Быйыл Башҡортостанда 3 мең 700 социаль контракт төҙөлгән

Улар буйынса 538 миллион һум түләнгән. Был турала Ғаилә, хеҙмәт һәм халыҡты социаль яҡлау министрлығынан хәбәр итәләр. Башҡортостанда аҙ килемле ғаиләләр, яңғыҙ йәшәүселәр, махсус хәрби операцияла ҡатнашыусыларҙың яҡындарына социаль контракт нигеҙендә адреслы ярҙам күрһәтелә. Аҡсаны тәғәйен маҡсатта ғына тотонорға мөмкин. Эшҡыуарҙар өсөн иң күбе 350 мең һум бирелә, шәхси хужалығы булған граждандарға ярҙам 200 мең һум менән сикләнә.

Махсус тәғәйенләнештәге мобиль отряд ойошторолоуға - 35 йыл

Рәсәй гвардияһының ОМОН хеҙмәткәрҙәрен һөнәри байрам уңайынан Башҡортостан Башлығы Радий Хәбиров тәбрикләне. Махсус тәғәйенләнештәге мобиль отряд йәмәғәт хәүефһеҙлеген һаҡлау, террорға һәм экстримизмға ҡаршы күп яҡлы эш алып барыусы подразделение. Байрам уңайынан хеҙмәткәрҙәргә дәүләт наградалары һәм почет грамоталары тапшырылды.

Радий Хәбиров «Башавтотранс» предприятиеһына 50 яңы автобус тапшырыу тантанаһында ҡатнашты

Республика көнө алдынан баш ҡала халҡына бүләк. Бөгөн Башҡортостан башлығы Радий Хәбиров «Башавтотранс» предприятиеһына «НефАЗ» маркалы 50 яңы автобус тапшырыу тантанаһында ҡатнашты.
Ҙур класлы транспорт саралары Инорс биҫтәһен баш ҡаланың үҙәк урамдары менән тоташтырыусы 226-сы маршрутҡа сығасаҡ. Көн һайын был маршрут менән 24 мең самаһы пассажир файҙалана.

Капиталь ремонттан һуң Стәрлетамаҡ ҡалаһындағы 30-сы мәктәп асылды

Бинаны ремонтлауға федераль һәм төбәк бюджеттарынан 117 миллион һум самаһы аҡса бүленгән. Мәктәптә ремонт эштәре быйыл мартта башланған. Ярты йыл эсендә электр үткәргестәр, вентиляция тулыһынса алмаштырылған, кластар яңыртылған, тамаша һәм спорт залы ремонтланған, яңы тәҙрәләр һәм ишектәр ҡуйылған. Компьютерҙар, ноутбуктар, интерактив панелдәр һәм таҡталар, һанлы пианино, спорт ҡорамалдары һатып алынған.

Башҡортостан бөгөн донъя кимәлендә данлыҡлы спортсыларҙы ҡабул итте

Өфөлә Башҡортостан Спорт министрлығының 100 йыллығына арналған тантаналы ултырыш үтә һәм Олимпия Советтарының Бөтә Рәсәй форумы старт алды. Тарихи сарала Республика башлығы Радий Хәбиров, Рәсәй Олимпия комитеты президенты Станислав Поздняков, Рәсәй спорт министрлығының физик культура һәм күләмле спорт департаменты директоры Максим Уразов, илдең төрлө төбәктәренән, шул иҫәптән Донецк, Луганск республикаларынан, Запорожьье, Херсон өлкәләренән делегациялар ҡатнаша.

Башҡортостан делегацияһы Мәскәүҙә «Алтын көҙ - 2023» агросәнәғәт күргәҙмәһендә эш башланы

Башҡортостан делегацияһы илдең баш ҡалаһында үткән «Алтын көҙ - 2023» агросәнәғәт күргәҙмәһендә эш башланы. Төбәктең ауыл хужалығы министрлығы, предприятиелар, кооперативтар һәм фермер хужалыҡтары вәкилдәре, муниципалитет башлыҡтарынан торған команданы Башҡортостан Хөкүмәте Премьер-министры урынбаҫары, ауыл хужалығы министры Илшат Фәзрәхманов етәкләй.

Ниязбай Сәлимов 65 йәшлек ғүмер байрамын ҡаршыланы

Йәмәғәт эшмәкәре, Ғафури районының Почетлы гражданины, Республика милли архивы директоры урынбаҫары Ниязбай Булатбай улы Сәлимов 65 йәшлек ғүмер байрамын ҡаршыланы. Мәжит Ғафуриҙың мемориаль -йорт музейында ойошторолған ижад кисәһе хаҡында тулыраҡ киләһе яҙмала.

Өфө Бөтә Рәсәй йәйәү йөрөү көнөнә ҡушылды

Спорт байрамы бөгөн "Ҡашҡаҙан" паркында ойошторола. Унда ҡатнашыусылар 2 мең 23 метрҙы атлап үтә. Шулай уҡ чемпиондар менән фитнес күнекмә була. Почетлы ҡунаҡ итеп 4 тапҡыр Олимпия чемпионы , Рәсәй олимпия комитеты әйесе Станислав Поздняков саҡырылған, тип хәбәр итәләр Республика спорт министрлығынан.

Башҡортостан фермерҙары был аҙнала ла йәрминкәгә сыға

Бөгөн һәм иртәгә ҡала һәм райондарҙа сауҙа рәттәре асыла. Халыҡҡа йәшелсә-емеш, бал һәм ит тәҡдим ителә. Баш ҡалала сауҙа Хәҡиҡәт һәм Эшсе хәбәрселәр урамында, “Тулҡын” паркында һәм Спорт һарайы алдындағы майҙанда үтә. Һатыусылар халыҡты иртәнге сәғәт 9-ҙан көндөҙгө 4-кә тиклем көтә. Йәрминкә Республика көнөндә лә ойошторола.

Беларусь республикаһында Башҡортостан әҙәбиәте көндәре үтә

Ул 10-12 октябргә тәғәйенләнгән. Минск ҡалаһында ойошторолған сараларҙа республикабыҙҙан ундан ашыу әҙип ҡатнаша. Яҙыусылар берлеге рәйесе Айгиз Баймөхәмәтов белдереүенсә, беларусь баҫмаларында Башҡортостан әҙиптәренең әҫәрҙәре донъя күрә. Беҙҙең республика журналдары белорус яҙыусыларының ижад өлгөләрен башҡорт һәм рус телдәрендә сығара. 11 октябрҙә Минск ҡалаһында Башҡортостан – Беларусь дуҫлығына бағышланған әҙәби-музыкаль кисә була.

Башҡортостан төҙөүселәре Луганск республикаһында мәҙәниәт йортон ремонтлай

Красный Луч ҡалаһындағы бина 1935 йылда төҙөлгән, 88 йыл эсендә ныҡ иҫкергән, капиталь төҙөкләндереү талап ителә. Учреждениела йыл һайын 120-нән ашыу сара уҙғарыла, бында төрлө түңәрәктәр эшләп килә.

Башҡортостан халҡын "БумБатл"ға саҡыралар

10 октябрҙән 15-енә тиклем макулатура йыйыу буйынса акция ойошторола. Тәбиғәттән файҙаланыу һәм экология министрлығынан хәбәр итеүҙәренсә, сара халыҡ иғтибарын экология проблемаларына йүнәлтеү, тәбиғәткә һаҡсыл ҡараш тәрбиәләү маҡсатында уҙғарыла. Уҙған йылда был акция барышында Башҡортостан халҡы 17 тоннаға яҡын макулатура йыйған.

Евразия фәнни-мәғариф үҙәге студент ҡаласығында Биоинжерения үҙәге асыла

Өфөлә IQ-парк бинаһында 4-се һәм 5-се ҡаттарҙа Башҡорт дәүләт медицина университеты лабораториялары урынлаша. Бында ғалимдар асыштарын ғәмәлдә һынап ҡарай ала. Аддитив технологиялар лабораторияһында протездар етештерелә. Яһалма тән ағзаһы өлөштәре яңы алымдар буйынса эшләнә. “Кеше һаулығы өсөн зыяны булмай”, - ти лаборатория инженеры Фәнир Килмөхәмәтов. Евразия фәнни-мәғариф үҙәге студент ҡаласығының IQ-паркы йыл аҙағында асылырға тейеш.

Башҡортостан егет һәм ҡыҙҙары Бөтә донъя йәштәр фестивалендә ҡатнаша ала

Форум 1 мартта Сочиҙағы “Сириус” биләмәһендә үтә. Республика Йәштәр сәйәсәте буйынса дәүләт комитеты рәйесе Яна Гайдук белдереүенсә, сараның рәсми сайтында теркәлеү башланған. Ул 4 ноябргә тиклем дауам итә. Фестивалдә Башҡортостандан 14 йәштән алып 35 йәшкә тиклемге 270 кеше ҡатнаша. Фестиваль Рәсәй Президенты Владимир Путин башланғысы менән ойошторола. Сочиға донъя илдәренән 20 меңдән ашыу кешенең килеүе көтөлә.

Башҡортостандан Донбасҡа 96-сы гуманитар ылау юлланды

Республика ирекмәндәре һәм мобилизацияланғандар өсөн ярҙамды Башҡортостандың ғәҙәттән тыш хәлдәр буйынса дәүләт комитеты, 16 муниципалитет, сик буйы ғәскәрендә хеҙмәт иткән Дыуан районы ветерандары, Өфөнөң «Иптәштәр» хәрби хәрәкәттәр ветерандары ойошмаһы тараынан тупланған. Колоннала 32 берәмек техника, 58 кеше. Йөк машиналарына 29 автомобиль, тепловизорҙар, рациялар, һыу, 300 кубометр ағас, төҙөлөш материалдары, аҙыҡ- түлек, медикаменттар һәм яугирҙарҙың яҡындарынан посылкалар тейәлгән.

Ялға ҡайтҡан яугирҙар йәнә махсус хәрби операция биләмәһенә юлланды

Ялға ҡайтҡан яугирҙар «Өфө арена» боҙ һарайы майҙаны алдынан йәнә махсус хәрби операция биләмәһенә юлланды. Ике аҙналыҡ отпусктан һуң хәрби хеҙмәткә юлланған ир-егеттәрҙе туғандары, яҡындары, дуҫтары, Башҡортостан Хөкүмәте Премьер-министры урынбаҫары Ирек Сәғитов оҙатып ҡалды. Яугирҙар махсус хәрби операцияла ҡатнашыусы хеҙмәттәштәренә шәхси посылкалар һәм хаттар ҙа алып китте.

Өфөнән һалдат әсәһе «Башҡортостан» мотоуҡсылар полкы сафына баҫҡан

46 йәшлек ханым улы һәләк булғандан һуң махсус хәрби операцияға юлланырға ҡарар итә. Бер нисә тапҡыр махсус операция биләмәһенә барырға тырышып ҡарай. Ялан кухняһы ашнаҡсыһы курсын тамамлай. Июндә Оборона министрлығы менән килешеү төҙөй. Әммә ҡатын икенсе хәрби часткә эләгә. «Башҡорт батальондары» телеграмм каналында яугир әсәһе Радий Хәбировҡа рәхмәт әйтеп, үҙен “Башҡортостан” полкына күсереүҙәрен, бөгөн үҙебеҙҙең егеттәр эргәһендә булыуын белдергән.

Луганск халыҡ республикаһында эшләүсе медицина хеҙмәткәрҙәре шәмбе өмәһенә сыҡты

Табиптар ҡулына һепертке алды. Луганск халыҡ республикаһының Красный Луч ҡалаһында эшләүсе медицина хеҙмәткәрҙәре шәмбе өмәһенә сыҡты. Бөгөн улар Башҡортостан шефлыҡҡа алған ҡаланың парктарын тәртипкә килтерҙе.

Рәсәй Оборона министрлығының мобилизация резервында торған ирҙең ғаиләһендә 10-сы бала тыуған

Өлкәненә - 19, бәләкәйҙәренә бер аҙна ғына. Рәсәй Оборона министрлығының мобилизация резервында торған ирҙең ғаиләһендә 10-сы бала тыуған. Бакбергеновтар Благовар районының Самарин ауылында йәшәй.

Өфөлә мөмкинлектәре сикләнгән балалар һәм үҫмерҙәр өсөн иң ҙур реабилитация һәм белем биреү үҙәге төҙөлә

Объект «Салют» шифаханаһы майҙансығында урынлашҡан. Комплекстың төҙөлөш барышы менән үҙенсәлекле балаларҙың ата-әсәләре лә танышты. Улар подрядсы ойошма хеҙмәткәрҙәре менән буласаҡ үҙәкте ҡарап сыҡты, объектҡа ҡарата үҙҙәренең теләктәрен һәм тәҡдимдәрен еткерҙе.

Башҡорт дәүләт ҡурсаҡ театры бөгөн кескәй тамашасыһын премьера менән һөйөндөрҙө

Сәхнәлә «Һабантуй». Башҡорт дәүләт ҡурсаҡ театры бөгөн кескәй тамашасыһын премьера менән һөйөндөрҙө. Владимир Аношкин пьесаһы буйынса ҡуйылған «Һабантуй» спектакле тураһында репортаж.