Республикала 15 октябргә тиклем башҡорт теленән олимпиада уҙа

Онлайн интеллектуаль сарала һәр кем ҡатнаша ала. Олимпиада өс кимәлдә ойошторола. Башҡорт телен өйрәнә башлағандар, иркен аралашҡандар һәм төрлө диалектарҙа һөйләшкәндәр өсөн айырым үткәрелә. Туған телдән белем һынап ҡарау өсөн олимпиада сайтында теркәлергә һәм 45 минут дауамында 30 һорауға яуап бирергә кәрәк. Проект Республика граждандар йәмғиәтенә булышлыҡ итеү фонды ярҙамында тормошҡа ашырыла.

Бөгөн Башҡортостандың дәүләт гимны һәм гербына 30 йыл

Башҡортостандың мөһим дәүләт символдары тураһында ҡанун 1993 йылдың 12 октябрендә Дәүләт Йыйылышы-Ҡоролтай тарафынан ҡабул ителә. Дәүләт гимны итеп Фәрит Иҙрисовтың "Башҡортостан" тип аталған тантаналы көйө алына. 2008 йылда гимндың һүҙҙәре лә ҡабул ителә. Авторҙары - шағир Рауил Бикбаев менән ғалим Рәшит Шәкүр. Һәр дәүләттең символдары уның тарихын һәм йолаларын, сәйәси ҡиммәттәрен һәм өҫтөнлөктәрен сағылдыра, ти Рәшит Шәкүр.
1993 йылдың 12 октябрендә Башҡортостандың дәүләт гербы ла ҡабул ителде. Уның авторы рәссам Фазлетдин Ислахов. Гербта ҡалҡып килгән ҡояш фонында милли орнаменттар менән уратып алынған Салауат Юлаевтың һәйкәле урынлашҡан. Аҫтараҡ – ҡурай тажы һәм Республиканың дәүләт флагы төҫтәренә буялған таҫма урын алған.

Бөгөн Башҡортостанда янғынға ҡаршы махсус режим ғәмәлдән сыға

Бындай ҡарар урман һәм ландшафт янғындары менән хәлдең тотороҡланыуы, янғын хәүефенең кәмеүенә бәйле ҡабул ителә, тип белдерәләр Ғәҙәттән тыш хәлдәр буйынса дәүләт комитетынан. Республикала янғынға ҡаршы махсус тәртип 15 майҙа индерелде.

Башҡортостанға “Ватандаштар” программаһы буйынса 800 кеше күсенгән

Сит илдә йәшәгән Рәсәй кешеләренә ҡайтырға ярҙам итәләр. Ғаилә, хеҙмәт һәм халыҡты социаль яҡлау министрлығынан белдереүҙәренсә, программала башлыса йәштәр ҡатнаша. Егеттәр һәм ҡыҙҙар республикала белем ала һәм эшкә ҡала. Бындай алым хеҙмәт баҙарында кадрҙар ҡытлығы мәсьәләһен хәл итергә мөмкинлек бирә, ти белгестәр.

Радий Хәбиров: "Торлаҡ төҙөлөшөн арттырыу маҡсатын ҡуябыҙ"

Башҡортостанда йорттар төҙөлөшө йылдам бара. Уҙған йылда 3 миллион квадрат метрҙан ашыу торлаҡ файҙаланыуға тапшырылған. Быйыл ҙурыраҡ маҡсат ҡуйылған, тип белдерҙе Республика Башлығы Радий Хәбиров.

Башҡортостан предприятиелары Төркиәгә спорт кейеме һата ала

Был турала Тышҡы иҡтисади бәйләнештәр һәм конгресс эшмәкәрлеге министрлығынан хәбәр итәләр. Өфөлә төрөк делегацияһы менән осрашыу булды. Улар тау саңғыһы курорттары өсөн кейем һәм ҡорамалдар менән ҡыҙыҡһына. Башҡортостан менән Төркиә араһында сауҙа үҫә бара.

Республикаға гриптан вакцинаның тағы бер партияһы килтерелде

390 мең препарат алынды. Тиҙҙән улар медицина учреждениеларына тапшырыла, тип хәбәр итәләр Һаулыҡ һаҡлау министрлығынан. Башҡортостан 1 миллион ярым вакцина алған. Бөгөнгә миллионға яҡын кеше киҙеүҙән прививка менән һаҡланған.

Башҡортостан ауыл хужалыҡтары үҙебеҙҙә етештерелгән техниканы ала

Быйыл техника яңыртыуға 9 миллиард 600 миллион һум тотонолған. Был уҙған йылдың ошо осоронан 37 процентҡа ҙур һан. Вице-премьер-Ауыл хужалығы министры Илшат Фәзрахманов белдереүенсә, 391 трактор, 200-гә яҡын комбайн, 400-ҙән ашыу ер эшкәртеү машинаһы һәм башҡа төр техника алынған.

Өфөлә элекке "Победа" кинотеатры бинаһы төҙөкләндерелә

Капиталь ремонт буйынса документтар хупланды. Мәҙәни мираҫ объекты тип танылған кинотеатр Беренсе май урамында 1949 йылда төҙөлә. Ул 630 тамашасыға иҫәпләнә. 2017 йылда бина ябыла. Киләсәктә кинотеатрҙы йәш тамашасылар өсөн театр итеп үҙгәртеү планлаштырыла.

Ейәнсура районы Таҙлар ауылында яугирҙәр иҫтәлегендә обелиск асылды

Урындағы халыҡтың тырышлығы менән Бөйөк Ватан һуғышында һәләк булған батырҙарҙың һәм еңеү яулап ҡайтҡан яҡташтарҙың исемдәре мәңгелләштерелде. “Аныҡ эштәр” проектына ярашлы обелискты төҙөкләндереүгә 300 мең һум аҡса бүленгән.

Ғафури районы Ерек ауылында йәшәүсе хеҙмәт ветераны 95 йәшлек юбилейын билдәләй

Башҡортостандың географик үҙәге - Ғафури районы Ерек ауылында йәшәүсе хеҙмәт ветераны, «Почет Билдәһе» ордены кавалеры Зөлғәнифә Әсфәндиәрова күркәм ғүмер барамын - 95 йәшлек юбилейын билдәләй. Биш бала тәрбиәләп үҫтергән алдынғы сөгөлдөрсөнөң тормош юлы хаҡында тулыраҡ видеояҙмала.

Стәрлетамаҡ районы Васильевка ауылы янында машиналар йөрөшөндә тотҡарлыҡ бар

Стәрлетамаҡ-Салауат трассаһының тимер юл менән киҫешкән урынында ремонт бара. Эштәр бөгөн һәм иртәгә иртәнге 9-ҙан киске 9-ға тиклем була. Ошоға бәйле машиналар юлдың бер генә һыҙатынан йөрөй, тип хәбәр итәләр Транспорт һәм юл хужалығы министрлығынан.

Күгәрсен районы Бикбулат ауылында спорт майҙансығы асылды

Төбәк "Айыҡ ауыл" республика конкурсында “Ҙур ауылдар” номинацияһында 1-се урын яуланы һәм 5 миллион һумлыҡ сертификат тапшырылды. “Яңы объект әүҙем тормош алып барған ауылдаштарыма ҙур бүләк булды”, ти ауылда йәшәүсе Гөлсәсәк Солтанморатова.

Рәсәй мосолмандары Үҙәк Диниә назараты рәйесе Тәлғәт Тажетдинды тыуған көнөн билдәләй

Гәүһәр юбилей. Башҡортостан БашлығыРадий Хәбиров Рәсәй мосолмандары Үҙәк Диниә назараты рәйесе Тәлғәт Тажетдинды тыуған көнө менән ҡотланы. Баш мөфтөйгә бөгөн 75 йәш. Тәлғәт Тажетдин үҙенең бар ғүмерен исламға хеҙмәт итеүгә бағышланған олуғ һәм абруйлы шәхес, ул бөгөн дә тотош илдә милләт-ара татыулыҡты, берҙәмлекте нығытыуға, йәш быуынды дингә өйрәтеүгә тос өлөш индерә.

Башҡортостандың торлаҡ-коммуналь хужалыҡ предприятиелары ҡышҡы осорға әҙерлек һыҙығында

Өфөнөң Орджоникидзе районындағы учреждениела әҙерлек эштәре 95 процентҡа теүәлләгән. Күптән түгел республика башлығы тапшырған өс берәмек техникала ҡышҡа әҙер.

Башҡортостандан контракт төҙөгән Үҙәк хәрби округ яугирҙары тыл райондарында танктарҙа әҙерлек үтә

Башҡортостандан тәүгә контракт төҙөгән Үҙәк хәрби округ яугирҙары тыл райондарында Т-90М танктарында әҙерлек үтә. Күнекмәләр махсус хәрби операция зонаһы полигондарының береһендә ойошторолған. Махсус хәрби операция биләмәһендә тәжрибә туплаған инструкторҙар етәкселегендә хәрбиҙәр танктың төп нөктәләре һәм агрегаттары, ҡорал кәрәк-ярағы һәм япма ҡорамалдары тураһында мәғлүмәт ала.

Әхмәт Дәүләтов исемендәге медицина ротаһы тотош фронтта иң яҡшы йыһазландырылған хәрби подразделение

Башҡортостан полкының Әхмәт Дәүләтов исемендәге медицина ротаһы тотош фронтта иң яҡшы йыһазландырылған, барлыҡ табиптары булған хәрби подразделение. Әле яҡташтарыбыҙ Луганск халыҡ республикаһының Рубежное ҡалаһында тора. Табиптар үҙҙәре лә ут аҫтына инеп яралыларҙы ҡотҡарыу осраҡтары ла бар.

Өфөлә йәшәүсе ханым махсус хәрби операцияла ҡатнашыусыларға бейәләйҙәр һәм йөн ойоҡбаштар бәйләй

Яугирҙарға күңел йылыһы. Өфөлә йәшәүсе Дания Гәрәйшина махсус хәрби операцияла ҡатнашыусы ир-егеттәргә бейәләйҙәр һәм йөн ойоҡбаштар бәйләй. Күҙ нурҙарын түгеп әҙерләгән ярҙамды ул алғы һыҙыҡҡа ла оҙатҡан. 9-сы тиҫтәһен ваҡлауға ҡарамаҫтан, оло йәштәге ханым изге эшен дауам итә. Әле Башҡортостанда яугирҙар өсөн йөҙөнсө гуманитар ылау туплана, хәрби операцияла ҡатнашыусылар өсөн йылы әйберҙәр, йоҡо тоҡтары, тимер мейестәр йыйыла. Күңел йылыһы менән бәйләгән әйберҙәр яугирҙәр өсөн үтә лә кәрәкле.

Башҡортостанда һирәк осраған дарыу үләндәре производство шарттарында үҫтерелеүе ихтимал

Әле белгестәр ҡиммәтле биологик актив матдәләр етештереүсе үҫемлектәрҙең төклө тамырҙарын үҫтереү менән шөғөлләнә. Өфө фән һәм технологиялар университеты лабораторияһында ҡулланылған биотехнологик ысул хаҡында репортаж.

Хәйбулла районы Аҡъяр үҙәк дауаханаһында яңы медицина ҡорамалы ҡулланыла

Һанлы маммография аппараты “Һаулыҡ һаҡлау” милли проектының беренсел медицина звеноһын яңыртыу программаһы буйынса алынған. Әлеге ваҡытта унда 900-ҙән ашыу ҡатын-ҡыҙ тикшереү үткән.

Башҡортостанда хәрби хәрәкәттәр инвалидтары өйҙә бушлай социаль хеҙмәттәр алыу хоҡуғына эйә

Дәүләт Йыйылышы- Ҡоролтай депутаттары “Граждандарҙы социаль хеҙмәтләндереү тураһында” законға үҙгәрештәр әҙерләй. Ҡанун проектында өйҙә бушлай социаль хеҙмәттәр алыусылар категорияһына хәрби хәрәкәттәр инвалидтарын индерергә тәҡдим ителә.