Өфөлә сираттағы мобилизациаланыусылар төркөмө алға һыҙыҡҡа юлланды

Ике аҙна отпускынан һуң, махсус хәрби операция биләмәһенә. Өфөлә сираттағы мобилизациаланыусылар төркөмө алға һыҙыҡҡа юлланды. Алда уларҙы ике көнлөк юл көтә. Хәрбиҙәрҙе яу биләмәһенә тиклем алып барыу өсөн республика тарафынан транспорт бүленгән. Яугирҙарҙы «Өфө-арена» майҙанынан уларҙың яҡындары, дуҫтары оҙатты.

Башҡортостан «Әйҙә ҡушыл» Бөтә Рәсәй марафонында ҡатнаша

Елек мейеһе донорлығына арналған сара Улан-Удэ ҡалаһында башланып, Архангельскиҙа тамамланасаҡ. Марафонда Башҡортостандың Һаулыҡ һаҡлау министры Айрат Рәхмәтуллин да ҡатнашты. Ведомство етәксеһе Республика ҡан тапшырыу станцияһында ҡан биреп, елек мейеһе донорҙары исемлеген тулыландырҙы. Әйткәндәй, Айрат Рәхмәтуллин Башҡортостан һаулыҡ һаҡлау министрҙары араһында регистрға иң беренсе булып ингән. Үҙ миҫалында ул изге эшкә башҡаларҙы ла йәлеп итмәксе. Сөнки республикала һәм илдә елек мейеһе донорҙарына ихтыяж юғары.

«Ҡатын-ҡыҙҙың бәхет биләмәһе» асыҡ академияһы Ғафури районында

Гүзәл заттарҙың ҡоро был юлы Красноусол ауылындағы мәҙәниәт йортонда үтте. Сара төрлө быуын, милләт ҡатын-ҡыҙҙарын берләштерҙе.
Асыҡ академия фәһемле һәм мауыҡтырғыс майҙансыҡтарға бай булды. Гүзәл заттар матурлыҡ, зауыҡ серҙәре менән бүлеште, сәләмәтлеген тикшерҙе, үҙҙәрен борсоған һорауҙар буйынса белгестәр менән кәңәшләште. Биләмәлә махсус хәрби операцияла ҡатнашыусыларға ярҙам буйынса брифинг та ойошторолдо.

Башҡортостанда Дүртөйлө-Әшит юлы төҙөлөшө дауам итә

Ул М-12 федераль трассаһының бер өлөшө була. Уның аша Санкт-Петербургтан Владивостокка тиҙ йөрөшлө маршрут һуҙыла. Башҡортостан билмәһендә 56 күпер һәм юл айырсаһы төҙөлә. Әле 49 объектта эш бара, тип хәбәр итәләр Федераль юл агентлығынан. Магистралдең 140 километры Дүртөйлө, Борай, Тәтешле райондары аша үтә. Был - төҙөлөштөң беренсе этабы. Артабан, эштәр Пермь крайында һәм Свердловск өлкәһендә дауам итә.

Өфөнән махсус хәрби операция биләмәһенә сираттағы гуманитар конвой оҙатылды

Төҙөлөш ҡоралдары, квадрокоптерҙар һәм дронға ҡаршы хәрби брипастар. Өфөнән махсус хәрби операция биләмәһенә сираттағы гуманитар конвой оҙатылды. Ярҙам «Башҡортостан» мотоуҡсылар полкы хәрбиҙәренә тәғәйенләнгән. Составтағы 10 машинаға мейестәр, газ баллондары, тәгәрмәстәр һәм башҡа кәрәк-яраҡтар тупланған. Бынан тыш, республика меценаттары Башҡортостан яугирҙарына мунса, утын, еңел машина һәм броня менән ҡапланған техника ла ебәргән. Водителдәр белдереүенсә, яугирҙар төбәк етәкселегенә һәм халыҡҡа рәхмәт еткерә.

Башҡортостан Башлығы республикала Йәшмә бүлмәһе булдырылыуы хаҡында белдерҙе

Ул был турала “ГеоҺынау” халыҡ-ара чемпионаты барышында һөйләне. “Башҡортостанға килгән туристар ҡыҙыҡлы геология объекттары менән дә танышырға теләй. Беҙ йәшмә бүлмәһе тигән проект башланыҡ. Республика йәшмә ятҡылыҡтарына бай, был таштан әйберҙәр яһала. Гәрәбә бүлмәһе бөтә донъяға танылған. Беҙ ҙә уға оҡшатырға теләйбеҙ. Проектты киләһе йылда башлайбыҙ. Бүләмәләге мозаика картиналары йәшмәнән була. Евразия күсмә цивилизациялар музейында ла йәшмә күргәҙмәһе ойоштороу ниәте бар”, тине Радий Хәбиров.

Өфөлә Черниковка биҫтәһендә машиналар йөрөшө сикләнә

Ҡала хакимиәтенән хәбәр итеүҙәренсә, был "1 мең велосипедсы төнө" акцияһын менән бәйле. Бөгөн киске 9-ҙан бер тәүлеккә Машина төҙөүселәр майҙаны ябыла. Шулай уҡ иртәгә кисен велосипедсылар маршрутында хәрәкәт сикләнә. Машина төҙөүселәр, Ҡулса, Ульянов һәм Беренсе май урамдарының айырым өлөштәренән автомобилдә үтеп булмай. Шулай уҡ велосипедсылар акцияһы ваҡытында 4-се, 9-сы, 10-сы һәм 15-се трамвайҙар йөрөмәй.

Өфөлә юл йөрөү ҡиммәтерәккә төшә

18 октябрҙән ҡайһы бер маршруттарҙа хаҡ күтәрелә. Ҡала хакимиәтенән хәбәр итеүҙәренсә, 218-се һәм 257-се К автобустарында 40 һум түләргә кәрәк була. Был маршруттар хужаһы билет ҡиммәтләнеүен, яғыулыҡ-майлау материалдарына хаҡ артыуы менән аңлата. Шулай уҡ тиҙҙән 207-се автобустарҙа юл өсөн түләүҙең 40 һумға тиклем күтәрелеүе тураһында хәбәр ителде.

Башҡортостанға Төркиәнең Рәсәйҙәге ғәҙәттән тыш һәм тулы хоҡуҡлы илсеһе Мехмет Самсар килде

Эш сәфәре сиктәрендә ул Башҡортостан Башлығы Радий Хәбиров менән осрашты.
Был Мехмет Сансарҙың һуңғы эш сәфәре, ул Рәсәйҙәге 5 йыллыҡ дипломатик миссияһын тамамлай. Илсе даими ярҙамы өсөн Республика етәкселегенә рәхмәт белдерҙе. Минең тәүге командировкам да тап Өфөгә булғайны, һөҙөмтәле хеҙмәттәшлек иттек. Радий Хәбировтың башланғысы менән Истамбулда Башҡортостан вәкиллеге асылды. Ә Өфөлә Төркиәнең Почетлы консулы эш башланы, тине Мехмет Сансар.

Стәрлетамаҡ районында йәшәүсе ғаилә бер йыл эсендә хәрбиҙәргә меңдән ашыу әйбер теккән

Махсус хәрби операцияла ҡатнашҡан яҡташтарыбыҙҙы хәстәрләп. Стәрлетамаҡ районы Загородный ҡасабаһынан Гөлнур менән Радик Мөстәҡимовтар бер йыл эсендә хәрбиҙәргә меңдән ашыу әйбер - маскировка халаттары, баш һәм өҫ кейемдәре, плащ-палаткалар теккән. Был эшкә ғаилә «Үҙебеҙҙекеләргә тегәбеҙ» ирекмән төркөмө эшмәкәрлеге менән танышҡандан һуң ҡушылған.

Башҡортостан табиптары алғы һыҙыҡта яралы һалдаттарға махсус медицина ярҙамы күрһәтә

Башҡортостан медицина университеты кафедралары табиптары Пирогов исемендәге «Һәләкәт медицинаһы үҙәге» федераль бригадаһы составында һөнәри бурысын үтәй. Гиппократ антына тоғро һөнәр эйәләре Луганск халыҡ республикаһында алғы һыҙыҡта яралы һалдаттарға махсус медицина ярҙамы күрһәтә. Яҡташтарҙың яуаплы әмәлиәт барышында берҙәмлек һәм рух көсө хаҡында киләһе яҙмала.

Өфөлә Рәсәйҙең Ғәҙәттән тыш хәлдәр министрлығынан тиҫтәләп белгес тактик уҡыуҙарҙа ҡатнашты

Бәхетһеҙ осраҡ сәбәптәрен асыҡлау өсөн Өфөлә фатир яндырылды. Республика район-ҡалаларынан Рәсәйҙең Ғәҙәттән тыш хәлдәр министрлығынан тиҫтәләп белгес тактик уҡыуҙарҙа ҡатнашты. Бөгөн улар күп ҡатлы йорттағы янғын сәбәптәрен асыҡлап, утты һүндерҙе.

Бөгөн Балаҡай районы үҙәгендә заманса китапхана асыла

Модель китапхана юғары тиҙлекле интернет, “Милли электрон китапхана”ға тоташыу нөктәһе менән йыһазландырыла, фәнни һәм художестволы йөкмәткеле заманса мәғлүмәт ресурстарынан файҙаланыу, һанлаштырылған ваҡытлы матбуғат менән танышыу мөмкинлеге була. Башҡортостанда “Мәҙәниәт” милли проектына ярашлы, 15 яңы быуын китапханаһы эшләй.

Республикала ураҡ аҙағына яҡынлаша

Ауыл хужалығы министрлығынан белдереүҙәренсә, әле дөйөм майҙандарҙың 87 процентында эштәр теүәлләнгән, элеваторҙарға 2 миллион 800 мең тонна ашлыҡ оҙатылған. Стәрлетамаҡ, Ауырғазы, Ҡырмыҫҡалы, Шишмә, Дәүләкән һәм Мәләүез райондары 100 мең тоннанан ашыу уңыш йыйып алған.

Бөгөн Өфөлә “1000 велосипедсы төнө” уҙғарыла

Сараны үткәреүгә бәйле, Черниковка биҫтәһендә ҡайһы бер урамдарҙа хәрәкәт сикләнә, йәмәғәт транспорты маршруттарының схемаһы үҙгәрә. Киске сәғәт 8-ҙән унға тиклем Машина эшләүселәр, Ҡулса, Беренсе май урамдары өлөшләтә ябыла. Водителдәргә маршруттарын алдан билдәләргә кәңәш ителә, тип белдерәләр ҡала хакимиәтенән.

Өфө Бөтә Рәсәй энергетика форумын ҡабул итергә әҙерләнә

Быйыл сарала илдең 20 төбәгенән, Әрмәнстан, Беларусь, Ҡытай һәм Ҡырғыҙстандан йөҙҙән ашыу компания ҡатнашырға теләк белдергән. Пленар ултырыш “Рәсәйҙә энергетика тармағын үҫтереү” тигән исем аҫтында уҙа. Форум барышында “Урал энергетикаһы” исемле күргәҙмә ойошторола. Бөтә Рәсәй энергетика форумы Өфөнөң ВДНХ-ЭКСПО күргәҙмәләр залында 27 -29 сентябрҙә уҙа.

Башҡортостанда бензин тағы ҡиммәтләнде

Бөгөн "Башнефть" станцияларында хаҡ күтәрелгән. Дизель яғыулығының литры 60 тингә ҡиммәткә һатыла. 92-се маркалы бензинға хаҡ 30 тингә артҡан. Рәсәй хөкүмәте баҙарҙа хаҡты көйләү өсөн сит илдәргә яғыулыҡ һатыуҙы сикләне.

Башҡортостанда 10 мең ярым гектарҙа шәкәр сөгөлдөрө ҡаҙып алынған

Майҙандарҙың биштән бер өлөшөндә эш теүәлләнгән, тип хәбәр итәләр Республика ауыл хужалығы министрлығынан. Һәр гектар 300 центнер уңыш бирә.Иң яҡшы күрһәткестәр Благовар хужалыҡтарында, бында план 40 процентҡа үтәлгән.

Башҡортостанда 17 меңдән ашыу пенсионер туристик программала ҡатнашҡан

“Башҡорт оҙон ғүмерлелеге. Туризм” проекты әүҙем тормошҡа ашырыла. Эшҡыуарлыҡ һәм туризм министрлығынан белдереүҙәренсә, быйылғы план 84 процентҡа үтәлгән. Программа дауам итә. Хаҡлы ялдағылар республика буйлап бушлай сәйәхәт итә ала. Бының өсөн район йәки ҡала хакимиәттәренә мөрәжәғәт итергә кәрәк.

Башҡортостан табиптары яҡташ яугирҙәр сәләмәтлеге һағында

Республика Башлығы хакимиәте етәксеһе Максим Забелин социаль селтәрҙә яҙыуынса, медицина белгестәренең Луганскиҙа командировкаһы дауам итә. Уҙған айҙа табиптар 3 мең 400 кешене ҡабул иткән. Ошо көндәрҙә махсус бригада башҡорт батальондарының береһенә барған. Яугирҙәргә Красный Луч ҡалаһында тулы медицина тикшеренеүе ойошторорға ҡарар ителгән. “Табиптар анализдар алған һәм дауалау курсы үткәргән”, - тип яҙа Максим Забелин.

Бөгөн көйөргәҙеләр ағас ултыртты

Көйөргәҙе йәшелләнә. Бөгөн районда ағас ултыртыу буйынса өмә үтте. Иртәгә республикала ағас ултыртыу буйынса берҙәм өмә ойошторола. 7 мең төп эре ағас һәм 47 мең үҫенте ултыртыу ҡарала.