Уҡытыусыларға 2,5 минималь хеҙмәт хаҡына тиң эш хаҡы түләргә тәҡдим ителә

Дәүләт Думаһында шундай закон проекты әҙерләнә. Әле илдә минималь хеҙмәт хаҡы 16 мең 242 һумға баһалана. Йәмғиәттә педагог һөнәренең абруйын арттырыу өсөн уҡытыусыларға эш хаҡын күтәрергә кәрәк, тип белдерә документ авторҙары. Рәсәйҙә статистика мәғлүмәтенә ярашлы, уҡытыусылар айына уртаса 46 мең һум ала. Әммә ҡайһы бер төбәктәрҙә ул 25-30 мең һум ғына.

Баш ҡалала Абдулла Солтановҡа арналған хәтер кисәһе үтте

Республиканың төп концерт залында мәшһүр йырсы, Башҡортостандың халыҡ артисы Абдулла Солтановҡа арналған хәтер кисәһе үтте. Учалы районы Ҡобағош ауылынан сыҡҡан бөйөк шәхес башҡорт халыҡ йырҙарын юғары кимәлдә башҡарып, бөтә донъяла республика данын яҡланы. Урал ҡаяларынан көс алған аҡһаҡал, арҙаҡлы йыраусы 95 йәшен туйлаған булыр ине.

Максим Забелин волонтерҙарға рәхмәт белдерҙе

Йәмәғәтселектең көсөн бер урынға тупланыҡ. Миңлеғәли Шайморатов исемендәге ирекмәндәр штабы вәкилдәре шулай тип белдерҙе. Бөгөн уның ойошторолоуына бер йыл. Ошо уңайҙан "Берҙәм Рәсәй" сәйәси фирҡәһенең йәмәғәт башланғыстарын хуплау үҙәгендә эш йомғаҡтары барланды. Әүҙемлек күрһәткән ирекмәндәр бүләкләнде. -Бер йыл эсендә штаб яугирҙәр һәм уларҙың яҡындарына ярҙам күрһәткән төп йәмәғәт көсөнә әйләнде. Ирекмәндәр алғы һыҙыҡҡа ебәреү өсөн гуманитар ылау туплай. Йөктө урынына илтеп тапшыра, - тине Башҡортостан башлығы хакимиәте етәксеһе Максим Забелин.

Өфөлә Октябрь проспекты буйлап тауышһыҙ трамвай йөрөтөү ҡарала

Баш ҡала хакимиәтенән хәбәр итеүҙәренсә, транспорт мәсьәләһен хәл итеү өсөн “Ҡала электричкаһы” проекты тормошҡа ашырыла. Уға ярашлы, аэропортҡа тиклем тимер юл һуҙыла. Өфөнөң генераль планы буйынса тиҙлекле тауышһыҙ трамвай йөрөтөргә тәҡдим ителә. Ул ҡаланың төньяғын көньяҡ өлөшө менән тоташтырасаҡ.

Башҡортостан халҡы тәңкәләрҙе ҡағыҙ аҡсаға алмаштыра ала

Беҙҙең республикала 8 октябргә тиклем махсус аҙналыҡ ойошторола. Уның барышында банктарҙа тимер аҡсаны алмаштырырға була. Халыҡ ҡулаҡса һәм тәңкә менән һирәк иҫәпләшә. Акция халыҡта һаҡланған тимер аҡсаны әйләнешкә индерергә һәм тәңкә һуғыу өсөн киткән сығымды кәметеүгә йүнәлтелгән, тип хәбәр итәләр Башҡортостан Милли банкынан.

Рәсәй Хөкүмәте “Ватанды һаҡлаусылар” дәүләт фондын финанслауға 5 миллиард һум йүнәлтә

Премьер-министр Михаил Мишустин бойороҡҡа ҡул ҡуйҙы. Резерф фондтан бүленгән аҡса субсидия рәүешендә грант булараҡ төбәктәрҙәге дәүләт фонды бүлексәләренә ебәрелә. “Ватанды һаҡлаусылар” фонды махсус хәрби операцияла ҡатнашҡандар һәм уларҙың ғаиләләренә ярҙам күрһәтә. Өфөлә ойошма 1 июндән эшләй. Район һәм ҡалаларҙа социаль координаторҙар вазифаһы булдырылды.

Быйыл Башҡортостанда «Профессионалитет» федераль проекты ярҙамында яңы кластерҙар барлыҡҡа килде

Иҡтисад өсөн кәрәкле белгестәр. Быйыл Башҡортостанда «Профессионалитет» федераль проекты ярҙамында химия, тау - байыҡтырыу тармаҡтары, машиналар эшләү, клиник һәм профилактик медицина, педагогика буйынса тағы ла 7 яңы кластер барлыҡҡа килде. Улар 1 курста уҡыусы 5 мең студенты үҙ эсенә ала.

Өфөлә Шайморатов батальоны яугирҙары менән телекүпер ойошторолдо

Башҡортостан хәрби комиссариатында Шайморатов батальоны яугирҙары яҡындары менән онлайн бәйләнешкә сыҡты. Алғы һыҙыҡтағы ир-егеттәр ғаилә ағзалары менән аралашып, махсус операция биәләмәһендәге хәлдәре менән уртаҡлашты.

Өфөләге Аксаков исемендәге мәҙәниәт һәм ял паркы реконструкцияһы тамамланыу алдында

Республика көнөнә ҙур бүләк. Өфөләге Аксаков исемендәге мәҙәниәт һәм ял паркы реконструкцияһы тамамланыу алдында. Биләмәләге төҙөкләндереү эштәре «Уңайлы ҡала мөхитен булдырыу» федераль программаһы сиктәрендә бара. Шуныһы мөһим - былтыр ун йәмәғәт биләмәһе араһында тап тарихи үҙәктәге баҡсаны яңыртыу өсөн өфөләр үҙҙәре үк күпселек тауыш биргәйне.

Көйөргәҙе районында күптән көтөлгән ремонт

Көйөргәҙе районының Ермолаев ауылы халҡы оҙаҡ йылдар Тимер юл, Мичурин һәм Заслонов урамдарын төҙөкләндереүҙе һорап, социаль селтәрҙәрҙә мөрәжәғәт итә. Капиталь ремонт проекты «Башҡортостандың транспорт системаһын үҫтереү» программаһына индерелгән.

79 йылдан Герой исеме тыуған яғына шаңдау булып әйләнеп ҡайтты

Ауырғазы районы Төрөмбәт ауылынан Бөйөк Ватан һуғышында һәләк булған Ғиндәлиф Заһитовтың батырлыҡ өсөн наградаһына - Ҡыҙыл Йондоҙ орденына танытма уның берҙән-бер ҡыҙына тапшырылды. Быға яҡындарының яугиры тураһында рәсми сығанаҡтарҙа төплө өйрәнеүе булышлыҡ иткән. Бөгөн ул туғандарынан бигерәк, яҡташтары өсөн дә мөһим ваҡиға.

Бөгөн Өфөлә Бөтә Рәсәй энергетика форумы башлана

Башҡортостан күргәҙмәләр үҙәгенән хәбәр итеүҙәренсә, йөҙҙән ашыу компания экспозиция тәҡдим итергә йыйына, Ҡытай, Әрмәнстан, Беларусь һәм Ҡырғыҙстандан делегациялар килеүе көтөлә. Пленар ултырыш “Рәсәйҙә энергетика тармағын үҫтереү” тигән исем аҫтында уҙа.Форумда өс тиҫтәгә яҡын йүнәлеш буйынса фекер алышыу ойошторола. Сара барышында “Урал энергетикаһы” исемле күргәҙмә үтә.

Ағиҙел ҡалаһының үҙәк китапханаһында “Мутин уҡыуҙары” уҙҙы

Сарала Бөтә Донъя башҡорттары ҡоролтайы башҡарма комитеты ағзалары, Татарстандың Аҡтаныш районы Таҡталасыҡ ауылы делегацияһы һәм ҡала мәктәптәренән уҡыусылар ҡатнашты. Илдархан Мутин - билдәле тарихи шәхес, башҡорт хәрби шураһы рәйесе, башҡорт милли азатлыҡ хәрәкәтендә әүҙем ҡатнашҡан етәкселәрҙең береһе булған.

Башҡортостанға “Мәктәп туризмы” программаһына ярашлы өҫтәмә субсидия бүленә

Республика Хөкүмәтенән хәбәр итеүҙәренсә, федераль бюджеттан 7,5 миллион һум, төбәк ҡаҙнаһынан 3 миллион һум йүнәлтелә. Өҫтәмә субсидия ярҙамында тағы 1,5 мең уҡыусыға бушлай ял ойоштороу мөмкинлеге була. “Мәктәп туризмы” программаһын финанслау күрһәткесе буйынса Башҡортостан Мәскәү өлкәһенән ҡала икенсе урында килә. Быйыл 5-се - 9-сы класта уҡыған 39 меңдән ашыу малай һәм ҡыҙ туристик маршруттарға сыға ала.

Башҡортостанда социаль өлкәне үҫтереү стратегияһы әҙерләнә

Евразия фәнни-мәғариф үҙәге йортонда дүрт көн дауамында төрлө тармаҡ эксперттары һәм белгестәре йыйылыштары уҙҙы. Стратегик сессияла социаль өлкә сәйәсәтенә бәйле яңы идеялар һәм башланғыстар буйынса фекер алышыу булды. Документ Республика Башлығы Радий Хәбировҡа Тормош сифаты буйынса совет ултырышында тәҡдим ителә.

Бөрйәндә йылытыу миҙгеле башланған

Тәү сиратта дауахана, мәктәп һәм балалар баҡсаларына йылы бирелгән. Был турала район хакимиәте башлығы Ғәзиз Манапов хәбәр итте. Һауа температураһы 5 көн рәттән 8 градустан түбән булһа йылы бирелә.

Башҡортостанда яңы уңыштан 16 мең тонна шәкәр етештерелгән

Башҡортостанда шәкәр сөгөлдөрө дөйөм майҙандың өстән бер өлөшөндә ҡаҙып алынған. Ауыл хужалығы министрлығынан белдереүҙәренсә, 460 мең тонна татлы тамыр сығарылған, гектарынан 400 центнерға яҡын уңыш алына. Шишмә, Әлшәй, Благовар хужалыҡтарында күрһәткестәр юғары. Сеймал Раевка һәм Шишмә шәкәр заводтарына оҙатыла. Яңы уңыштан 16 мең тонна шәкәр етештерелгән.

Башҡортостанда 19 меңдән ашыу тәрбиәсе һөнәри байрамын билдәләй

Бөгөн тәрбиәселәр һәм мәктәпкәсә белем биреү ойошмалары хеҙмәткәрҙәре көнө. “Беҙгә ҙур яуаплылыҡ йөкмәтелгән. Тәрбиәле бала уҡыуҙа ла, һуңынан тормошта ла лайыҡлы урын таба”, ти хеҙмәткәрҙәр.

Башҡортостанда ялдан һуң яугирҙәрҙең тағы бер төркөмө оҙатылды

Яугирҙәрҙең ялы тамамланды. Ҡыҫҡа ялдан һуң ир-егеттәр алғы һыҙыҡҡа юлланды. Бөгөн уларҙы “Өфө- Арена” алдындағы майҙандан яҡындары һәм туғандары оҙатты.

Радий Хәбиров социаль селтәрҙәрҙә Саҡмағош районы эшҡыуары менән таныштырҙы

25 йәшлек Рамзан Әхмәтшин бер нисә бизнес-проектты тормошҡа ашырған. Өс йыл элек йәш эшҡыуар бәләкәй генә ауылда магазин аса. Ә былтыр юл буйы сервисы объектын төҙөү идеяһы менән Саҡмағош районы хакимиәтенә мөрәжәғәт итә. Рамзан Әхмәтшиндың проекты «Эшҡыуарлыҡ сәғәте»ндә тикшерелә. Йүнселгә ер участкаһы бирергә, муниципаль программа буйынса сығымдарҙың бер өлөшө ҡаплау тураһында ҡарар ҡабул ителә. Бөгөн район үҙәгендә Рамзан Әхмәтшиндың юл буйы сервисы объекты эшләй. Бизнесты артабан үҫтереү планлаштырыла.

Башҡортостанда янғын һүндереүселәр араһында иң яҡшы отделение командирын асыҡлайҙар

Һөнәри конкурс тураһында документҡа ҡул ҡуйылды. Уның менән рәсми мәғлүмәттәр порталында танышырға була. Конкурс ике этапта - муниципаль һәм республика кимәлдәрендә үтә. Еңеүселәр диплом һәм аҡсалата бүләкләнә.