9-сы, 10-сы һәм 15-се трамвайҙар йөрөмәй.

Өфөлә юл йөрөү ҡиммәтерәккә төшә

18 октябрҙән ҡайһы бер маршруттарҙа хаҡ күтәрелә. Ҡала хакимиәтенән хәбәр итеүҙәренсә, 218-се һәм 257-се К автобустарында 40 һум түләргә кәрәк була. Был маршруттар хужаһы билет ҡиммәтләнеүен, яғыулыҡ-майлау материалдарына хаҡ артыуы менән аңлата. Шулай уҡ тиҙҙән 207-се автобустарҙа юл өсөн түләүҙең 40 һумға тиклем күтәрелеүе тураһында хәбәр ителде.

Башҡортостанға Төркиәнең Рәсәйҙәге ғәҙәттән тыш һәм тулы хоҡуҡлы илсеһе Мехмет Самсар килде

Эш сәфәре сиктәрендә ул Башҡортостан Башлығы Радий Хәбиров менән осрашты.
Был Мехмет Сансарҙың һуңғы эш сәфәре, ул Рәсәйҙәге 5 йыллыҡ дипломатик миссияһын тамамлай. Илсе даими ярҙамы өсөн Республика етәкселегенә рәхмәт белдерҙе. Минең тәүге командировкам да тап Өфөгә булғайны, һөҙөмтәле хеҙмәттәшлек иттек. Радий Хәбировтың башланғысы менән Истамбулда Башҡортостан вәкиллеге асылды. Ә Өфөлә Төркиәнең Почетлы консулы эш башланы, тине Мехмет Сансар.